‘Reke Wendi wa Ngai Wĩkagwo’
1. Kĩongo gĩa kĩgomano kĩa mũthenya ũmwe kĩa mwaka wa ũtungata wa 2012 nĩ kĩrĩkũ, na nĩkĩ nĩ harĩ bata twarĩrĩrie ũndũ ũcio?
1 Twombirũo nĩ ũndũ wa kwenda kwa Jehova. (Kũg. 4:11) Kwogwo, tũtingĩhota kũhingia muoroto wa ũtũũro witũ angĩkorũo tũtikwĩruta na twĩke wendi wa Ngai. Ũcio ti ũndũ mũhũthũ ta ũrĩa tũngĩciria, tondũ tũkoragwo na mwerekera wa na thĩinĩ wa gwĩka “maũndũ marĩa mendagwo nĩ mwĩrĩ o na magecirio nĩ ngoro” kana gwĩka ‘maũndũ marĩa mendagwo nĩ andũ a ndũrĩrĩ.’ (Ef. 2:3; 1 Pet. 4:3; 2 Pet. 2:10) Tũtarĩ na ũteithio wa Ngai, o na no tũkorũo ũgwati-inĩ wa ‘kũnyitwo nĩ Mũcukani tũrĩ muoyo nĩ ũndũ wa wendi wake.’ (2 Tim. 2:26, NW) Kĩgomano giitũ kĩa mũthenya ũmwe kĩa mwaka wa ũtungata wa 2012, nĩ gĩgaateithia o mũndũ eke kũringana na ũmwe wa maũndũ marĩa matatũ Jesu aatũrutire thĩinĩ wa ihoya rĩa kĩonereria; ‘ũrĩa wendete nĩwĩkagwo.’—Mat. 6:9, 10.
2. Nĩ ciũria irĩkũ igaacokio hĩndĩ ya kĩgomano?
2 Ciũria Iria Igaacokio: Ũgĩthikĩrĩria mũtaratara ũcio-rĩ, caria macokio ma ciũria ici: Nĩ ũndũ ũrĩkũ wa bata makĩria kũrĩ kũigua Kiugo kĩa Ngai? Tũngĩthiĩ na mbere atĩa kũmenya wendi wa Ngai nĩ ũrĩkũ harĩ ithuĩ? Tũrabatara gũkorũo twĩhaarĩirie gũteithia andũ a mĩthemba yothe nĩkĩ? Tũngĩona atĩa ũtũũro mwega na tũiganĩre? Nĩ maũndũ marĩkũ Jehova abataraga kuuma kũrĩ andũ ethĩ? Nĩ ngerenwa irĩkũ ciumanaga na gwĩka wendi wa Ngai? Nĩkĩ nĩ wagĩrĩirũo gũkorũo ũrĩ ũndũ wa mĩtũkĩ gwaka na gwĩkĩra andũ arĩa angĩ ngoro?
3. Tũngĩgunĩka atĩa kuumana na kĩgomano kĩa mũthenya ũmwe?
3 Wĩrutanĩrie nĩguo ũgaathiĩ na ũthikĩrĩrie na kinyi tabarĩra ĩyo. Mwaria kuuma Betheli kana mũrori ũrĩa ũgendaga nĩ agaakorũo kuo arĩ mũgeni ũrĩa ũceerete. Mbere na thutha wa mũtaratara ũcio, ndũgetigĩre kwaria nake na mũtumia wake, angĩkorũo nĩ ahikanĩtie. Nĩguo ndũgatuĩke ‘mũndũ ũiguaga na akariganĩrũo-rĩ,’ mwainũka, no mũcokere maũndũ marĩa mũkeeruta mũrĩ famĩlĩ na mwarĩrĩrie ũrĩa mũngĩka maũndũ kũringana na wendi wa Ngai makĩria.—Jak. 1:25.
4. Nĩkĩ nĩ kwagĩrĩire tuone gwĩka wendi wa Ngai arĩguo ũndũ ũrĩa wa bata mũno?
4 Ica ikuhĩ arĩa marũmagĩrĩra merirĩria mao ene na arĩa maregaga gwĩka wendi wa Jehova nĩ makaaninwo. (1 Joh. 2:17) Kwogwo nĩ tũracokeria Jehova ngatho nĩ kũhaarĩria ũhoro wa ihinda rĩrĩa rĩagĩrĩire nĩguo ũtũteithie tuone gwĩka wendi wa Ngai arĩguo ũndũ ũrĩa wa bata mũno!
[Ciũria cia Wĩruti]