Kambĩini ya Bata

1. Kambĩini ya gwĩta andũ kĩgomano-inĩ ĩkambĩrĩria rĩ?

¹ Ũngĩkorũo ũhaarĩirie ndĩa nene nĩ ũndũ wa famĩlĩ kana arata aku, na ũkorũo ũhũthĩrĩte mbeca nyingĩ na ũkaruta wĩra mũingĩ, ũngĩkorũo ũcanjamũkĩte mũno ũkĩmeta. Ũndũ ũmwe na ũcio, wĩra mũingĩ nĩ ũrutĩtwo kũhaarĩrĩria ndĩa nene ya kĩĩroho ĩrĩa ĩgakorũo kĩgomano-inĩ kĩrĩa gĩũkĩte. Ciumia ithatũ mbere ya kĩgomano kĩambĩrĩirie, nĩ tũgaakorũo na mweke mwega ũrĩa tũheetwo nĩ Jehova wa kũheana tũratathi twa kũnyita andũ ũgeni. Nĩ kĩĩ gĩgatũteithia tũmete tũcanjamũkĩte?

2. Nĩ kĩĩ gĩgatũteithia tũnyitanĩre na kĩyo kambĩini-inĩ?

² Tweciria ũrĩa ithuĩ ene tũgunĩkaga nĩ irio iria Jehova atũheaga igomano-inĩ, nĩ tũkaanyitanĩra biũ na ahunjia arĩa angĩ kambĩini-inĩ ĩyo ya gwĩta andũ. (Isa. 65:13, 14) Ningĩ nĩ wega kũririkana atĩ, kambĩini iria twĩkaga o mwaka, nĩ ikoragwo na moimĩrĩro mega. (Rora gathandũkũ ka “Nĩ Ĩgĩaga na Moimĩrĩro Mega.”) Andũ amwe tũgeeta hĩndĩ ya kambĩini, nĩ magoka. O na angĩkorũo ti othe magoka, kĩyo giitũ hĩndĩ ya kambĩini, nĩ gĩkarehera Jehova rũgooco na kĩonanie ũtaana wake.—Thab. 145:3, 7; Kũg. 22:17.

3. Tũratathi twa kũnyita andũ ũgeni tũkaheanwo atĩa?

³ Kĩama gĩa athuri no kĩarĩrĩrie ũrĩa tũratathi twa kũnyita andũ ũgeni tũkaheanwo, na kana ahunjia nĩ magatũheana kũndũ kwa mũingĩ, kana gũtũikia nyũmba iria matagaakora andũ. Mũthia-inĩ wa ciumia, tũratathi tũu no tũheanwo hamwe na ngathĩti mũngĩona hagĩrĩire. Kambĩini yathira-rĩ, na githĩ tũtigaakorũo na gĩkeno kĩnene nĩ kũmenya atĩ twekire ũrĩa wothe twahotire, kũnyitanĩra tũcanjamũkĩte gwĩta andũ ndĩa-inĩ ĩyo ya kĩĩroho Jehova atũhaarĩrĩirie!

Nĩ Ĩgĩaga na Moimĩrĩro Mega

Mĩaka ĩigana ũna mĩhĩtũku mwarĩ wa Ithe witũ ũmwe agĩka kambĩini ya kũnyita andũ ũgeni, nĩ arigagwo kana nĩ haarĩ na bata wa gwĩkĩra kĩyo kĩnene kũheana tũratathi tũu. Eyũragia, ‘Hihi kũna andũ nĩ magetĩkĩra gũka kĩgomano-inĩ?’ Hĩndĩ ya kĩgomano mũthenya wa Njuuma rũcinĩ, nĩ onire mũndũrũme ũmwe Mũkarathingʼa aikarĩte thĩ hakuhĩ nake, na agĩciria amwarĩrie. Mũndũrũme ũcio okĩte kĩgomano-inĩ tondũ nĩ aahetwo karatathi ga kũmũnyita ũgeni. Nĩ aarĩ na ciũria cigana ũna na mwarĩ wa Ithe witũ ũcio akĩmũcokeria. Agĩtaarĩria ũrĩa aakeneire kĩgomano na ũrĩa akenetio nĩ mwĩhumbĩre na mĩtugo ya arĩa mokĩte. Thutha-inĩ mũthenya o ũcio, mwarĩ wa Ithe witũ ũcio nĩ aambĩrĩirie ndeereti na mũthuri ũmwe na mũtumia wake arĩa maikarĩte hakuhĩ nake. O nao mokĩte na mbathi thutha wa kũheo karatathi ga kũnyita andũ ũgeni. Nĩ maakenagĩra kĩgomano na nĩ mabangĩte gũka mũthenya wa Kiumia. Hĩndĩ ĩyo nĩrĩo mwarĩ wa Ithe witũ aamenyire bata wa kambĩini ya gwĩta andũ.
Kĩgomano-inĩ kĩmwe gĩa ica ikuhĩ, mapainia erĩ mũthuri na mũtumia, nĩ maaririe na mũthuri ũmwe mũkũrũ na mũtumia wake. Mũthuri ũcio mũkũrũ na mũtumia wake, moigire atĩ rĩarĩ rĩa mbere gũka kĩgomano-inĩ. Mapainia acio mamoria ũrĩa wametire, moigirie, “Twainũkire mũciĩ mũthenya ũmwe tũgĩkora karatathi ga kũnyita andũ ũgeni rungu rwa mũrango witũ.” Maathomire karatathi kau na makĩiyũria ũhoro wao na hau thutha wako. Thutha ũcio, nĩ maaheirũo irio cia mũthenya nĩ aarĩ na ariũ a Ithe witũ. Nĩ maakeneire kĩgomano mũno na makĩbanga gũgoka mũthenya ũrĩa warũmĩrĩire. Nĩ gwekirũo mĩbango ya kũmaceerera na gũtwarithia ndeereti na mbere.