Wĩra wa Kũnyita Andũ Ũgeni Moke Kĩririkano-inĩ Ũkaambĩrĩria Machi 17
1. Nĩ wĩra ũrĩkũ ũkaambĩrĩria Machi 17?
1 O mwaka o mwaka gĩkũngũĩro gĩa Kĩririkano nĩ kĩmemerekagia gĩkuũ kĩa Jesu. (1 Kor. 11:26) Kwoguo nĩ tũkwenda andũ makaanyitanĩra na ithuĩ meiguĩre ũhoro wa ũkũũri—kĩheo kĩa wendo kĩa Jehova. (Joh. 3:16) Mwaka ũyũ wĩra witũ wa kũnyita andũ ũgeni moke Kĩririkano-inĩ ũkaambĩrĩria Njuuma, Machi 17. Hihi nĩ wĩhaarĩirie gũkaaruta wĩra ũcio na ngoro yaku yothe?
2. Tũngiuga atĩa tũkĩnengera andũ tũratathi twa kũmanyita ũgeni?
2 Ũrĩa Tũngiuga: Nĩ wega kwaria na njĩra nguhĩ. No tuuge ũũ: “Ũhoro waku. Tuoka kũnyita famĩlĩ yanyu ũgeni gĩkũngũĩro-inĩ kĩa bata mũno kĩa o mwaka kĩrĩa gĩgeekwo Ĩpuro 5 thĩinĩ wa thĩ yothe. Nĩ gũgaakorũo na mĩario ya Bibilia hatarĩ marĩhi ĩrĩa ĩgaatarĩria kĩrĩa kĩahingirio nĩ gĩkuũ kĩa Jesu na ũrĩa areka mahinda-inĩ maya. Karatathi gaka nĩ karonania thaa na kũrĩa mũcemanio ũcio ũgeekĩrũo itũũra-inĩ riitũ.” Tũkĩheana tũratathi tũu mũico-inĩ wa kiumia, nĩ twagĩrĩirũo ningĩ kũheana magathĩti rĩrĩa tuona kwagĩrĩire.
3. Tũngĩhota atĩa kũnyita ũgeni andũ aingĩ o ũrĩa kũngĩhoteka?
3 Nyita Andũ Aingĩ Ũgeni o Ũrĩa Ũngĩhota: Muoroto witũ nĩ gwĩta andũ aingĩ o ũrĩa kũngĩhoteka. Kwoguo tigĩrĩra atĩ nĩ wanyita ũgeni arutwo aku a Biblia, arĩa ũcokagĩra, andũ a mbarĩ cianyu, arĩa mũrutithanagia wĩra, arĩa mũthomaga nao, arĩa mũrigainie, na andũ angĩ. Athuri a kĩũngano kĩanyu nĩ makaaheana ũtongoria wa ũrĩa mũkaahinyia gĩcigo kĩanyu. Wĩra witũ wa o mwaka wa kũnyita andũ ũgeni Kĩririkano-inĩ nĩ ũkoragwo na moimĩrĩro. Mwaka ũcio ũrathirire rĩrĩa mũtumia ũmwe aatonyire nyũmba ĩmwe ĩrĩa yekĩirũo mũcemanio ũcio, mũnyitani ũgeni nĩ eerutĩire kũmũteithia acarie mũhunjia ũrĩa wamũnyitĩte ũgeni. Ĩndĩ, mũtumia ũcio oigire atĩ gũtirĩ mũndũ aamenyaga kũu mũcemanio-inĩ na atĩ aaheetwo karatathi ga kũnyitana ũgeni o mũthenya ũcio nĩ mũndũ wahunjagia nyũmba kwa nyũmba.
4. Tũrĩ na itũmi irĩkũ cia gũkorũo na kĩyo wĩra-inĩ wa kũnyita andũ ũgeni?
4 No kũhoteke kũrĩ mũndũ ũgooka Kĩririkano-inĩ nĩ ũndũ waku kũmũtigĩra karatathi ga kũnyitana ũgeni. O na mũndũ angĩgooka kana aage, kĩyo gĩaku kĩnene no gĩkaaruta ũira. Tũratathi tũrĩa ũkaaheana nĩ tũkaamemerekeria andũ atĩ rĩu Jesu nĩ Mũthamaki ũrĩ hinya. Kĩyo gĩaku nĩ gĩkonia andũ othe—kũrĩa mũkaahunjia, ahunjia arĩa angĩ, na mũno makĩria Jehova—atĩ nĩ ũkenagĩra mũno kĩheo kĩa ũkũũri.—Kol. 3:15.