Ibuku Ngũrani Biũ rĩa Kũrutana Bibilia

Kũrĩ Janũarĩ 2021, Kĩama Kĩrĩa Gĩtongoragia nĩ kĩamenyithanirie kũrutwo kwa ibuku rĩerũ rĩa kũrutana Bibilia rĩa Kenera Ũtũũro Tene na Tene!a Kĩmenyithia kĩu gĩakũhutirie atĩa? Matthew kuuma Canada aaugire ũũ: “Nĩ ndakenire mũno! Na gĩkeno gĩakwa nĩ kĩongererekire rĩrĩa ndathikagĩrĩria mĩario na video iria ciataaragĩria kĩrĩa gĩatũmĩte ibuku rĩu rĩrutwo na ũrĩa rĩageretio ũtungata-inĩ. Nĩ nderiragĩria mũno kũrĩona na kwambĩrĩria kũrĩhũthĩra.”

Ibuku rĩa Kenera Ũtũũro Tene na Tene! rĩkoragwo na njĩra njerũ ya kũrutana Bibilia. O na kũrĩ ũguo, ĩyo toyo tu ngũrani gatagatĩ ka ibuku rĩrĩ rĩerũ na marĩa twahũthagĩra hau kabere. Angĩkorũo ũhũthagĩra ibuku icabe rĩa Kenera Ũtũũro Tene na Tene!, no gũkorũo nĩ wonete atĩ warĩhutia rĩ na ngũrani na macio mangĩ. Nĩguo tuone gĩtũmi, reke tũthuthurie ũhoro makĩria wĩgiĩ ũrĩa rĩthondeketwo.

Ibuku Rĩerũ Rĩthondeketwo na Njĩra Ngũrani

Maratathi maritũ. Maabataranagia nĩkĩ? Ibuku rĩa Kenera Ũtũũro Tene na Tene! rĩ na mbica makĩria ma 600 irĩ na marangi ngũrani, hakuhĩ maita ikũmi ma iria irĩ ibuku-inĩ rĩa Bibilia Ĩtũrutaga. Ibuku rĩu rĩerũ ningĩ nĩ rĩrĩ kũndũ kũingĩ gũtigĩtwo gũtarĩ ciugo kana mbica. Maũndũ macio merĩ no maumĩrie thĩna: Karatathi kangĩkorũo karĩ kahũthũ, mbica iria irĩ mwena ũcio ũngĩ wa karatathi no cioneke, o na angĩkorũo itironeka wega. Nĩguo twĩtheme ũndũ ũcio, ariũ a Ithe witũ a Rũhonge rwa Thĩ Yothe rwa Gũcaba, thĩinĩ wa Wallkill, New York, U.S.A., nĩ maathuthuririe mĩthemba ĩna ya maratathi marĩa tũrahũthĩra ihinda-inĩ rĩrĩ iganda-inĩ citũ cia gũcaba. Kamĩtĩ ya Wandĩki ya Kĩama Kĩrĩa Gĩtongoragia nĩ yathuthuririe o karatathi na ĩgĩthuura karĩa gataronania mũno mwena ũcio ũngĩ. O na gũtuĩka karatathi kau karĩ na goro na gĩcunjĩ gĩa 16 harĩ 100 gũkĩra maratathi marĩa tũhũthagĩra mabuku-inĩ macio mangĩ, arutwo a Bibilia nĩ mahotaga gũthoma ibuku rĩa Kenera Ũtũũro Tene na Tene! matekũhĩngĩcwo nĩ mbica iria irĩ mwena ũcio ũngĩ wa karatathi.

Ngothi ngũrani. Ngothi ya ibuku rĩu rĩerũ nĩ ngũrani na ya mabuku macio mangĩ tondũ ĩhumbĩrĩtwo na karatathi ka mũthemba ũngĩ ngũrani. Handũ ha kũhũthĩra mũthemba wa iratathi ũrĩa ũhũthagĩrũo kaingĩ kũhumbĩra ngothi, ibuku rĩu rĩhumbĩrĩtwo na iratathi inyoroku, rĩrĩa rĩtũmaga mbica ĩrĩa ĩrĩ ngothi-inĩ yoneke wega. Ningĩ iratathi rĩu rĩa kũhumbĩra ngothi nĩ rĩgitagĩra ibuku rĩtigathũke nĩ ũndũ wa kũhũthĩrũo mũno. O na kũrĩ ũguo, iratathi rĩu inyoroku rĩrĩ na goro maita matano gũkĩra iratathi rĩa kawainda. Kwoguo wabici cigana ũna cia rũhonge nĩ ciarutithanirie wĩra nĩguo igũre iratathi rĩtarĩ na goro mũno.

Nĩ kĩĩ gĩatũmire kũhũthĩrũo maratathi macio ma goro? Mũrũ wa Ithe witũ ũmwe ũrutaga wĩra na Rũhonge rwa Thĩ Yothe rwa Gũcaba aataarĩirie akiuga: “Tũrerĩgĩrĩra atĩ ibuku rĩrĩ nĩ rĩkũhũthĩrũo wega, kwoguo tũngĩenda rĩikare rĩrĩ ithaka o na thutha wa kũhũthĩrũo mũno.” Eduardo, ũrĩa ũrutaga wĩra Wabici-inĩ ya Ũcabi thĩinĩ wa wabici ya rũhonge ya Brazil, aaugire ũũ: “Nĩ tũkenete mũno kuona ũrĩa ithondeka rĩa Jehova rĩhũthĩrĩte indo njega gũthondeka ibuku ithaka, rĩngĩtũũra ihinda iraihu, na rĩrĩ na maratathi mega, o rĩkĩhũthagĩra mĩhothi wega.”

Gũcaba Ihinda-inĩ rĩa Mũrimũ wa COVID-19

Twaambĩrĩirie gũcaba ibuku rĩa Kenera Ũtũũro Tene na Tene! mweri-inĩ wa Machi 2021. Kwarĩ ihinda-inĩ rĩa mũrimũ wa COVID-19, kwoguo kwarĩ na moritũ maingĩ. Tondũ gũtietĩkĩrĩtio andũ gũthiĩ Betheli kuuma na nja, gũtingĩahotekire aarĩ na ariũ a Ithe witũ gũthiaga kuo o mũthenya gũteithia wĩra-inĩ wa gũcaba kana kũnyita ũgeni angĩ mathiĩ magatungate kuo. Kwoguo iganda imwe cia gũcaba itiarĩ na aruti wĩra a kũigana, na ingĩ nĩ ciahingĩtwo kwa ihinda nĩ ũndũ wa mawatho ma thirikari.

Twahotire gũtooria moritũ macio atĩa? Rĩrĩa iganda cia gũcaba ciaambĩrĩirie kũruta wĩra rĩngĩ, aarĩ na ariũ a Ithe witũ kuuma honge-inĩ ingĩ cia Betheli nĩ mooririo mateithĩrĩrie wĩra-inĩ wa gũcaba kwa ihinda. Joel, ũrĩa ũrutaga wĩra na Rũhonge rwa Thĩ Yothe rwa Gũcaba, aaugire ũũ: “Roho wao wa kwĩima na wendi wao wa kwĩruta mawĩra merũ nĩ watũmire tũhote kũruta wĩra ũrĩa wabataranagia.”

O na kũrĩ na moritũ macio, nĩ tũhotete gũcaba kobĩ milioni nyingĩ cia ibuku rĩa Kenera Ũtũũro Tene na Tene! Gũthondeka kobĩ icio kũbataraga indo nyingĩ ta, tũbaati twa gũcaba, maratathi ma kũhumbĩra ngothi, maratathi ma gũcaba, rangi, na ngamu. Mĩeri-inĩ ya mbere ĩtano kuuma rĩrĩa twaambĩrĩirie gũcaba, twahũthĩrire dola milioni 2.3 cia Amerika kũgũra indo icio tu. Nĩguo tũhonokie mbeca, tũcabaga o mabuku marĩa ciũngano irabatara.

“Nĩ Ibuku Rĩhaarĩirio Wega”

Arĩa marutanaga Bibilia hamwe na arutwo ao makoragwo na mawoni marĩkũ megiĩ ibuku rĩrĩ rĩerũ rĩa kũrutana Bibilia? Mũrũ wa Ithe witũ Paul kuuma Australia aaugire ũũ: “Nĩ ngenagĩra mũno kũhũthĩra ibuku rĩa Kenera Ũtũũro Tene na Tene! ũũ atĩ njiguaga njanjamũkĩte rĩrĩa ndĩrarutana Bibilia. Rĩbangĩtwo na njĩra njega mũno na nĩ rĩteithagia mũrutwo kwĩyaria. Ningĩ nĩ rĩkoragwo na ũhoro ũrataũkĩka wega, ciũria cia gũkinyĩra ngoro, video, mbica, mĩcoro, na maũndũ mũrutwo angĩgeria gwĩka. Nĩ ibuku rĩhaarĩirio wega na nĩ rĩndeithagia kwagagĩria ũrutani wakwa.”

Mũrutwo ũmwe wa Bibilia kuuma Amerika (US) aaugire ũũ: “Nĩ nyendete ibuku rĩrĩ rĩerũ mũno. Mbica ciarĩo nĩ indeithagia gũtaũkĩrũo nĩ maũndũ marĩa manene. Video nĩ ihutagia ngoro yakwa na ikanjĩkĩra ngoro kuoya ikinya. Mũrutwo ũcio athomaga maita merĩ harĩ kiumia na nĩ athiaga mĩcemanio ya kĩũngano.

Kobĩ milioni nyingĩ cia ibuku rĩa Kenera Ũtũũro Tene na Tene! nĩ irabatara gũcabwo na thiomi nyingĩ. Gũkinyĩria rĩu, Kĩama Kĩrĩa Gĩtongoragia nĩ gĩtĩkĩrĩtie ibuku rĩu rĩcabwo na thiomi 710, thiomi 340 makĩria ma iria cietĩkĩrĩtio harĩ ibuku rĩa Bibilia Ĩtũrutaga.

Tũrutaga kũ mbeca cia gũcaba? Harĩ mĩhothi ya wĩra wa thĩ yothe, ĩrĩa kaingĩ ĩrutagwo kũgerera donate.jw.org. Nĩ ngatho nĩ ũndũ wa mĩhothi ĩrĩa ũrutaga ũrĩ na ũtaana, ĩrĩa ĩtũteithagia kũhaarĩria indo cia kũrutana Bibilia nĩ ũndũ wa arĩa mangĩenda kwĩruta ũhoro wĩgiĩ Jehova na ‘gũkenera ũtũũro tene na tene.’—Thaburi 22:26.