Tũratathi twa Gwĩta Andũ Kĩririkano Tũkaambĩrĩria Kũheanwo Ĩpuro 2
1. Mwaka ũyũ tũkaaheana tũratathi twa gwĩta andũ Kĩririkano rĩ, na bata wa mũbango ũyũ wa gwĩtana nĩ ũrĩkũ?
1 Kwambĩrĩria Ĩpuro 2 nginya 17, nĩ tũkaaheana tũratathi twa gwĩta andũ ũndũ-ĩni ũyũ wa mwanya mũno thĩinĩ wa mwaka—Kĩririkano gĩa gĩkuũ gĩa Kristo. Andũ aingĩ arĩa makenagio nĩ ũhoro witũ nĩ metĩkĩraga rĩĩtana rĩu tũkoragwo narĩo o mwaka. Kwa mũhaano, mũtumia ũmwe nĩ aahũrire thimũ wabici ya rũhonge mũthenya wa Kĩririkano na akiuga ũũ: “No hĩndĩ ndakinya mũciĩ, na ndakora karatathi ka rĩĩtana rĩa Kĩririkano rungu rwa mũrango wakwa. Nĩ ndĩrenda gũthiĩ no ndiramenya wega Kĩririkano nĩ gĩa thaa ciigana.” Agĩtarĩrio harĩa aangĩonire ũhoro ũcio karatathi-inĩ kau ka rĩĩtana. Mũtumia ũcio aarĩkĩrĩirie na kuuga ũũ: “Nĩ ngũthiĩ Kĩririkano kĩu hwaĩ-inĩ!”
2. Tũngiuga atĩa rĩrĩa tũraheana karatathi ga gwĩta andũ Kĩririkano?
2 Njĩra Ĩrĩa Tũkahũthĩra: Nĩ gũkorũo tũrĩ o na ihinda inyinyi rĩa gwĩta andũ kũrĩa guothe tũhunjagia-rĩ, nĩ wega kũheana ũhoro na njĩra nguhĩ. No tuuge ũũ: “Wĩ mwega. Tũgũkũũria wee hamwe na famĩlĩ yaku mũkaanyitanĩra na ithuĩ tũkĩririkana ũndũ wa bata mũno ũrĩa ũgakũngũĩrũo thĩ yothe Kiumia, Ĩpuro 17. [Mũnengere karatathi ka rĩĩtana.] Mũthenya ũcio nĩguo ũgakorũo ũrĩ Kĩririkano gĩa gĩkuũ kĩa Jesu. Nĩ gũgakorũo na mĩario ya Bibilia ĩtarĩ marĩhi ĩrĩa ĩkaarĩrĩria ũrĩa tũngĩgunĩka kuumana na ũkũũri wa Kristo. Karatathi gaka karonania kũrĩa mũcemanio ũcio ũgeekĩrũo itũũra-inĩ riitũ, na mathaa marĩa ũgeekwo.”
3. Tũngĩhota atĩa gwĩta andũ aingĩ o ũrĩa kũngĩhoteka?
3 Angĩkorũo kĩũngano kĩanyu gĩkoragwo na gĩcigo kĩnene gĩa kũhunjia-rĩ, athuri a kĩũngano no mamwĩre mũtige tũratathi tũu mĩciĩ ĩrĩa mũtagakora andũ, angĩkorũo no kaigwo ũndũ gatekuonwo nĩ andũ angĩ. Ririkana gwĩta arĩa ũcokagĩra, arĩa mwĩtainwo, arĩa mũrutaga wĩra nao, arĩa mũthomaga nao, na andũ angĩ ũĩ. Rĩrĩa ũraheana tũratathi twa rĩĩtana Njuuma na Kiumia-rĩ, tũheane hamwe na ngathĩti kũngĩkorũo nĩ kwagĩrĩire. Hihi no ũtuĩke painia-wa-gũteithĩrĩria mweri wa Ĩpuro nĩguo ũgaakorũo na mweke mũnene wa wĩra ũcio wĩ gĩkeno wa gwĩta andũ Kĩririkano?
4. Nĩ kĩĩ kĩratũma twende andũ magooka Kĩririkano?
4 Hatirĩ nganja, arĩa othe magooka nĩ makarutĩrũo ũira mũnene mũno! Nĩ makaigua ũhoro wa wendo mũnene wa Jehova wa kũheana ũkũũri. (Joh. 3:16) Nĩ makeeruta ũrĩa Ũthamaki wa Ngai ũkaaguna andũ. (Isa. 65:21-23) Nĩ makoorio maarĩrie anyitani ũgeni angĩkorũo nĩ makenda kũgĩa na wĩruti wa Bibilia nĩguo merute makĩria. Nĩ ihoya riitũ atĩ andũ arĩa makenagio nĩ kwĩruta ũhoro wa Jehova nĩ mageetĩkĩra rĩĩtana riitũ na manyitanĩre hamwe na ithuĩ hĩndĩ ya Kĩririkano!