Hihi nĩ Kĩonereria Kĩega Kana nĩ Kĩũru Harĩ Wee?
“Ngai wa Jakubu, atũrute mĩthiĩre yake, na ithuĩ tũthiage na njĩra ciake.”—ISA. 2:3.
1, 2. Tũngĩgunĩka atĩa nĩ cionereria iria irĩ thĩinĩ wa Bibilia?
HIHI nĩ ũkoragwo na ma biũ atĩ no ũgunĩke nĩ maũndũ marĩa mandĩkĩtwo Bibilia-inĩ? Thĩinĩ wayo, nĩ ũkuona cionereria cia athuri na atumia ehokeku arĩa maarĩ na mĩthiĩre na ngumo njega iria ũngĩenda kwĩgerekania nacio. (Ahib. 11:32-34) O na kũrĩ ũguo, no kũhoteke wanathoma ũhoro wa athuri na atumia maarĩ na ciĩko na mĩerekera mĩũru ũngĩenda gwĩthema.
2 Ma nĩ atĩ, andũ amwe arĩa magwetetwo thĩinĩ wa Bibilia, kũrĩ maũndũ mao tũngĩenda kwĩgerekania namo na kũrĩ mangĩ tũngĩenda gwĩthema. Ta wĩcirie ũhoro wa Daudi, mũrĩithi warĩ mwĩnyihia ũrĩa wacokire gũtuĩka mũthamaki warĩ hinya. Nĩ kĩonereria kĩega kĩa mũndũ weendete ũhoro wa ma na akehoka Jehova. Ĩndĩ, Daudi nĩ eekire mehia maritũ, ta gũtharia na Bathi-sheba, kũũragithia Uria, na gũtara andũ arĩ na muoroto mũru. O na kũrĩ ũguo, rekei twarĩrĩrie ũhoro wa Suleimani mũriũ wake, ũrĩa warĩ mũthamaki na mwandĩki wa Bibilia. Tũkwamba kwarĩrĩria maũndũ merĩ make marĩa tũngĩĩgerekania namo.
‘Ũũgĩ wa Suleimani’
3. Tũngiuga Suleimani nĩ atũigĩire kĩonereria kĩega nĩkĩ?
3 Jesu Kristo, Suleimani ũrĩa Mũnene, nĩ onanirie atĩ Mũthamaki Suleimani, nĩ kĩonereria kĩega. Jesu eerire Ayahudi amwe arĩa maarĩ na nganja ũũ: ‘Mũtumia mũthamaki, ũrĩa wa mwena wa guthini, nĩ akarũgama mũthenya ũrĩa wa cira hamwe na andũ a rũciaro rũrũ, nake amatue ehia: nĩ gũkorũo nĩ oimire ituri cia thĩ nĩ getha akeiguĩre ũũgĩ wa Suleimani; na rĩrĩ, haha nĩ harĩ mũnene kũrĩ Suleimani.’ (Mat. 12:42) Ĩni, Suleimani aarĩ na ngumo nĩ ũndũ wa ũũgĩ wake, na nĩ atuonetie bata wa kũgĩa na ũũgĩ ũcio.
4, 5. Suleimani aagĩire na ũũgĩ atĩa, no ithuĩ tũkũbatara gwĩka atĩa nĩguo tũgĩe naguo?
4 Kĩambĩrĩria-inĩ kĩa wathani wa Suleimani, Ngai nĩ aamumĩrĩire kĩroto-inĩ na akĩmwĩra ahoe kĩrĩa ekwenda. Tondũ wa kũmenya atĩ ndaarĩ na ũmenyeru, Suleimani aahoire aheo ũũgĩ. (Thoma 1 Athamaki 3:5-9.) Suleimani nĩ aakenirie Ngai nĩ kũhoya aheo ũũgĩ handũ ha ũtonga na igweta, Ngai akĩmũhe ‘ngoro ĩrĩ na ũũgĩ, na ũmenyi wa maũndũ’—o hamwe na ũtonga. (1 Ath. 3:10-14) O ta ũrĩa Jesu aagwetire, ũũgĩ wa Suleimani warĩ mũnene mũno ũũ atĩ mũthamaki mũtumia wa Sheba nĩ aaiguire ũhoro waguo akiuma bũrũri wa kũraya akawĩiguĩre we mwene.—1 Ath. 10:1, 4-9.
5 Ithuĩ tũtiĩrĩgagĩrĩra kũheo ũũgĩ na njĩra ya kĩama. Suleimani oigire: “Ũũgĩ-ũrĩa-wa-ma nĩ Jehova ũheanaga,” agĩcoka akĩandĩka atĩ nĩ twagĩrĩirũo nĩ kwĩrutanĩria gũcaria ngumo ĩyo ya Ngai, akiuga ũũ: ‘Tegagĩra ũũgĩ-ũrĩa-wa-ma matũ, na werekagĩrie ngoro yaku njĩra ya kwĩgĩĩra na ũtaũku.’ Akĩaria ũhoro ũcio nĩ aahũthĩrire ciugo ta “kwanĩria ũũgĩ,” “kũũcaragĩrĩria,” na ‘kũũtuĩragia na kĩyo.’ (Thim. 2:1-6) Hatarĩ nganja, no tũhote kwĩgwatĩra ũũgĩ.
6. Tũngĩonania atĩa nĩ tũragunĩka nĩ kĩonereria kĩega gĩa Suleimani ũhoro-inĩ wĩgiĩ ũũgĩ?
6 Nĩ wega kwĩyũria ũũ: ‘Hihi nĩ nyonaga ũũgĩ ũrĩa uumaga kwĩ Ngai ũrĩ wa bata ta ũrĩa Suleimani aawonaga?’ Mathĩna ma mbeca, nĩ matũmĩte andũ aingĩ mahũthĩre mahinda maingĩ mawĩra-inĩ mao na maũndũ-inĩ megiĩ mbeca, kana mathĩna macio makamatongoria harĩ gũthuura mũthemba na mũigana wa gĩthomo kĩrĩa megũthoma. Ĩ wee na famĩlĩ yaku? Hihi maũndũ marĩa mũthuuraga nĩ monanagia atĩ nĩ mũcaragia na mũkoona ũũgĩ wa Ngai ũrĩ wa bata? Hihi kũgarũrĩra mĩoroto yanyu no kũmũteithie mũcarie ũũgĩ makĩria? Ma nĩ atĩ, mwagĩa na ũũgĩ na mũũhũthĩre mũkũgunĩka tene na tene. Suleimani aandĩkire ũũ: “Ningĩ weka ũguo nĩrĩo ũrĩtaũkagĩrũo nĩ ũhoro ũrĩa wa ũthingu na wa kĩhooto, na ũhotage gũkũũrana maũndũ marĩa marũngĩrĩru, ĩĩ-ni, ũkĩmenye njĩra o yothe njega.”—Thim. 2:9.
Gũtũũgĩria Ũthathaiya wa ma Kwarehaga Thayũ
7. Hekarũ ya Ngai yaakirũo atĩa?
7 Kahinda kanini thutha wa Suleimani gũtuĩka mũthamaki, nĩ oire ikinya rĩa gwaka hekarũ nene ĩgĩcoka ithenya rĩa hema ya gũtũnganwo ĩrĩa yahũthagĩrũo kuuma o hĩndĩ ya Musa. (1 Ath. 6:1) Tũmĩtaga hekarũ ya Suleimani, ĩndĩ tiwe woimanĩte na rĩciria rĩa kũmĩaka, o na ndaarĩ na muoroto wa gwĩcarĩria igweta kana ũtonga. Ma nĩ atĩ, Daudi nĩwe woimĩte na rĩciria rĩa kũmĩaka, nake Ngai akĩhe Daudi mũtaratara wothe wa mwako ũcio na indo iria ingĩaigirũo thĩinĩ wa hekarũ. Daudi nĩ aarutire mbeca nyingĩ mũno cia gũteithĩrĩria wĩra ũcio. (2 Sam. 7:2, 12, 13; 1 Maũ. 22:14-16) O na kũrĩ ũguo, Suleimani nĩwe warutire wĩra ũcio wa mwako ũrĩa wooire mĩaka mũgwanja na nuthu.—1 Ath. 6:37, 38; 7:51.
8, 9. (a) Suleimani atũigĩire kĩonereria kĩrĩkũ gĩa gũkorũo na ũkirĩrĩria tũgĩka maũndũ mega? (b) Moimĩrĩro maarĩ marĩkũ Suleimani atũũgĩria ũthathaiya wa ma?
8 Nĩ ũndũ ũcio, Suleimani nĩ atũigĩire kĩonereria kĩega gĩa gũkorũo na ũkirĩrĩria tũgĩka maũndũ mega, na gĩa gũthingata maũndũ marĩa ma bata. Rĩrĩa hekarũ yarĩkire na ithandũkũ rĩa kĩrĩkanĩro rĩkĩigwo thĩinĩ wayo, Suleimani nĩ aahoire mbere ya kĩrĩndĩ. Mahoya-inĩ make oigire ũũ: “Maitho maku [nĩ] maikarage maracũrĩirio nyũmba ĩno ũtukũ na mũthenya, o handũ haha waaririe ũhoro waho ũkiuga ũũ: Rĩĩtwa rĩakwa rĩrĩikaraga ho; nĩ getha ũthikagĩrĩrie ihoya rĩrĩa niĩ, ndungata yaku, ndĩrĩhoyaga ndorete handũ haha.” (1 Ath. 8:6, 29) Aisiraeli hamwe na arĩa mataarĩ Aisiraeli nĩ mangĩahoire marorete hekarũ ĩyo, ĩrĩa yetanĩtio na rĩĩtwa rĩa Ngai.—1 Ath. 8:30, 41-43, 60.
9 Moimĩrĩro maarĩ marĩkũ nĩ ũndũ wa Suleimani gũtũgĩria ũthathaiya wa ma? Thutha wa gũkũngũĩra kwamũrũo kwa hekarũ, andũ magĩthiĩ “makenete mũno, o na makaigua wega ngoro nĩ ũndũ wa maũndũ marĩa mothe mega Jehova ekĩte Daudi, ndungata yake, o na andũ ake Isiraeli.” (1 Ath. 8:65, 66) Ma nĩ atĩ, hĩndĩ ya wathani wa mĩaka 40 wa Suleimani, kwarĩ na thayũ na ũgaacĩru mũingĩ. (Thoma 1 Athamaki 4:20, 21, 25.) Thaburi 72 nĩ yonanagia ũndũ ũcio na ĩgatũteithia gũtaũkĩrũo nĩ irathimo iria tũgakenera rungu rwa wathani wa Jesu Kristo, Suleimani ũrĩa Mũnene.—Thab. 72, 6-8, 16.
Kĩonereria Kĩũru gĩa Suleimani
10. Nĩ ũndũ ũrĩkũ mũru Suleimani eekire ũririkanagwo mũno?
10 O na kũrĩ ũguo, nĩkĩ kĩngĩtũma tuuge atĩ nĩ kũrĩ maũndũ Suleimani eekire tũtangĩenda kwĩgerekania namo? No ũhiũhe gwĩciria ũhoro wa atumia ake arĩa maarĩ a ndũrĩrĩ na angĩ a kũigwo. Tũthomaga ũũ: “Nĩgwakinyire atĩrĩ, atĩ hĩndĩ ĩrĩa Suleimani aarĩ mũkũrũ, aka acio ake nĩmaamũgarũrire ngoro, arũmĩrĩre ngai ingĩ; na ndaigana kũrũmĩrĩra Jehova Ngai wake na ngoro yake yothe.” (1 Ath. 11:1-6) Hatarĩ nganja, ndũngĩenda o na hanini gwĩka ũrĩa Suleimani eekire. No rĩrĩ, hihi ũcio noguo ũndũ ũrĩa mũru Suleimani eekire? Rekei twarĩrĩrie maũndũ mamwe moru matatindanagĩrĩrũo mũno marĩa eekire, tuone ũrĩa tũngĩĩruta.
11. Tũngĩĩruta atĩa kuumana na kĩhiko kĩa mbere gĩa Suleimani?
11 Suleimani aathamakire mĩaka 40. (2 Maũ. 9:30) Kwoguo-rĩ, nĩ ũndũ ũrĩkũ tũngĩĩruta kuumana na 1 Athamaki 14:21? (Thoma.) Kũringana na mũhari ũcio, thutha wa gĩkuũ gĩa Suleimani, Rehoboamu mũriũ wake agĩtuĩka mũthamaki arĩ na mĩaka 41, na nyina aarĩ “Naama Mũamoni.” Ũguo nĩ kuuga atĩ mbere ya Suleimani gũtuĩka mũthamaki, nĩ aahikĩtie mũtumia kuuma thĩinĩ wa rũrĩrĩ rwa thũ rũrĩa rwatungatagĩra ngai cia mĩhianano. (Atiir. 10:6; 2 Sam. 10:6) Hihi mũtumia ũcio nĩ aathathayagia ngai icio? O na angĩkorũo nĩ kũrĩ hĩndĩ aacithathayagia-rĩ, no kũhoteke nĩ aatiganĩte na ngai icio na agatuĩka mũthathaiya wa ma, ta ũrĩa Rahabu na Ruthu meekĩte. (Ruth 1:16; 4:13-17; Mat. 1:5, 6) Ĩndĩ, nĩ ũndũ wa Suleimani kũhikia Mũamoni, no kũhoteke nĩ aagĩire na athoni mataathathayagia Jehova.
12, 13. Suleimani aatuire itua rĩrĩkũ rĩũru kĩambĩrĩria-inĩ kĩa wathani wake, na kwahoteka eeĩraga atĩa?
12 Maũndũ maathũkire makĩria thutha wa Suleimani gũtuĩka mũthamaki. Suleimani agĩtuma “ũthoni na Firauni, mũthamaki wa Misiri, agĩgĩtwara mwarĩ wa Firauni, akĩmũhira itũũra rĩa Daudi.” (1 Ath. 3:1) Hihi mũtumia ũcio Mũmisiri nĩ aarũmĩrĩire ũthathaiya wa ma ta Ruthu? Gũtirĩ ũndũ wonanagia atĩ nĩ eekire ũguo. Thutha wa ihinda Suleimani akĩmwakĩra nyũmba nja ya Itũũra rĩa Daudi (kwahoteka hamwe na ndungata ciake cia airĩtu cia Misiri). Nĩkĩ? Maandĩko moigaga eekire ũguo tondũ warĩ ũndũ mũru mũthathaiya wa ngai cia maheeni gũtũũra hakuhĩ na ithandũkũ rĩa kĩrĩkanĩro.—2 Maũ. 8:11.
13 No kũhoteke Suleimani eeciragia atĩ kũhikia mwarĩ wa Firauni nĩ kũngĩamũteithirie maũndũ-inĩ ma ũteti. No hihi kĩu kĩarĩ gĩtũmi kĩega? Ihinda iraya mbere ĩyo, Ngai nĩ aakananĩtie kũhikania na Akanaani, o na nĩ aagwetete ndũrĩrĩ imwe iria mataagĩrĩirũo kũhikania nacio. (Tham. 34:11-16) No kũhoteke Suleimani eeĩraga atĩ ti ũũru kũhikia Mũmisiri tondũ rũrĩrĩ rũu rũtiagwetetwo. O na angĩkorũo ũguo nĩguo eeciragia-rĩ, hihi kĩu kĩarĩ gĩtũmi kĩiganu? Ma nĩ atĩ, gwĩka ũguo kwarĩ kũhũthia mũkaana ũrĩa Jehova aaheanĩte wa gwĩthema kũhikia andũ a ndũrĩrĩ ingĩ, tondũ nĩ mangĩagarũrire Mũisiraeli atige ũthathaiya wa ma aingĩre ũthathaiya-inĩ wa maheeni.—Thoma Gũcokerithia Maathani 7:1-4.
14. Tũngĩgunĩka atĩa tũngĩreka kĩonereria kĩũru gĩa Suleimani gĩtuĩke mũkaana harĩ ithuĩ?
14 Hihi nĩ tũgwĩtĩkĩra mũthiĩre ũcio wa Suleimani ũtuĩke mũkaana harĩ ithuĩ? Mwarĩ wa Ithe witũ ahota kũruta ciĩgwatio cia kũhũthia watho wa Ngai wa kũhika o “thĩinĩ wa Mwathani,” na atume ndũgũ na mũndũ ũtarĩ Mũkristiano. (1 Kor. 7:39) Mũndũ ũraruta ciĩgwatio ta icio, ahota kwĩingĩria maũndũ-inĩ matarĩ ma o mũhaka, ta mathako na irabu cia cukuru, kwaga kũrĩha mbeca iria agĩrĩirũo nĩ kũrĩha cia igoti, kana kũheenania rĩrĩa orio oimbũre ũndũ aramenya no ũmũrehere gĩconoko. Ũrĩa kũrĩ nĩ atĩ, no mũhaka Suleimani akorũo aahũthagĩra ciĩgwatio itarĩ na kũrĩa irĩ nĩguo aagarare watho wa Ngai, na o na ithuĩ no tũingĩre ũgwati-inĩ ta ũcio.
15. Jehova onirie Suleimani tha na njĩra ĩrĩkũ, ĩndĩ twagĩrĩirũo nĩ kũririkana ũndũ ũrĩkũ?
15 Ũndũ wa mwanya nĩ atĩ, o na thutha wa Suleimani kũhikia mwarĩ ũcio wa Firauni, Bibilia yugaga atĩ Ngai nĩ aamũheire ũũgĩ ũrĩa aahoete na ningĩ Akĩmuongerera ũtonga. (1 Ath. 3:10-13) Suleimani nĩ aagararire watho wa Ngai, o na kũrĩ ũguo gũtirĩ ũndũ wonanagia atĩ Jehova nĩ aamũtunyire ũthamaki kana akĩmũrũithia mũno o hĩndĩ ĩyo. Ũndũ ũcio wonanagia atĩ Ngai nĩ oĩ tũrĩ andũ matarĩ akinyanĩru mombĩtwo na tĩri. (Thab. 103:10, 13, 14) O na kũrĩ ũguo ririkana atĩ: Ciĩko ciitũ no ikorũo na moimĩrĩro mahinda-inĩ maya kana marĩa mokĩte.
Atumia Aingĩ Mũno!
16. Nĩ watho ũrĩkũ Suleimani aagararire nĩ ũndũ wa kũhikia atumia aingĩ?
16 Thĩinĩ wa Rwĩmbo rwa Suleimani, mũthamaki Suleimani nĩ aagathĩrĩirie mũirĩtu warĩ thingi akiuga atĩ aarĩ mũthaka gũkĩra atumia 60 a mũthamaki na thuriya 80. (Rũĩm. 6:1, 8-10) No kũhoteke gũkinyĩria hĩndĩ ĩyo Suleimani aarĩ na atumia aingĩ mũno. O na korũo amwe kana othe maarĩ athathaiya a ma-rĩ, Ngai eerĩte Musa atĩ mũthamaki wa Isiraeli “ndakaneingĩhĩrie aka, nĩguo ngoro yake ndĩkanagarũrũke.” (Gũcok. 17:17) O rĩngĩ Jehova ndaigana gũtiganĩria Suleimani. Ma nĩ atĩ, Ngai aathire na mbere na kũmũrathima, akĩmũhũthĩra kwandĩka ibuku rĩa Bibilia rĩa Rwĩmbo rwa Suleimani.
17. Nĩ ũndũ ũrĩkũ tũtagĩrĩirũo nĩ kũriganĩrũo?
17 Hihi ũguo nĩ kuuga atĩ Suleimani nĩ angĩahũthirie watho wa Ngai na ndone ũũru na hihi ithuĩ no twĩke o ũguo? Aca. Ithenya rĩa ũguo, ũndũ ũcio wonanagia atĩ Ngai no akirĩrĩrie kwa ihinda. O na kũrĩ ũguo, ũmwe wa andũ a Ngai angĩagarara watho wake na aage kũrũithio o hĩndĩ ĩyo ti kuuga atĩ macũngĩrĩro-inĩ ndakona moimĩrĩro moru. Ta ririkana ũrĩa Suleimani aandĩkire: “Tondũ wa ũrĩa iherithia rĩa gwĩka maũndũ moru rĩtaherithanagio narua-rĩ, ciana cia Adamu ikĩragĩrĩria o gwĩka ũũru.” Agĩcoka akiuga ũũ: “Nĩngũmenya na ma atĩ andũ arĩa metigagĩra Ngai, no-o makona maũndũ mega, o acio mamwĩtigagĩra me mbere yake.”—Koh. 8:11, 12.
18. Kĩonereria gĩa Suleimani kĩonanagia atĩa ũũma wa Agalatia 6:7?
18 Na arĩ korũo Suleimani nĩ aathĩkĩire watho ũcio wa Ngai! Ĩĩni, nĩ kũrĩ maũndũ maingĩ mega eekĩte na nĩ aakeneire irathimo cia Ngai kwa ihinda iraya. No thutha wa ihinda, akĩambĩrĩria gwĩka maũndũ moru. Agĩkũria mwerekera mũũru. Ciugo iria mũtũmwo Paulo acokire akĩandĩka atongoretio nĩ roho nĩ cia ma: “Mũtikanahenio; Ngai ndangĩnyũrũrio; amu kĩndũ o gĩothe kĩrĩa mũndũ ekũhanda nokĩo akagetha.” (Gal. 6:7) Thutha wa ihinda, Suleimani nĩ aagethire maciaro moru nĩ ũndũ wa kwagarara watho wa Ngai. Tũthomaga ũũ: ‘Mũthamaki Suleimani nĩ eendire andũ-a-nja aingĩ a kũngĩ o hamwe na mwarĩ wa Firauni, nao nĩ a Amoabi, Amoni, Aedomu, Azidoni, na Ahiti.’ (1 Ath. 11:1) No kũhoteke aingĩ a atumia acio maatũũrire mahoyaga ngai cia maheeni, na o nake Suleimani ndangĩethemire. Eekire maũndũ moru, na nĩ ũndũ ũcio akĩregwo nĩ Ngai witũ mũkirĩrĩria.—Thoma 1 Athamaki 11:4-8.
Wĩrute Kuumana na Kĩonereria Gĩake—Kĩega na Kĩũru
19. Ũngiuga Bibilia nĩ ĩkoragwo na cionereria nyingĩ njega nĩkĩ?
19 Jehova aatongoririe Paulo andĩke ũũ: “Maũndũ mothe marĩa maandĩkirũo tene, maandĩkirũo marĩ ma kwĩruta na ithuĩ, nĩ getha tũtũũre na kĩĩrĩgĩrĩro nĩ ũndũ wa ũrĩa tũhotithagio nĩ Maandĩko macio gũkirĩrĩria, o na ũrĩa tũũmagĩrĩrio nĩmo.” (Rom. 15:4) Maũndũ macio nĩ hamwe na cionereria njega cia athuri na atumia a tene arĩa maarĩ na wĩtĩkio mũrũmu. Nĩkĩo Paulo oigire ũũ: ‘Na nĩ ũndũ ũrĩkũ ũngĩ ingĩcoka kuuga? Amu ndingĩona hĩndĩ ya kũheana ũhoro wa Gideoni na Baraka na Samusoni na Jefitha, na ningĩ wa Daudi na Samueli o na wa anabii. Acio othe-rĩ, tondũ wa gwĩtĩkia nĩ maatoririe mabũrũri ma athamaki amwe, magĩka maũndũ ma ũthingu, makĩhingĩrio ciĩranĩro, magĩĩkĩrũo hinya rĩrĩa maahinyarĩte.’ (Ahib. 11:32-34) No tũgunĩke na nĩ twagĩrĩirũo nĩ kũgunĩka nĩ cionereria njega iria irĩ thĩinĩ wa Maandĩko, tũngĩĩgerekania na cionereria njega iria irĩ thĩinĩ wa Bibilia.
20, 21. Ũtuĩte itua rĩa kũgunĩka kuumana na cionereria iria irĩ thĩinĩ wa Kiugo kĩa Ngai nĩkĩ?
20 O na kũrĩ ũguo, maũndũ mamwe marĩa marĩ thĩinĩ wa Bibilia, nĩ ma gũtũkaania. Mamwe ma maũndũ macio makoniĩ mĩtũũrĩre ya athuri na atumia arĩa hĩndĩ ĩmwe maarĩ na ũkuruhanu mwega na Jehova na nĩ aamahũthagĩra marĩ ndungata ciake. Hĩndĩ ĩrĩa tũrathoma Bibilia, no tũhote kuona mahĩtia mao, na kĩrĩa gĩatũmire mahĩtie, na kwoguo twĩtheme tũtigeke tao. Amwe ao maambĩrĩirie gũkũria mĩerekera mĩũru kahora kahora, na macũngĩrĩro-inĩ moimĩrĩro maarĩ moru mũno. Tũngĩĩruta atĩa kuumana na maũndũ ta macio? Nĩ wega kwĩyũria ciũria ta ici: ‘Hihi mwerekera ũcio waambĩrĩirie atĩa? Hihi mwerekera ta ũcio no ũkũre thĩinĩ wakwa? Ingĩka atĩa ndĩĩtheme mwerekera ta ũcio na nĩ ũndũ ũcio ngʼunĩke nĩ kĩonereria kĩu?’
21 Hatarĩ nganja twagĩrĩirũo nĩ gwĩciria na ũritũ ũhoro wa cionereria icio, tondũ Paulo atongoretio nĩ roho aandĩkire ũũ: “Maũndũ macio mothe monire maarĩ ta igerekanio, na makĩandĩkwo matuĩke ma gũtũtaara ithuĩ, o ithuĩ tũkinyĩrĩirũo nĩ marigĩrĩrio ma mahinda maya ma ndũire.”—1 Kor. 10:11.
Weruta Atĩa?
• Nĩkĩ no wone cionereria njega na njũru thĩinĩ wa Bibilia?
• Suleimani eerekereirie atĩa gũkũria mwerekera mũũru kahora kahora ũtũũro-inĩ wake?
• Ũngĩgunĩka atĩa kuumana na kĩonereria kĩũru gĩa Suleimani?
[Mbica karatathi-inĩ ga 11]
Suleimani nĩ aahũthĩrire ũũgĩ ũrĩa aaheetwo nĩ Ngai
[Mbica karatathi-inĩ ga 14]
Hihi nĩ ũgunĩkaga kuumana na kĩonereria kĩũru gĩa Suleimani?