Ithandũkũ rĩa Kĩũria

◼ Nũũ wagĩrĩirũo kũihũria karatathi ga kũhoya mabuku karĩa gakoragwo mabuku-inĩ maitũ kana Intaneti-inĩ?

Kaingĩ mabuku maitũ nĩ makoragwo na karatathi kangĩihũrio na gatũmwo kũrĩ wabici ya rũhonge kũhoya mabuku kana kũũria mũndũ aceererũo nĩ Aira a Jehova. Ningĩ mũndũ no ahũthĩre andirethi iitũ ya Intaneti ya www.watchtower.org kũũria arutwo Bibilia. Mũbango ũcio nĩ ũrateithia andũ aingĩ kwĩruta ma. O na kũrĩ ũguo, rĩmwe nĩ kũgĩaga mathĩna rĩrĩa ahunjia mahũthĩra njĩra ĩyo kũbanga andũ a famĩlĩ kana andũ angĩ matũmĩrũo mabuku kana maceererũo kwao mĩciĩ.

Andũ amwe arĩa matũmĩirũo mabuku matahoete nĩ matetete, nĩ kuona ta ithondeka riitũ rĩramaingĩrĩra na ta rĩandĩkĩte marĩĩtwa mao mũbango-inĩ wa arĩa rĩrĩtũmagĩra indo. Ahunjia arĩa manyitĩte marũa ma kũmooria maceerere mũndũ ũtahoete aceererũo nĩ mekoraga mathĩna-inĩ rĩrĩa mũndũ ta ũcio arakara. Kwoguo, ihoya rĩrĩa rĩkoragwo mabuku-inĩ maitũ kana Intaneti-inĩ rĩagĩrĩire kũihũrio nĩ mũndũ ũcio ũrenda mabuku kana gũceererũo we mwene no ti mũhunjia wagĩrĩirũo kũihũrĩria andũ angĩ. Rĩrĩa hamenyeka atĩ ihoya rĩu ti mũndũ we mwene weihũrĩirie, kaingĩ rĩticokagio.

Gũkĩrĩ ũguo-rĩ, tũngĩteithia atĩa mũndũ wa famĩlĩ kana mũrata amenye ma? Angĩkorũo nĩ harĩ mabuku ũngĩenda agĩe namo-rĩ, githĩ to ũmũtũmĩre kĩrĩ kĩheo? Angĩkorũo nĩ arenda kwĩruta na nĩ orĩtie aceererũo nĩ Aira a Jehova na ndũĩ ũrĩa ũngĩaranĩria na athuri a kĩũngano gĩa itũũra rĩao, wagĩrĩire kũihũria fomu ya Tafadhali Fuatia Upendezi (S-43) na ũmĩneane kũrĩ mwandĩki wa kĩũngano kĩanyu, ũcio nĩwe ũkũmĩrora na amĩtũme kũrĩ wabici ya rũhonge. O na kũrĩ ũguo, ndwagĩrĩirũo kwandĩkĩra wabici ya rũhonge nĩ ũndũ wa mũndũ ũhingĩrĩtwo njera, kana kwa andũ arĩa mahũthagĩra ndawa cia ũrĩĩu, kana ũrĩ thibitarĩ ya thirikari. Ithenya rĩa ũguo-rĩ, no ũmwĩkĩre ngoro aranĩrie na ariũ a Ithe witũ arĩa mahunjagia kũndũ kũu kana we mwene andĩkĩre wabici ya rũhonge.