Gũtĩtĩrithia Maũndũ Marĩa ma Bata

MŨTHOMI mwega ndaroraga o mũhari ũrĩa arathoma, aikagia maitho nginya mbere ya kĩbungo kĩrĩa mũhari ũcio ũrĩ. Agĩthoma, nĩ aririkanaga maũndũ marĩa ma bata ũhoro-inĩ wothe ũrĩa arathoma. Ũndũ ũcio ũmũteithagia kũmenya kũrĩa egũtĩtĩrithia.

Angĩaga kũrũmĩrĩra njĩra ĩyo, maũndũ marĩa ma bata thĩinĩ wa mĩario matingĩmenyeka. Gũtirĩ ũndũ ũngĩĩyumĩria wega. Arĩkia kũheana mĩario, no ũkorũo ũrĩ ũndũ mũritũ harĩ athikĩrĩria kũririkana nĩ ũndũ ũrĩkũ uuma wa bata.

Gũtĩtĩrithia maũndũ marĩa ma bata ũrĩa kwagĩrĩire, kaingĩ nĩ gũteithagia mũno kwagĩria ũthomi wa rũgano rũna kuuma Bibilia-inĩ. Gwĩka ũguo no kwagĩrie mũno ũthomi wa ibungo ũkĩruta mũndũ Bibilia kana hĩndĩ ya mũcemanio wa kĩũngano. Na nĩ kwa bata makĩria rĩrĩa mũndũ araheana mĩario ya gũthoma, ta ũrĩa rĩmwe na rĩmwe gwĩkagwo irũrũngano-inĩ.

Ũrĩa Ũngĩka Ũguo. Thĩinĩ wa cukuru ĩno, no ũheo mĩario ya gũthoma gĩcunjĩ kĩa Bibilia. Nĩ maũndũ marĩkũ wagĩrĩirũo gũtĩtĩrithia? Angĩkorũo nĩ harĩ na ũndũ mũna mũnene kana ũndũ wa bata ũhoro-inĩ ũrĩa ũgũkorũo ũgĩthoma, nĩ wega kũũtĩtĩrithia.

O na angĩkorũo gĩcunjĩ kĩrĩa ũrathoma nĩ ta irebeta, thimo kana rũgano, athikĩrĩria aku mekũgunĩka wathoma wega. (2 Tim. 3:16, 17) Nĩguo ũhote gwĩka ũguo no mũhaka wĩcirie igũrũ rĩgiĩ ũhoro ũrĩa ũgũthoma o hamwe na athikĩrĩria aku.

Angĩkorũo ũgũthoma na kayũ kuuma ibuku-inĩ ũkĩruta mũndũ Bibilia kana mũcemanio-inĩ wa kĩũngano, ũkũbatara gũtĩtĩrithia maũndũ marĩkũ ma bata? Tĩtĩrithia macokio ma ciũria iria icabĩtwo marĩ maũndũ marĩa ma bata. Ningĩ tĩtĩrithia maũndũ marĩa makonainie na kĩongo kĩnini kĩrĩa kĩandĩke na ndemwa mata, marĩa marĩ rungu rwakĩo.

Ti wega mũndũ gũcenjia mĩario ĩrĩa ĩheanagwo kĩũngano-inĩ amĩtue ya gũthoma. O na kũrĩ ũguo, nĩ kũrĩ hĩndĩ gũkoragwo na mĩario ĩmwe ya gũthoma irũrũngano-inĩ nĩguo maũndũ marutanwo thĩinĩ wa irũrũngano ciothe na njĩra ĩhaanaine. Mĩario-inĩ ta ĩyo, nĩguo mwaria ahote gũtĩtĩrithia maũndũ marĩa ma bata no mũhaka ambe athathaũranie wega ũhoro ũcio. Maũndũ marĩa ma bata nĩ marĩkũ? Nĩ arabatara kũmamenya. Maũndũ marĩa ma bata ti marĩa araigua makĩmũgucĩrĩria. Nĩ maũndũ ma mũthingi marĩa ũhoro ũcio wakĩtwo igũrũ rĩamo. Rĩmwe kohoro gakuhĩ kegiĩ ũndũ ũrĩa wa bata thĩinĩ wa mĩario ya gũthoma nĩko gakoragwo mbere ya ndeto ĩngĩ. Kaingĩ ũndũ wa bata ũgwetagwo thutha wa maũndũ marĩa maraũnyita mbaru kwarĩrĩrio. Mwaria ataũkĩrũo nĩ maũndũ marĩa ma bata mĩario-inĩ yake ya gũthoma, abatiĩ kũmakururĩra. Kaingĩ maũndũ macio makoragwo marĩ mana kana matano. Acoke emenyerie gũthoma ũndũ athikĩrĩria mekũnyita maũndũ macio na njĩra hũthũ. Maũndũ macio nĩmo gatũũrũ ka mĩario ĩyo. Mwaria angĩruta mĩario agĩtĩtĩrithagia maũndũ marĩa magĩrĩire, no kũhoteke maũndũ macio maririkanagwo. Ũcio nĩguo wagĩrĩirũo gũkorũo ũrĩ muoroto wa mwaria.

Nĩ kũrĩ njĩra itiganĩte mwaria angĩhũthĩra gũtĩtĩrithia kũrĩa kũrabatarania nĩguo ateithie athikĩrĩria manyite maũndũ marĩa ma bata. No ongerere ũcanjamũku, acenjie mũthiĩre wake wa gũthoma, athome arikĩirie biũ kuuma ngoro-inĩ, ahũthĩre ciĩga cia mwĩrĩ ũrĩa kwagĩrĩire, kana maũndũ mangĩ.