Ũrĩa Tũngĩhũthĩra Broshua Njerũ Nĩa Mareka Wendi wa Jehova Ũmũthĩ?
Ĩhaarĩirio Yerekerie Arutwo a Bibilia Ithondeka-inĩ
1. Broshua ya Wendi wa Jehova ĩhaarĩirio ĩhingie maũndũ marĩkũ matatũ?
1 Hihi nĩ wambĩrĩirie kũhũthĩra Broshua ĩrĩa njerũ ya Nĩa Mareka Wendi wa Jehova Ũmũthĩ? Muoroto wayo nĩ (1) gũteithia arutwo a Bibilia mamenye Aira a Jehova wega, (2) kũmateithia merute ũhoro wa wĩra witũ, na (3) kũmonia ũrĩa ithondeka ritũ rĩrutaga wĩra. Broshua ya Wendi wa Jehova ĩrĩ na ithomo rĩmwe o thĩinĩ wa karatathi rĩrĩa mũngĩarĩrĩria na ndagĩka ithano nginya ikũmi hingo ciothe thutha wa kwĩruta Bibilia.
2. Taarĩria ũrĩa broshua ĩno ĩbangĩtwo na maũndũ marĩa marĩ thĩinĩ wayo.
2 Ũrĩa Ĩbangĩtwo: Broshua ĩno ĩgayanĩtio icunjĩ ithatũ, o gĩcunjĩ gĩkaarĩrĩria ũndũ ũmwe harĩ macio magwetetwo hau rũgongo megiĩ ithondeka rĩa Jehova. Ciongo cia mathomo mothe 28 ciandĩkĩtwo irĩ ciũria, nacio ciongo nyinyi iria irũmĩrĩire ciandĩkĩtwo na ndemwa mata igacokia ciũria icio. Ĩrĩ na mbica cia kuuma mabũrũri makĩria ma 50 iria ironania ũrĩa wĩra witũ ũrutagwo thĩinĩ wa thĩ yothe. Mathomo maigana ũna marĩ na tũthandũkũ tũrĩ na kĩongo “Caria Ũhoro Makĩria” tũrĩa tũrĩ na maũndũ ũngĩkĩra mũrutwo waku ngoro athuthurie.
3. Tũngĩhũthĩra broshua ya Wendi wa Jehova atĩa?
3 Ũrĩa Ũngĩmĩhũthĩra: Ambĩrĩria na kũũria mũrutwo kĩũria kĩrĩa arĩ kĩo kĩongo gĩa ithomo. Ũcoke hĩndĩ ĩrĩa mũrathoma ithomo rĩu, ũtĩtĩrithie ciongo iria icabĩtwo na ndemwa mata. Marigĩrĩrio-inĩ, mwarĩrĩrie ciũria iria irĩ mũhuro wa karatathi kau. No mũthome ithomo rĩothe mũcoke mũrĩarĩrĩrie kana mũthome gacunjĩ gwa gacunjĩ mũgĩkaaragĩrĩria. Hũthĩra ũtaũku kũmenya nĩ maandĩko marĩkũ mũgũthoma harĩ marĩa monanĩtio. Ndũkariganĩrũo kwarĩrĩria mbica na tũthandũkũ tũrĩa tũrĩ na kĩongo “Caria Ũhoro Makĩria.” Kaingĩ, mathomo macio magĩrĩirũo kwarĩrĩrio kũringana na ũrĩa marũmanĩrĩire. O na kũrĩ ũguo, ti ũũru gũthiĩ harĩ ithomo ũrona rĩrĩ na ũndũ mũrutwo arabatara kwamba kũmenya. Kwa ngerekano-rĩ, angĩkorũo harĩ na kĩgomano kana kĩrũrũngano gĩkuhĩrĩirie, no mũthiĩ ithomo rĩa 11.
4. Wee ũrakenera broshua ĩno njerũ nĩkĩ?
4 Rĩrĩa tũreruta Bibilia na mũndũ, tũmũteithagia amenyane na Ithe witũ wa igũrũ. O na kũrĩ ũguo, ningĩ nĩ tũkũbatara kũmũruta ũhoro wĩgiĩ ithondeka rĩa Jehova. (Thim. 6:20) Na githĩ ti gĩkeno kĩnene gũkorũo na broshua ĩno njerũ ĩrĩa ĩrahũthia wĩra ũcio!