Kambĩini ya Gwĩta Andũ Kĩririkano-inĩ Ĩkaambĩrĩria Machi 1
1. Tũkaambĩrĩria gwĩta andũ Kĩririkano-inĩ rĩ, na kambĩini ya mwaka ũyũ ĩraiha-raihĩtio nĩkĩ?
1 Mũthenya wa Njumaa, Machi 1, nĩguo tũkaambĩrĩria kambĩini itũ ya o mwaka ya gwĩta andũ Kĩririkano-inĩ. Kĩririkano gĩgeekwo Machi 26, ũguo nĩ kuuga atĩ kambĩini ĩyo nĩ ĩgathiĩ na mbere kahinda kanena-nene gũkĩra mĩaka ĩrĩa mĩhĩtũku. Ũndũ ũcio nĩ ũkaahotithia andũ aingĩ makĩria gũkinyĩrũo nĩ tũratathi tũu, na makĩria angĩkorũo maikaraga kũndũ kĩũngano kĩgaĩirũo gĩcigo kĩnene.
2. Mĩbango ya kuoya tũratathi twa kũnyita andũ ũgeni na ya kũhunjia gĩcigo kĩanyu ĩhaana atĩa?
2 Kũbanga Maũndũ: Athuri a kĩũngano nĩ magaatwĩra ũrĩa gĩcigo gĩkaahunjio, o hamwe na kana nĩ tũgaatiga tũratathi tũu mĩciĩ ĩrĩa ĩtagaakorũo na andũ. Tũratathi tũu tũngĩgaatigara thutha wa kũheanwo icigo-inĩ iria mũkaahunjia nyũmba kwa nyũmba, no tũheo andũ kũgerera mahunjio ma kũndũ kwa mũingĩ. Mũrori wa ũtungata nĩ agaatigagĩrĩra atĩ kũrĩ na tũratathi twandĩke twa kũigana metha-inĩ ya mabuku twa kũhũthĩrũo nĩ ahunjia, no tũratathi tũu tũtiagĩrĩirũo kũrutwo tuothe rita rĩmwe. Ahunjia magĩrĩirũo gũkooyaga mũigana ũrĩa marabatara o kiumia.
3. Nĩ ũndũ ũrĩkũ twagĩrĩirũo kũririkana tũkĩheana tũratathi twa kũnyita andũ ũgeni?
3 Hihi Tũkoigaga Atĩa? Nĩ wega kwaria na njĩra nguhĩ, amu gwĩka ũguo no gũtũhotithie gũkinyĩra andũ aingĩ ũrĩa kũngĩhoteka. Karatathi ga 4 karĩ na ũhoro tũngĩhũthĩra kũringana na ũrĩa gĩcigo gitũ gĩtariĩ. Hatirĩ bata wa kũhĩkĩka angĩkorũo mwene nyũmba nĩ aratũthikĩrĩria wega kana arĩ na ciũria. Tũkĩheana tũratathi tũu mũthia-inĩ wa kiumia, twagĩrĩirũo gũtũheana hamwe na ngathĩti rĩrĩa tuona kwagĩrĩire. Mũthenya wa Machi 2, tũgaakorũo tũkĩheana tũratathi twa kũnyita andũ ũgeni handũ ha kwambĩrĩria kwĩruta na andũ Bibilia.
4. Nĩkĩ nĩ twagĩrĩirũo gũkeerutĩra na kĩyo hĩndĩ ya kambĩini?
4 Tũrerĩgĩrĩra atĩ andũ aingĩ nĩ magooka Kĩririkano-inĩ. Mĩario ĩrĩa ĩkaarutwo nĩ ĩgaatarĩria Jesu nũ kũna. (1 Kor. 11:26) Nĩ ĩkoonania ũrĩa gĩkuũ gĩake gĩtũgunaga. (Rom. 6:23) Ningĩ nĩ ĩkoonania nĩkĩ nĩ ũndũ wa bata tũmũririkanage. (Joh. 17:3) Kĩrekei tũkeerutĩra na kĩyo kambĩini-inĩ ĩyo!