GĨCUNJĨ KĨA WĨRUTI KĨA 31
RWĨMBO NA. 111 Itũmi Citũ cia Gũkena
Hihi nĩ ‘Wĩrutĩte Hitho’ ya Kũiganĩra?
“Nĩ ndĩrutĩte kũiganĩra gũtekũmakania ũrĩa maũndũ makwa matariĩ.”—AFIL. 4:11.
ŨNDŨ ŨRĨA WARĨRĨIRIO
Nĩ tũkuona ũrĩa tũngĩĩruta kũiganĩra na njĩra ya gũkoragwo na ngatho, kũiga meciria harĩ wendi wa Jehova na gũkorũo tũrĩ enyihia, na gwĩcũranagia ũhoro wĩgiĩ kĩĩrĩgĩrĩro gitũ kĩa ihinda rĩũkĩte.
1. Kũiganĩra nĩ kuuga atĩa, no ũndũ ũcio ndũronania atĩa?
HIHI nĩ ũiganagĩra na kĩrĩa wĩ nakĩo? Mũndũ ũiganagĩra nĩ agĩaga na gĩkeno na thayũ, tondũ aigaga meciria harĩ irathimo iria arĩ nacio. Ndaiguaga ũũru kana akarakara nĩ ũndũ wa kĩrĩa atarĩ nakĩo. O na kũrĩ ũguo, gũkorũo ũiganĩire ti kuuga atĩ ndũtindanagĩra na ũrĩa ũtũũro waku ũhaana. Kwa ngerekano, Mũkristiano ndangĩkorũo ahĩtĩtie angĩcaria mĩeke ya kwandandũra ũtungata wake. (Rom. 12:1; 1 Tim. 3:1) No ndoragwo nĩ gĩkeno angĩona ta atarakinyĩra mĩeke ĩyo na ihenya.
2. Kwaga kũiganĩra kũngĩkorũo na maumĩrĩro marĩkũ moru?
2 Kwaga kũiganĩra no gũkorũo na maumĩrĩro moru. Arĩa mataiganagĩra na kĩrĩa marĩ nakĩo no mambĩrĩrie kũrutaga wĩra mathaa maingĩ nĩguo megĩĩre na indo o na matarabatara. Ũndũ wa kĩeha nĩ atĩ, Akristiano amwe o na manaiya mbeca kana indo ingĩ marerirĩria. Kwahoteka meyũmagĩrĩria ũũ: ‘Kĩndũ gĩkĩ o na kĩbatiĩ gũkorũo kĩrĩ gĩakwa,’ ‘Nĩ ndĩrabatara kĩndũ gĩkĩ,’ kana ‘Ngwamba njoe mbeca ici, nĩ ngaacokia thutha-inĩ.’ Ĩndĩ ũici wa mũthemba o wothe nĩ ũrakaragia Jehova na ũkamwagĩra gĩtĩo. (Thim. 30:9) Angĩ nao nĩ makuĩte ngoro mũno nĩ ũndũ wa kwaga kwamũkĩra mweke wa ũtungata meriragĩria, nginya magatiga gũtungatĩra Jehova. (Gal. 6:9) Nĩ kĩĩ kĩngĩtũma Mũkristiano wĩyamũrĩire Jehova akinyĩrĩre gwĩka ũguo? No kũhoteke nĩ atigĩte kũiganagĩra na kĩrĩa e nakĩo.
3. Nĩ ũndũ ũrĩkũ wa gwĩkĩra ngoro tũreruta thĩinĩ wa Afilipi 4:11, 12?
3 Ithuothe no twĩrute kũiganagĩra na kĩrĩa twĩ nakĩo. Mũtũmwo Paulo aandĩkire atĩ ‘nĩ eerutĩte kũiganĩra gũtekũmakania ũrĩa maũndũ make matariĩ.’ (Thoma Afilipi 4:11, 12.) Akĩandĩka ciugo icio aarĩ kĩoho-inĩ. No tondũ nĩ ‘eerutĩte hitho’ ya kũiganĩra, ndoorirũo nĩ gĩkeno gĩake. Ciugo cia Paulo o hamwe na kĩonereria gĩake no itũhe ũũma atĩ o na ithuĩ no tũhote kũiganagĩra gũtekũmakania ũrĩa maũndũ maitũ matariĩ. Kũiganĩra ti ũndũ wĩrehaga guo mwene, ĩndĩ no nginya twĩrute gwĩka ũguo. Na njĩra ĩrĩkũ? Nĩ tũkwarĩrĩria maũndũ mamwe mangĩtũteithia kwĩruta hitho ya kũiganĩra.
KORAGWO NA NGATHO
4. Gũkorũo na ngatho gũtũteithagia atĩa kũiganĩra? (1 Athesalonike 5:18)
4 Mũndũ ũkoragwo na ngatho nĩ ahotaga kũiganĩra na kĩrĩa e nakĩo. (Thoma 1 Athesalonike 5:18.) Kwa ngerekano, angĩkorũo nĩ tũkoragwo na ngatho nĩ ũndũ wa kuona mabataro ma o mũhaka, kwahoteka tũtingĩtangĩka mũno nĩ ũndũ wa gũkorũo tũtarĩ na indo iria twĩriragĩria. Ningĩ rĩrĩa twakorũo na ngatho harĩ Jehova nĩ ũndũ wa mĩeke ĩrĩa atũheete ya ũtungata, tũtirĩtangĩkaga nĩ ũndũ wa mĩeke ĩrĩa tũtarĩ nayo. Handũ ha ũguo, tũrĩigaga meciria maitũ harĩ kũhingia mawĩra marĩa twĩhokeirũo na njĩra ĩrĩa njega biũ. O na Maandĩko nĩ matwĩkĩraga ngoro gũcokagĩria Jehova ngatho mahoya-inĩ maitũ. Gũkorũo na ngatho nĩ gũtũteithagia kũgĩa na “thayũ wa Ngai ũrĩa ũkĩrĩte ũtaũku wothe.”—Afil. 4:6, 7.
5. Aisiraeli maarĩ na itũmi irĩkũ cia gũkorũo na ngatho? (Ningĩ rora mbica.)
5 Ta wĩcirie ũrĩa gwathiire harĩ Aisiraeli. Nĩ maatetagia Jehova maita maingĩ tondũ nĩ meeriragĩria irio iria maarĩaga Misiri. (Ndar. 11:4-6) Ma nĩ atĩ, ũtũũro ndwarĩ mũhũthũ marĩ werũ-inĩ. No hihi nĩ kĩĩ kĩngĩamateithirie kũiganĩra na kĩrĩa maarĩ nakĩo? Maabatiĩ gwĩciria ũhoro wa maũndũ marĩa mothe Jehova aamekĩire na makorũo na ngatho nĩ ũndũ wamo. Nĩ maabatiĩ kũririkana atĩ marĩ Misiri kũrĩa maarutithagio wĩra mũritũ wa ũkombo, Jehova nĩ aareheire Amisiri mahũũra ikũmi nĩguo amahonokie. Ningĩ thutha wa Aisiraeli kũrekererio, nĩ ‘maatahire Amisiri’ indo cia betha, na cia thahabu, o hamwe na nguo. (Tham. 12:35, 36) Na rĩrĩa maarĩ rũteere-inĩ rwa Iria Itune, nĩ moonire mbũtũ cia Firauni ciũkĩte kũmatharĩkĩra, no Jehova akĩmahonokia na njĩra ya kũgayũkania maĩ ma Iria rĩu. Ningĩ marĩ werũ-inĩ, Jehova nĩ aamaheaga maana o mũthenya. Gũkĩrĩ ũguo-rĩ, nĩ kĩĩ gĩagĩtũmaga matetie Jehova? O na gũtuĩka Jehova nĩ aamaheaga irio cia kũigana, maagaga kũiganĩra tondũ matiakoragwo na ngatho nĩ ũndũ wa kĩrĩa maarĩ nakĩo.
Nĩ kĩĩ gĩatũmire Aisiraeli mage kũiganĩra na kĩrĩa maarĩ nakĩo? (Rora kĩbungo gĩa 5)
6. Nĩ maũndũ ta marĩkũ mangĩtũteithia gũkoragwo na ngatho?
6 Ũngĩka atĩa nĩguo ũkoragwo na ngatho? Wa mbere, caragia mahinda o mũthenya ma gwĩcũrania maũndũ marĩa ũkeneire. O na no wandĩke maũndũ merĩ kana matatũ marĩa ũrĩ na ngatho nĩ ũndũ wamo. (Maca. 3:22, 23) Wa kerĩ, cokagia ngatho. Cokagĩria arĩa angĩ ngatho nĩ ũndũ wa maũndũ marĩa magwĩkagĩra. Makĩria ma ũguo, cokagĩria Jehova ngatho o mũthenya. (Thab. 75:1) Wa gatatũ, tigagĩrĩra atĩ arata aku a hakuhĩ nĩ andũ macokagia ngatho. Ririkana atĩ gũkorũo na ngatho nĩ kũgwatanagio, na noguo o na kwaga kũiganĩra. (Gũcok. 1:26-28; 2 Tim. 3:1, 2, 5) Tũngĩcaragia mĩeke ya gũcokia ngatho, no twage gũtangĩka nĩ ũndũ wa kĩrĩa tũtarĩ nakĩo.
7. Aci eekire atĩa nĩguo akoragwo na ngatho, na maumĩrĩro maarĩ marĩkũ?
7 Ta wĩcirie ũrĩa gwathiire harĩ mwarĩ wa Ithe witũ wĩtagwo Aci, ũrĩa ũikaraga Indonesia. Aaugire ũũ: “Hĩndĩ ya kĩngʼũki gĩa COVID-19, nĩ ndambĩrĩirie kwĩringithania na aarĩ na ariũ a Ithe witũ arĩa angĩ. Ũndũ ũcio watũmire njage kũiganĩra na kĩrĩa ndaarĩ nakĩo.” (Gal. 6:4) Nĩ kĩĩ kĩamũteithirie kũgarũrĩra mwĩcirĩrie wake? Aaugire ũũ: “Nĩ ndambĩrĩirie gũtara irathimo iria ndamũkagĩra o mũthenya na gwĩcũrania ũhoro wa maũndũ maingĩ mega marĩa ngĩte namo nĩ ũndũ wa gũkorũo ithondeka-inĩ rĩa Jehova. Thutha ũcio ngacokeria Jehova ngatho nĩ ũndũ wamo. Gwĩka ũguo nĩ kwandeithirie kũiganagĩra na kĩrĩa ndĩ nakĩo.” Angĩkorũo nĩ ũiguaga ũtekũiganĩra na kĩrĩa wĩ nakĩo-rĩ, na githĩ to ũrũmĩrĩre kĩonereria kĩu nĩguo ũkoragwo na ngatho?
IGA MECIRIA HARĨ WENDI WA JEHOVA NA ŨKORŨO NA WĨNYIHIA
8. Baruku aagũire mũtego-inĩ ũrĩkũ?
8 Hĩndĩ ĩmwe Baruku, ũrĩa warĩ mwandĩki wa mũnabii Jeremia, nĩ aagũire mũtego-inĩ wa kwaga kũiganĩra. Baruku eehokeirũo wĩra mũritũ wa gũteithĩrĩria Jeremia kũhe rũrĩrĩ rũremi rwa Isiraeli ndũmĩrĩri nditũ ya ituĩro. No nĩ haakinyire handũ agĩtiga kũiga meciria harĩ wendi wa Jehova, na akĩambĩrĩria kwĩĩciria mũno na gwĩciria maũndũ marĩa we eendaga gwĩka. No Jehova aamwĩrire ũũ kũgerera Jeremia: “Wee nĩ ũrecarĩria maũndũ manene. Tiga gũcaria maũndũ ta macio.” (Jer. 45:3-5) Na ciugo ingĩ nĩ ta Jehova aamwĩraga: “Iganĩra na kĩrĩa wĩ nakĩo.” Baruku nĩ aarũmĩrĩire ũtaaro ũcio, na agĩthiĩ na mbere gwĩtĩkĩrĩka nĩ Jehova.
9. Tũreruta atĩa kuumana na 1 Akorintho 4:6, 7? (Ningĩ rora mbica.)
9 Rĩmwe Mũkristiano no one ta aragĩrĩra kũheo mweke mũna wa ũtungata. Ahota gwĩciria ũguo tondũ arĩ na ũũgĩ mũingĩ wa gwĩka maũndũ, nĩ akoragwo na kĩyo, kana tondũ nĩ agĩte na ũmenyeru mũnene. Ĩndĩ no one atĩ arĩa angĩ nĩo maraheo mweke ũcio eriragĩria. Hihi nĩ kĩĩ kĩngĩmũteithia ndakaigue ũũru? No ecũranie ciugo cia mũtũmwo Paulo iria irĩ thĩinĩ wa 1 Akorintho 4:6, 7. (Thoma.) Mweke o wothe twamũkagĩra, kana ũhoti o wothe tũngĩkorũo naguo, ikoragwo ciumĩte kwĩ Jehova. Ndatũheaga maũndũ macio atĩ tondũ nĩ tũragĩrĩra, no ekaga ũguo nĩ ũndũ wa ũtugi wake mũnene.—Rom. 12:3, 6; Ef. 2:8, 9.
Ũhoti o wothe twĩ naguo tũheetwo nĩ Jehova nĩ ũndũ wa ũtugi wake mũnene (Rora kĩbungo gĩa 9)b
10. Nĩ kĩĩ kĩngĩtũteithia gũkorũo na wĩnyihia?
10 Gwĩcũrania na njĩra ndikĩru igũrũ rĩgiĩ kĩonereria kĩa Jesu no gũtũteithie gũkorũo na wĩnyihia. Ta wĩcirie ũndũ ũyũ: Jesu nĩ aathambirie atũmwo ake magũrũ, o na gũtuĩka nĩ aamenyaga atĩ aarĩ Mũrũ wa Ngai na nĩ aahetwo wathani wothe. Mũtũmwo Johana aandĩkire ũũ: “Jesu nĩ aamenyaga atĩ Ithe nĩ aamũheete indo ciothe na atĩ ooimĩte kũrĩ Ngai na aarĩ hakuhĩ gũcoka kũrĩ Ngai,” no nĩ ookĩrire na “akĩambĩrĩria gũthambia arutwo magũrũ.” (Joh. 13:3-5) Jesu nĩ aangĩonire ta arĩ we wabatiĩ gũthambio magũrũ nĩ atũmwo ake. No ihinda-inĩ rĩrĩa rĩothe aarĩ gũkũ thĩ, gũtirĩ hĩndĩ oonire atĩ tondũ aarĩ Mũrũ wa Ngai, nĩ aagĩrĩire gũkorũo na ũtũũro wa kĩrathi kĩa igũrũ. (Luk. 9:58) Jesu aarĩ mwĩnyihia na nĩ aaiganagĩra na kĩrĩa aarĩ nakĩo. Na githĩ kĩu ti kĩonereria kĩega aatũigĩire?—Joh. 13:15.
11. Nĩ kĩĩ gĩteithagia Dennis kũiganagĩra?
11 Dennis ũrĩa ũikaraga Netherlands, nĩ erutanagĩria kũrũmĩrĩra kĩonereria kĩa Jesu kĩgiĩ wĩnyihia, no ndũkoretwo ũrĩ ũndũ mũhũthũ gwĩka ũguo. Aaugire: “Rĩrĩa mũndũ ũngĩ aheo mweke wa ũtungata ndĩriragĩria, rĩmwe nĩ njiguaga ndarakara nĩ ũndũ wa kuona ta arĩ niĩ batiĩ kũheo mweke ũcio. Ihinda-inĩ ta rĩu, nĩ thomaga icunjĩ iria ciaragĩrĩria ũhoro wa wĩnyihia. Ningĩ thĩinĩ wa JW Library®, nĩ ngoragwo njĩkĩrĩte rũũri (tag) maandĩko-inĩ mamwe marĩa maragĩrĩria wĩnyihia, nĩguo ngahota kũmona na ihenya na ngamathoma kaingĩ. Makĩria ma ũguo nĩ njĩkĩrĩte thimũ-inĩ yakwa video imwe ciaragĩrĩria wĩnyihia na ngacithikĩrĩria kaingĩ.a Nĩ ndĩrutĩte atĩ wĩra o wothe twĩhokeirũo, tũũrutaga nĩguo tũgoocithie Jehova no ti nĩguo twĩgoocithie. Jehova nĩ atigĩrĩire atĩ o ũmwe witũ arĩ na wĩra angĩteithĩrĩria, no nĩwe ũtũmaga ũgaacĩre.” Angĩkorũo rĩmwe nĩ ũiguaga ũtekũiganĩra na mweke wa ũtungata ũrĩa ũrĩ naguo, wĩrutanĩrie gũkũria ngumo ya wĩnyihia. Ũndũ ũcio no wĩkĩre hinya ũrata waku na Jehova na ũgũteithie kũiganagĩra.—Jak. 4:6, 8.
WĨCŨRANAGIE ŨHORO WA KĨĨRĨGĨRĨRO GITŨ
12. Nĩ kĩĩrĩgĩrĩro kĩrĩkũ kĩa ihinda rĩũkĩte gĩtũmaga tũigue tũiganĩire? (Isaia 65:21-25)
12 Gwĩcũranagia ũhoro wĩgiĩ kĩĩrĩgĩrĩro gitũ kĩa magegania nĩ gũtũteithagia kũigua tũiganĩire. Ibuku-inĩ rĩa Isaia, Jehova atwĩrĩte atĩ nĩ ataũkagĩrũo nĩ moritũ marĩa mothe tũgeragĩra, na agatwĩrĩra atĩ nĩ agaatwehereria mathĩna macio mothe. (Thoma Isaia 65:21-25.) Tũgaaikaraga nyũmba njega irĩ na ũgitĩri, tũkaruta wĩra ũrĩ na uumithio, na tũkarĩa irio njega cia gwaka mwĩrĩ. Ningĩ gũtirĩ hĩndĩ tũkaigua guoya rĩngĩ, tondũ ithuĩ hamwe na ciana citũ tũgaaikaraga kũndũ kũrĩ na ũgitĩri. (Isa. 32:17, 18; Ezek. 34:25) No tũkorũo na ma biũ atĩ ciĩranĩro icio nĩ ikaahinga.
13. Nĩ mahinda-inĩ ta marĩkũ tũngĩbatara gwĩcũrania mũno igũrũ rĩgiĩ kĩĩrĩgĩrĩro gitũ?
13 Nĩ tũrabatara gwĩcũranagia ũhoro wa kĩĩrĩgĩrĩro gitũ ihinda-inĩ rĩrĩ gũkĩra hĩndĩ ĩngĩ o yothe. Gĩtũmi nĩ tondũ tũratũũra “matukũ-inĩ ma kũrigĩrĩria,” na ithuothe nĩ tũracemania na maũndũ “maritũ kũhiũrania namo.” (2 Tim. 3:1) O mũthenya Jehova nĩ atũteithagia gũkirĩrĩria na njĩra ya gũtũhe motaaro, gũtwĩkĩra hinya, na gũtũhe ũteithio ũrĩa tũrabatara. (Thab. 145:14) Makĩria ma ũguo, kĩĩrĩgĩrĩro gitũ nĩ gĩtũtiiragĩrĩra rĩrĩa tũragerera moritũ. Angĩkorũo nĩ ũritũhagĩrũo kũhingĩria famĩlĩ yaku mabataro ma o mũhaka-rĩ, hihi ũguo nĩ kuuga atĩ ũgũtũũra ũgiĩkaga ũgĩcaria mabataro? Aca, tondũ Jehova atwĩrĩire atĩ thĩinĩ wa Paradiso, agaatũhe nginya makĩria ma kĩrĩa tũrabatara. (Thab. 9:18; 72:12-14) Angĩkorũo nĩ ũhiũranagia na mũrimũ mũnene, depression, kana mathĩna ma ũkũrũ-rĩ, hihi ũgũtũũra na mathĩna macio ũtekuona kĩhonia? Aca. Thĩinĩ wa thĩ njerũ, Ngai nĩ akaaniina mĩrimũ na gĩkuũ. (Kũg. 21:3, 4) Kĩĩrĩgĩrĩro kĩu nĩ gĩtũteithagia kũiganĩra na kwaga kũrakario nĩ maũndũ marĩa marekĩka ihinda-inĩ rĩrĩ. Nĩ tũiguaga tũiganĩire rĩrĩa twacemania na ũndũ ũtarĩ wa kĩhooto, twakuĩrũo, twarũara, kana twacemania na ũndũ ũngĩ mũritũ. Nĩkĩ? Tondũ nĩ tũĩ atĩ ‘mathĩna marĩa tũcemanagia namo nĩ ma ihinda inini,’ na atĩ mathĩna mothe nĩ makaaniinwo biũ thĩinĩ wa thĩ njerũ.—2 Kor. 4:17, 18.
14. Tũngĩĩkĩra kĩĩrĩgĩrĩro gitũ hinya atĩa?
14 Nĩ tuona atĩ kĩĩrĩgĩrĩro nĩ gĩtũteithagia kũiganĩra. No hihi tũngĩkĩra kĩĩrĩgĩrĩro gitũ hinya atĩa? O ta ũrĩa mũndũ ũragerera barabara kũrĩ na nduma angĩbatara kũhũthĩra toci nĩguo one wega kũrĩa arathiĩ, no taguo tũngĩbatara gwĩcũrania maũndũ marĩa tũgaakenera Paradiso nĩguo tũhote kũhũũra mbica wega ũrĩa ũtũũro ũgaakorũo ũhaana ihinda rĩũkĩte. Kwa ngerekano, rĩrĩa tũratangĩka nĩ ũndũ wa kwaga mbeca njiganu cia mabataro, no tũhũũre mbica ũrĩa ũtũũro ũgaakorũo ũhaana rĩrĩa tũtakabatara mbeca na gũtagaakorũo na mũndũ mũthĩni. Na angĩkorũo nĩ tũiguaga tũkuĩte ngoro nĩ ũndũ wa kwaga kwamũkĩra mweke mũna wa ũtungata twĩriragĩria, no twĩcirie ũrĩa tũtagathumbũrũo nĩ ũndũ ta ũcio thutha wa gũtungatĩra Jehova mĩaka ngiri nyingĩ tũrĩ akinyanĩru. (1 Tim. 6:19) Nĩ ũndũ wa ũrĩa twĩ na mĩtangĩko mĩingĩ ya ũtũũro, no tũritũhĩrũo gwĩcũrania igũrũ rĩgiĩ ciĩranĩro icio cia ihinda rĩũkĩte. No tũngĩĩrutanĩria gwĩka ũguo, thutha wa ihinda no ũkorũo ũrĩ ũndũ mũhũthũ kũiga meciria maitũ harĩ kĩĩrĩgĩrĩro gitũ.
15. Ciugo cia Christa irakũruta atĩa?
15 Ta wĩcirie ũrĩa kĩĩrĩgĩrĩro gitũ gĩteithagia Christa, ũrĩa mũthuriwe Dennis ekũgwetetwo hau kabere. Christa aaugire: “Nĩ ngoragwo na mũrimũ mũũru ũtũmaga njage hinya marũngo, ũũ atĩ bataraga kũhũthĩra wheelchair, na kaingĩ ndindaga ũrĩrĩ. Gũtirĩ hĩndĩ itakoragwo na ruo. Ndagĩtarĩ erĩga kũnjĩra atĩ mũrimũ wakwa ndũrĩ na kĩhonia. No o rĩo ngĩĩra, ‘Niĩ ndĩrona maũndũ na njĩra ngũrani.’ Njigaga meciria harĩ kĩĩrĩgĩrĩro gitũ, na ũndũ ũcio nĩ ũtũmaga ngĩe na thayũ wa meciria. Ihinda-inĩ rĩrĩ no batare gũkirĩrĩria moritũ maingĩ, no nĩ ngaakorũo na ũtũũro mwega thĩinĩ wa thĩ njerũ.”
“ARĨA MAMWĨTIGAGĨRA GŨTIRĨ KĨNDŨ MAGAGA”
16. Nĩ kĩĩ kĩngĩatũmire Mũthamaki Daudi andĩke atĩ arĩa metigagĩra Jehova “gũtirĩ kĩndũ magaga”?
16 O na angĩkorũo nĩ tũiganagĩra na kĩrĩa twĩ nakĩo, no tũrĩcemanagia na moritũ. Ta wĩcirie ũhoro wa Mũthamaki Daudi. Bibilia yonanagia atĩ nĩ aakuĩrĩirũo nĩ ciana ithatũ. Makĩria ma ũguo nĩ aaigĩrĩirũo igenyo, agĩkunyanĩrũo nĩ arata, na agĩtũũra mĩaka mĩingĩ ehithaga nĩguo ndakooragwo. O na kũrĩ ũguo, aaugire ũũ igũrũ rĩgiĩ Jehova hĩndĩ ĩmwe aageragĩra igerio iritũ: “Arĩa mamwĩtigagĩra gũtirĩ kĩndũ magaga.” (Thab. 34:9, 10) Nĩ kĩĩ gĩatũmire auge ũguo? Tondũ nĩ aamenyaga atĩ o na gũtuĩka Jehova ndagiragĩrĩria andũ ake macemanie na moritũ, hingo ciothe nĩ atigagĩrĩra marĩ na kĩrĩa marabatara. (Thab. 145:16) O na ithuĩ no tũkorũo na ma atĩ Jehova nĩ arĩtũteithagia gũkirĩrĩria rĩrĩa tũragerera moritũ. Kũmenya ũguo nĩ gũtũteithagia kũiganĩra gũtekũmakania ũrĩa maũndũ maitũ mahaana.
17. Ũtuĩte itua rĩa kwĩruta kũiganagĩra nĩkĩ?
17 Jehova endaga ũiganagĩre na kĩrĩa wĩ nakĩo. (Thab. 131:1, 2) Kwoguo, thiĩ na mbere kwĩruta hitho ya kũiganĩra. Ũngĩĩrutanĩria gũkoragwo na ngatho, kũigaga meciria harĩ wendi wa Jehova na gũkorũo ũrĩ mwĩnyihia, na gwĩkĩraga hinya kĩĩrĩgĩrĩro gĩaku, no ũhote kuuga ũũ ũrĩ na ma: “Nĩ njiganĩire.”—Thab. 16:5, 6.
RWĨMBO NA. 118 “Tuongerere Wĩtĩkio”
a Kwa ngerekano, wĩrorere video ya Ũthathaiya wa Rũcinĩ ya Jehova nĩ Arũmbũyagia Arĩa Enyihia na ya Mwĩtĩo Ũũkaga Mbere ya Kũgwa thĩinĩ wa jw.org/ki.
b GŨTAARĨRIA MBICA: Mũrũ wa Ithe witũ akĩruta wĩra wa kũmenyerera mwako wa ithondeka, mwarĩ wa Ithe witũ wĩrutĩte rũthiomi rwa kwaria na ciĩko akĩhoywo ũhoro kĩgomano-inĩ, na mũrũ wa Ithe witũ akĩruta mĩario ya andũ othe.