Ndũgateage Ihinda Rĩrĩa Rĩagĩrĩru ũrĩ Ũtungata-inĩ
Mwaka-inĩ wa ũtungata wa 2014, Aira a Jehova maahũthĩrire mathaa 1,945,487,604 ũtungata-inĩ. Ũndũ ũcio ũronania wega atĩ nĩ twĩhotorete gũkorũo na kĩyo ũtungata-inĩ wa Jehova! (Thab. 110:3; 1 Kor. 15:58) Tondũ rĩu ‘hingo nĩĩnyihĩte-rĩ,’ na githĩ tũtiagĩrĩirũo nĩ kũhũthagĩra wega mathaa marĩa tũrĩ ũtungata-inĩ nĩguo tũkinyĩre andũ aingĩ makĩria?—1 Kor. 7:29.
Nĩguo tũhote kũhũthĩra mahinda maitũ wega tũrĩ ũtungata-inĩ, no tũbatare kũgarũrĩra. Kwa ngerekano, angĩkorũo maita maingĩ nĩ ũhũthagĩra ithaa rĩmwe kana makĩria thĩinĩ wa ũtungata wa mũthemba mũna na ũgekora ndũnaaria na mũndũ o na ũmwe-rĩ, hihi no ũgarũrĩre nĩguo wone andũ a kwaria nao? Maũndũ matihanaine kũndũ guothe. O na kũrĩ ũguo, maũndũ maya no magũteithie kũhũthagĩra mahinda maku wega nĩguo wĩthemage ‘kũhũũra rũhuho.’—1 Kor. 9:26.
Kũhunjia Nyũmba-kwa-Nyũmba: Kwa ihinda rĩa mĩaka mĩingĩ, ahunjia aingĩ makoretwo makĩhunjia nyũmba kwa nyũmba rũcinĩ. O na kũrĩ ũguo, tondũ andũ aingĩ marutaga wĩra mũthenya, na githĩ ti wega kũgeria kũhunjia nyũmba kwa nyũmba mathaa ma thaa inyanya kana hwaĩ-inĩ hĩndĩ ĩrĩa andũ aingĩ marĩ mĩciĩ mahurũkĩte? Kũhunjia barabara-inĩ kana kũndũ kwa biacara mathaa-inĩ ma mũthenya no gũkorũo na moimĩrĩro mega makĩria.
Kũhunjia Kũndũ kwa Mũingĩ: Tũmetha na tũkaari twa mabuku twagĩrĩirũo nĩ kũigwo kũndũ kũrĩa andũ aingĩ mahĩtũkagĩra icigo-inĩ ciitũ cia kũhunjia. (Rora Ũtungata Witũ wa Ũthamaki wa Julaĩ 2013, kar. 5.) Handũ harĩa hatuĩtwo ha kũigaga gakaari kana kametha ka mabuku hangĩtiga kũgeragwo nĩ andũ aingĩ, Kamĩtĩ ya Ũtungata ya Kĩũngano no ĩtue itua kametha kana gakaari kau gathamĩrio handũ hangĩ harĩa hahĩtũkagĩrũo nĩ andũ aingĩ.
Gũcokera Andũ na Kwĩruta Bibilia na Andũ: Hihi no kũhoteke ũbange gũcokera andũ kana kwĩruta Bibilia na andũ mahinda-inĩ marĩa ũtungata wa mũthemba ũngĩ ũtangĩkorũo na moimĩrĩro mega? Kwa ngerekano, angĩkorũo Njuuma rũcinĩ nĩrĩo kũhunjia nyũmba kwa nyũmba gũkoragwo na moimĩrĩro mega-rĩ, na githĩ to ũbange kwĩruta Bibilia na mũndũ mathaa ma thaa inyanya kana hwaĩ-inĩ?
O na gũtuĩka tũtaraga mathaa rĩrĩa rĩothe tũrĩ ũtungata-inĩ, nĩ tũkenaga mũno rĩrĩa twagĩa na moimĩrĩro mega. Ũngĩona atĩ harĩ mathaa ũtungata mũna ũtakoragwo na moimĩrĩro mega, geria ũtungata wa mũthemba ũngĩ. Hoya Jehova, “Mwathani mwene magetha,” agũtongorie nĩguo ũhũthagĩre wega mahinda maku ũrĩ ũtungata-inĩ!—Mat. 9:38.