Ithandũkũ rĩa Kĩũria

◼ Hihi ahunjia nĩ maagĩrĩirũo kũhũthagĩra Intaneti mũno kũhunjĩria kana kwĩruta Bibilia na andũ matoĩ a mabũrũri mangĩ?

Ahunjia amwe nĩ mahũthagĩra Intaneti gũcaria andũ a kwĩruta Bibilia nao mabũrũri-inĩ marĩa wĩra witũ ũgirĩtio kana kũrĩa gũtarĩ na ahunjia aingĩ. Kũndũ kũmwe nĩ gũkoretwo na moimĩrĩro mega. O na kũrĩ ũguo, no gũkorũo na ũgwati hĩndĩ ĩrĩa ahunjia magĩa na ndeereti na andũ matoĩ kũgerera e-mail kana njĩra ingĩ cia kwaranĩria Intaneti-inĩ. (Thoma Huduma Yetu ya Ufalme ya Julaĩ 2007, kar. 3.) O na gũtuĩka muoroto nĩ gũkinyĩria andũ arĩa enyihia ndũmĩrĩri ya Ũthamaki, ndeereti ta icio no itũme mũrũ kana mwarĩ wa Ithe witũ anyitanĩre na andũ matarĩ ega, o hamwe na aregenyũki. (1 Kor. 1:​19-​25; Kol. 2:8) Makĩria ma ũguo, mabũrũri-inĩ marĩa wĩra witũ ũgirĩtio, ndeereti icio no ituĩrio nĩ thirikari. Ũndũ ũcio no ũingĩrie aarĩ na ariũ a Ithe witũ a mabũrũri macio ũgwati-inĩ. Nĩ ũndũ ũcio, ahunjia matiagĩrĩirũo gũcaria andũ a mabũrũri mangĩ makĩhũthĩra Intaneti nĩguo mamahunjĩrie.

Tiga o rĩrĩa twĩtĩkĩrĩtio nĩ wabici itũ ya rũhonge, tũngĩgĩa na mweke wa kũhunjĩria mũndũ tũtoĩ ũceerete kuuma bũrũri ũngĩ, tũtiagĩrĩirũo kũgeria gũtwarithia ndeereti na mbere acoka kwao. Handũ ha ũguo, no tũmuonie ũrĩa angĩhũthĩra jw.org nĩguo erute makĩria kana aranĩrie na wabici ya rũhonge ya kwao. Ningĩ no tũmwĩkĩre ngoro athiĩ mĩcemanio Nyũmba-inĩ ya Ũthamaki ĩrĩa ĩrĩ hakuhĩ na kwao. Ma nĩ atĩ, nĩ kũrĩ mabũrũri mamwe matarĩ Nyũmba cia Ũthamaki. Angĩkorũo no ende gũceererũo nĩ Aira a Jehova a kwao, twagĩrĩirũo kũiyũria bomu ya Tafadhali Fuatia Upendezi (S-43) na tũmĩneane kũrĩ mwandĩki wa kĩũngano, nĩguo amĩtũme kũgerera jw.org. Wabici ya rũhonge ĩrĩa ĩrũgamagĩrĩra maũndũ bũrũri-inĩ ũrĩa mũndũ ũcio arĩ nĩ yũĩ maũndũ ma kũu wega na no ĩhote kũmenya ũrĩa mũndũ ũcio angĩteithio.​—Thoma Ũtungata Witũ wa Ũthamaki wa Juni 2014 kar. 7, na Ũtungata Witũ wa Ũthamaki wa Novemba 2011, kar. 2. 

Angĩkorũo mũndũ ũrĩa tũracokera ihinda-inĩ rĩrĩ nĩ arathamĩra bũrũri ũngĩ kana mũndũ ũrĩa tũrathoma nake ihinda-inĩ rĩrĩ wa bũrũri ũngĩ tũmenyanĩte kũgerera Intaneti, twagĩrĩirũo kũhũthĩra ũtongoria ũcio twarĩrĩria. Ĩndĩ, no tũthiĩ na mbere gũthoma nake nginya hĩndĩ ĩrĩa mũhunjia wa kũu kwao arĩmũceerera. O na kũrĩ ũguo, angĩkorũo akoragwo kũrĩa wĩra witũ ũgirĩtio, mũhunjia nĩ agĩrĩirũo kwĩmenyerera mũno rĩrĩa arahunjia kũgerera marũa, thimũ, kana indo ingĩ.​—Mat. 10:16.