Kũhaarĩria Mĩario ya Kĩũngano

TABARĨRA ya Cukuru ya Ũtungata wa Gĩtheokrasi ĩrongoreirio kũguna kĩũngano gĩothe. Ningĩ nĩ kũheanagwo ũhoro wa bata mĩcemanio-inĩ ĩngĩ ya kĩũngano, igomano-inĩ na irũrũngano-inĩ. Ũngĩkorũo ũheetwo mĩario tabarĩra-inĩ ĩmwe ya icio, menya atĩ nĩ ũndũ mũritũ wĩhokeirũo. Mũtũmwo Paulo eerire Timotheo mũrori Mũkristiano amenyagĩrĩre ũrutani wake. (1 Tim. 4:16) Arĩa mokaga mĩcemanio-inĩ ya Gĩkristiano mahũthagĩra mahinda mao ma bata mũno, na amwe merutanagĩria mũno nĩguo makorũo kuo marutwo maũndũ megiĩ ũkuruhanu wao na Ngai. Kũheana ũrutani ta ũcio nĩ mweke wa mwanya mũno! Ũngĩhota atĩa kũrutana wega?

Matemo ma Ũthomi wa Bibilia

Gĩcunjĩ gĩkĩ gĩa cukuru kĩĩhocetie harĩ ũthomi wa Bibilia wa o kiumia. Kĩrĩa kĩagĩrĩirũo gũtĩtĩrithio nĩ ũrĩa ũhoro ũcio ũratũhutia ũmũthĩ. O ta ũrĩa Nehemia 8:8 yugĩte, Ezara ũrĩa mũthĩnjĩri Ngai hamwe na Alawii maathomeire andũ Kiugo kĩa Ngai, magĩgĩtaarĩria, ‘magĩgĩtaũranĩra,’ na magĩteithia andũ mataũkĩrũo. Kũrutana gĩcunjĩ kĩa matemo ma Bibilia gũkũheaga mweke wa gwĩka ũguo o nawe.

Wagĩrĩirũo kũhaarĩria gĩcunjĩ kĩu atĩa? Kũngĩhoteka kiumia kĩmwe mbere kana makĩria, thoma gĩcunjĩ kĩa Bibilia kĩrĩa ũheetwo. Ũcoke wĩcirie ũhoro wa kĩũngano kĩanyu na mabataro ma kĩo. Hoya igũrũ rĩgiĩ ũndũ ũcio. Hihi nĩ ũtaaro ũrĩkũ, nĩ ngerekano irĩkũ, nĩ maũndũ marĩkũ gĩcunjĩ-inĩ gĩkĩ gĩa Kiugo kĩa Ngai marahingia mabataro macio?

Ũthuthuria nĩ wa bata. Hihi nĩ kũrĩ Watchtower Library thĩinĩ wa CD-ROM kana Fahirisi ya rũthiomi ũngĩtaũkĩrũo nĩruo? Angĩkorũo nĩ kũrĩ, cihũthĩre biũ. Ũngĩthuthuria maũndũ marĩa macabĩtwo megiĩ mĩhari ĩrĩa ũthuurĩte kwarĩrĩria, no wone maũndũ marĩ na ũrutani mwega, mataarĩirie kũhinga kwa morathi, ũrĩa mĩhari ĩmwe ĩguũragia ũhoro-inĩ wĩgiĩ Jehova, kana kwarĩrĩrio kwa motaaro ma Kĩĩmandĩko. Ndũgakorũo na ũhoro mũingĩ mũno. Thuura o mĩhari mĩnyinyi tu. Kaba gũkorũo na mĩhari mĩnyinyi na ũmĩthathaũre wega.

Ningĩ gĩcunjĩ gĩaku kĩahota gũkorũo kĩhutĩtie kũũria athikĩrĩria magwete ũrĩa magunĩkĩte nĩ ũthomi wa Bibilia wa kiumia kĩu. Marerutire maũndũ marĩkũ mekũmateithia wĩruti-inĩ wao wa mũndũ kĩũmbe na wa famĩlĩ, kana ũtungata-inĩ kana mũtũũrĩre-inĩ wao? Nĩ ngumo irĩkũ cia Jehova cionekire rĩrĩa aahiũranagia na andũ na ndũrĩrĩ? Nĩ maũndũ marĩkũ athikĩrĩria marerutire marongerera wĩtĩkio wao hinya na marongerera wendo wao harĩ Jehova? Ndũgatindĩrĩre maũndũ matarĩ ma o mũhaka. Tĩtĩrithia ũrĩa maũndũ marĩa ũthuurĩte moigĩte na ũrĩa mangĩhũthĩrũo ũtũũro-inĩ.

Mĩario Kuuma Mabuku-inĩ Maitũ

Mĩario ĩyo ĩkoragwo yumĩte ũhoro-inĩ mũcabe ta gĩcunjĩ thĩinĩ wa Mũrangĩri kana Amkeni! kana hihi gĩcunjĩ kĩna thĩinĩ wa ibuku. Maita maingĩ hakoragwo na ũhoro mũingĩ makĩria gũkĩra mahinda marĩa maheanĩtwo. Wagĩrĩirũo kũruta mĩario ĩyo atĩa? Ũrĩ mũrutani, ndwagĩrĩirũo kũmĩruta nĩguo tu warĩrĩrie ũhoro wothe ũrĩa ũheetwo. No mũhaka mũrori akorũo arĩ mũndũ “ũũĩ kũrutana maũndũ.”—1 Tim. 3:2.

Ũkĩambĩrĩria kũhaarĩria, amba ũthome ũhoro ũrĩa ũheetwo. Thoma maandĩko macio. Wĩcũranie. Geria mũno gwĩka ũguo tene mbere ya tarĩki cia mĩario yaku. Ririkana atĩ aarĩ na ariũ a Ithe witũ nĩ mekagĩrũo ngoro mathome ũhoro kuuma ibuku-inĩ rĩrĩa mĩario ĩyo ĩrutĩtwo. Itemi rĩaku ti kũheana ũhoro ũcio na njĩra ya matemo kana kũũkuhĩhia, ĩndĩ nĩ kuonania ũrĩa ũngĩhũthĩrũo. Hũthĩra tũcunjĩ tũrĩa twagĩrĩire twa ũhoro ũcio na njĩra kũna ĩkũguna kĩũngano.

O ta ũrĩa o mwana akoragwo na ũmũndũ wake, noguo o kĩũngano gĩkoragwo na maũndũ ngũrani. Mũciari ũrutanaga wega ndatindaga akĩinĩra mwana wake ta rwĩmbo mawatho megiĩ mĩtugo. Amũteithagia one bata wa watho mũna. Nĩ aririkanaga ũmũndũ na mathĩna marĩa mwana wake ageragĩra. Ũndũ ũmwe na ũcio, arutani kĩũngano-inĩ merutanagĩria kũmenya wega mabataro ma athikĩrĩria. O na kũrĩ ũguo, mwarimũ ũrĩ na ũtaũku nĩ ethemaga kũhũthĩra ngerekano cingĩconora mũndũ mũna thĩinĩ wa athikĩrĩria. Nĩ onanagia irathimo iria athikĩrĩria marakenera nĩ ũndũ wa kũrũmĩrĩra njĩra cia Jehova, na akaruta ũtaaro wa Kĩĩmandĩko ũrĩa ũgũteithia kĩũngano kĩhiũranie wega na mathĩna marĩa kĩracemania namo.

Ũrutani mwega nĩ ũhutagia ngoro cia athikĩrĩria. Ũndũ ũcio ndũbataraga o kũgweta ũhoro mũna wa ma ĩndĩ nĩ hamwe na kuonania bata wa ma ĩyo. Mũndũ abataraga kũrũmbũiya biũ arĩa araruta. Arĩithi a kĩĩroho nĩ magĩrĩirũo nĩ kũmenya rũũru. Mangĩririkana na wendo mathĩna marĩa andũ ngũrani maragerera, nĩ marĩhotaga kũruta mĩario na njĩra ya gwĩkĩra ngoro, makonania ũtaũku, tha, na ũcayanĩri.

O ta ũrĩa arutani ega moĩ, mĩario no mũhaka ĩkorũo na muoroto mũna. Mĩario yagĩrĩirũo kũrutwo na njĩra ĩgũtũma maũndũ marĩa ma bata makĩria moimĩre wega na maririkanagwo. Athikĩrĩria nĩ magĩrĩirũo kwĩruta maũndũ mangĩmateithia ũtũũro-inĩ wao.

Mũcemanio wa Ũtungata

Nĩ ngũrani hanini angĩkorũo ũkũruta mĩario thĩinĩ wa Ũtungata Witũ wa Ũthamaki. Handũ ha gwĩthuurĩra kĩrĩa ũrona kĩagĩrĩire, kaingĩ ũkoragwo ũheetwo ũhoro wothe ũrĩa ũkwarĩrĩria na athikĩrĩria. Teithia athikĩrĩria mone ihooto cia kĩĩmaandĩko ciĩgiĩ ũtaaro o wothe ũrĩa ũheanĩtwo. (Tit. 1:9) Maita maingĩ mahinda makoragwo marĩ manyinyi ũndũ ũtekũbatara kuongerera ũhoro.

O na kũrĩ ũguo, no wĩrwo ũrute mĩario ũkĩhũthĩra ũhoro ũtarĩ thĩinĩ wa Ũtungata Witũ wa Ũthamaki. No wĩrwo ũrute ũhoro gĩcunjĩ-inĩ kĩna kĩa Mũrangĩri, kana ũheo o tũmatemo tũnyinyi. Nĩ wĩra waku ũrĩ mwarimũ gwĩciria ũhoro wa mabataro ma kĩũngano kũringana na ũhoro ũrĩa ũheetwo. No ũbatare kũhũthĩra ngerekano nguhĩ, kana ũheane ũndũ wonetwo ũrĩa ũkonainie na ũhoro ũcio. Ririkana atĩ itemi rĩaku to kũheana ũhoro ũcio ĩndĩ nĩ kũũheana na njĩra ĩgũteithia andũ kĩũngano-inĩ mahingie wĩra ũrĩa Kiugo kĩa Ngai kiugĩte na makenere gwĩka ũguo.—Atũm. 20:20, 21.

Ũkĩhaarĩria gĩcunjĩ gĩaku, wĩcirie maũndũ ma arĩa marĩ thĩinĩ wa kĩũngano. Magathĩrĩrie nĩ ũndũ wa maũndũ marĩa marahota kũhingia. Mangĩhũthĩra maũndũ marĩa marĩ ũhoro-inĩ ũcio-rĩ, moimĩrĩro na gĩkeno kĩao ũtungata-inĩ cingĩongerereka atĩa?

Hihi gĩcunjĩ gĩaku kĩrĩ na kĩonereria kana kũhoyanwo ũhoro? Angĩkorũo nĩ kĩrĩ-rĩ, wagĩrĩirũo kũbanga o tene. No wone arĩ ũhũthũ kwĩra mũndũ ũngĩ akũbangĩre, ĩndĩ ti hingo ciothe ũndũ ũcio ũkoragwo na moimĩrĩro marĩa mega biũ. Kũngĩhoteka, rora kĩonereria kĩu kana ũhoe mũndũ ũcio ũhoro mbere ya mũthenya wa mĩcemanio. Tigĩrĩra atĩ maũndũ macio kũna nĩ maratwarana na ũrutani ũrĩa ũrongoreirio.

Igomano na Irũrũngano

Ariũ a Ithe witũ arĩa makũragia ngumo njega cia kĩĩroho na magatuĩka arutani na aria ega mbere ya andũ, thutha wa ihinda no maheo mĩario tabarĩra-inĩ ya kĩgomano kana kĩrũrũngano. Macio nĩ mahinda ma mwanya ma gĩthomo gĩa gĩtheokrasi. No maheo mĩario ya gũthoma, matemo, drama ya Bibilia ĩronania ũrĩa ũhoro ũcio ũngĩhũthĩrũo mahinda-inĩ maitũ, kana kĩbungo kĩrĩ na ũtongoria mũna. Ũngĩkorũo na mweke tabarĩra-inĩ ta ĩyo, thoma wega ũhoro ũrĩa ũheetwo. Ũhaarĩrie nginya ũtaũkĩrũo nĩguo biũ.

Arĩa maheetwo mĩario ya gũthoma magĩrĩirũo kũmĩthoma kiugo gwa kiugo. Matiagĩrĩirũo kũgarũra ciugo kana kũbangũra ũhoro ũcio. Magĩrĩirũo kũmĩthoma nĩguo mataũkĩrũo biũ nĩ maũndũ marĩa ma bata makĩria na ũrĩa maũndũ macio matĩtĩrithĩtio. Magĩrĩirũo nĩ kwĩmenyeria gũthoma na kayũ nginya mahote kũruta mĩario ĩyo kuuma ngoro-inĩ, na njĩra ya gũtĩtĩrithia ũrĩa kwagĩrĩire, ya ũcanjamũku, ya mĩtũkĩ, ya kũiguithia, o hamwe na mũgambo ũrĩa wagĩrĩire athikĩrĩria aingĩ.

Ariũ a Ithe witũ arĩa maheagwo matemo ma mĩario magĩrĩirũo nĩ kũhaarĩria ũhoro wao makĩrũmĩrĩra biũ matemo macio. Handũ ha gũthoma matemo macio hĩndĩ ya kũruta mĩario kana kũmĩhaarĩria ta mĩario ya gũthoma, mwaria agĩrĩirũo nĩ kũruta kuuma ngoro, atekũrora mũno maratathi. Harĩ bata kũrũmĩrĩra mahinda marĩa ũheetwo matemo-inĩ nĩguo warĩrĩrie wega maũndũ ma bata makĩria marĩa mothe monanĩtio. Mwaria agĩrĩirũo nĩ kũhũthĩra biũ ũhoro na maandĩko marĩa marĩ rungu rwa maũndũ marĩa ma bata makĩria. Ndagĩrĩirũo kuongerera maũndũ make, eherie marĩa marĩ matemo-inĩ. Ma nĩ atĩ, mũthingi wa mĩario ĩyo nĩ Kiugo kĩa Ngai. Wĩra wa athuri a kĩũngano nĩ ‘kũhunjia ũhoro wa Ngai.’ (2 Tim. 4:1, 2) Nĩ ũndũ ũcio mwaria agĩrĩirũo gũtĩtĩrithia maandĩko marĩa marĩ thĩinĩ wa matemo, aheane ihooto ciumĩte thĩinĩ wamo, na onanie ũrĩa mangĩhũthĩrũo.

Ndũkahũthĩrĩrie

Hihi ũkoragwo kĩũngano-inĩ kĩrĩ na mĩeke mĩingĩ ya kũruta mĩario? Ũngĩhota atĩa kũmĩruta yothe na njĩra ĩrĩa yagĩrĩire? Wĩtheme kũhaaragĩria icunjĩ ciaku ndagĩka ya mũico.

Mĩario ya kũguna kĩũngano biũ ĩbataraga kũhaarĩrio wega mbere. Kwoguo, wĩmenyerie gũthomaga ũhoro narua waheo o gĩcunjĩ o gĩcunjĩ. Ũndũ ũcio ũrĩgũteithagia gwĩcũrania ũhoro ũcio rĩrĩa ũrĩ mĩhangʼo-inĩ ĩngĩ. Mĩthenya kana ciumia cigana ũna ũtanaruta mĩario yaku, no ũigue maũndũ mangĩgũteithia kuona ũrĩa ũngĩhũthĩra wega ũhoro ũcio. No kuumĩre maũndũ maronania atĩ mĩario ĩyo nĩ ya ihinda rĩrĩa rĩagĩrĩire. Gũthoma na gwĩciria ũhoro wa gĩcunjĩ gĩaku o narua waheo nĩ kuoyaga mahinda, ĩndĩ kũu nĩ kũhũthĩra mahinda na njĩra njega. Hĩndĩ ĩrĩa ũkaambĩrĩria kũhaarĩria, nĩ ũkona irathimo cia gũkorũo wĩcirĩtie ũhoro ũcio wega mbere. Kũhaarĩria mĩario ũguo nĩ gũkũnyihia mĩtangĩko na njĩra nene na nĩ gũgũgũteithia ũheane ũhoro na njĩra njega na ĩgũkinyĩra ngoro cia andũ kĩũngano-inĩ.

O ũrĩa ũratĩĩa kĩheo kĩrĩa ũheetwo gĩkonainie na mũbango wa Jehova wa kũruta andũ ake, nĩ ũrĩmũtĩithagia na nĩ ũrĩkoragwo ũrĩ kĩrathimo harĩ arĩa mamwendete.—Isa. 54:13; Rom. 12:6-8.