Nĩa Mareka Wendi wa Jehova Ũmũthĩ?

1. Tũkambĩrĩria rĩ kwĩruta broshua Nĩa Mareka Wendi wa Jehova Ũmũthĩ? na tũkaagunĩka atĩa?

¹ Kwambĩrĩria kiumia kĩa Oktomba 28, broshua Nĩa Mareka Wendi wa Jehova Ũmũthĩ? nĩyo ĩkaahũthĩrũo Wĩruti-inĩ wa Bibilia wa Kĩũngano. Broshua ĩyo njerũ, ĩrĩa yaarutirũo Kĩrũrũngano-inĩ kĩa Ngʼongo kĩa “Gitagĩra Ngoro Yaku!” ĩhaarĩrĩirio yerekerie arutwo a Bibilia ithondeka-inĩ rĩa Jehova. Kwĩruta Broshua ĩyo nĩ gũgũtũma twende ithondeka rĩa Jehova makĩria, ningĩ nĩ gũtũteithie tũhotage kũmĩhũthĩra rĩrĩa tũrĩ ũtungata-inĩ.​—Thab. 48:13.

2. Tũkeeruta broshua ĩno atĩa kĩũngano-inĩ?

² Ũrĩa Tũkerutaga Broshua ĩyo: Ũrĩa ũratongoria nĩ akaabatara kũgaya ihinda wega nĩguo ithomo rĩmwe rĩtikaarĩe ihinda inene kũrĩ rĩrĩa rĩngĩ. Akambagĩrĩria o ithomo harĩ mothe 28 na kũũria kĩũria kĩrĩa arĩ kĩo kĩongo gĩa ithomo. Thutha ũcio, orie ũrĩa ũrathoma athome kĩbungo kĩa mbere. Acoke orie athikĩrĩria kĩũria kĩrĩa ahaarĩirie gĩa kĩbungo kĩu. Thutha ũcio, ibungo iria ciambĩrĩirie na ciugo irĩ na ndemwa ngwatu rangi ithomwo na ciarĩrĩrio kĩmwe gwa kĩmwe. O kĩbungo gĩathomwo, ũrĩa ũratongoria orie athikĩrĩria mataarĩrie ũrĩa kĩbungo kĩu gĩcoketie kĩũria kĩrĩa arĩ kĩo kĩongo gĩa ithomo rĩu. Broshua ĩyo ningĩ ĩrĩ na mbica nyingĩ iria athikĩrĩria mangĩhũthĩra magĩcokia ciũria. Maandĩko ma mũthingi magĩrĩirũo gũthomwo kũringana na mahinda. Mũtanambĩrĩria ithomo rĩrĩa rĩrũmĩrĩire, ũrĩa ũratongoria agĩrĩirũo kũũria ciũria iria irĩ hau mũhuro, irĩ cia kwĩririkania maũndũ marĩa mweruta. Angĩkorũo harĩ na gathandũkũ ga “Caria Ũhoro Makĩria,” gathomwo, na orie athikĩrĩria moige ũrĩa mũrutwo wa Bibilia arĩteithĩkaga ahũthĩra motaaro ma gathandũkũ kau. Ihinda rĩngĩtĩkĩria, ũrĩa ũratongoria no ahũthĩre ciongo cia mathomo akĩrĩkĩrĩria irĩ ciũria cia kwĩririkania. Ririkana atĩ to mũhaka mũhunjia arũmĩrĩre mũtaratara ũyũ akĩĩruta na mũndũ Bibilia.

3. Tũngĩgunĩka biũ na njĩra ĩrĩkũ tweruta broshua ĩno?

³ Nĩguo ũkaagunĩka biũ, tigĩrĩra atĩ nĩ wĩhaarĩirie wega ũgĩthiĩ mĩcemanio na wĩrutanĩrie gũcokia. Hĩndĩ ya wĩruti, wĩcirie ũrĩa ũhoro ũcio ũngĩteithia arutwo a Bibilia. Rekei kwĩruta broshua ĩyo gũtũhotithie gũteithia arĩa angĩ manyitanĩre na ithuĩ gwĩka wendi wa Ngai, nĩ getha o nao magĩe na kĩĩrĩgĩrĩro gĩa gũgatũũra tene na tene.​—1 Joh. 2:17.