Ũtũũro Waku wa Mahinda Mokĩte Wĩhocetie Harĩ Kĩĩ?
Andũ aingĩ metĩkĩtie atĩ ũtũũro wao wa mahinda marĩa mokĩte wĩhocetie harĩ hinya ũtarĩ wa ndũire. Nĩ ũndũ wa wĩtĩkio ũcio, marũmagĩrĩra mĩtugo ĩrĩa meciragia atĩ no yagagĩrie ũtũũro wao wa mahinda mokĩte.
MAŨNDŨ MARĨA ANDŨ AINGĨ METĨKĨTIE
ŨŨGĨ WA NJATA: Andũ amwe metĩkĩtie atĩ ũtũũro wao ũkoragwo wĩhocetie harĩ ũrĩa njata ikoragwo ciĩbangĩte igũrũ rĩrĩa maciarũo. Matuĩragia ũhoro wa njata ngathĩti-inĩ kana kuuma kũndũ kũngĩ, nĩguo mamenye ũrĩa ũtũũro wao wa mahinda mokĩte ũgaakorũo ũhaana, na makahũthĩra ũhoro ũcio gũtua matua.
GŨTHOMA KANDI: Angĩ metĩkĩtie atĩ kwaria na arĩa mathomaga kandi no kũmateithie kũmenya kĩrĩa kĩratũma maũndũ mamwe mamakore, na ũrĩa magĩrĩirũo nĩ gwĩka. Metĩkĩtie atĩ mamenya gĩtũmi, no mahote gwĩthema ũgwati ũrĩa ũngĩmakora, mone kĩhonia gĩa thĩna ũcio, na magaacĩre.
GŨTHATHAIYA MAGUKA: Angĩ nao metĩkĩtie atĩ no mũhaka meke maũndũ ma gũtĩa maguka mao ma tene, kana ngai itiganĩte nĩguo magitĩrũo nĩo na marathimwo. Van,a ũrĩa ũikaraga Vietnam, aaugire, “Ndetĩkĩtie atĩ ingĩka maũndũ ma gũtĩa maguka makwa ma tene, no ngĩe na ũtũũro mwega ihinda-inĩ rĩrĩ na ihinda-inĩ rĩũkĩte hamwe na ciana ciakwa.”
GŨCIARŨO RĨNGĨ: Andũ aingĩ metĩkĩtie atĩ mũndũ akua aciaragwo rĩngĩ, na o na akua rĩngĩ agaciarũo rĩngĩ na rĩngĩ. Metĩkĩtie atĩ maũndũ mega kana moru marĩa maracemania namo ihinda-inĩ rĩrĩ, nĩ maumĩrĩra ma ũtũũro ũrĩa maatũũrĩte mbere matanaciarũo rĩngĩ.
O na gũtuĩka andũ aingĩ moigaga atĩ matiĩtĩkĩtie maũndũ ta macio, no meingĩragia maũndũ-inĩ ta gũthoma njara, gũtuĩria njata, gũthoma kandi, na maũndũ mangĩ ta macio. Monaga atĩ maũndũ macio hihi no mamateithie kũmenya ũhoro wĩgiĩ ũtũũro wao wa mahinda mokĩte.
MAUMĨRĨRA MAKORETWO MARĨ MARĨKŨ?
Hihi arĩa meingĩranagia na mĩtugo ta ĩyo nĩ magĩaga na ũtũũro mwega?
Ta wĩcirie ũhoro wĩgiĩ Hào, ũrĩa ũikaraga Vietnam. Eeingĩrĩtie maũndũ-inĩ ta ũũgĩ wa njata, mũtugo wa kũhũthĩra indo ta compass na mĩcoro gũtuĩria ũhoro wa mahinda mokĩte, na gũthathaiya maguka ũtũũro-inĩ wake. Hihi nĩ aateithĩkire? Aaugire ũũ: “Biacara yakwa nĩ yathũkire, ngĩingĩra mathiirĩ-inĩ, ngĩgĩa na mathĩna ma famĩlĩ, na ngĩkua ngoro mũno.”
Qiuming, kuuma Taiwan, o nake nĩ eetĩkĩtie maũndũ ta ũũgĩ wa njata, gũciarũo rĩngĩ, ũtũũro wa mũndũ gũkorũo ũrĩ mũbange, mũtugo wa kũhũthĩra indo ta compass na mĩcoro gũtuĩria ũhoro wa mahinda mokĩte, na gũthathaiya maguka. Thutha wa gũthuthuria mawĩtĩkio macio wega, aaugire ũũ: “Nĩ ndamenyire atĩ mĩtugo ĩyo na mawĩtĩkio macio nĩ mahĩngĩcanaga na matitaũkĩkaga. Nĩ ndonire atĩ maũndũ maingĩ marĩa ndarathagĩrũo kuumana na gũtuĩria njata matiakoragwo marĩ ma ma. Ũhoro-inĩ wĩgiĩ gũciarũo rĩngĩ, [ndeyũragia] angĩkorũo ndũngĩhota kũririkana ũrĩa watũũraga ũtanaciarũo rĩngĩ-rĩ, ũngĩhota atĩa kwagĩria ũtũũro waku wa ihinda rĩrĩ?”
“Nĩ ndamenyire atĩ mĩtugo ĩyo na mawĩtĩkio macio nĩ mahĩngĩcanaga na matitaũkĩkaga.”—QIUMING, TAIWAN
O ta ũrĩa Hào, Qiuming, na angĩ aingĩ meyoneire, ũtũũro witũ ndũkoragwo wĩhocetie harĩ ũndũ mũbange, njata, maguka ma tene, kana gũciarũo rĩngĩ. Hihi ũguo nĩ kuuga atĩ gũtirĩ ũndũ tũngĩka nĩguo twagagĩrie ũtũũro witũ wa mahinda mokĩte?
Andũ aingĩ meciragia atĩ gũthingata gĩthomo na ũtonga nĩkuo kũngĩmateithia gũkaagĩa na ũtũũro mwega. Andũ arĩa mathingatĩte maũndũ macio magĩĩte na maumĩrĩra marĩkũ?
a Marĩĩtwa mamwe nĩ macenjetio gĩcunjĩ-inĩ gĩkĩ, na icunjĩ-inĩ iria irũmĩrĩire.
b Ciugo icio ikoragwo Bibilia-inĩ thĩinĩ wa Agalatia 6:7. Nĩ iratwarana na thimo ĩmwe yũĩkaine mũno gĩcigo-inĩ kĩa Asia, ĩrĩa yugaga wahanda meroni, ũkaagetha meroni; wahanda mboco, ũkaagetha mboco.