Gũcokera Nĩguo Ũtĩtĩrithie

GŨCOKERA nĩ njĩra ĩmwe ya ũrutani mwega. Ũndũ wa bata ũngĩgwetwo makĩria ma riita rĩmwe, no kũhoteke athikĩrĩria maũririkane makĩria. O na no mataũkĩrũo nĩ ũndũ ũcio wega makĩria ũngĩcokerũo na njĩra ngũrani hanini.

Athikĩrĩria aku mangĩaga kũririkana ũrĩa ũrameera, ciugo ciaku itingĩhutia mũtũũrĩre wao kana ũrĩa metĩkĩtie. No kũhoteke mathiĩ na mbere gwĩciria ũhoro wa maũndũ marĩa ũgũtĩtĩrithagia makĩria.

Jehova, Mũrutani witũ Mũnene, nĩ atũigĩire kĩonereria harĩ kũhũthĩra njĩra ya gũcokera. Nĩ aaheire rũrĩrĩ rwa Isiraeli Maathani marĩa Ikũmi. Nĩ aamenyithirie rũrĩrĩ rũu maathani macio kũgerera mũraika Kĩrĩma-inĩ gĩa Sinai. Thutha-inĩ akĩnengera Musa maathani macio marĩ mandĩke. (Tham. 20:1-17; 31:18; Gũcok. 5:22) Akĩrũmĩrĩra ũtongoria wa Jehova, Musa nĩ aacokereire rũrĩrĩ rũu maathani macio rũtanaingĩra Bũrũri wa Kĩĩranĩro, na kũgerera roho mũtheru, Musa akĩmaandĩka, ta ũrĩa marĩ thĩinĩ wa Gũcokerithia Maathani 5:6-21. Rĩmwe rĩa maathani marĩa Aisiraeli maahetwo rĩarĩ mendage na matungatagĩre Jehova na ngoro yao yothe, muoyo, na hinya wao wothe. Rĩathani rĩu narĩo nĩ rĩacokerirũo rĩngĩ na rĩngĩ. (Gũcok. 6:5; 10:12; 11:13; 30:6) Nĩkĩ? Tondũ o ta ũrĩa Jesu oigire, nĩrĩo rĩarĩ “rĩathani rĩrĩa inene, na rĩa mbere.” (Mat. 22:34-38) Kũgerera mũnabii Jeremia, Jehova nĩ aaririkanirie andũ a Juda makĩria ma maita 20 ũritũ wa kũmwathĩkĩra maũndũ-inĩ mothe marĩa aamathĩte. (Jer. 7:23; 11:4; 12:17; 19:15) Na kũgerera Ezekieli, Ngai oigire makĩria ma maita 60 atĩ ndũrĩrĩ “nĩikamenya atĩ niĩ nĩ niĩ Jehova.”—Ezek. 6:10; 38:23.

Ningĩ maũndũ-inĩ marĩa mandĩke megiĩ ũtungata wa Jesu, njĩra ya gũcokera nĩ ĩhũthĩrĩtwo wega. Kwa ngerekano, thĩinĩ wa Injiri iria inya—o Injiri nĩ yarĩrĩirie maũndũ ma bata marĩa mandĩkĩtwo thĩinĩ wa Injiri ĩmwe kana icio ingĩ ĩndĩ makandĩkwo na njĩra itiganĩte hanini. Jesu akĩrutana, nĩ aaragĩrĩria ũrutani mũna mahinda ngũrani, ĩndĩ akahũthĩra njĩra itiganĩte. (Mar. 9:34-37; 10:35-45; Joh. 13:2-17) Kĩrĩma-inĩ kĩa Mĩtamaiyũ matukũ manyinyi mbere ya gĩkuũ gĩake, Jesu nĩ aahũthĩrire njĩra ya gũcokera agĩtĩtĩrithia ũtaaro ũyũ wa bata: “Wĩhũgagei, nĩ gũkorũo mũtiũĩ mũthenya ũrĩa Mwathani wanyu agoka.”—Mat. 24:42; 25:13.

Ũtungata-inĩ. Rĩrĩa ũrahunjia, nĩ ũkoragwo na mwĩhoko atĩ andũ nĩ mekũririkana ũrĩa ũroiga. Kũhũthĩra wega njĩra ya gũcokera no gũgũteithie gũkinyĩra muoroto ũcio.

Kaingĩ, gũikara ũgĩcokagĩra ũndũ rĩrĩa ũrawarĩrĩria gũteithagia ũndũ ũcio ũingĩre biũ meciria-inĩ ma mũndũ. Nĩ ũndũ ũcio, thutha wa gũthoma rĩandĩko, no ũrĩtĩtĩrithie na njĩra ya gũcokera kohoro ka rĩo karĩa getainwo na kĩrĩa ũrarĩrĩria na ũũrie, “Hihi nĩ wona ũrĩa ciugo icio ihũthĩrĩtwo rĩandĩko-inĩ rĩu?”

Ningĩ ciugo cia gũtiriha thĩinĩ wa ndeereti no ihũthĩrũo na njĩra njega. Kwa ngerekano, no uuge: “Ũndũ ũrĩa mũnene ingĩenda ũririkane kuumana na ndeereti itũ nĩ . . .” Cokera ũndũ ũcio na njĩra nguhĩ. No uuge ũndũ ta ũyũ: “Muoroto wa Ngai nĩ thĩ ĩtuĩke paradiso. Muoroto ũcio no mũhaka ũkaahinga.” Kana uuge: “Bibilia ĩronania cara-rũkũ atĩ tũratũũra matukũ-inĩ ma mũico ma mũtabarĩre ũyũ wa maũndũ. Nĩguo tũkaahonoka mũthia waguo, tũkũbatara kwĩruta ũrĩa Ngai endaga twĩke.” Kana no uuge: “O ta ũrĩa tuona, Bibilia nĩ ĩheanĩte ũtaaro mwega wĩgiĩ ũrĩa tũngĩhiũrania na mathĩna ma mũtũũrĩre wa famĩlĩ.” Rĩmwe na rĩmwe no ũgwete ĩmwe kwa ĩmwe rĩandĩko rĩna ta ũrĩa rĩandĩkĩtwo Bibilia-inĩ rĩrĩ guo ũndũ wa kũririkanwo. Ma nĩ atĩ, nĩguo mũndũ agĩe na moimĩrĩro mega ũndũ-inĩ ũcio ekũbatara gũkorũo ecirĩtie kabere.

Ũgĩcokera na ũkĩruta andũ Bibilia, no ũhũthĩre ciũria cia kwĩririkania irĩ njĩra ya gũcokera.

Ũngĩona mũndũ nĩ araritũhĩrũo nĩ gũtaũkĩrũo kana kũhũthĩra ũtaaro wa Bibilia, no ũbatare gũcokera ũhoro ũcio mahinda maigana ũna matiganĩte. Geria kũwarĩrĩria na njĩra mwanya mwanya. To mũhaka ndeereti ĩgiĩ ũndũ ũcio ĩkorũo ĩrĩ ndaya ĩndĩ yagĩrĩirũo gwĩkĩra mũrutwo ngoro aikare agĩciragia ũndũ ũcio. Ririkana, Jesu nĩ aahũthĩrire njĩra ĩyo ya gũcokera agĩteithia arutwo ake matoorie merirĩria ma ũnene.—Mat. 18:1-6; 20:20-28; Luk. 22:24-27.

Ũkĩruta Mĩario. Ũkĩruta mĩario, muoroto waku to kũheana ndeto. Wendi waku nĩ gũteithia athikĩrĩria mataũkĩrũo, maririkane, na mahũthĩre ũhoro ũcio. Nĩguo ũkinyĩre muoroto ũcio, hũthĩra wega njĩra ya gũcokera.

O na kũrĩ ũguo, ũngĩcokera maũndũ marĩa ma bata makĩria maita maingĩ mũno, athikĩrĩria no matige gũgũthikĩrĩria. Thuura na ũbarĩrĩru maũndũ marĩa marabatara gũtĩtĩrithio biũ. Kaingĩ macio nĩmo makoragwo marĩ maũndũ ma bata makĩria mĩario-inĩ yaku, ĩndĩ no makorũo marĩ hamwe na maũndũ mangĩ mangĩguna athikĩrĩria mũno.

Ũkĩhũthĩra njĩra ya gũcokera, no wambe ũgwete kĩambĩrĩria-inĩ maũndũ marĩa ma bata makĩria. Ũgĩka ũguo hũthĩra ciugo nyinyi ironania na njĩra njariĩ kĩrĩa ũkwarĩrĩria, ciũria, kana ngerekano nguhĩ ironania mathĩna marĩa ũkuonania kĩhonia. No ũgwete nĩ maũndũ maigana ma bata makĩria ũkwarĩrĩria na ũmagwete na namba ũrĩa marũmanĩrĩire. Ũcoke ũthathaũranie ũmwe ũmwe mĩario-inĩ yaku. No ũtĩtĩrithie wega ũndũ o wothe wa bata makĩria kũu thĩinĩ wa mĩario yaku na njĩra ya kũũgweta rĩngĩ mbere ya gũthiĩ harĩ ũcio ũngĩ. O na ũndũ ũcio no ũhingio na njĩra ya kũheana ngerekano ĩronania ũrĩa ũndũ ũrĩa wa bata makĩria ũngĩhũthĩrũo. Ningĩ no ũtĩtĩrithie maũndũ marĩa ma bata makĩria hĩndĩ ya gũtiriha mĩario na njĩra ya kũmagweta rĩngĩ, kũmaarĩrĩria na njĩra ya kuonania ngũrani, gũcokia ciũria iria ũkũũrĩtie, kana kwarĩrĩria na njĩra nguhĩ kĩhonia kĩa mathĩna marĩa ũkũgwetete.

Hamwe na ũguo, mwaria ũrĩ na ũmenyeru nĩ abaraga wega athikĩrĩria ake marĩ mũndũ ũmwe ũmwe. Mwaria no amenye angĩkorũo amwe ao matirataũkĩrũo nĩ ũndũ mũna. Angĩkorũo nĩ ũndũ wa bata, akaũcokera. O na kũrĩ ũguo, gũcokera ciugo o iria ekũhũthĩrĩte gũtingĩhingia muoroto wake. Kũrutana nĩ makĩria ma ũguo. No mũhaka akorũo na ũhoti wa kũgarũrĩra. No abatare kuongerera maũndũ mangĩ makonainie na mĩario yake. Gũtuĩka mwarimũ mwega kwĩhocetie harĩ kwĩruta kũgarũrĩra na njĩra ĩyo kũringana na mabataro ma athikĩrĩria.