Mĩthiĩre Ĩrĩa Ĩgoocithagia Ngai
1. Nĩ kĩĩ gĩtũmaga andũ mamenye atĩ Aira a Jehova marĩ na kĩrũrũngano?
1 Rĩrĩa twathiĩ irũrũngano-inĩ, andũ nĩ mamenyaga. Kũndũ kũingĩ kũrĩa irũrũngano ciĩkagĩrũo, nyũmba cia mohoro nĩ imenyithagia andũ atĩ Aira a Jehova mena kĩrũrũngano. Mĩkawa nĩ ĩkoragwo na andũ aingĩ arĩa makoragwo mokĩte, na andũ nĩ monaga atĩ kwĩna ageni aingĩ mũno mekĩrĩte banji cia kĩrũrũngano. Maũndũ maya tũraririkanio nĩ magatũteithia kũgoocithia Jehova kũgerera mĩthiĩre itũ mĩega twathiĩ kĩrũrũngano.—1 Pet. 2:12.
2. Mwĩhumbĩre witũ mwega ũngĩgoocithia Jehova atĩa rĩrĩa tũthiĩte kĩrũrũngano-inĩ?
2 Mwĩhumbĩre Mwega: Mwĩhumbĩre witũ mwega rĩrĩa tũrĩ kĩrũrũngano-inĩ kaingĩ nĩ ũkenagia andũ. O na kũrĩ ũguo, rĩmwe mwĩhumbĩre witũ ta rĩrĩa tũraikara na tũkĩrĩa mĩkawa-inĩ, tũkĩgũra indo matuka-inĩ na kũndũ kũngĩ ta kũu, no ũtũme andũ makorũo na mawoni matagĩrĩire gũtwerekera. O na gũtuĩka tũrĩ kũndũ ta kũu to mũhaka twĩhumbe ta ũrĩa twĩhumbaga tũgĩthiĩ mĩcemanio, nguo iria tũrehumba ciagĩrĩire kuonania gĩtĩo na ikorũo itakĩrĩtie njano. Arĩa maratwĩrorera nĩ magĩrĩirũo kuona ngũrani gatagatĩ-inĩ gaitũ na arĩa matetĩkĩtie. (Rom. 12:2) Ningĩ nĩ twagĩrĩirũo gwĩkĩra banji ciitũ tondũ nĩ imenyithagia andũ ũhoro wĩgiĩ kĩrũrũngano, ikoimĩria mĩeke ya kũhunjia, na ikahotithia Aira arĩa angĩ a Jehova gũtũkũũrana.
3. Tũngĩonania gĩtĩo na wetereri na njĩra irĩkũ?
3 Wetereri na Gĩtĩo: Mahinda-inĩ maya marĩa andũ aingĩ thĩinĩ wa thĩ meyendete na makaga ngatho-rĩ, githĩ arĩa maratwĩrorera ta aruti a wĩra a mĩkawa to makene mũno nĩ kuona tũrĩ na wetereri na gĩtĩo? (2 Tim. 3:1-5) Rĩrĩa tũretha handũ ha gũikara kana tũkĩoya mabuku marĩa maarutwo kĩrũrũngano-inĩ, twagĩrĩirũo gwĩciria maũndũ ma arĩa angĩ to maitũ tu. (1 Kor. 10:23, 24) Mũndũ ũmwe oigire ũũ thutha wa gũthiĩ kĩrũrũngano rita rĩa mbere, “Ndingĩririkana mĩario ĩrĩa yarutirũo mũthenya ũcio, no ũndũ ũrĩa ndirikanaga mũno nĩ mĩthiĩre ya Aira a Jehova.”
4. Nĩkĩ nĩ twagĩrĩirũo kũbanga gũkeerutĩra kĩrũrũngano-inĩ angĩkorũo maũndũ maitũ nĩ magaatwĩtĩkĩria?
4 Erutĩri a Kwĩyendera: Akristiano a ma nĩ moĩkaine nĩ ũndũ wa kwĩrutĩra meyendeire. (Thab. 110:3) Hihi nĩ ũkeerutĩra gũteithĩrĩria kĩrũrũngano-inĩ? Harĩ aarĩ na ariũ a Ithe witũ ta 600 meerutĩire gũtheria kũndũ kĩrũrũngano kĩmwe gĩekĩirũo. Aruti a wĩra a kũu moigire ũũ: “Ũyũ nĩguo ũndũ wa kũgegania mũno twaneyonera! Mũndũ ndangĩtĩkia atĩ andũ aya othe nĩ a kwĩrutĩra.” Nĩ twetereire mũno kĩrũrũngano kĩa ngʼongo kĩa mwaka ũyũ kĩrĩa tũgakorũo na mweke wa gũthikĩrĩria Ngai o hamwe na kũmũgoocithia.
Iririkania cia Kĩrũrũngano kĩa Ngʼongo—2013
◼ Thaa cia Tabarĩra: Tabarĩra ĩkaambĩrĩria na tũrwĩmbo twa kĩnanda thaa 3:20 rũcinĩ mĩthenya yothe ĩtatũ. Hĩndĩ ĩyo ithuothe twagĩrĩirũo gũikara thĩ nĩguo tabarĩra yambĩrĩrie na njĩra ĩrĩ na gĩtĩo na mũbango. Mũthenya wa Njumaa na Njuuma tabarĩra ĩgaathira thaa 10:55 hwaĩ-inĩ, naguo Kiumia ĩgaathira thaa 9:40 hwaĩ-inĩ.
◼ Ngaari: Kũndũ guothe irũrũngano igekĩrũo, nĩ gũgaakorũo na kũndũ gwa kũiga ngaari hatarĩ marĩhi, mũndũ akaaheagwo ha kũiga ngaari kũringana na thaa iria akinya. Kaingĩ handũ ha kũiga ngaari hakoragwo harĩ hanini, kwoguo arĩa marĩ ngaari no mecirie ũrĩa mangĩkuana handũ ha o mũndũ gũũka na ngaari yake.
◼ Kũiga Itĩ: No ũige itĩ cia arĩa tu mũraikara nao kwanyu mũciĩ, arĩa mũrathiĩ nao ngaari ĩmwe, kana arutwo arĩa ũreruta nao Bibilia. Itĩ cia arĩa akũrũ na arĩa arwaru itikoragwo irĩ nyingĩ kwoguo no kwage kũhoteka maikaranie na andũ ao othe a famĩlĩ. Nĩ wega kũreka itĩ icio ciikarĩrũo nĩ andũ arĩa akũrũ na arĩa arwaru o hamwe na arĩa maramateithĩrĩria.—1 Kor. 13:5.
◼ Irio cia Mĩaraho: Ũkũũrio ũgaakuua irio handũ ha gũgathiĩ gũcaria irio nja ya kũrĩa kĩrũrũngano gĩgeekĩrũo. No ũkuue irio na kĩndũ gĩtarĩ kĩnene kĩrĩa kĩngĩiganĩra rungu rwa gĩtĩ. Tũtiĩtĩkĩrĩtio gũkuua indo nene mũno cia irio kana indo cia ngirathi kĩrũrũngano-inĩ.
◼Mĩhothi: Hĩndĩ ya kĩrũrũngano, no tuonanie ngatho ciitũ nĩ ũndũ wa mĩbango ya kĩrũrũngano na njĩra ya kũruta mĩhothi ya kwĩyendera nĩ ũndũ wa wĩra wa thĩ yothe. Ceki o yothe yagĩrĩire ĩrĩhwo kũrĩ “International Bible Students Association,” kana kũrĩ rũhonge rũrĩa rwĩtĩkĩrĩkĩte kĩĩwatho bũrũri-inĩ wanyu.
◼ Aksidenti na Maũndũ Materĩgĩrĩirũo: Kũngiumĩra ũndũ wa hi na hi ũrabatara ũrigitani kĩrũrũngano-inĩ, menyithia ũmwe wa anyitani-ũgeni ũrĩa ũrĩ hakuhĩ, amenyithie rũhonge rwa Ũteithio wa Mbere o na ihenya nĩguo mũndũ wĩ na ũũgĩ wĩgiĩ ũrigitani arore ũritũ wa thĩna ũcio na aheane ũteithio. Angĩkorũo nĩ gũkũbatarania, arĩa marĩ rũhonge-inĩ rwa ũteithio wa mbere nĩ megwĩta ngaari ya gũkuua arũaru. Ũndũ ũcio no ũteithie nĩguo arĩa metagwo rĩrĩa kuoimĩra ũndũ wa hi na hi matikahũrĩrũo thimũ nĩ andũ aingĩ ciĩgiĩ ũndũ o ũcio.
◼ Ũrigitani: Angĩkorũo nĩ harĩ ndawa ũhũthagĩra, ndũkanariganĩrũo gũkuua cia kũigana, tondũ gũtigakorũo na ndawa ta icio kĩrũrũngano-inĩ. Cindano na indo iria ihũthĩragwo gwĩtheca nĩ ũndũ wa mũrimũ wa cukari ciagĩrĩire gũteo harĩa hagĩrĩire no ti mabuba-inĩ ma gĩko kĩrũrũngano-inĩ na hoteli-inĩ.
◼ Iratũ: O mwaka nĩ kuonekaga nguraro ciigana ũna iria ciumanaga na iratũ, makĩria iratũ cia mĩkanye. Nĩ wega gwĩkĩra iratũ njega, irakũigana wega nĩguo ndũgakorũo na thĩna ũkĩambata ngathĩ-inĩ, tũcĩra-inĩ, na kũndũ kũngĩ ta kũu.
◼ Maguta na Maraci: Irũrũngano nyingĩ ciĩkagĩrũo nyũmba thĩinĩ. Nĩ ũndũ ũcio-rĩ, no ũkorũo ũrĩ ũndũ mwega kwaga kũhũthĩra maguta kana maraci marĩ na mũtararĩko mũnene ũrĩa ũngĩtũma arĩa makoragwo na mathĩna makonainie na kũhuhia mathĩnĩke.—1 Kor. 10:24.
◼ Bomu cia Tafadhali Fuatia Upendezi (S-43): Bomu ya Tafadhali Fuatia Upendezi yagĩrĩirũo kũhũthĩrũo kũheana ũhoro wĩgiĩ mũndũ o wothe ũhunjĩirio hĩndĩ ya kĩrũrũngano na akonania gũkenio nĩ ũhoro ũcio. Thutha wa kũmĩiyũria, bomu ĩyo no ĩneanwo Rũhonge-inĩ rwa Mabuku kana wacoka kĩũngano-inĩ ũnengere mwandĩki wa kĩũngano kĩanyu.
◼ Mĩkawa: Goocithia rĩĩtwa rĩa Jehova na njĩra ya mĩthiĩre yaku mĩega ũrĩ mĩkawa-inĩ. Wĩhumbe na njĩra ĩronania ũrĩ Mũkristiano. He aruti a wĩra bacici angĩkorũo kwanyu nĩ gwĩkagwo ũguo.
◼ Hoteli:
(1) Ũkũũrio ndũkaigithie rumu makĩria ma iria ũkũhũthĩra, na thĩinĩ wa rumu ĩyo mũtigaikare mũrĩ aingĩ makĩria ma ũrĩa gwĩtĩkĩrĩtio.
(2) Ndũgakanje mĩbango ya kũrĩa ũgaakoma tiga o kumĩrire ũndũ ũterĩgĩrĩirũo, na o hĩndĩ ĩyo ũmenyithie arũgamĩrĩri a hoteli nĩgetha andũ angĩ maheo rumu ĩyo. (Mat. 5:37) Angĩkorũo no mũhaka ũkanje, tigĩrĩra atĩ nĩ waheo marũa ma kuonania nĩ wakanja. Ũngĩkanja mũbango ũcio itigarĩte thikũ igĩrĩ, ndũngĩcokerio mbeca iria warutĩte.
(3) Ririkana atĩ angĩkorũo ũrahũthĩra kandi ya mbeca ũkĩĩyandĩkithia hoteli-inĩ, hoteli imwe nĩ irĩ hũthĩra ya gũtinia mbeca nyingĩ makĩria cia kũrĩhĩra rumu hamwe na indo iria ũngĩthũkia na maũndũ mangĩ. Ndũngĩhũthĩra mbeca icio nginya rĩrĩa makarĩkia kũrutithania mahũthĩro maku thikũ cigana ũna thutha ũcio.
(4) Hũthĩra gakaari ga gũkuua mĩrigo o rĩrĩa ũrakabatara, na ũgacokie narua warĩkia nĩguo andũ arĩa angĩ o nao makahũthĩre.
(5) He arĩa magũthondekagĩra rumu na aruti a wĩra a hoteli magũkuuĩra mĩrigo bacici, angĩkorũo kwanyu nĩ mwĩkaga ũguo.
(6) Rugagĩra tu rumu-inĩ iria ciĩtĩkĩrĩtio.
(7) Ndũkahũthĩre ũũru indo iria iheanagwo hoteli-inĩ, ta irio cia rũcinĩ, kahũa, kana indo ingĩ ta icio.
(8) Hĩndĩ ciothe onanagia maciaro ma roho harĩ aruti a wĩra a hoteli. Makoragwo magĩtungatĩra ageni aingĩ na no makene mũno tũngĩonania ũtugi, ũkirĩrĩria, na gwĩciria arĩa angĩ.
(9) Aciari magĩrĩirũo kũrora ciana ciao mahinda mothe rĩrĩa marĩ hoteli-inĩ, hamwe na kũndũ gwa gũtubĩra, gwa kwamũkĩra ageni, tũcĩra-inĩ, na kũndũ kũngĩ.
(10) Kũngiumĩra mathĩna megiĩ rumu yaku ya hoteli ũrĩ kĩrũrũngano-inĩ, menyithia Rũhonge rwa Handũ ha Gũkoma nĩguo ũteithio.
◼ Ũtungata wa Kwĩrutĩra: Mũndũ o wothe ũngĩenda gũteithĩrĩria no athiĩ Rũhonge-inĩ rwa Ũtungata wa Kwĩrutĩra kĩrũrũngano-inĩ. Ciana iria itakĩrĩtie mĩaka 16 no iteithĩrĩrie kũruta wĩra igĩtongorio nĩ mũciari kana mũndũ ũngĩ mũgima wĩtĩkĩrĩtio nĩ mũciari wa cio.