‘Nĩgetha Mũtigakinye Magerio-inĩ’

‘Mwĩhũgagei na mũhoyage, mũtigakinye magerio-inĩ.’—MATHAYO 26:41.

JESU KRISTO, Mũrũ wa Ngai, ndahatĩkĩtwo ũguo rĩngĩ. Aarĩ hakuhĩ mũthia wa ũtũũro wake gũkũ thĩ. Nĩamenyaga atĩ ica ikuhĩ nĩekũnyitwo, atuĩrũo gĩkuũ, na acurio mũtĩ-inĩ. Nĩamenyaga atĩ matua make kana ciĩko ciake no ikumie kana icambithie rĩĩtwa rĩa Ithe. Jesu ningĩ nĩamenyaga atĩ kau nĩko kaarĩ kahinda ga kwamũra ũtũũro wa andũ wa mahinda marĩa mokĩte. Nĩ ũndũ wa gũkorũo e hatĩka-inĩ icio-rĩ, ekire atĩa?

² Jesu aathire mũgũnda-inĩ wa Gethisemane hamwe na arutwo ake. Hau nĩ handũ eendete mũno. Maakinya hau-rĩ, Jesu nĩ atigire arutwo ake, agĩthiĩ mbere hanini. Arĩ hau keheri-inĩ, nĩambĩrĩirie kũhoya na kĩo kũrĩ Ithe wa matu-inĩ, akĩmũtaarĩria thĩna wake wothe wa ngoro na kũmũhoya hinya. Ekire ũguo maita matatũ. O na gũtuĩka Jesu aarĩ mũkinyanĩru-rĩ, ndeciririe no atoorie hatĩka ĩyo na hinya wake we mwene.—Mathayo 26:36-44.

³ O na ithuĩ ũmũthĩ tũrĩ hatĩka-inĩ. Kĩambĩrĩria-inĩ gĩa kabuku gaka nĩhonanĩtie ũira wa atĩ ithuĩ tũratũũra mahinda ma mũthia wa mũtabarĩre ũyũ mũũru. Magerio na mĩtangĩko ya mũtabarĩre ũyũ wa Shaitani nĩ ĩraingĩha. Matua maitũ na ciĩko cia o ũmwe witũ ithuĩ tuugaga atĩ tũtungatagĩra Ngai ũrĩa wa ma, no ikumie rĩĩtwa rĩake kana irĩcambithie, na ningĩ no ciamũre kana nĩ tũgatũũra kana tũtigatũũra thĩinĩ wa thĩ yake njerũ. Nĩtwendete Jehova. Tũrenda ‘gũkirĩrĩria nginya o mũthia,’ ũkorũo nĩ mũthia wa ũtũũro witũ kana wa mũtabarĩre ũyũ, o kĩrĩa gĩgaakinya mbere. (Mathayo 24:13) No nĩ atĩa tũngĩhota gũtũũra tũkĩririkanaga ũgwati wa mahinda marĩa tũrĩ na tũikarage twĩhũgĩte?

⁴ Jesu nĩũndũ wa kũmenya atĩ arutwo ake a hĩndĩ ĩo na a rĩu nĩmegũkorũo hatĩka-inĩ-rĩ, augire ũũ: ‘Wĩhũgagei na mũhoyage, mũtigakinye magerio-inĩ.’ (Mathayo 26:41) Ciugo icio cingĩtũteithia atĩa ũmũthĩ? Nĩ magerio marĩkũ ũkoranaga namo? Na ũngĩhota ‘gũikara atĩa wĩhũgĩte’?

Nĩ Magerio Marĩkũ Tũkoranaga Namo?

⁵ Ithuothe nĩtũgeragio o mũthenya tũingĩre “mũtego-inĩ wa mũcukani.” (2 Timotheo 2:26) Bibilia ĩtwĩraga atĩ Shaitani akoragũo makĩria ehotoreire athathaiya a Jehova. (1 Petero 5:8; Kũguũrĩrio 12:12, 17) Akoragwo na muoroto ũrĩkũ? Mũno makĩria ona ndakoragwo akĩenda gũtũũraga. Tũngĩkua tũrĩ ehokeku harĩ Ngai, Shaitani ndangĩkorũo arĩ mũhotani. Shaitani nĩ oĩ atĩ Jehova nĩ agatoria gĩkuũ hĩndĩ ĩrĩa yagĩrĩire, rĩrĩa akariũkia andũ.—Luka 20:37, 38.

⁶ Shaitani endaga kwananga wĩkindĩru witũ harĩ Ngai; ũcio nĩguo wa bata gũkĩra muoyo ũrĩa twĩ naguo rĩu. Shaitani nĩ arenda mũno kuonania atĩ no atũtigithie gũtungatĩra Jehova. Kwoguo-rĩ, tũngĩheneka twage wĩhokeku, tũtige kũhunjia ũhoro mwega, kana twage kũrũmĩrĩra mĩthiĩre ya Ũkristiano, Shaitani no atuĩke mũhotani! (Aefeso 6:11-13) Nĩkĩo “mũgerania” atũrehagĩra magerio.—Mathayo 4:3.

⁷ Shaitani ahũthagĩra “mawara” matiganĩte. (Aefeso 6:11) No atũgerie na gũtengʼerania na ũtonga, guoya, nganja, kana gwetha ikeno. No njĩra ĩmwe ahũthagĩra na umithio mũno nĩ kũũraga andũ ngoro. Shaitani nĩ mwara mũno na nĩ oĩ atĩ tũngĩkua ngoro no tũtharare kĩroho na tũtuĩke a gũtoorio nĩ magerio. (Thimo 24:10) Mũno makĩria rĩrĩa ‘tũhehenjekete’ nĩatũgeragia nĩgetha tũkue ngoro.—Thaburi 38:8, NW.

⁸ O ũrĩa tũrakuhĩrĩria mũthia wa mahinda ma kũrigĩrĩria, noguo maũndũ ma gũtũũraga ngoro maraingĩha, na tũtingĩhota kũmeethema. (Ona ithandũkũ “Maũndũ Mamwe Marĩa Matũmaga Tũkue Ngoro.”) O na gĩtũmi kĩngĩkorũo nĩ kĩrĩkũ-rĩ, gũkua ngoro no kũnine hinya witũ. “Kũgũra ihinda rĩrĩa rĩagĩrĩru” rĩa gũĩka maũndũ ma kĩroho, ta kwĩruta Bibilia, gũthiĩ mĩcemanio ya Gĩkristiano na kũhunjia, no gũkorũo kũrĩ ũritũ mũno, makĩria ũngĩkorũo wĩ mũnogu mwĩrĩ, meciria, na gũtangĩka ngoro. (Aefeso 5: 15, 16, NW) Ririkana atĩ Mũgerania arenda ũtige gũtungatĩra Jehova. No rĩrĩ ti ihinda rĩa kũgonderera kana kũriganĩrũo mahinda marĩa tũrĩ nĩ ma mĩtũkĩ! (Luka 21:34-36) Ũngĩhota gwĩtirĩrĩria magerio atĩa na ũikare wĩhũgĩte? Haha harĩ na maũndũ mana mangĩgũteithia.

“Mũhoyage”

⁹ Wĩhoke Jehova kũgerera mahoya. Ririkana Jesu hĩndĩ ĩrĩa arĩ mũgũnda-inĩ wa Gethisemane. Rĩrĩa ahinyĩrĩrĩkĩte biũ ngoro-rĩ, ekire atĩa? Aahoire ũteithio kũrĩ Jehova, akĩhoya na kĩyo kĩingĩ mũno kinya “njoya yake ĩgĩtuĩka ta mataata manene ma thakame, magĩtaata thĩ.” (Luka 22:44) Ta wĩcirie ũhoro ũcio. Jesu nĩoĩ Shaitani kaimana. Jesu nĩonete arĩ igũrũ magerio marĩa mothe Shaitani atũmagĩra akĩgeria gũtega ndungata cia Ngai. Ĩndĩ Jesu ndeciririe atĩ no ahote gũtoorania na njĩra hũthũ magerio o marĩkũ marĩa mũgerania angĩamũreheire. Angĩkorũo Mũrũ mũkinyanĩru wa Ngai nĩ onire bata wa kũhoya nĩguo ateithio nĩ Ngai-rĩ, no ithuĩ!—1 Petero 2:21.

¹⁰ Ningĩ ririkana atĩ Jesu arĩkia kwĩra arutwo ake ‘mahoyage-rĩ,’ oigire ũũ: “Ngoro nĩyenda, no mwĩrĩ ndũrĩ hinya.” (Mathayo 26:41) Nĩ mwĩrĩ waũ Jesu aagwetaga? Ndũngĩkorũo warĩ mwĩrĩ wake; tondũ mwĩrĩ wake mũkinyanĩru ndũngĩagire hinya. (1 Petero 2:22) No arutwo ake marĩ ngũrani nake. Nĩũndũ wa kwaga gũkinyanĩra, na mwerekera wa kwĩhia, nĩ mangĩabatarire makĩria ũteithio wa gwĩtirĩrĩria magerio. (Aroma 7:21-24) Nĩkĩo Jesu erire arutwo acio ake, o hamwe na Akristiano othe a ma arĩa mangĩarũmĩrĩire thutha ũcio, mahoyage Ngai amateithie gũtoorania na magerio. (Mathayo 6:13) Jehova nĩ acokagia mahoya ta macio. (Thaburi 65:2) Atĩa? Haha harĩ na njĩra igĩrĩ.

¹¹ Ya mbere, Ngai nĩ atũteithagia kũmenya magerio. Magerio ma Shaitani nĩ ta mĩtego ĩigĩtwo gacĩra-inĩ karĩ na nduma. Ũngĩaga kũmĩona, no kũnyitũkio! Jehova atũmagĩra Bibilia na mabuku ma kũmĩtaarĩria gũtũmũrĩkĩra mĩtego ya Shaitani nĩguo tũtikagwe magerio-inĩ. Kwa ihinda rĩa mĩaka mĩingĩ, mabuku na ũrutani ũrĩa ũkoragwo ciũngano-inĩ nĩ ikoretwo igĩcokera rĩngĩ na rĩngĩ gũtũteithia tuone ũgwati ũrĩa umanaga na gwĩtigĩra andũ, ũtharia, gwetha ũtonga, na magerio mangĩ ma Shaitani. (Thimo 29:25; 1 Akorintho 10:8-11; 1 Timotheo 6:9, 10) Wee ndũcokagĩria Jehova ngatho nĩ ũndũ wa gũtũmenyithia mawara ma Shaitani? (2 Akorintho 2:11) Ĩyo nĩ njĩra ĩmwe Jehova acokagia nayo mahoya maku rĩrĩa wamũhoya ũteithio wa gwĩtirĩrĩria magerio.

¹² Ya keerĩ, Jehova acokagia mahoya maitũ na njĩra ya gũtũhe hinya wa kũũmĩrĩria magerio. Kiugo gĩake kiugĩte ũũ: “Ngai . . . ndangĩĩtĩkĩra mũgerio na magerio makĩrĩte marĩa mũngĩhota gwĩtiiria; no hĩndĩ ĩrĩa mũkũgerio nĩarĩmuonagĩra njĩra ya kũhonokera, nĩ getha mũhote gwĩtiiria magerio macio.” (1 Akorintho 10:13) Ngai ndarĩ hĩndĩ angĩreka magerio maritũhe mũno o ũndũ tũngĩaga hinya wa kĩroho wa kũmetirĩrĩria, angĩkorũo nĩ tũgũthiĩ na mbere kũmwĩhoka. Atũthondekagĩra “njĩra ya kũhonokera” atĩa? Nĩ ‘aheaga roho mũtheru arĩa mamũhoyaga.’ (Luka 11:13) Roho ũcio no ũtũteithie kũririkana maandĩko ma Bibilia marĩa mangĩĩkĩra hinya itua riitũ rĩa gwĩka ũrĩa kwagĩrĩire na gũtũteithia kũamũra maũndũ na njĩra ya ũũgĩ. (Johana 14:26; Jakubu 1:5, 6) No ũtũteithie kũgĩa na ngumo iria ingĩtũhotithia kũrũa na mĩerekera mĩũru. (Agalatia 5:22, 23) Roho wa Ngai ningĩ no ũtũme arĩa tũthathayagia nao matuĩke ũteithio wa ‘gũtũũmĩrĩria.’ (Akolosai 4:11) Wee ndũkenaga nĩ ũndũ wa ũrĩa Jehova acokagia na njĩra ya wendo rĩrĩa ũkũmũhoya ũteithio?

Korũo na Ciĩrĩgĩrĩro Cingĩkinyĩrĩka

¹³ Nĩguo tũhote gũikara twĩhũgĩte no nginya tũkorũo na ciĩrĩgĩrĩro cingĩkinyĩrĩka. Nĩ ũndũ wa matangĩko ma ũtũũro-rĩ, ithuothe nĩtũnogaga rĩngĩ na rĩngĩ. Ĩndĩ no nginya tũririkane atĩ Ngai ndatwĩrĩire ũtũũro ũtarĩ na mathĩna mũtabarĩre-inĩ ũyũ. O na mahinda ma Bibilia, ndungata cia Ngai no ciakoragwo na mathĩna ta; kũnyarirũo, ũkĩa, gũkua ngoro, na mĩrimũ.—Atũmwo 8:1; 2 Akorintho 8:1, 2; 1 Athesalonike 5:14; 1 Timotheo 5:23.

¹⁴ O na ithuĩ ũmũthĩ twĩ na mathĩna maitũ. Nĩ ũhũthũ tũnyarirũo, tũgiĩke nĩ ũndũ wa mbeca, tũrike ngoro, tũrware, kana tũnyamarĩke na njĩra ingĩ. Korũo Jehova aringa kĩama atũgitĩre kuuma kwĩ mathĩna mothe, ũndũ ũcio githĩ to ũtũme Shaitani anyũrũrie Jehova? (Thimo 27:11) Jehova nĩetĩkagĩra ndungata ciake igerio, na rĩmwe nginya kũragwo nĩ arĩa macinyariraga.—Johana 16:2.

¹⁵ Nĩ ũndũ ũcio-rĩ, Jehova aheanĩte kĩĩrĩgĩrĩro kĩrĩkũ? O ta ũrĩa tũrĩkirie kuona, nĩeranĩire atĩ nĩarĩtũheaga hinya nĩguo tũhote kũũmĩrĩria magerio o mothe marĩa tũngĩkorũo namo, bata tu tũkoragũo tũmwĩhokete nama. (Thimo 3:5, 6) Nĩatũgitagĩra kĩroho na gũtũteithia kũmenyerera ngwatanĩro iitũ nake na njĩra ya Kiugo gĩake, roho wake, na ithondeka rĩake. Ngwatanĩro ĩyo ĩngĩkorũo ĩ njega, o na tũngĩkua, tũrĩ ahootani. Gũtirĩ kĩndũ o na kĩrĩkũ, o na gĩkuũ, kĩngĩtũma Ngai ndakahe ndungata ciake njĩhokeku ngerenwa. (Ahibirania 11:6) Ningĩ thĩinĩ wa thĩ yake njerũ ĩrĩa rĩu ĩ hakuhĩ, Jehova nĩakahingĩria arĩa mamwendete ciĩranĩro iria ingĩ ciothe njega cia irathimo.—Thaburi 145:16.

Ririkana Ciũria Iria

¹⁶ Nĩguo tũkirĩrĩrie nginya o ithirĩro-rĩ, no nginya tũririkane ciũria iria cia bata itũmĩte Ngai arekererie waganu. Rĩmwe tũngĩhatĩrĩrio nĩ mathĩna nginya tũigue ta tũngĩtiga gũtungatĩra Jehova-rĩ, nĩ wega kũririkana atĩ Shaitani nĩakararĩtie kĩhooto kĩa wathani wa Jehova. Mũhenania ũcio ningĩ nĩekĩrĩire ngaja wĩrutĩri na wĩkindĩru wa athathaiya a Ngai. (Ayubu 1:8-11; 2:3, 4) Ciũria icio na ũrĩa Jehova aamũrĩte gũcicokia nĩ kwa bata kũrĩ mũoyo witũ kĩũmbe. Na njĩra ĩrĩkũ?

¹⁷ Kahinda kanini karĩa Ngai arekereirie mathĩna, nĩ kaheete andũ aingĩ mweke wa kũrutwo na kũrũmĩrĩra ũhoro wa ma. Ta wĩcirie ũndũ ũyũ: Jesu anyaririrũo nĩ getha tuone mũoyo. (Johana 3:16) Tũtikenagio nĩ ũndũ ũcio? No rĩrĩ, no twende kũũmĩrĩria mathĩna kahinda kangĩ kanini nĩguo andũ angĩ nao mone muoyo? Nĩguo tũũmĩrĩrie o nginya mũthia, no nginya tũguũkĩrũo atĩ ũũgĩ wa Jehova nĩ mũingĩ gũkĩra witũ. (Isaia 55:9) Nĩ arĩnina waganu kahinda karĩa kaagĩrĩire nĩguo ciũria iria igĩrĩ icokio na njĩra njega na nĩ getha tuone irathimo tene na tene. Hihi kuoneka njĩra ĩngĩ njega ya gũcokia ciũria icio ta ĩyo? Ngai nĩ wa kĩhooto!—Aroma 9:14-24.

“Kuhĩhĩriai Ngai”

¹⁸ Nĩ getha tũikarage twĩhũgĩte-rĩ, nĩtũbataire gũkuhĩhĩria Jehova. Ndũkanariganĩrũo atĩ Shaitani arageria o ũrĩa angĩhota gũthũkia ngwatanĩro iitũ na Jehova. Shaitani eendaga twĩtĩkie atĩ mũthia ndũgakinya na kwoguo gũtirĩ bata wa kũhunjia ũhoro mwega kana kũrũmĩrĩra maathani ma Bibilia. No we “nĩ wa maheni, na nowe ithe wamo.” (Johana 8:44) No mũhaka twĩhotore ‘kũregana na Mũcukani.’ Tũtiagĩrĩirũo orĩ orĩ kwagĩra kĩene ngwatanĩro iitũ na Jehova. Bibilia ĩtwĩraga ũũ: “Kuhĩhĩriai Ngai, nake nĩekũmũkuhĩhĩria inyuĩ.” (Jakubu 4:7, 8) Ũngĩkuhĩhĩria Jehova na njĩra ĩrĩkũ?

¹⁹ Gwĩthugunda na njĩra ya mahoya nĩ kwa bata. Hĩndĩ ĩrĩa ũhatĩkĩtwo nĩ mĩtangĩko ya ũtũũro nginya ũkona ta ũngĩtoorio-rĩ, ĩra Jehova kĩrĩa kĩ ngoro-inĩ yaku. Wamũtaarĩria thĩna mũna, nĩũkũhota kũmenya acokia mahoya maku. Aahota gũcokia na njĩra ĩrĩa ũterĩgĩrĩire, no angĩkorũo muoroto waku nĩ kũmũgoocithia na kũrũmia wĩkindĩru-rĩ, nĩegũgũteithia nĩguo ũũmĩrĩrie kinya mũthia. (1 Johana 5:14) O ũrĩa ũrona agĩgũtongoria ũtũũro-inĩ waku-rĩ, noguo ũkũmũkuhĩrĩria makĩria. Ona ningĩ gũthoma na gwĩciria ũhoro wa ngumo na njĩra cia Jehova iria irĩ Bibilia-inĩ nĩ kwa bata. Gwĩthugunda kũu nĩ gũgũgũteithia ũmũmenye wega, nĩ kũrĩrurumagia ngoro yaku na gũtũme ũmwende makĩria. (Thaburi 19:14) Gũkĩra maũndũ marĩa mangĩ mothe, wendo ũcio nĩ ũrĩgũteithagia gwĩtirĩrĩria magerio na gũikaraga wĩhũgĩte.—1 Johana 5:3.

²⁰ Gũkuhĩrĩria athathaiya arĩa angĩ o na kuo nĩ kwa bata nĩguo tũikarage hakuhĩ na Jehova. Ũndũ ũcio nĩũkwarĩrĩrio thĩini wa gĩcunjĩ kĩa mũthia gĩa kabuku gaka.

CIŨRIA CIA KWĨRUTA

• Jesu ekire atĩa hĩndĩ ĩrĩa ahatĩkĩtwo mũno hakuhĩ na mũthia wa ũtũũro wake gũkũ thĩ, na erire arutwo ake mekage atĩa? (Tũcunjĩ 1-4)

• Shaitani ehotoreire athathaiya a Jehova nĩkĩ, na ahũthagĩra njĩra irĩkũ gũtũgeria? (Tũcunjĩ 5-8)

• Nĩgetha twĩtiirie magerio-rĩ, nĩkĩ no mũhaka tũhoyage tũtegũtigithĩria (Tũcunjĩ 9-12), tũkorũo na ciĩrĩgĩrĩro cingĩkinyĩrĩka (Tũcunjĩ 13-15), tũririkane ciũria iria (Tũcunjĩ 16-17), na ‘tũkuhĩhĩrie Ngai’ (Tũcunjĩ 18-20)?

[Gathandũkũ karatathi ka 25]

Maũndũ Mamwe Marĩa Matũmaga Tũkue Ngoro

Ũgima wa mwĩrĩ/ũkũrũ. No tũtangĩke ngoro angĩkorũo mũrimũ ũtarahona kana ũkũrũ nĩ ũragiria tũtungatĩre Ngai makĩria.—Ahibirania 6:10.

Gũte mwĩhoko. Twahota gũkua ngoro angĩkorũo o na twerutanĩria kũhunjia Kiugo kĩa Ngai tũtirona uumithio mũingĩ.—Thimo 13:12.

Kwĩyagĩra kĩene. Mũndũ waanekwo ũũru mĩaka mĩingĩ ahota kuona ta atendetwo, nginya nĩ Jehova.—1 Johana 3:19, 20.

Gũtuurio ngoro. Mũndũ angĩkorũo ahĩtĩirio mũno nĩ ũngĩ mathathaiyagia nake no atangĩke mũno, o nginya aigue ta egũtiga gũthiĩ mĩcemanio ya Gĩkristiano kana kũhunjia.—Luka 17:1.

Mĩnyamaro. Andũ angĩ arĩa matarĩ na wĩtĩkio ta waku no maregane nawe, makũnyamarie, kana makũnyũrũrie.—2 Timotheo 3:12; 2 Petero 3:3, 4.

[Gathandũkũ karatathi ka 26]

Jesu atwĩrire ‘tũhoyage’ ũteithio wa gwĩtirĩrĩria magerio