Hunjia Ũrĩ na Ũmĩrĩru Icigo-inĩ cia Biacara
1. Nĩkĩ tũtiagĩrĩirũo gũkua ngoro angĩkorũo nĩ tũiguaga guoya kũhunjia icigo-inĩ cia biacara?
1 Hihi nĩ ũiguaga guoya kũhunjia icigo-inĩ cia biacara? Angĩkorũo nĩguo-rĩ, ndũgakue ngoro, tondũ o na Paulo ũrĩa warĩ mũhunjia ũrĩ ũcamba, kũrĩ hĩndĩ abataraga ‘ũũmĩrĩru’ nĩguo ahote kũhunjia. (1 Thes. 2:2) Gĩcunjĩ-inĩ gĩkĩ tũkwarĩrĩria mamwe ma moritũ marĩa tũcemanagia namo kaingĩ na ũrĩa tũngĩmatooria.
2. Nĩkĩ tũtiagĩrĩirũo kũmaka atĩ nĩ tũkũrakaria arĩa mararuta wĩra?
2 Hihi Arĩa Mararuta Wĩra nĩ Mekũrakara Ndarũgamia Wĩra Wao? Thĩinĩ wa biacara nyingĩ aruti wĩra matungatagĩra mũingĩ na kwoguo nĩ merĩgagĩrĩra gũtinio na mĩario. Kaingĩ no makwarĩrie wega tondũ no makorũo magĩĩciria atĩ ũrĩ mũgũri. Kwĩhumba na njĩra ya gĩtĩo na gũkorũo ũrĩ mũcanjamũku na ũrĩ na ũrata, no gũtũme ũthikĩrĩrio na gĩtĩo.
3. Tũngĩĩthema atĩa kũrakaria agũri?
3 Hihi nĩ Njagĩrĩirũo Kũhunjia Rĩrĩa Agũri Marĩ Aingĩ? Kũngĩhoteka, thiĩ rĩrĩa nduka-inĩ gũtarĩ na mĩhangʼo mĩingĩ mũno, ta rĩrĩa mahingũra o ũguo. Eterera nginya hĩndĩ ĩrĩa mwene nduka arĩ wiki nĩguo ũmwarĩrie. Aria na njĩra nguhĩ mũno.
4. Tũngiuga atĩa rĩrĩa tũrahunjia biacara-inĩ?
4 Ingiuga Atĩa? Angĩkorũo kũrĩ na aruti wĩra maigana ũna, aria na mũrũgamĩrĩri. No uuge ũũ: “Ti ũndũ mũhũthũ gũkora ahũri biacara kwao mĩciĩ, nĩkĩo tũramũcerera mawĩra-inĩ manyu. Nĩ tũramenya mũrĩ wĩra-inĩ na kwoguo ngwaria na njĩra nguhĩ mũno.” Nĩguo matigecirie atĩ tũrĩ endia a indo, nĩ wega kwaga kũgweta mũbango wa mĩhothi o tiga mũndũ atũririe kũrĩa tũrutaga mbeca cia gũtwarithia wĩra witũ na mbere. Kũringana na mũthemba wa biacara, no ũrie mũrũgamĩrĩri agwĩtĩkĩrie warie na aruti a wĩra na njĩra nguhĩ. Aria nao ũhoro o ũrĩa ũkwarĩtie na mũrũgamĩrĩri. Mũruti wa wĩra angĩoneka arĩ na wĩra mũingĩ, kuhĩhia mĩario yaku na ũmũtigĩre trakti. Angĩkorũo gũtikũhoteka warie na aruti a wĩra, hihi no wĩtĩkĩrio ũtige mabuku, ngathĩti, kana indo ingĩ mangĩthoma.
5. Tũrĩ na itũmi irĩkũ cia kũhunjia tũrĩ na ũmĩrĩru icigo-inĩ cia biacara?
5 Jesu na Paulo nĩ maahunjagĩria andũ biacara-inĩ ciao marĩ na ũmĩrĩru, na o nawe no ũhote. (Mat. 4:18-21; 9:9; Atũm. 17:17) Hoya Jehova akũhe ngoro ĩrĩ na thayũ na ũkorũo na ũmĩrĩru. (Atũm. 4:29) Nĩ andũ anini mũno ũngĩkora matarĩ biacara-inĩ ciao, kwoguo-rĩ, na githĩ ti wega tũkĩgerie njĩra ĩyo ĩrĩ moimĩrĩro mega?