Irũrũngano Citũ cia Ngʼongo—Ũira Mũrũmu Harĩ Ũhoro Ũrĩa wa Ma
1. Ikũngũĩro cia o mwaka ciaheaga Aisiraeli mweke wa gwĩcũrania na kwarĩrĩria ma irĩkũ cia bata cia kĩĩroho?
1 Aisiraeli a tene maagomanaga maita matatũ o mwaka nĩ ũndũ wa ikũngũĩro. O na gũtuĩka kũringana na watho no arũme tu maagĩrĩirũo nĩ kũgomana-rĩ, kaingĩ famĩlĩ ngʼima nĩ ciathiaga Jerusalemu gũkenera igomano icio. (Gũcok. 16:15, 16) Igomano icio nĩ ciamaheaga mweke wa gwĩcũrania na kwarĩrĩria ma cia bata cia kĩĩroho. Imwe cia ma icio nĩ irĩkũ? Ĩmwe nĩ atĩ, Jehova nĩ Ngai mũtugi na Mũheani ũrĩ wendo. (Gũcok. 15:4, 5) Ĩngĩ nĩ atĩ nĩ wa kwĩhokeka harĩ kũheana ũtongoria na ũgitĩri. (Gũcok. 32:9, 10) Ningĩ Aisiraeli nĩ mangĩaririkanire atĩ marĩ andũ a Jehova, no mũhaka mangĩonanirie biũ gũtũũra kũringana na ithimi ciake cia ũthingu. (Gũcok. 7:6, 11) Mahinda-inĩ maya o tao nĩ tũgunĩkaga nĩ irũrũngano citũ cia ngʼongo cia o mwaka.
2. Tabarĩra ya kĩrũrũngano kĩa ngʼongo ĩgaatũma atĩa ũtheri wa ũhoro ũrĩa wa ma ware?
2 Tabarĩra ya Kĩrũrũngano Ĩtũmaga Ũtheri wa Ũhoro wa ma Ware: Hĩndĩ ya irũrũngano citũ cia ngʼongo, nĩ tũkenagĩra mĩario, drama, cionereria, na kũhoyana ũhoro, maũndũ marĩa matũmaga ũtheri wa ma cia bata cia Bibilia ware. (Joh. 17:17) Hatarĩ nganja, wĩra mũingĩ nĩ ũrutĩtwo kũhaarĩria kĩrũrũngano kĩrĩa kĩroka. Ithondeka rĩa Jehova nĩ rĩraharĩria tabarĩra ĩrĩa kũna ĩrongoreirio kũhingia mabataro ma mahinda maya ma andũ thĩinĩ wa thĩ yothe. (Mat. 24:45-47) Hihi nĩ ũrerirĩria kuona na kũigua maũndũ marĩa makaarĩrĩrio?
3. Twagĩrĩirũo gwĩka atĩa nĩguo tũkaagunĩka nĩ programu ĩyo?
3 Ma nĩ atĩ, tũkaagunĩka biũ angĩkorũo nĩ tũgaakorũo kuo na tũthikĩrĩrie na kinyi thikũ ciothe ithatũ. Angĩkorũo ndũrĩ ũraria na mũkwandĩki, aria nake nĩguo agaakũhe rũtha. Nĩ wega ũgaatigagĩrĩra atĩ nĩ wakoma wega o mũthenya nĩguo ũgaaikaraga wĩiguĩte hĩndĩ ya tabarĩra ĩyo. Aingĩ nĩ monete atĩ gũikara marorete ũrĩa ũraheana mĩario na kwandĩka maũndũ manyinyi nĩ kũmateithagia gũikara meiguĩte. Ndũkanareke thimũ yaku ĩgũthumbũre kana ĩthumbũre andũ arĩa angĩ. Wĩtheme kwaria na gũtũma ndũmĩrĩri. Tiga ũkorirũo ũrĩ na thĩna wa mwĩrĩ, ndũkarĩe kana ũnyue programu ĩgĩthiĩ na mbere.
4. Aciari mangĩteithia ciana ciao atĩa igunĩke hĩndĩ ya kĩrũrũngano?
4 Mĩaka-inĩ ya Thabatũ, rĩrĩa famĩlĩ cia Aisiraeli ciagomanaga nĩguo ithikĩrĩrie Watho ũgĩthomwo hĩndĩ ya Ciathĩ cia Ithũnũ, ciakoragwo hamwe na ‘ciana ciao, nĩ getha maigue, na merute.’ (Gũcok. 31:12) Na githĩ ti ũndũ wĩkĩraga ngoro mũno kuona famĩlĩ ciikarĩte hamwe hĩndĩ ya kĩrũrũngano na ciana ciao ciikarĩte ciĩiguĩte na igĩthikagĩrĩria biũ! Mũkuona atĩa o hwaĩ-inĩ o hwaĩ-inĩ mũngĩrora maũndũ marĩa mwandĩkire ma programu ĩyo na mwarĩrĩrie marĩa mamũkenirie makĩria? Tondũ “ngoro ya mwana ĩthaĩkanĩtio na ũrimũ,” handũ ha ‘gũcirekereria’ nĩ wega aciari kũrora ciana ciao, hamwe na iria irĩ mĩaka-inĩ ya ũtinĩnja, hĩndĩ ya mĩaraho na rĩrĩa marĩ mũkawa-inĩ.—Thim. 22:15; 29:15.
5. Mĩthiĩre itũ thĩinĩ wa mĩkawa ĩkaagemia ũhoro ũrĩa wa ma atĩa?
5 Mĩthiĩre Itũ Mĩega nĩ Ĩgemagia Ũhoro Ũrĩa wa Ma: Tũrĩ itũũra-inĩ rĩa kĩrũrũngano mĩthiĩre itũ mĩega nĩ ĩgemagia ũhoro ũrĩa wa ma. (Tit. 2:10) Aruti wĩra a mĩkawa nĩ monaga rĩrĩa andũ mararũmĩrĩra mawatho ma mũkawa na makonania wetereri na ũtugi harĩ aruti wĩra. (Kol. 4:6) Mwaka ũcio ũrathirire rĩrĩa arĩa maatũmĩtwo nĩ wabici ya rũhonge maathogoranaga na arũgamĩrĩri a mũkawa ũmwe, mũrũgamĩrĩri ũmwe aamerire ũũ: “Nĩ tũkenaga andũ anyu magĩũka mũkawa-inĩ witũ tondũ nĩ andũ ega. Makoragwo na mĩtugo mĩega na nĩ atugi, na hingo ciothe nĩ matĩaga mũkawa witũ o hamwe na aruti aitũ a wĩra.”
6. Tũngĩgemia ũhoro ũrĩa wa ma na mwĩhumbĩre witũ atĩa rĩrĩa tũrĩ itũũra-inĩ rĩa kĩrũrũngano?
6 Rĩrĩa twĩkĩrĩte mbanji citũ cia kĩrũrũngano, cititeithagia tu kũmenyithania ũhoro wa kĩrũrũngano kana kũhotithia Aira a Jehova arĩa angĩ matũmenye, ĩndĩ nĩ irutaga ũira kũrĩ arĩa matuonaga. Andũ itũũra-inĩ rĩa kĩrũrũngano nĩ makoona atĩ arĩa mekĩrĩte mbanji cia kĩrũrũngano nĩ mehumbĩte na kĩhaarĩro, ti ta ũrĩa andũ aingĩ thĩinĩ wa thĩ mamenyerete kwĩhumba ũũru. (1 Tim. 2:9, 10) Kwoguo, twagĩrĩirũo nĩ kũrora mũno mwĩhumbĩre witũ tũrĩ itũũra-inĩ rĩa kĩrũrũngano, o hamwe na rĩrĩa tũraingĩra mũkawa-inĩ. Gwĩkinyia twĩhumbĩte ibandĩ na T-cati gũtingĩonania gĩtĩo. O na angĩkorũo kĩrũrũngano kĩrekĩrũo kĩhaaro-inĩ, nguo citũ ciagĩrĩirũo kuonania gĩtĩo. Tũngĩciria gũcenjia nguo thutha wa programu tũgĩthiĩ mũkawa-inĩ, tũkũbatara kũririkana atĩ tũrĩ kũu tondũ wa kĩrũrũngano na kwoguo tũtiagĩrĩirũo kwĩhumba ũrĩa tũkwenda.
7. Njĩra ĩmwe ya gũkenera ũrũmwe witũ wa Gĩkristiano kĩrũrũngano-inĩ nĩ ĩrĩkũ?
7 Hĩndĩ ya ikũngũĩro cia o mwaka, Aisiraeli nĩ maakenagĩra gũkorũo hamwe na athathaiya arĩa angĩ kuuma ituri ingĩ cia bũrũri na cia thĩ, na ũndũ ũcio nĩ watũmaga magĩe na ũrũmwe. (Atũm. 2:1, 5) Hĩndĩ ya irũrũngano cia ngʼongo ũrũmwe witũ wa mwanya wa Gĩkristiano nĩ wonekaga. Ũndũ ũcio mwega wĩgiĩ paradiso itũ ya kĩĩroho kaingĩ nĩ ũgegagia arĩa mawonaga. (Thab. 133:1) Handũ ha kuuma nja hĩndĩ ya mĩaraho ũkagũre irio-rĩ, na githĩ ti wega makĩria gũkuua irio hũthũ nĩguo tũhũthĩre wega mĩeke ya gũcemania na kwaria na aarĩ na ariũ a Ithe witũ arĩa maikarĩte hakuhĩ na ithuĩ!
8. Tũrĩ na itũmi irĩkũ cia kwĩrutĩra angĩkorũo maũndũ maitũ nĩ maratwĩtĩkĩria?
8 Kaingĩ andũ merorera nĩ magegagio nĩ irũrũngano citũ iria ikoragwo ibangĩtwo wega na irĩ na kĩhaarĩro kĩega, makĩria rĩrĩa mamenya atĩ mawĩra mothe marutagwo nĩ erutĩri. Hihi no wĩrutĩre “na mwĩendero” kũruta wĩra thĩinĩ wa kĩrũrũngano? (Thab. 110:3) Kaingĩ famĩlĩ ngʼima nĩ ciĩrutagĩra ĩrĩ njĩra ya kũmenyeria ciana ciao kwĩrutagĩra. Angĩkorũo wĩ mũndũ ũrĩ thoni, kũruta wĩra kĩrũrũngano-inĩ nĩ njĩra njega ya kũmenyana na arĩa angĩ. Mwarĩ wa Ithe witũ ũmwe oigire ũũ: “Tiga o andũ a famĩlĩ yakwa na arata atare, ndiamenyaga andũ aingĩ kũu. No rĩrĩa nderutĩire wĩra-inĩ wa gũtheria, ndaamenyanire na aarĩ na ariũ a Ithe witũ aingĩ mũno. Warĩ ũndũ wa gĩkeno kĩnene!” Kuongerera arata aitũ na njĩra ya gũteithĩrĩria hĩndĩ ya kĩrũrũngano nĩ kũrĩtũrehagĩra gĩkeno kĩnene. (2 Kor. 6:12, 13) Angĩkorũo ndũrĩ werutĩra, ũria athuri a kĩũngano ũrĩa ũngĩka nĩguo wagĩrĩre gũteithĩrĩria.
9. Tũkaanyita andũ ũgeni atĩa moke kĩrũrũngano?
9 Nyita Arĩa Angĩ Ũgeni Maigue Ũhoro Ũrĩa wa Ma: O ta mĩaka ĩrĩa mĩhĩtũku, ciumia ithatũ mbere ya kĩrũrũngano gitũ kwambĩrĩria nĩ tũgaakorũo na wĩra wa kũnyita andũ ũgeni nĩguo magoka. Ciũngano nĩ ikageria kũnyita ũgeni andũ aingĩ biũ o ũrĩa ikaahota icigo-inĩ ciacio. (Rora ithandũkũ “Tũkaanyita Andũ Ũgeni Atĩa?”) Tũratathi tuothe tũrĩa tũgaakorũo tũtigarĩte twagĩrĩirũo gũkaarehwo kĩrũrũngano-inĩ. Tũratathi tũu nĩ tũkaahũthĩrũo nĩ arĩa magaakoragwo itũũra-inĩ rĩa kĩrũrũngano kũhunjia rĩrĩa marĩ itũũra-inĩ rĩu.
10. Taarĩria maũndũ monetwo maronania atĩ wĩra witũ wa o mwaka wa kũnyitana ũgeni nĩ ũkoragwo na moimĩrĩro.
10 Andũ maiyũkagia atĩa wĩra ũcio wa o mwaka wa kũmanyita ũgeni? Thĩinĩ wa kĩrũrũngano kĩmwe kũrĩ mũnyitani ũgeni wateithirie mũthuri na mũtumia wake mone ha gũikara. Maamwĩrire atĩ maaheo karatathi nĩ moonire ũcio ũrĩ ũndũ mwega. Maatwarithirie ngari kiromita 300 gũkinya kĩrũrũngano-inĩ! Narĩo hĩndĩ ĩngĩ, mwarĩ wa Ithe witũ akĩhunjia nyũmba kwa nyũmba nĩ aaheire mũthuri wonekire akĩenda kũmenya mũno ũhoro wa kĩrũrũngano karatathi kau. Nĩ ũndũ ũcio akĩhũthĩra mahinda kwarĩrĩria nake karatathi kau. Thutha wa matukũ manyinyi mwarĩ wa Ithe witũ arĩ kĩrũrũngano-inĩ akĩona mũthuri ũcio na mũratawe kĩrũrũngano-inĩ makuuĩte rĩmwe rĩa mabuku merũ marĩa maarutĩtwo!
11. Nĩ kĩĩ gũkorũo irũrũngano-inĩ citũ cia ngʼongo cia o mwaka nĩ kwa bata?
11 Ikũngũĩro icio cia o mwaka ciarĩ kĩheo kĩa Jehova kĩa wendo gĩa gũteithia Aisiraeli ‘mamũtungatagĩre matarĩ na ũhinga, na marĩ na ũhoro wa ma.’ (Josh. 24:14) Ũndũ ũmwe na ũcio, gũthiĩ irũrũngano-inĩ citũ cia ngʼongo cia o mwaka gũtũteithagia ‘gũtũũra tũrũmagĩrĩra ũhoro ũrĩa wa ma’ na nĩ gĩcunjĩ kĩa bata kĩa ũthathaiya witũ. (3 Joh. 3) Jehova arorathima kĩyo kĩa arĩa othe mendete ũhoro wa ma nĩguo magaakorũo kĩrũrũngano-inĩ kĩu na magunĩke biũ!
Tũrĩ itũũra-inĩ rĩa kĩrũrũngano mĩthiĩre itũ mĩega nĩ ĩgemagia ũhoro ũrĩa wa ma
Ciumia ithatũ mbere ya kĩrũrũngano gitũ kwambĩrĩria, nĩ tũgaakorũo na wĩra wa kũnyita andũ ũgeni nĩguo magoka
Tũkaanyita Andũ Ũgeni Atĩa?
Nĩguo tũhinyie gĩcigo gitũ, no tũbatare kwaria na njĩra nguhĩ. No tuuge ũũ: “Ũhoro waku. Tũrahe andũ thĩinĩ wa thĩ yothe karatathi gaka ga kũmanyita ũgeni. Gaka nĩ gaku. Nĩ ũgwĩthomera maũndũ makĩria thĩinĩ wako.” Korũo ũcanjamũkĩte. Ũkĩheana tũratathi tũu mũico-inĩ wa kiumia, nĩ wagĩrĩirũo ningĩ nĩ kũheana ngathĩti kũrĩ arĩa magĩrĩire.