Gũthathaũra Ũhoro wa Mũthingi

ARIA arĩa makoragwo na ũmenyeru nĩ moĩ bata wa gũkorũo na ũhoro wa mũthingi. Rĩrĩa marahaarĩria mĩario, ũhoro wa mũthingi ũmateithagia gũthingata ũhoro mũna na gwĩciria igũrũ rĩaguo na njĩra ndikĩru. Moimĩrĩro nĩ atĩ handũ ha kwarĩrĩria maũndũ maingĩ, mathathaũraga mĩario na njĩra ĩkũguna athikĩrĩria ao makĩria. Ũndũ o wothe wa bata makĩria ũngĩkorũo ũkonainie ĩmwe kwa ĩmwe na ũhoro wa mũthingi na ũgateithia harĩ kũũthathaũra, athikĩrĩria nĩ mahotaga kũririkana maũndũ macio na kuona bata wamo.

Mĩario yaku nĩ ĩrĩagĩraga angĩkorũo ũhoro waku wa mũthingi nĩguo ũkũhũthĩra gũthathaũra ndeto ĩrĩa ũraheana. Ũthamaki, Bibilia, na ũriũkio nĩ ndeto njariĩ mũno. Ũhoro ũtiganĩte wa mũthingi no ũthathaũrũo kuumana na ndeto icio. Rora ngerekano ici: “Ũthamaki, Thirikari ya Biũ,” “Ũthamaki wa Ngai nĩ Ũgaatua Thĩ Paradiso,” “Bibilia Ĩtongoretio nĩ Ngai,” “Bibilia nĩ Ĩtũheaga Ũtongoria Mahinda-inĩ Maya,” “Ũriũkio nĩ Ũheaga Arĩa Maracakaya Kĩĩrĩgĩrĩro,” na “Kĩĩrĩgĩrĩro gĩa Kũriũka Gĩtũteithagia Gũikara Twĩhandĩte Wega Twagũmĩrũo nĩ Mĩnyamaro.” Maũndũ macio mothe ma mũthingi mabataraga gũthathaũrũo na njĩra ngũrani biũ.

Mahunjio ma Jesu Kristo arĩ gũkũ thĩ meehocetie harĩ ũhoro wa mũthingi wa Bibilia ĩrĩ yothe na maaragĩrĩria ũndũ ũyũ wa mũthingi: ‘Ũthamaki wa igũrũ nĩ ũkuhĩrĩirie.’ (Mat. 4:17) Aathathaũrire ũhoro ũcio wa mũthingi atĩa? Ũhoro wa Ũthamaki nĩ ũgwetetwo makĩria ma maita 110 thĩinĩ wa Injiri iria inya. Makĩria ma o gũcokera kiugo “ũthamaki” Jesu nĩ eekire maũndũ mangĩ. Kũgerera ũrutani wake na ciama iria aaringaga, Jesu nĩ onanirie cara rũkũ atĩ nĩwe warĩ Mũrũ wa Ngai, Mesia, ũrĩa Jehova angĩkahe Ũthamaki. Ningĩ Jesu nĩ onanirie atĩ kũgerera harĩ we andũ nĩ maahingũrĩirũo njĩra nĩguo manyite itemi thĩinĩ wa Ũthamaki ũcio. Nĩ aataarĩirie ngumo iria ciabataranagia harĩ arĩa mangĩagĩire na mweke ũcio wa mwanya. Kũgerera ũrutani wake na maũndũ ma hinya marĩa eekaga, nĩ onanirie kũna ũrĩa Ũthamaki wa Ngai ũngĩgekĩra andũ na akĩonania atĩ ũrĩa aarutaga andũ ndaimono na hinya wa roho wa Ngai warĩ ũira wa atĩ ‘ũthamaki wa Ngai nĩ wakorereire’ athikĩrĩria ake. (Luk. 11:20) Jesu aathire arũmĩrĩri ake marutage ũira wĩgiĩ Ũthamaki ũcio.—Mat. 10:7; 24:14.

Kũhũthĩra Ũhoro Wagĩrĩire wa Mũthingi. Ndũrerĩgĩrĩrũo ũthathaũranie ũhoro wa mũthingi ta ũrĩa Bibilia ĩthathaũrĩte, ĩndĩ nĩ harĩ bata gũkorũo na ũhoro ũrĩa wagĩrĩire wa mũthingi.

Angĩkorũo nĩwe ũgwĩthuurĩra ũhoro wa mũthingi, amba wĩcirie muoroto wa ndeto ĩrĩa ũkũheana. Ũgĩthuura maũndũ marĩa ma bata ma matemo maku ma mĩario, tigĩrĩra atĩ nĩ maranyita mbaru ũhoro ũrĩa ũthuurĩte wa mũthingi.

Angĩkorũo nĩ ũheetwo ũhoro wa mũthingi, ũthathaũranie wega nĩguo wone ũrĩa wagĩrĩirũo kũheana mĩario yaku. No ũbatare kwĩrutanĩria nĩguo wone bata wa ũhoro ũcio wa mũthingi na ũrĩa ũngĩguna athikĩrĩria. Angĩkorũo nĩwe ũgwĩthuurĩra ndeto ĩrĩa ũkũhũthĩra kwarĩrĩria ũhoro ũrĩa ũheetwo wa mũthingi, thuura wega nĩguo ndũkoime nja ya ũhoro ũcio wa mũthingi. Ĩndĩ angĩkorũo nĩ ũheetwo ndeto ya kwarĩrĩria, no ũkũbatara kũmĩthathaũrania nĩguo ũmenye ũrĩa ũkũmĩhũthĩra kũringana na ũhoro wa mũthingi. Makĩria ma ũguo nĩ ũkũbatara gwĩciria nĩkĩ ndeto ĩyo nĩ ya bata harĩ athikĩrĩria na muoroto waku wagĩrĩirũo gũkorũo ũrĩ ũrĩkũ ũkĩmĩheana. Maũndũ macio nĩ megũgũteithia kũmenya kĩrĩa ũgũtĩtĩrithia ũkĩruta mĩario yaku.

Ũrĩa Ũngĩtĩtĩrithia Ũhoro wa Mũthingi. Nĩguo ũtĩtĩrithie wega ũhoro wa mũthingi, no mũhaka ũige mũthingi ũgĩthuura na ũkĩbanga ndeto yaku. Ũngĩhũthĩra o maũndũ marĩa maranyita mbaru ũhoro waku wa mũthingi na ũrũmĩrĩre motaaro megiĩ kũhaarĩria matemo mega ma mĩario, hatarĩ nganja nĩ ũkũhota gũtĩtĩrithia ũhoro ũcio wa mũthingi.

Gũcokacokera no gũteithie harĩ gũkindĩra ũhoro wa mũthingi. Kwa ngerekano, wĩcirie ũhoro wa rwĩmbo rwa wendo. Thĩinĩ waruo mũini atĩtĩrithagia ciugo cia mũthingi, wendo ũrĩa akoragwo naguo harĩ mũndũ ũrĩa endete. No acokere ciugo icio na njĩra mwanya mwanya. No ahũthĩre kiugo “wendo” na njĩra itiganĩte. Makĩria ma ũguo, no ahũthĩre ciugo ingĩ cia wendo, ngerekano, thimo, kana maũndũ mangĩ. Ĩndĩ kĩongo kĩa rwĩmbo rũu no kĩmwe. Ũguo nĩguo kwagĩrĩirũo gũkorũo harĩ ũhoro wa mũthingi wa mĩario. O ta ũrĩa wendo ũracokacokerũo rwĩmbo-inĩ rũu ruothe, no ũcokere ciugo cia bata kuuma ũhoro-inĩ wa mũthingi hĩndĩ ya mĩario yaku. Nĩguo ũhũthĩre ciugo mwanya mwanya, hũthĩra ciugo iria ciugĩte ũndũ ũmwe na ciugo icio cia bata kana ũgwete ũhoro wa mũthingi na njĩra itiganĩte. Weka ũguo ũndũ ũrĩa mũnene athikĩrĩria mekũririkana nĩ ũhoro wa mũthingi.

Motaaro macio magĩrĩirũo kũhũthĩrũo harĩ kũruta mĩario na ũtungata-inĩ. Ndeereti nguhĩ nĩ ĩririkanagwo mũno angĩkorũo ũhoro wa mũthingi nĩ ũkwĩyumĩria. Mũrutwo wa Bibilia no aririkane wega ũrutani mũna angĩkorũo mwarimũ wake nĩ egũtĩtĩrithia ũhoro wa mũthingi. Kĩyo gĩaku harĩ gũthuura na gũthathaũra ũhoro wagĩrĩire wa mũthingi nĩ kĩrĩgũteithagia kũgaacĩrithia ũhoti waku ũrĩ mwaria na mwarimũ wa Kiugo kĩa Ngai.