Mĩthenya Ĩtatũ ya Gwĩkĩrũo Hinya Kĩĩroho
1. Tũngĩgunĩka atĩa kuumana na kĩrũrũngano kĩa ngʼongo kĩa mwaka ũyũ?
1 Thĩinĩ wa thĩ ĩno ya Shaitani ĩrĩ na ngʼaragu nene ya kĩĩroho, Jehova no arathiĩ na mbere gwĩkĩra hinya ndungata ciake. (Isa. 58:11) Njĩra ĩmwe Jehova ahũthagĩra gwĩka ũguo nĩ kũgerera irũrũngano cia ngʼongo cia o mwaka. O ũrĩa kĩrũrũngano kĩa mwaka ũyũ kĩrakuhĩrĩria-rĩ, tũngĩĩharĩria atĩa gũcanjamũrana kĩĩroho?—Thim. 21:5.
2. Nĩ mĩbango ĩrĩkũ tũrabatara kũrĩkĩrĩria?
2 Angĩkorũo ndwĩkĩte ũguo, ambĩrĩria kũbanga maũndũ maku kĩũmbe na wĩra waku wa kĩĩmwĩrĩ rĩu, nĩguo ũgaakorũo kĩrũrũngano-inĩ mĩthenya yothe ĩtatũ. Nĩ ũtarĩte ihinda rĩrĩa ũkaahũthĩra gũkinya harĩa kĩrũrũngano gĩgeekĩrũo nĩguo ũgaakoragwo ũkinyĩte na ũgaikara thĩ mbere ya tabarĩra kwambĩrĩria? Nĩ ma tũtingĩenda kũũrũo nĩ irio cia kĩĩroho iria itwĩkĩraga hinya iria Jehova aharĩrĩirie nĩũndũ witũ! (Isa. 65:13, 14) Hihi mĩbango yaku ya kũrĩa ũgakoma na ya ũrĩa ũgathiĩ nĩ ĩrĩkĩte?
3. Nĩ maũndũ marĩkũ megũteithia famĩlĩ ciitũ igunĩke biũ kuumana na tabarĩra ĩyo?
3 Nĩ kĩĩ gĩgateithia meciria maku makindĩrie tabarĩra ĩgĩthiĩ na mbere? Kũngĩhoteka, hurũka wega ũtukũ mĩthenya yothe ya kĩrũrũngano. Rora mwaria. Rora maandĩko mothe megũthomwo Bibilia-inĩ yaku. Andĩka na njĩra nguhĩ maũndũ marĩa ũngĩenda kũhũthĩra. Nĩ wega famĩlĩ ĩgaaikarania hamwe nĩguo aciari makaahota gũteithia ciana ciao ithikĩrĩrie wega. (Thim. 29:15) Hihi no mwarĩrĩrie maũndũ marĩa magakorũo tabarĩra-inĩ o hwaĩ-inĩ mũrĩ famĩlĩ. Nĩguo famĩlĩ yanyu ĩthiĩ na mbere gwĩkĩrũo hinya o na thutha wa kĩrũrũngano, no mũbange ihinda rĩna hwaĩ-inĩ wanyu wa Ũthathaiya wa Famĩlĩ nĩguo mwarĩrĩrie maũndũ mwerutire kĩrũrũngano-inĩ marĩa mũngĩhũthĩra.
4. Tũngĩteithia andũ arĩa angĩ atĩa kĩũngano-inĩ giitũ mekĩrũo hinya kĩĩroho?
4 Teithia Andũ Arĩa Angĩ Mekĩrũo Hinya: Nĩ tũkwenda arĩa angĩ o nao mekĩrũo hinya kĩĩroho. Hihi nĩ kũrĩ ahunjia akũrũ kana angĩ kĩũngano-inĩ kĩanyu arĩa marabatara ũteithio nĩguo mahote gũkinya kĩrũrũngano-inĩ? Hihi no ũhote kũmateithia? (1 Joh. 3:17, 18) Athuri a kĩũngano, na mũno arori a ikundi, magĩrĩirũo kuona atĩ ahunjia acio nĩ maheo ũteithio ũrĩa marabatara.
5. Tũkaaheana atĩa tũratathi twa kũnyita andũ ũgeni? (Ningĩ rora ithandũkũ rĩrĩa rĩonanĩtio karatathi-inĩ gaka.)
5 O ta ũrĩa twĩkaga, ciumia ithatũ mbere ya kwambĩrĩria gwa kĩrũrũngano giitũ nĩ tũkanyitanĩra wĩra-inĩ wa kũnyita andũ ũgeni moke kĩrũrũngano-inĩ. Ciũngano ciagĩrĩirũo kũiga itanya rĩa kũheana tũratathi tuothe twa kũnyita andũ ũgeni nĩguo makinyĩre andũ aingĩ makĩrĩa o ta ũrĩa kwahoteka gĩcigo-inĩ kĩao gĩa kũhunjia. O na kũrĩ ũguo-rĩ, angĩkorũo famĩlĩ yanyu ndĩgaakorũo ĩninĩte tũratathi tũu kĩambĩrĩria-inĩ gĩa kĩrũrũngano, mũkũũrio mũgaathiĩ natuo kĩrũrũngano-inĩ. Tũratathi tũu nĩ tũkaahũthĩrũo kũnyita andũ ũgeni rĩrĩa twamahunjĩria hi na hi tũrĩ itũũra-inĩ rĩrĩa kĩrũrũngano gĩgeekĩrũo. Tũrĩa tũngĩ tũgaatigara na famĩlĩ yanyu yone ndĩkaahota gũtũhũthĩra mũrĩ kĩrũrũngano-inĩ, mwagĩrĩire gũgaatũneana kũrĩ anyitani-ũgeni mũkĩingĩra kĩrũrũngano-inĩ mũthenya wa Njumaa. Ũhoro wa ũrĩa tũratathi tũu tũkaahũthĩrũo nĩ ũkaaheanwo kĩrũrũngano-inĩ.
6. Tũngĩkĩra arĩa angĩ hinya atĩa na njĩra ya kuonania mĩtugo mĩega?
6 Mĩtugo Mĩega nĩ Ĩkagĩra Hinya: Ihinda-inĩ rĩrĩ rĩrĩa andũ matuĩkĩte “eendi” na mateciragia ũhoro wa andũ arĩa angĩ, na githĩ ti ũndũ wa gwĩkĩra hinya gũkorũo hamwe na Akristiano arĩa angĩ merutanagĩria gũkorũo na mĩtugo mĩega! (2 Tim. 3:2) Tuonanagia mĩtugo mĩega na njĩra ya kũingĩra kũrĩa kĩrũrũngano kĩrekĩrũo tũhoreire na twĩ na kĩhaarĩro thaa 2:00 rũcinĩ kwahingũrũo, na kũigĩra itĩ o andũ arĩa tũraikara nao gwitũ mũciĩ, arĩa tũrathiĩ hamwe ngari-inĩ iitũ, kana arĩa tũreruta nao Bibilia. Tũrũmagĩrĩra ũtongoria wa mũikarĩri-gĩtĩ wa ihinda rĩu atũũria tũikare thĩ nĩguo tũthikĩrĩrie tũrwĩmbo twa kĩnanda mbere ya tabarĩra kwambĩrĩria. Nĩ ũndũ wonanagia mĩtugo mĩega kũhoria thimũ ciitũ na indo ingĩ cia gũtũkinyĩria ndũmĩrĩri kana gũciiga ũndũ itangĩthumbũra andũ arĩa angĩ tabarĩra ĩgĩthiĩ na mbere. Ningĩ no tuonanie mĩtugo mĩega na njĩra ya kwaga kũnegena, kwandĩkanĩra ndũmĩrĩri na thimũ, kũrĩa, kana kũũrũra hatarĩ na gĩtũmi tabarĩra ĩgĩthiĩ na mbere.
7. Tũngĩamũkĩra atĩa kana twĩkĩre hinya ariũ a Ithe witũ rĩrĩa tũkũgwatanĩra nao?
7 Ngwatanĩro Ĩkagĩra Hinya: Irũrũngano itũheaga mĩeke mĩingĩ ya gũkenera ũrũmwe wa Gĩkristiano ũrĩa ũtwĩkagĩra hinya. (Thab. 133:1-3) Na githĩ ndũkĩagĩrĩirũo kuoya ikinya rĩa mbere ‘kũhingũra ngoro yaku’ nĩguo ũcemanie na aarĩ na ariũ a Ithe witũ kuuma ciũngano ingĩ arĩa mokĩte kĩrũrũngano? (2 Kor. 6:13) Hihi no ũgĩe na itanya rĩa kũmenyana o mũthenya na mũndũ ũmwe kana famĩlĩ ũtaroĩ. Mahinda ma kũhurũka ma mĩaraho nĩ matũheaga mweke mwega wa gwĩka ũguo. Kwoguo, kuua irio hũthũ na ũrĩe ũgĩkenagĩra ngwatanĩro hamwe na arĩa angĩ kũu kĩrũrũngano-inĩ handũ ha gũthiĩ kũrĩa mũkawa-inĩ. Ũndũ ũcio no ũrehe kĩrathimo gĩa kũgĩa na arata erũ na a gũtũũra.
8. Twagĩrĩirũo kwĩrutĩra kũruta wĩra kĩrũrũngano-inĩ nĩkĩ, na tũngĩka ũguo atĩa?
8 Na githĩ ti ũndũ wa gwĩkĩra hinya tũkĩrutithania wĩra na athathaiya arĩa angĩ ũtungata-inĩ mũtheru! Hihi no wĩrutĩre gũteithĩrĩria rũhonge rũna kana kũnyitanĩra na kĩũngano kĩanyu rĩrĩa kĩagaĩrũo wĩra wa gũtheria? (Thab. 110:3) Angĩkorũo ndũheetwo wĩra mũna, ũkũũrio ũkaaria na Rũhonge rwa Ũtungata wa Kwĩrutĩra rĩrĩa wĩ kĩrũrũngano-inĩ. Andũ aingĩ nĩ matũmaga wĩra ũkorũo na gĩkeno na ũhũthe.
9. Twagĩrĩirũo kũrora na njĩra ya mwanya mĩthiĩre na mĩĩhumbĩre iitũ nĩkĩ ihinda rĩa kĩrũrũngano?
9 Mĩthiĩre Iitũ nĩ Ĩkagĩra Hinya Andũ Arĩa Matuonaga: Twagĩrĩirũo nĩ kũririkana atĩ tũrĩ ageni a kĩrũrũngano mĩthenya yothe ĩtatũ, na to rĩrĩa tabarĩra ĩrathiĩ na mbere. Arĩa matuonaga tũrĩ itũũra rĩrĩa kĩrũrũngano kĩrekĩrũo magĩrĩirũo kuona ngũrani ĩkũmekĩra hinya gatagatĩ gaitũ na andũ matarĩ Aira a Jehova. (1 Pet. 2:12) Mĩĩhumbĩre iitũ o na kwĩgemia rĩrĩa tũrĩ kĩrũrũngano-inĩ, tũrĩ kũrĩa tũrakoma, o na mĩkawa-inĩ yagĩrĩire ĩgoocithie Jehova. (1 Tim. 2:9, 10) Gwĩkĩra mbanji ciitũ nĩ gũtũmaga arĩa matuonaga matũmenye na hihi gũgatũhe kamweke ga kũmeera igũrũ rĩgiĩ kĩrũrũngano na tũkahota kũmahunjĩria.
10. Tũngĩka atĩa nĩguo aruti wĩra a hoteli na mĩkawa makorũo na mawoni mega kwerekera kĩrũrũngano giitũ?
10 Nĩ na njĩra ĩrĩkũ tũngĩkĩra hinya aruti wĩra a hoteli kana mũkawa? Tũtiagĩrĩirũo kũigithia nyũmba cia hoteli nyingĩ makĩria ma iria tũkũhũthĩra, nĩ amu gwĩka ũguo gũgũtũma ageni arĩa angĩ mokĩte kĩrũrũngano-inĩ maage nyũmba ya gũkoma, na hoteli no ĩremwo kuona andũ angĩ mekũhũthĩra nyũmba icio. Angĩkorũo nĩ gũgaakorũo na mĩhangʼo mĩingĩ hoteli-inĩ ĩyo tũkĩingĩra kana tũkiuma, twagĩrĩirũo gũkoonania wetereri na mĩtugo mĩega. (Kol. 4:6) Aruti wĩra a mĩkawa na hoteli arĩa magaatũkuuĩra mĩrigo, arĩa magaatũthambĩria nyũmba kana gũtũhe ũtungata ũngĩ no tũmatigĩre tũbeca tũnini nĩ ũndũ wa wĩra wao.
11. Nĩ maũndũ marĩkũ monetwo maronania ũira mwega ũrĩa ũrutagwo kũgerera mĩthiĩre iitũ ya Gĩkristiano?
11 Mĩtugo iitũ mĩega hingo ya kĩrũrũngano ĩtũmaga andũ makorũo na mawoni marĩkũ gũtwerekera? Kũringana na ũhoro waandĩkĩtwo ngathĩti-inĩ ĩmwe, mũrũgamĩrĩri ũmwe wa gĩikaro kĩmwe kĩahũthagĩrũo nĩ ũndũ wa irũrũngano oigire ũũ: “Andũ aya me mĩtugo mĩega mũno. Nĩ tũkenaga o mwaka gũkorũo nao gũkũ.” Mwaka ũcio ũrathirire kĩbeti kĩa mũndũ ũmwe ũtarĩ Mũira wa Jehova nĩ kĩorire hoteli-inĩ yararagwo nĩ ageni arĩa mokĩte kĩrũrũngano. Rĩrĩa kĩbeti kĩu gĩatwarĩirũo mũrũgamĩrĩri wa hoteli kĩrĩ na indo ciothe, mũrũgamĩrĩri ũcio eerire mwene kĩbeti ũũ: “Wateithĩka tu nĩ ũndũ Aira a Jehova mararĩ na kĩrũrũngano gũkũ, na aingĩ ao maraikaraga hoteli-inĩ ĩno. Korũo ti o ndũngĩona kĩbeti gĩaku.”
12. O ũrĩa kĩrũrũngano kĩrakuhĩrĩria-rĩ, twagĩrĩirũo gũkorũo na muoroto ũrĩkũ, na nĩkĩ?
12 Irũrũngano cia mwaka ũyũ nĩ ikuhĩrĩirie mũno. Mahinda maingĩ nĩ mahuthĩragwo na wĩra mũingĩ ũkarutwo nĩguo tabarĩra ya kĩrũrũngano hamwe na kũrĩa gĩgeekĩrũo ikorũo irĩ cia gwĩkĩra hinya. Reke ũkorũo arĩ muoroto waku wa gũgaakorũo kuo mĩthenya yothe ĩtatũ, na wĩhaarĩrie gũkaagunĩka na kĩrĩa Jehova na ithondeka rĩake mahaarĩrĩirie nĩ ũndũ waku. Korũo na itua rĩa gũgekĩra andũ arĩa angĩ hinya kũgerera mĩtugo mĩega, ngwatanĩro ĩrĩ na gĩkeno, na mĩthiĩre mĩega. Ningĩ we na andũ arĩa angĩ no mũigue ta ũrĩa mũndũ ũmwe warĩ mũgeni kĩrũrũngano-inĩ mwaka mũthiru ũrĩa waandĩkire ũũ: “Ndingĩririkana ũndũ ũngĩ wanatũma njigue njiganĩire kũrĩ ũyũ!”
[Mbica ĩrĩ page 4]
O ta ũrĩa twĩkaga, ciumia ithatũ mbere ya kwambĩrĩria gwa kĩrũrũngano giitũ nĩ tũkanyitanĩra wĩra-inĩ wa kũnyita andũ ũgeni moke kĩrũrũngano-inĩ
[Mbica karatathi ga 6]
Mĩĩhumbĩre iitũ o na kwĩgemia rĩrĩa tũrĩ kĩrũrũngano-inĩ, tũrĩ kũrĩa tũrakoma, o na mĩkawa-inĩ yagĩrĩire ĩgoocithie Jehova
[Mbica karatathi ga7]
Korũo na itua rĩa gũgekĩra andũ arĩa angĩ hinya kũgerera mĩtugo mĩega, ngwatanĩro ĩrĩ na gĩkeno, na mĩthiĩre mĩega
[Ithandũkũ karatathi ga 4-7]
Maũndũ ma Kũririkana Megiĩ Kĩrũrũngano Kĩa Ngʼongo Kĩa mwaka wa 2011
◼ Thaa cia Tabarĩra: Tabarĩra ĩkaambĩrĩria thaa 3:20 rũcinĩ mĩthenya yothe ĩtatũ. Mĩrango ĩkaahingũrũo thaa 2:00 rũcinĩ. Rĩrĩa gũkaanĩrĩrũo atĩ tũrwĩmbo twa kĩnanda nĩ tũkwambĩrĩria, ithuothe twagĩrĩirũo gũikara thĩ nĩguo tabarĩra yambĩrĩrie na njĩra ĩrĩ na gĩtĩo. Mĩthenya ya Njumaa na Njuuma tabarĩra ĩgaathira thaa 10:55 hwaĩ-inĩ no mũthenya wa Kiumia ĩgaathira thaa 9:40 hwaĩ-inĩ.
◼ gwa Kũiga Ngari: Kũrĩa guothe twĩkagĩra irũrũngano ciitũ, nĩ tũheanaga ha kũiga ngari kũringana na ihinda rĩrĩa mũndũ akinya tũtekũrĩhia. Arĩa me na wathe wa mwĩrĩ no marũmbũiyo na njĩra ya mwanya.
◼ Kũigĩra Andũ Itĩ: Twagĩrĩirũo kũigĩra itĩ o andũ arĩa tu maraikara gwitũ mũciĩ, arĩa tũrathiĩ hamwe ngari-inĩ iitũ, kana arutwo a Bibilia arĩa tũrathoma nao.—1 Kor. 13:5.
◼ Irio cia Mĩaraho: Tũkũũrio tũgaakuua irio cia mĩaraho handũ ha gũkanathiĩ kũrĩa nja ya kũrĩa kĩrũrũngano gĩgeekĩrũo. Kanyamũ ga gũkuua irio karĩa kangĩiganĩra rungu rwa gĩtĩ kĩrĩa ũgaaikarĩra no kahũthĩrũo. Tũtiĩtĩkĩrĩtio gũkorũo na mathandũkũ manene ma gũkuua irio kana indo cia ngirathi kĩrũrũngano-inĩ.
◼ Mĩhothi: No tuonanie ngatho ciitũ nĩ ũndũ wa mĩbango ya kĩrũrũngano na njĩra ya kũruta mĩhothi ya kwĩyendera nĩ ũndũ wa wĩra wa thĩ yothe tũrĩ Nyũmba-inĩ iitũ ya Ũthamaki kana twĩ kĩrũrũngano-inĩ. Ceki o ro yothe ĩngĩrutwo kĩrũrũngano-inĩ yagĩrĩire kwandĩkwo ĩrĩhwo kũrĩ “International Bible Students Association.”
◼ Aksindenti na Maũndũ ma hi na hi: Kũngiumĩra ũndũ wa hi na hi ũrabatara ũrigitani kĩrũrũngano-inĩ, mũkũũrio mũmenyithie ũmwe wa anyitani-ũgeni, ũrĩa ũkũmenyithia rũhonge rwa ũteithio wa mbere o na ihenya nĩguo mũndũ wĩ na ũũgĩ wa kũheana ũrigitani wa mbere arore ũritũ wa thĩna ũcio na aheane ũteithio. Angĩkorũo nĩ gũkũbatarania, arĩa marĩ rũhonge-inĩ rũu rwa ũteithio wa mbere nĩ megwĩta ngari ya gũkuua arwaru. Ũndũ ũyũ nĩ ũkũgirĩrĩria gũtikahũrũo thimũ nyingĩ kũrĩ arĩa maheanaga ũtungata wa ũrigitani wa hi na hi.
◼ Ndawa: Angĩkorũo nĩ ũhũthagĩra ndawa wandĩkĩirũo nĩ ndagĩtarĩ, ũkũũrio ndũkanariganĩrũo gũkuua cia kũigana, tondũ gũtigakorũo na ndawa ta icio kĩrũrũngano-inĩ.
◼ Iratũ: O mwaka nĩ kuonekaga nguraro ciigana ũna nĩ ũndũ wa gwĩkĩra iratũ iria itagĩrĩire. Nĩ wega gwĩkĩra iratũ hũthũ, irakũigana wega na iria ũkũhota gũthiĩ nacio wega njĩra-inĩ cia mwambato, ngathĩ-inĩ, na kũndũ kũngĩ ta kũu.
◼ Maraci Kana Maguta Mena Mũtararĩko: Nyũmba nyingĩ iria irũrũngano ciĩkagĩrũo ihũthagĩra mĩtambo ya kũingĩria rĩera. Kwoguo-rĩ, tũngĩaga kũhũthĩra indo irĩ na mũtararĩko mũno no tuonanie wendo harĩ andũ arĩa makoragwo na mĩrimũ ya kũhihia.—1 Kor. 10:24.
◼ Bomu cia Tafadhali Fuatia Upendezi (S-43): Bomu ya Tafadhali Fuatia Upendezi yagĩrĩirũo kũhũthĩrũo kũheana ũhoro wĩgiĩ mũndũ o wothe wahunjĩrio hi na hi na onania gũkenio nĩ ũhoro ũcio. Ahunjia magĩthiĩ kĩrũrũngano magĩrĩirũo gũgaakuua bomu ĩmwe kana igĩrĩ. Bomu ciyũrĩtio no ineanwo kũrĩ rũhonge rwa Nyũmba ya Mabuku kana wacoka kĩũngano kĩanyu ũnengere mwandĩki.—Rora Hudumu Yetu ya Ufalme wa Novemba 2009, kar. 4.
◼ Mĩkawa: Goocithia rĩĩtwa rĩa Jehova na njĩra ya mĩthiĩre yaku mĩega ũrĩ mĩkawa-inĩ. No ũtigĩre aruti wĩra tũbeca tũnini nĩ ũndũ wa ũtungata wao angĩkorũo kwanyu nĩ gwĩkagwo ũguo.
◼ Hoteli:
(1) Ũkũũrio ndũkaigithie nyũmba makĩria ma iria ũkũhũthĩra, na thĩinĩ wa nyũmba ĩyo ya hoteli mũtigaikare mũrĩ aingĩ makĩria ma ũrĩa gwĩtĩkĩrĩtio.
(2) Ndũkagarũre mĩbango ya kũrĩa ũgũkoma tiga o kuonekire ũndũ ũterĩgĩrĩirũo, na ũmenyithie arũgamĩrĩri a hoteli na ihenya o ũrĩa kũngĩhoteka.—Mat. 5:37.
(3) Hũthĩra gakari ga gũkuua mĩrigo ga gũtindĩka o rĩrĩa ũrakabatara, na ũgacokie na ihenya warĩkia nako nĩguo andũ arĩa angĩ o nao makahũthĩre.
(4) Rugĩra tu nyũmba-inĩ iria ciĩtĩkĩrĩtio.
(5) Nĩ ũndũ wa ũtungata wao wa gũgũkuuĩra mĩrigo kana gũgũthambĩria nyũmba, tigĩra aruti wĩra a hoteli ĩyo tũbeca tũnini.
(6) Ndũkahũthĩre ũũru indo iria iheagwo arĩa mokĩte hoteli-inĩ, ta irio cia rũcinĩ, kahũa kana mbarabu ya kũiga indo irĩ hehu.
(7) Onania maciaro ma roho rĩrĩa rĩothe mũrĩ hamwe na aruti wĩra a hoteli. Matungatagĩra andũ aingĩ na nĩ makenaga mũno tuonania ũtugi, wetereri, na twatuĩka andũ maraiguithĩka.
(8) Marĩhi ma nyũmba marĩa monanĩtio Kĩmenyithia-inĩ Kĩa Marĩhi kĩa hoteli nĩmo mũigana wa marĩhi mothe ma mũthenya ũmwe, hĩndĩ ĩyo ũtatarĩte igoti. Ũngĩrĩhio makĩria kana ũheo rĩthiti ya indo iria ũtahũthĩrĩte, ndwagĩrĩirũo kũrĩha mbeca icio, na no ũmenyithie Rũhonge rwa Handũ ha Gũkoma kĩrũrũngano-inĩ na ihenya ũrĩa kũngĩhoteka.
(9) Kũngiumĩra thĩna nyũmba ya hoteli ĩrĩa ũrakoma, menyithia Rũhonge rwa Handũ ha Gũkoma wĩ kĩrũrũngano-inĩ nĩguo ũheo ũteithio.
◼ Ũtungata wa Kwĩrutĩra: Gĩkeno kĩrĩa kiumanaga na kĩrũrũngano gĩgaakorũo kĩrĩ kĩnene makĩrĩa twerutĩra gũteithĩrĩria wĩra ũrĩa ũgaakorũo ũkĩrutwo. (Atũm. 20:35) Mũndũ o wothe ũngĩenda gũteithĩrĩria no athiĩ kũrĩ Rũhonge rwa Ũtungata wa Kwĩrutĩra. Ciana iria irĩ thĩ wa mĩaka 16 o nacio no iteithĩrĩrie kũruta wĩra igĩtongorio nĩ mũciari kana mũndũ ũngĩ mũgima wĩtĩkĩrĩtio nĩ mũciari kũrũta wĩra na ciana ciake.
[Ithandũkũ karatathi ga 5]
Tũkaaheana atĩa tũratathi twa kũnyita andũ ũgeni?
Nĩguo tũhunjie gĩcigo giitũ gĩothe, twagĩrĩirũo kwaria na njĩra nguhĩ. No tuuge ũndũ ta ũyũ: “Ũhoro waku. Tũranyitanĩra wĩra-inĩ wa thĩ yothe wa kũheana karatathi gaka ga kũnyita andũ ũgeni. Gaka nĩ gaku. Nĩ ũkuona ũhoro makĩria karatathi-inĩ gaka.” Mwena wa mbere wa karatathi kau nĩ wa kũgucĩrĩria, kwoguo nengera mwene mũciĩ na njĩra ekuona mwena ũcio wa mbere. Korũo ũrĩ mũcanjamũku. Rĩrĩa tũraheana tũratathi tũu mĩthia-inĩ ya kiumia, ningĩ no tũheane ngathĩti rĩrĩa tuona kwagĩrĩire.