Iririkania cia Kĩgomano gĩa Thikũ Ithatũ
Thaa cia Tabarĩra: Tabarĩra ĩkaambĩrĩria na tũrwĩmbo twa kĩnanda thaa 3:20 rũcinĩ mĩthenya yothe ĩtatũ. Hĩndĩ ĩyo ithuothe twagĩrĩirũo gũikara thĩ nĩguo tabarĩra yambĩrĩrie na njĩra ĩrĩ na gĩtĩo na mũbango. Mũthenya wa Njumaa na Njuuma tabarĩra ĩgaathira thaa 11:00 hwaĩ-inĩ, na Kiumia ĩgaathira thaa 10:00 hwaĩ-inĩ.
‘Gooca Jehova na Rwĩmbo’: Mahinda-inĩ ma tene, ndungata cia Jehova nĩ ciamũgoocaga kũgerera nyĩmbo na o na ũmũthĩ, nyĩmbo nĩ gĩcunjĩ kĩa bata kĩa ũthathaiya witũ. (Thab. 28:7) Tabarĩra ciothe cia kĩgomano gĩa thikũ ithatũ ciambagĩrĩria na tũrwĩmbo twa kĩnanda. Tũrwĩmbo tũu tũthondekagwo nĩguo tũtũteithie kwĩhaarĩrĩria kũrutwo nĩ Jehova na kũmũthathaiya. Kwoguo, rĩrĩa mũikarĩri gĩtĩ anĩrĩra atĩ nĩ ihinda rĩa tũrwĩmbo twa kĩnanda, tũbatiĩ gũikara thĩ tũthikĩrĩrie na kinyi, handũ ha gũthiĩ na mbere kwaria. Gwĩka ũguo, nĩ kuonanagia ngatho citũ harĩ kĩyo kĩa aarĩ na ariũ a Ithe witũ arĩa mathondekaga nyĩmbo icio. Maita merĩ o mwaka, aarĩ na ariũ a Ithe witũ acio kuuma icigo itiganĩte thĩinĩ wa thĩ yothe, nĩ merutagĩra gũthiĩ Patterson, New York, nĩguo makahaarĩrie nyĩmbo njega iria tũkenagĩra ũthathaiya-inĩ witũ. Thutha wa gũthikĩrĩria tũrwĩmbo twa kĩnanda, mũndũ wothe agĩrĩirũo kũnyitanĩra harĩ kũgooca Jehova kũgerera nyĩmbo citũ cia Ũthamaki.
Ngaari: Kũndũ guothe kũrĩa igomano igekĩrũo, nĩ gũgaakorũo na kũndũ gwa kũiga ngaari hatarĩ marĩhi, mũndũ akaaheagwo ha kũiga ngaari kũringana na thaa iria akinya. Kaingĩ handũ ha kũiga ngaari hakoragwo harĩ hanini, kwoguo arĩa marĩ ngaari no mecirie ũrĩa mangĩkuana handũ ha o mũndũ gũũka na ngaari yake. Arĩa magakorũo na marũa kana kĩmenyithia gĩa kuonania atĩ marĩ na wathe wa mwĩrĩ, no o tu magetĩkĩrio kũiga ngaari ciao harĩa haigĩtwo nĩ ũndũ wa andũ ta acio.
Kũiga Itĩ: Rũcinĩ ihingo ciahingũrũo, tũkũũrio tũtikanahanyũke gũthiĩ kũiga itĩ ta arĩ gũtharana tũratharanĩra ha gũikara. Wĩcirie ũhoro wa andũ arĩa angĩ na ũkorũo wĩhaarĩirie kwĩima nĩ ũndũ wa aarĩ na ariũ a Ithe witũ. Roho wa kwĩima, nĩ wonanagia atĩ tũrĩ Akristiano a ma na makĩria ũgatũma arĩa maratuona magooce Jehova. (Joh. 13:34, 35; 1 Kor. 13:5; 1 Pet. 2:12) No ũige itĩ cia o arĩa mũraikara nao kwanyu mũciĩ, arĩa mũrathiĩ nao ngaari ĩmwe, kana arutwo arĩa ũreruta nao Bibilia. Ndũkanaigĩrĩre indo itĩ-inĩ iria ũtaraigĩra mũndũ. Kũnyitanĩra ũndũ-inĩ ũcio, nĩ gũgaateithia arĩa angĩ mone itĩ cia gũikarĩra. Itĩ nĩ igaakorũo ciigĩtwo nĩ ũndũ wa arĩa akũrũ na arĩa arũaru. Itĩ icio itikoragwo irĩ nyingĩ, kwoguo no arĩa akũrũ na arĩa arũaru na hihi mũndũ ũmwe kana eerĩ arĩa maramateithĩrĩria mangĩikara ho.
Mwĩhumbĩre Mwega: Twagĩrĩirũo kwĩhumba nguo irĩ na kĩhaarĩro kĩega hĩndĩ ya kĩgomano, no ti cia mwĩyonanio, ikĩrĩtie njano ta iria ciĩkĩragwo nĩ andũ a thĩ ĩno. (1 Tim. 2:9) O na rĩrĩa tũrĩ mĩkawa-inĩ, hoteli-inĩ kana thaa cia kũhurũka, mbere kana thutha wa kĩgomano, twagĩrĩirũo gwĩthema kwĩhumba ta ũrĩa twĩhumbaga tũrĩ ikeno-inĩ. Tũngĩka ũguo, tũtirĩconokaga kũhunjĩria andũ rĩrĩa mweke weyumĩria, kana gwĩkĩra mbanji rĩrĩa tũrathiĩ kĩgomano-inĩ. Mĩthiĩre itũ mĩega o hamwe na mwĩhumbĩre witũ hĩndĩ ya igomano, nĩ ĩtũmaga andũ magucĩrĩrio nĩ ũhoro ũrĩa wa ma, na makĩria ĩgakenia Jehova.—Zef. 3:17.
Mĩtugo Mĩega Ĩgiĩ Kũhũthĩra Thimũ na Indo cia Kĩrĩu: Nĩ tuonanagia mĩtugo mĩega rĩrĩa twaiga thimũ citũ na indo ingĩ ta icio, ũndũ itangĩthumbũra arĩa angĩ. Angĩkorũo nĩ ũkũhũthĩra kamera, indo cia kuoya video, tablet, kana indo ingĩ ta icio, menyerera ndũgathiĩke arĩa marĩ thutha waku. Ningĩ nĩ tuonanagia mĩtugo mĩega rĩrĩa twethema gũtũma ndũmĩrĩri kũgerera thimũ na indo ingĩ ta icio rĩrĩa programu ĩrathiĩ na mbere.
Irio cia Mĩaraho: Ũkũũrio ũgakuua irio handũ ha gũgathiĩ gũcaria irio nja ya harĩa kĩgomano gĩgeekĩrũo. No ũkuue irio na kĩndũ gĩtarĩ kĩnene kĩrĩa kĩngĩiganĩra rungu rwa gĩtĩ. Tũtiĩtĩkĩrĩtio gũkuua indo nene mũno cia irio kana indo cia ngirathi kĩgomano-inĩ.
Mĩhothi: No tuonanie ngatho ciitũ nĩ ũndũ wa mĩbango ya kĩgomano na njĩra ya kũruta mĩhothi ya kwĩyendera nĩ ũndũ wa wĩra wa thĩ yothe rĩrĩa tũrĩ kĩgomano-inĩ. Ceki o yothe yagĩrĩire kwandĩkwo International Bible Students Association. Mĩhothi ningĩ no ĩheanwo na njĩra ĩngĩ o yothe ta kũhũthĩra kadi cia marĩhi.
Ũrigitani: Angĩkorũo nĩ harĩ ndawa ũhũthagĩra, ndũkanariganĩrũo gũkuua cia kũigana, tondũ gũtigakorũo na ndawa ta icio kĩgomano-inĩ. Cindano na indo iria ihũthagĩrũo gwĩtheca nĩ ũndũ wa mũrimũ wa cukari ciagĩrĩire gũteo harĩa hagĩrĩire no ti harĩa haikagio mahuti kĩgomano-inĩ kana hoteli-inĩ.
Kwĩmenyerera: Nĩ wega kwĩmenyerera kuumana na ũndũ o wothe ũngĩtũma ũgurare nĩ ũndũ wa kũginyũka kana gũtindirũka. O mwaka nĩ kuonekaga nguraro ciigana ũna iria ciumanaga na iratũ, makĩria iratũ cia mĩkanye. Nĩ wega gwĩkĩra iratũ njega, irakũigana wega nĩguo ndũgakorũo na thĩna ũkĩambata ngoroba, ngathĩ-inĩ, tũcĩra-inĩ, na kũndũ kũngĩ ta kũu.
Arĩa Marĩ na Thĩna wa Kũigua: Programu nĩ ĩkamemerekio na njĩra ya mũtambo wa FM nĩ ũndũ wa arĩa marĩ na thĩna wa kũigua. Ũngĩenda gũkahũthĩra mũtambo ũcio, ũkũbatara gũgaakua kĩndũ kĩngĩnyita FM na ũkue kĩndũ ũngĩthikĩrĩria nakĩo matũ-inĩ.
Tũkaari twa Gũtindĩka Ciana na Itĩ cia Gũkũnjwo: Tũkaari twa gũtindĩka ciana na itĩ cia gũkũnjwo itiĩtĩkĩrĩtio kĩgomano-inĩ. O na kũrĩ ũguo, gatĩ kanini ka mwana karĩa kangĩiganĩra harĩa mũciari arĩ, no gakuo.
Maguta na Maraci: Igomano nyingĩ ciĩkagĩrũo nyũmba thĩinĩ. Nĩ ũndũ ũcio-rĩ, no ũkorũo ũrĩ ũndũ mwega kwaga kũhũthĩra maguta kana maraci marĩ na mũtararĩko mũnene ũrĩa ũngĩtũma arĩa makoragwo na mathĩna makonainie na kũhuhia mathĩnĩke.—1 Kor. 10:24.
Bomu cia Tafadhali Fuatia Upendezi (S-43): Hũthĩra bomu ya Tafadhali Fuatia Upendezi kũheana ũhoro wĩgiĩ mũndũ o wothe ũhunjĩirio hĩndĩ ya kĩgomano na akonania gũkenio nĩ ũhoro ũcio. Thutha wa kũmĩiyũria, bomu ĩyo no ĩneanwo kũrĩ Rũhonge rwa Mabuku kana wacoka kĩũngano-inĩ ũnengere mwandĩki wa kĩũngano kĩanyu.
Mĩkawa: Goocithia rĩĩtwa rĩa Jehova na njĩra ya mĩthiĩre yaku mĩega ũrĩ mĩkawa-inĩ. Wĩhumbe na njĩra ĩronania ũrĩ Mũkristiano. He aruti a wĩra mbacici angĩkorũo kwanyu nĩ gwĩkagwo ũguo.
Hoteli:
Ũkũũrio ndũkaigithie rumu makĩria ma iria ũkũhũthĩra, na thĩinĩ wa rumu ĩyo mũtigaikare mũrĩ aingĩ makĩria ma ũrĩa gwĩtĩkĩrĩtio.
Ndũgakanje mĩbango ya kũrĩa ũigithĩtie gwa gũgaakoma tiga o kuumĩrire ũndũ ũterĩgĩrĩirũo, na o hĩndĩ ĩyo ũmenyithie arũgamĩrĩri a hoteli nĩgetha andũ angĩ maheo rumu ĩyo. (Mat. 5:37) Angĩkorũo no mũhaka ũkanjithie, tigĩrĩra atĩ nĩ waheo marũa ma kuonania nĩ wakanjithia. Mũndũ angĩkanja mũbango ta ũcio itigarĩtie thikũ igĩrĩ, no aage gũcokerio mbeca iria aarutĩte.
Ririkana atĩ angĩkorũo ũrahũthĩra kadi ya marĩhi ũkĩoya rumu, hoteli imwe nĩ irĩ hũthĩra ya gũtinia mbeca nyingĩ makĩria nĩ ũndũ wa kũrĩhĩra indo iria hihi ũngĩthũkia hĩndĩ ĩyo ũraikara kũu. Ndũngĩcokerio mbeca icio nginya o rĩrĩa makarĩkia kũrutithania mahũthĩro maku thikũ cigana ũna thutha wa kuuma kũu.
Hũthĩra gakaari ga gũkuua mĩrigo o rĩrĩa ũrakabatara, na ũgacokie narua warĩkia nĩguo andũ arĩa angĩ o nao makahũthĩre.
Heana mbacici kũrĩ arĩa makũbangagĩra rumu na aruti a wĩra a hoteli arĩa magũkuuĩra mĩrigo, angĩkorũo kwanyu nĩ mwĩkaga ũguo.
Rugĩra tu o rumu-inĩ iria ciĩtĩkĩrĩtio.
Ndũkahũthĩre ũũru indo iria iheanagwo hoteli-inĩ, ta irio cia rũcinĩ, kahũa, kana indo ingĩ ta icio na njĩra ya kuoya makĩria ma iria ũrabatara.
Hĩndĩ ciothe onanagia maciaro ma roho rĩrĩa ũrahiũrania na aruti a wĩra a hoteli. Makoragwo magĩtungatĩra ageni aingĩ na no makene mũno tũngĩonania ũtugi, ũkirĩrĩria, na gwĩciria arĩa angĩ.
Aciari magĩrĩirũo kũrora ciana ciao mahinda mothe rĩrĩa marĩ hoteli-inĩ, kũndũ gwa gũtubĩra, gwa kwamũkĩra ageni, tũcĩra-inĩ, ngoroba-inĩ, na kũndũ kũngĩ ta kũu.
Marĩhi marĩa monanĩtio rĩthiti-inĩ ma rumu makoragwo maturanĩirũo mbeca cia mũthenya ũmwe hatarĩ na igoti. Ũngĩrĩhio makĩria ma ũrĩa honanĩtio, ndũkarĩhe na waranĩrie na Rũhonge rwa Handũ ha Gũkoma na ihenya o ũrĩa kwahoteka.
Kũngiumĩra mathĩna megiĩ rumu yaku ya hoteli, menyithia Rũhonge rwa Handũ ha Gũkoma ũrĩ kĩgomano-inĩ nĩguo ũteithio.
Ũtungata wa Kwĩrutĩra: Mũndũ o wothe ũngĩenda kwĩrutĩra gũteithĩrĩria, no athiĩ harĩ Rũhonge rwa Ũtungata wa Kwĩrutĩra kĩgomano-inĩ. Ciana iria itakĩrĩtie mĩaka 16 na no ciende kwĩrutĩra gũteithĩrĩria, no ciĩke ũguo irĩ rungu rwa mũciari kana mũndũ ũngĩ mũgima wĩtĩkĩrĩtio nĩ mũciari.