Eedjo dokafo Onghalamwenyo yopaKriste noilonga yokuudifa
© 2023 Watch Tower Bible and Tract Society of Pennsylvania
4-10 SEPTEMBA
OMAMONA OMEENDJOVO DAKALUNGA | ESTER 1-2
“Kala omulininipiki ngaashi Ester”
Oto dulu okukala omulininipiki nonande ou li momayeleko
11 Ngeenge omunhu ote tu mbweenga ile te tu pandula sha pitilila, otashi dulu okuyeleka elininipiko letu. Natu konakoneni oshihopaenenwa shaEster sha denga mbada shanghee a li e linyenga kwaasho sha li sha ningwa po. Okwa li muwa unene nokwa li e na onghalamwenyo youdjeko moule womudo. Okwa kala ha kala novakainhu ovanyasha vahapu va dja moitukulwa longo yOuhamba waPersia ovo va li ve na omhepo yefiyafanepo opo va kale va hokiwa kohamba. Ashike nande ongaho, Ester okwa kala e na efimaneko nokwa ngungumana. Ka li omulinenepeki nokuli nokonima eshi a hoololwa a ninge omukainhu wohamba. — Est. 2:9, 12, 15, 17.
Okwa li a popila oshiwana shaKalunga
15 Eshi olufo laEster la fika opo a ka holoke koshipala shohamba, okwa li a pewa oufemba opo a hoolole keshe osho tashi dulika a li a pumbwa opo a dule okuweda ko kewapalo laye. Molwaashi Ester okwa li e na ondjele, ka li a pula shihapu shi dulife pwaasho Hegai a li e mu lombwela. (Ester 2:15) Okwa li a didilika kutya ouwa hao ashike tau dulu oku mu ningifa a kale a hokiwa kohamba, ndele ota ka kala a hokiwa ngeenge okwa kala e na ondjele nomulininipiki. Mbela okwa li ngoo e li mondjila?
Oto dulu okukala omulininipiki nonande ou li momayeleko
12 Elininipiko ohali tu kwafele alushe tu djale nokuliwapeka monghedi yefimaneko nokukala alushe tu na elihumbato liwa. Ngeenge alushe otwa kala tu na “omhepo yombili noyelimweneneno,” ovanhu otava ka nanenwa kufye eshi ihatu linenepeke ile ihatu yukifa unene elitulemo kufye vene. (Lesha 1 Petrus 3:3, 4; Jer. 9:23, 24) Eenghatu detu ohadi holola osho shi li momitima detu. Pashihopaenenwa, otashi dulika tu diladile kutya ohatu hafele oinakuwanifwa yetu ye likalekelwa, hatu ungaunga noiholekwa ile tu na oufembanghenda wokulonga pamwe novamwatate ovo ve na oinakuwanifwa meongalo. Ile otashi dulika tu kale hatu yelifa nawa oinima nelalakano lokupandulwa nonande vamwe ova kufa yo ombinga moshinima osho. Natango, Jesus okwe tu tulila po oshihopaenenwa sha denga mbada. Eendjovo dimwe odo a li a popya oda li da shangwa ile da tumbulwa mOmishangwa dOshiheberi. Okwa li a popya monghedi yelininipiko opo ovapwilikini vaye va shiive kutya osho a li ta popi osha dja kuJehova ndele inashi dja mounongo waye mwene. — Joh. 8:28.
Omamona opamhepo
Owe shi shiiva tuu?
Ovalafululi ova li ve litwa omashangelo aPersia, oo a popya shi na sha nedina Marduka (mOshikwanyama Mordekai). Omulumenhu oo okwa li ha longo e li omupashukili, tashi dulika a li ha ungaunga nomavalulo oimaliwa muSusan. Arthur Ungnad, oo a li omushiivinawa wondjokonona moshitukulwa osho, okwa shanga kutya “osho osha li oshikando shotete Mordekai” a tumbulwa momashangelo, oo ehe li oshitukulwa shOmbiibeli.
Konima eshi Ungnad a yandja olaporta oyo, ovahongwanhu ova li va toloka omashangelo aPersia omayovi. Amwe omomashangelo oo, okwa li a shangwa koipelende inini ya longwa melova, oyo ya li ya hangwa moikulukuma moshilando shaPersepolis, omo mwa li hamu tuvikilwa omamona, popepi nomakuma oshilando. Oipelende oyo oya li ko pefimbo lokupangela kwaXerxes I. Oya li ya shangwa melaka lOshielami nomwa li mwa shangwa omadina mahapu, oo e li membo laEster.
Oipelende ihapu yomuPersepolis oya tumbula edina Marduka, oo a li ha longo e li hamushanga mombala yomuSusan pefimbo lokupangela kwaXerxes I. Oshipelende shimwe osha popya Marduka e li omutoloki. Ouyelele oo otau tu kumwe naasho Ombiibeli ya popya kombinga yaMordekai. Okwa li elenga, olo la li hali longele moshihale shohamba Ahasveros (Xerxes I), nokwa li ha popi omalaka avali. Mordekai okwa li ha kala poshivelo shohamba mombala muSusan. (Est. 2:19, 21; 3:3) Oshivelo osho osha li etungo linene, omo mwa li hamu longelwa komalenga omombala.
Ope na omafaafano a didilikwedi pokati kaMarduka, oo a shangwa koipelende nosho yo Mordekai, oo a popiwa mOmbiibeli. Ova li ko pefimbo limwe, monhele imwe nova li ve na oilonga nohava longele monhele yoilonga ya faafana. Omafaafano aeshe oo, otaa ulike kutya osho ovalafululi voikulunima va li va mona, otashi dulika tashi ulike kuMordekai, oo a popiwa membo laEster.
11-17 SEPTEMBA
OMAMONA OMEENDJOVO DAKALUNGA | ESTER 3-5
“Kwafela vamwe va dule okupondola”
it-2-E 431 ¶7
Mordekai
Okwa anya okulinyongamena Haman. Haman, Omuagag, okwa li a ningwa omuprima kuAhasveros, oo a li a yandja elombwelo kutya aveshe ovo ve li poshivelo shohamba nava wile eombe koshipala shaHaman, oo opo a nangekwa po. Mordekai okwa li a anya okuninga ngaho, nokwa yandja etomheno kutya ye Omujuda. (Est 3:1-4) Etomheno olo Mordekai a yandja ola ulika ekwatafano laye naJehova Kalunga, e li Omujuda e mu liyapulila. Okwa li e shii kutya okuwila eombe koshipala shaHaman osha kwatela mo shihapu shihe fi ashike okutwila eengolo omunhu oo a nangekwa po, ngaashi Ovaisrael va li hava ningi monakudiwa, eshi va li hava fimaneke umwe oo a li e na eenghonopangelo. (2Sam 14:4; 18:28; 1Eeh 1:16) Mordekai okwa li e na etomheno la femba kutya omolwashike ite linyongamene Haman. Haman okwa li Omuamalek, na Jehova okwa li a popya kutya ota ka lwifa Amalek okudja “koludalo fiyo okoludalo.” (Ex 17:16; tala HAMAN.) Mordekai okwa li e na okuulika kutya oku li omudiinini kuKalunga, ndele hakoinima yopapolitika.
it-2-E 431 ¶9
Mordekai
Okwa li a longifwa, opo Ovaisrael va xupifwe. Shi na sha neshiivifo olo la li la ningwa li na sha nokuhanauna po Ovajuda aveshe ovo va li mouhamba, Mordekai okwa li a ulika eitavelo kutya Ester okwa pewa oumbada wouhamba, opo a xupife Ovajuda. Okwa li a ulikila Ester oshinakuwanifwa shaye shidjuu, nokwe mu lombwela a ka pule ekwafo kohamba. Nonande osha li tashi tula omwenyo waEster moshiponga, okwa li a dimina okuya. — Est 4:7–5:2.
Okwa li a popila oshiwana shaKalunga
22 Otashi dulika Ester a li te lipula neenghono eshi a uda onghundana oyo. Osho osha li eyeleko linene leitavelo laye. Okwa li a tila, naasho osha li sha hololwa kenyamukulo olo a li a pa Mordekai. Okwa li e mu dimbulukifa omhango yohamba, kutya omunhu ngeenge okwa i kohamba ina ifanwa ko ota tokolelwa efyo, okuninga shapo ohamba tai mu ulike nepangelodibo layo loshingoldo opo ashike ta kala nomwenyo. Mbela Ester okwa li ngoo ta diladila kutya ota ka xupifa, unene tuu ngeenge ta diladila osho sha li sha ningilwa Vasti oo a li ina dulika koshipango shohamba, eshi a li a anya oku ka holoka koshipala shayo? Ester okwa li a lombwela Mordekai kutya opa pita omafiku 30 ohamba inai mu ifana ko kuyo. Molwaashi opa pita efimbo lile ngaho, okwa kala te lipula kutya pamwe ohamba oya ninguluka noinai mu hokwa vali. — Ester 4:9-11.
23 Mordekai okwa li a nyamukula diva opo a pameke eitavelo laEster. Okwa li e mu shilipaleka kutya ngeenge okwa dopa okukatuka onghatu, exupifo lOvajuda otali ka dja kodjo imwe i lili. Ndele mbela ye ongahelipi a li ta dulu oku ka xupa eshi omahepeko taa lundu pombada? Mordekai okwa li a ulika eitavelo la pama muJehova, ou ita ka efa oshiwana shaYe shi hanaunwe po nomaudaneko aye a kale inaa wanifwa. (Jos. 23:14) Opo nee okwa li a pula Ester a ti: “Ndele olyelye e shi shii kashiimba wa pewa oumbada wohamba omolwefimbo tuu eli?” (Ester 4:12-14) Mordekai ine tu tulila po tuu oshihopaenenwa shiwa! Okwa li e lineekela filufilu muKalunga kaye, Jehova. Mbela nafye osho ngoo hatu ningi? — Omayel. 3:5, 6.
Omamona opamhepo
Okukondjela oufemba wetu wokulongela Kalunga
14 Ngaashi ashike Ester naMordekai va li va ninga, oshiwana shaJehova kunena nasho ohashi kondjele oufemba washo wokulongela Jehova monghedi oyo a hokwa. (Est. 4:13-16) Mbela naave oto dulu okukufa ombinga mokukondjela oufemba wetu? Osho naanaa. Oto dulu okukala ho ilikanene pandjikilile ovamwatate novamwameme ovo tava mono oixuna molwaashi va tulilwa po eendjidikila paveta. Omailikano a tya ngaho otaa ti sha lela kovamwatate novamwameme ovo ve li moudjuu notava hepekwa. (Lesha Jakob 5:16.) Mbela Jehova oha udu ngoo omailikano oo? Oibofa oyo twa findana otai ulike kutya osho naanaa. — Heb. 13:18, 19.
18-24 SEPTEMBA
OMAMONA OMEENDJOVO DAKALUNGA | ESTER 6-8
“Oshilihongomwa shi na sha nokupopya nawa”
Okwa katuka pandunge, nouladi nokuheliholamwene
15 Molwaashi Ester okwa li a teelela nelididimiko opo a ka lombwele ohamba oupyakadi waye, Haman okwa li a pewa omhito opo e litele omwiyo. Mbela itaku dulu yo okutiwa kutya Jehova oye a li a ningifa ohamba i kale ya londokwa keemhofi? (Omayel. 21:1) Itashi tu kumwifa eshi Eendjovo daKalunga tadi tu ladipike tu kale tu na oikala ‘yokuteelela.’ (Lesha Mika 7:7.) Ngeenge otwa kala twe lineekela Kalunga nokuteelela a katuke eenghatu, ohatu ka mona kutya oye ashike ta dulu okukandula po omaupyakadi e tu monghedi ya denga mbada.
Okwa li a popya nouladi
16 Ester ka li vali a hala okuyeleka elididimiko lohamba; okwa li e na oku i lombwela oinima aishe eshi e va ifana olutivali koitelekela. Ndele mbela ongahelipi a li ta dulu oku shi ninga? Ohamba oya li ye mu pa omhito eshi ye mu pula vali kutya oshike osho tashi dulika a hala okuningilwa. (Ester 7:2) Ester okwa li e wete kutya paife olo “efimbo lokupopya.”
Okwa katuka pandunge, nouladi nokuheliholamwene
17 Otashi dulika Ester a li a ilikana kuKalunga kaye momutima fimbo ina popya eendjovo odo tadi ti: ‘Akutu ohamba! Ame ngeenge nda mona onghenda koshipala shoye, ndele ngeenge tashi wapalele ohamba, nandi xupifilwe omwenyo wange omolweindilo lange, nowoshiwana shange, eshi handi shi indile.’ (Ester 7:3) Didilika kutya okwa shilipaleka ohamba kutya okwa fimaneka etokolo layo li na sha naasho tashi wapalele ohamba. Ester ka li tuu a yooloka ko kuVasti oo a li nale omukulukadi wohamba nokwa li a fifa omushamane waye ohoni owina! (Ester 1:10-12) Kakele kaasho, Ester ka li a sheka ohamba omolwokulineekela kwayo Haman. Ponhele yaasho, okwa li a indila ohamba i xupife omwenyo waye.
Okwa katuka pandunge, nouladi nokuheliholamwene
18 Nopehe na omalimbililo, eindilo la tya ngaho ola li le linyengifa nola kumwifa ohamba. Olyelye oo a hala okutula omumbada wayo moshiponga? Ester okwa nyamukula: “Fye twa landwa po, ame noshiwana shange, tu hanaunwe po, tu dipawe ndele tu kombwe po. Ngeno twa landifwa po tu ninge ovapika ovalumenhu novakainhu, ngeno nda mwena, ndelenee omupya ou itau ka mona ewanifo mokunyekwa kwohamba.” (Ester 7:4) Didilika kutya Ester okwa li a popya paushili nokuholola oupyakadi waye, ndele okwa li a weda ko kutya ngeno okwa li ashike va landifwa po moupika ngeno okwa mwena. Edipao lopamihoko olo ola li yoo tali ka kuma ohamba, onghee okwa li e na oku i lombwela kombinga yalo.
19 Oshihopaenenwa shaEster otashi tu hongo ounghulungu wokutomhafana. Ngeenge otwa hala okukundafana oupyakadi wonhumba nomuholike wetu ile naumwe oo e na eenghonopangelo, otwa pumbwa elididimiko, efimaneko nokukala ovanashili.— Omayel. 16:21,23.
Omamona opamhepo
Omanenedhiladhilo okuza membo lyaEster
7:4 — Ongiini ehanagulo lyAajuda lya li tali ka ‘yuga po omukwaniilwa’? Sho Ester a li a popi nekotoko shi na ko nasha nokulanditha po Aajuda ongaapika, okwa li u ulikile omukwaniilwa kutya ehanagulo ndyoka otali ke mu kanithitha oshindji. Iitalendi yoshisiliveli 10 000 mbyoka Haman a li u uvaneke oya li yi na ongushu yi vulike kuuyamba mboka wa li tau ke ya meliko lyomukwaniilwa ando Haman okwa pangelele ompangela okulanditha po Aajuda ongaapika. Ando ompangela yaHaman oya gwanithilwe, ando omunyekadhi naye okwa si.
25 SEPTEMBA–1 OKTOBA
OMAMONA OMEENDJOVO DAKALUNGA | ESTER 9-10
“Okwa longifa eenghonopangelo daye, opo a kwafele ovanhu”
it-2-E 432 ¶2
Mordekai
Mordekai okwa li a pingena po Haman, ndele ta ningi omuprima, nokwa pewa okalinga kohamba kokuhakifa. Ester okwa tula po Mordekai a pangele eumbo laHaman, olo Ester a pewa kohamba. Molwaashi Mordekai okwa li a pitikwa kohamba, okwa pa Ovajuda oufemba wopaveta wokuliamena. Ovajuda ova li va hafa neenghono. Vahapu vomouhamba waPersia ova li ve limanga oukuni kumwe nOvajuda, eshi efiku etimulongo netitatu mohani Adar la fika, efiku olo omhango ya tulwa moilonga, Ovajuda ova li ve lilongekida. Ovanambelewa ova li va fikama konima yavo omolwondodo yopombada oyo Mordekai a li e na. Olwoodi, olo la li la ningilwa muSusa, ola li la twikila fiyo omefiku la shikula ko. Ovatondi vOvajuda ve dulife po 75 000 ova dipawa mouhamba waPersia, mwa kwatelwa ovanamati omulongo vaHaman. (Est 8:1–9:18) Mordekai okwa li a pewa epitikilo kuEster, opo a yandje elombwelo kutya oshivilo osho hashi danwa komudo, mo 14 nosho yo 15 aAdar, “omafiku aPurim,” shi kale shihafifa, va hafele okulya pamwe nokupaafana eeshali. Ovajuda ova li ve shi tambula ko, nova li va lombwela oludalo lavo kombinga yoshivilo osho, naaveshe ovo ve va waimina. E li pondodo onhivali, Mordekai okwa li a fimanekwa koshiwana shaJehova, nokwa twikila oku shi longela ouwa. — Est 9:19-22, 27-32; 10:2, 3.
it-2-E 716 ¶5
Purim
Elalakano. Nonande ovayandjimulombo vamwe ova ti kutya Oshivilo shaPurim, osho hashi danwa kOvajuda vokunena, osha kwatela mo shihapu shihe fi ashike oinima yopalongelokalunga nohashi kwata efimbo lile, osho hasho sha li ngaho pefimbo opo sha li sha dikwa po. Mordekai naEster, aveshe ova li ovapiya vaKalunga kashili, Jehova, noshivilo osho osha li sha dikwa po, opo shi mu fimanekife. Eshi Ovajuda va li va xupifwa pefimbo opo, otashi ulike kutya Jehova Kalunga oye e va xupifa, molwaashi Mordekai okwa li a kanyatela oudiinini waye mokulongela Jehova. Haman otashi dulika a li Omuamalek, oshiwana osho Jehova a li a fingaela nokwe shi tokolela ehanauno. Mordekai okwa li a fimaneka Kalunga, nokwa li a anya okulinyongamena Haman. (Est 3:2, 5; Ex 17:14-16) Natango, eendjovo odo Mordekai a li a lombwela Ester (Est 4:14) otadi ulike kutya okwa li a konga ekwafo kwaao e na eenghono dinene, opo a xupife Ovajuda. Eshi Ester e lidilika ofimbo ina ya koshipala shohamba, opo a ka popye nayo noku i shiva koitendele, otashi ulike kutya okwa konga ekwafo kuKalunga. — Est 4:16.
‘Ningeni ovahopaeleli vaKalunga’ eshi tamu longifa eenghono deni
12 Jehova okwa nangeka po ovapashukili opo va kwatele komesho meongalo lopaKriste. (Ovaheberi 13:17) Ovalumenhu ovo va wana ove na okulongifa eenghonopangelo odo Kalunga e va pa opo va yandje ekwafo olo la pumbiwa nokupashukila oufita. Ndele mbela okukala omukulunhuongalo otashi ti kutya omunhu oku na oufemba wokupangela ovaitaveli vakwao? Hasho nandenande! Ovakulunhuongalo ova pumbwa okukala ve na ondjele, nove na okukala ve lininipika eshi tava pashukile eongalo. (1Petrus 5:2,3) Ombibeli otai kumaida ovapashukili tai ti: ‘Lifeni eongalo laKalunga, e li lilikolela nohonde yOmona.’ (Oilonga 20:28, yelekanifa NW.) Olo olo etomheno la kola kutya omolwashike ve na okuungaunga nolukeno noshilyo keshe shoufita waKalunga ile sheongalo
13 Ohatu dulu oku shi faneka ngaha. Natu tye nee kaume koye kopofingo okwe ku pula u file oshisho oshinima shonhumba osho a lenga. Ou shii kutya kaume koye oshinima osho okwe shi landa kondilo. Mbela ito ka ungaunga nasho nawa noku shi fila oshisho? Sha faafana, Kalunga okwe lineekelela ovakulunhuongalo oshinakuwanifwa shokufila oshisho emona li na ondilo, sha hala okutya, eongalo, olo oilyo yalo ya faafanifwa needi. (Johannes 21:16, 17) Jehova oku hole neenghono eedi daye, nomolwaasho e di landa nohonde i na ondilo yOmona waye ewifa, Jesus Kristus. Ngeno Jehova okwa li ehe hole eedi daye, ngeno ine di landa noikulila i na ondilo i fike opo. Ovakulunhuongalo ovalininipiki ohava kaleke oshinima osho momadiladilo nohava ungaunga needi daJehova nawa.
Omamona opamhepo
Omanenedhiladhilo okuza membo lyaEster
9:10, 15, 16 — Nokuli nonando euthompango olya li lya pe Aajuda epitikilo okuyuga ko omaliko gaatondi yawo, omolwashike ya li ya tindi oku shi ninga? Okutinda kwawo okwa li ku ulike pwaahe na omalimbililo kutya elalakano lyawo olya li okwiigamena, ihe hakwiilikolela uuyamba.
2-8 OKTOBA
OMAMONA OMEENDJOVO DAKALUNGA | JOB 1-3
“Twikila okuulika kutya ou hole Jehova”
Hopaenena eitavelo nokudulika kwaNoa, Daniel naJob
16 Omashongo oo Job a li a taalela. Onghalamwenyo yaJob oi na oshilihongomwa sha yooloka ko. Ofimbo ina yelekwa, “okwa li oshipuna e dule ovalumenhu aveshe vomoushilo.” (Job 1:3) Okwa li a tumbala, e shiivike nawa nokwa fimanekwa. (Job 29:7-16) Ndele nande ongaho, Job ka li e linenepeka ile e udite kutya ina pumbwa Kalunga. Jehova okwe mu ifana ‘omupiya waye’ nokwa weda ko a ti: “Omulumenhu ehe noshipo, nomuyuki ndele ta tila Kalunga ndele ta kukuma owii.” — Job 1:8.
17 Onghalamwenyo yaJob oya li ya lunduluka filufilu mefimbo lixupi. Okwa li a ya moluhepo nomonghalo i nyemateka. Otu shii kutya eenghalo odo oda li da etifwa po komulundili Satana, oo a popya oipupulu kutya Job ota longele ashike Kalunga omolwoinima oyo a li e na. (Lesha Job 1:9, 10.) Jehova ka li e lipwililikila elundilo olo. Ponhele yaasho, Kalunga okwa li a pa Job omhito yokuulika oudiinini waye nosho yo kutya ote mu longele tashi di komutima nopehe na okuliholamwene.
Kala omudiinini!
10 Owa kwatelwa mo ngahelipi moshinima osho Satana a ningila Job? Satana okwa popya kutya ku hole lela Jehova Kalunga, oto ka efa po oku mu longela nosho yo oudiinini woye kuye. (Job 2:4,5; Eh. 12:10) Osho ohashi ku udifa ngahelipi? Oshi nyemateka, hasho mbela? Ashike diladila kombinga yaashi: Jehova okwe ku lineekela filufilu eshi e ku pa omhito. Jehova okwa efa Satana a yeleke oudiinini woye. Oku na elineekelo kutya oto ka kanyatela oudiinini woye noto ka ulika kutya Satana omunaipupulu. Okwa udaneka kutya ote ku kwafele u ninge ngaho. (Heb. 13:6) Kashi fi tuu oufembanghenda okukala we lineekelwa kOmunamapangelo weshito alishe! Mbela paife ou wete kutya omolwashike oudiinini wa fimana? Ohau tu kwafele tu nyaneke pomutenya oipupulu yaSatana notu yambidide edina laTate yetu nosho yo onghedi yaye yokupangela. Oshike hatu dulu okuninga opo tu kale ovadiinini?
Omamona opamhepo
Osho hatu lihongo meendjovo daJesus daxuuninwa
9 Jesus okwa li a hala okutya ngahelipi? Diva fimbo Jesus ina fya okwa ingida ta ti: “Kalunga kange, Kalunga kange, omolwashike wa ekela nge shi?” (Mat. 27:46) Ombiibeli inai popya kutya omolwashike Jesus a popila eendjovo odo. Natu tale kutya oshike hatu lihongo meendjovo odo. Oshinima shimwe oshosho kutya, eshi Jesus a popya eendjovo odo, okwa li ta wanifa po exunganeko olo tali hangwa mEpsalme 22:1. Shikwao vali, eendjovo odo otadi ulike kutya Jehova ka li a “amena keembinga adishe” Omona waye. (Job 1:10) Jesus okwa li e shii kutya Xe okwe mu efela momake ovatondi vaye, opo a dule okuyelekwa fiyo omefyo. Kape na omunhu a yelekwa monghedi ya tya ngaho. Eendjovo odo otadi ulike kutya Jesus ka li e na ondjo yoku mu dipaifa.
9-15 OKTOBA
OMAMONA OMEENDJOVO DAKALUNGA | JOB 4-5
“Lungamena omauyelele a puka”
it-1-E 713 ¶11
Elifas
2. Umwe womookaume vatatu vaJob. (Job 2:11) Okwa li Omuteman, notashi dulika a li womoludalo laEsau, onghee okwa li womepata laAbraham nomupambele waJob wokokule. Elifas nosho yo vakwao ova li tave litangele ounongo wavo. (Jer 49:7) ‘Movahekeleki’ vatatu, Elifas oye a li ta dana onghandangala, e na enwefemo lihapu, notashi dulika oye a li a kula kuvakwao. Oye a li a popya tete oikando aishe itatu, eshi va li tava tu eemhata, nokwa popya oinima ihapu.
w05-E 9/15 26 ¶2
Henuka omadiladilo a puka!
Eshi Elifas a li ta diladila kombinga yoshimoniwa shaye shi na sha noshishitwa shopamhepo, okwa ti: “Opo nee omhepo ya koya nge po, eexwiki domolutu lange da handala. Oya kala ofika moipafi yange, ndelenee olupe layo inandi li dimbulukwa. Nda uda ondaka tai nongofola.” (Job 4:15, 16) Omhepo ilipi ya li ya nwefa mo okudiladila kwaElifas? Eevelishe da shikula ko oda ulika kutya omhepo kaya li nande yomweengeli omuyuki waKalunga. (Job 4:17, 18) Oya li omhepo yoshishitwa shikolokoshi. Ndele mbela ngeenge hasho, omolwashike Jehova a li a handukila Elifas nookaume kaye vavali, eshi va popya oipupulu? (Job 42:7) Elifas okwa li a nwefwa mo kondemoni. Osho a popya osha ulika kutya oha diladila ngaashi ounyuni.
w10-E 2/15 19 ¶5-6
Henuka ouyelele wa puka waSatana
Satana okwa li a longifa Elifas, umwe womookaume vatatu ovo va li va talela po Job, opo a popye kutya ovanhu kave na oshilonga sha sha. Eshi a popya kutya ovanhu ova fa ovo “hava kala momatwali edu,” okwa lombwela Job a ti: “Eefina dokukala kwavo odi li mondwi! Vo otava teyaulwa po ngaashi eenhwishi, opokati kongula nonguloshi tava teyaulwa po. Vo otava hanaunwa po fiyo alushe ndele kape na ou te va dimbulukwa.” — Job 4:19, 20.
MOmbiibeli otwa faafanifwa ‘noitoo yedu.’ (2Ko 4:7) Otwa nghundipala molwaashi otwa fyuulula oulunde nokuhawanenena. (Rom 5:12) Ngeenge tu li ofye atuke, Satana ota dulu oku tu ponokela noupu. Ashike tu li Ovakriste, otu na oo te tu kwafele. Nonande otu na omaunghundi, otu na ondilo momesho aKalunga. (Jes 43:4) Natango, Jehova oha yandje omhepo yaye iyapuki kwaavo tave i pula. (Luk 11:13) Omhepo yaye otai dulu oku tu pa “eenghono di dule dopaushitwe,” tai tu kwafele tu finde omaponokelo aSatana. (2Ko 4:7; Flp 4:13) Ngeenge otwa kondjifa Ondiaboli, twa “pama meitavelo,” Kalunga ote ke tu pameka. (1Pe 5:8-10) Onghee inatu pumbwa okukala twa tila Satana Ondiaboli.
mrt 32-E ¶13-17
Liamena kouyelele wa puka
● Tala kutya owa dja peni, noshike sha popiwa mo
Ombiibeli otai ti: “Konakoneni oinima aishe.” — 1 Ovatessalonika 5:21.
Ofimbo ino itavela, ile ino tandaveleka ehokololo, nokuli nonande oli shiivike, ile ola endululwa lwoikando keenghundana, shilipaleka kutya oloshili. Ngahelipi mbela?
Tala ngeenge odjo oyo oi shii ngoo okulineekelwa. Omahangano oikundaneki, ile amwe vali otashi dulika ashike a popye ehokololo, molwaashi a hala oshimaliwa, ile okuyambidida oinima yopapolitika. Kala ho yelekanifa eedjo doikundaneki needjo dimwe vali. Omafimbo amwe, ookaume otashi dulika va tandaveleke omauyelele a puka inave shi didilika okupitila momatumwalaka, ile paintaneta. Onghee hano, ino lineekela eenghundana da tya ngaho, shapo ongeenge wa shilipaleke kodjo i shii okulineekelwa.
Shilipaleka kutya osho sha popiwa mo oshi li pefimbo noshoshili. Tala omafiku asho, shilipaleka oushili washo, nokukala u na oumbangi wa kola wokuyambidida osho sha popiwa mo. Kala wa lungama, ngeenge ouyelele oo otau monika wa fa mwa wedwa oinima imwe, ile wa nuninwa okuyahameka vamwe pamaliudo.
Omamona opamhepo
w03-E 5/15 22 ¶5-6
Kala omudiinini, ndele to findana mefiyafanepo lomwenyo
Okukala oshitukulwa shehangano lomounyuni aushe, omo mu na ovalongelikalunga vashili, otashi dulu oku tu kwafela tu kale twa pama pamhepo. Kashi fi tuu oufembanghenda okweendafana novamwatate novamwameme ovanahole mounyuni aushe! (1 Petrus 2:17) Nafye ohatu dulu yo okupameka ovamwatate novamwameme.
Konakona eenghatu domulumenhu omuyuki Job. Nokuli naElifas, oo a li omuhekeleki omunaipupulu, okwa dimina kutya: “Eendjovo doye oda yambula ou ta punduka, neengolo da tengauka we di pameka.” (Job 4:4) Ohatu shi endifa ngahelipi moshinima osho? Atushe pauhandimwe otu na oshinakuwanifwa shokukwafela ovamwatate novamwameme ve lididimike, eshi tava longele Kalunga. Eshi hatu ungaunga navo, natu katuke metwokumwe neendjovo edi: “Pamekeni omaoko a wa neengolo da loloka di nghonopalekeni.” (Jesaja 35:3) Omolwashike ito litulile po elalakano lokupameka nokutwa omukumo omumwatate, ile vavali efimbo keshe to shakene navo? (Ovaheberi 10:24, 25) Ngeenge owa kala to va pandula tashi di komutima, eshi tava ningi eenghendabala va twikile okuhafifa Jehova, otashi ke va kwafela va kale va pama mefiyafanepo loku ka mona omwenyo.
16-22 OKTOBA
OMAMONA OMEENDJOVO DAKALUNGA | JOB 6-7
“Ngeenge ito dulu okulididimika monghalamwenyo”
Omanenediladilo okudja membo laJob
7:1; 14:14 — Omautumbulilo ‘olwoodi’ nosho yo “omafiku aeshe oukwaita” okwa hala okutya shike? Molwaashi Job okwa li moupyakadi munene, okwa li a tala ko okukalamwenyo ku li olwoodi lidjuu ile la kwata moiti. (Job 10:17) Natango, Job okwa faafanifa efimbo olo omunhu e li moshovafi ofimbo a teelela enyumuko nomafiku omoukwaita, molwaashi omunhu ohai moshovafi a hala ile ina hala, ngaashi ashike ovanhu hava fininikilwa moukwaita.
‘Jehova oha xupifa ovo va teka omukumo’
OMAFIMBO amwe otashi dulika tu diladile kutya okukalamwenyo okuxupi nokuyadi ‘omaupyakadi.’ (Job 14:1) Onghee oshi shii okuudiwa ko eshi hatu kala twa teka omukumo omafimbo amwe. Ovapiya vaJehova vahapu vopefimbo lonale navo osho va li hava kala ve udite ngaho. Vamwe ova li nokuli va hala okufya. (1 Eeh. 19:2-4; Job 3:1-3, 11; 7:15, 16) Ashike omafimbo nomafimbo, Jehova Kalunga oo ve lineekela, okwa li e va shilipaleka nokwe va pameka. Omahokololo avo okwa shangwa opo e tu hekeleke notu lihonge mo sha. — Rom. 15:4.
g-E 1/12 16-17
Ngeenge u udite wa fa wa hala okusholola monghalamwenyo
Nokuli nonande onghalo yoye otai monika itai nuwa omeva, dimbuluka kutya haave auke; shinyikifa oluhodi hanga keshe umwe ote lididimikile oupyakadi wonhumba kunena. Ombiibeli oya ti: “Oishitwa aishe otai keme nokunyika oluhodi.” (Ovaroma 8:22) Nonande oupyakadi omafimbo amwe otashi dulika u kale wa fa uhe na ekandulepo, luhapu oinima ohai ende tai xwepopala efimbo nefimbo. Oshike tashi dulu oku tu kwafela paife?
Lombwela kaume oo a pyokoka noku shii okulineekelwa nghee u udite. Ombiibeli oya ti: “Kaume oku na ohole alushe, nomumwaina ta dalwa, a kwafe moluhepo.” (Omayeletumbulo 17:17) Omulumenhu omuyuki, Job, oo a popiwa mOmbiibeli, okwa li a lombwela vamwe nghee u udite pefimbo loudjuu waye. Eshi a li e udite a “nyonyodola okukalamwenyo” kwaye, okwa ti: “Onda hala, okukema kwange ku udike. Nda hala okupopya mouyehame wokomwenyo.” (Job 10:1) Okulombwela vamwe nghee u udite, otashi ku kwafele pamaliudo notashi dulika shi ku kwafele u kale u na etaleko liwa li na sha nomaupyakadi oo wa taalela.
Mbubulila Kalunga omutima woye okupitila meilikano. Vamwe ohava diladila kutya eilikano ohali kwafele ashike pamadiladilo, ashike Ombiibeli hasho tai ti ngaho. Epsalme 65:2 ola ti kutya Jehova Kalunga oku li “Omuudi womailikano,” nosho yo 1 Petrus 5:7 okwa ti: “Oku na ko nasha nanye.” Ombiibeli oya divilika nghee sha fimana okulineekela muKalunga. Pashihopaenenwa:
“Nomutima woye aushe lineekela Omwene, ino liameka keendunge doye mwene. Mu shiiva meendjila doye adishe, opo nee Ye ota ka lalakanifa omalila oye.”— OMAYELETUMBULO 3:5, 6.
“Ava, have mu tila, ote va wanifile eshi va hala, nonghuwo yavo ohe i udu, ndele te va xupifa.”— EPSALME 145:19.
“Onghee otu na elineekelo muKalunga kutya keshe osho hatu mu indile pahalo laye ote tu udu.”— 1 JOHANNES 5:14.
“Omwene e li kokule novahenakalunga, ndelenee ta udu eindilo lovayuki.”— OMAYELETUMBULO 15:29.
Ngeenge owa lombwele Kalunga omaupyakadi oo wa taalela, ote ke ku kwafela. Ombiibeli oye tu ladipika, tu ‘mu lineekele alushe notu mu mbubulile omitima detu.’— Epsalme 62:8.
Omamona opamhepo
Pwilikina, lihonga nokuulika olukeno
10 Ohatu dulu okuhopaenena Jehova mokukala hatu kendabala okuuda ko ovamwatate novamwameme. Kendabala okushiiva ovamwaxo nawanawa. Kala ho popi navo ngeenge mwa shakena pokwoongala ofimbo inaku hovela nokonima eshi kwa dja mo, kala ho longo pamwe navo moukalele, nongeenge otashi shiiva kala ho va shivi komusha. Ngeenge owa ningi ngaho, oto ka mona kutya omumwameme oo ha monika ehe na ohamu oku na eehoni, ile omumwatate oo ta monika a fa e hole oinima yopamaliko oha yandje, ile oukwaneumbo oo hau uya luhapu pokwoongala wa shelelelwa otau lididimikile omapataneko. (Job 6:29) Oshoshili kutya inatu hala okukala hatu “lidopo moinima yavamwe.” (1 Tim. 5:13) Onghee hano, osha fimana okukala tu shii oinima ile eenghalo odo da ningifa ovamwatate novamwameme va kale ve na omaukwatya a tya ngaho.
23-29 OKTOBA
OMAMONA OMEENDJOVO DAKALUNGA | JOB 8-10
“Ohole yaKalunga i na oudiinini ohai tu amene koipupulu yaSatana”
w15-E 7/1 12 ¶3
Mbela ohatu dulu ngoo shili okuhafifa Kalunga?
Job okwa mona oixuna, osho sha li tashi monika shihe li pauyuki. Okwa li a kwatwa komadiladilo a puka, ta diladila kutya Kalunga ke na ko nasha naye, kutya nee okwa kanyatela eitavelo laye muye, ile hasho. (Job 9:20-22) Job okwa li e shii kutya ye omuyuki, nonande kuvamwe osha li tashi monika a fa te liyukipalifa koshipala shaKalunga. — Job 32:1, 2; 35:1, 2.
Ouwa ulipi hatu mono mohole yaJehova i na oudiinini?
14 Ohole yaKalunga i na oudiinini ohai tu amene pamhepo. Eshi David a li ta popi naJehova okupitila meilikano, okwa ti: “Oove oshihondamwa shange, to amene nge koudjuu; oto dingililifa nge nehafo lexupifo. . . . Ou te lineekele Omwene, ota dingililwa konghenda.” (Eps. 32:7, 10) Ngaashi ashike omakuma oshilando shopefimbo lonale a li haa amene ovo ve li moshilando, ohole yaJehova i na oudiinini ohai kala ye tu dingilila. Ohai tu amene pamhepo koinima oyo ya nyika oshiponga, oyo tai yeleke oudiinini wetu. Onghee hano, ohole yaJehova i na oudiinini oyo hai mu linyengifa e tu nanene kuye. — Jer. 31:3.
Omamona opamhepo
“Olyelye a shiiva omadiladilo aJehova?”
19 Otwe lihonga shike kombinga ‘yomadiladilo aJehova’? Otwa pumbwa okweefa Eendjovo daKalunga di tu pe eudeko li li mondjila li na sha nomadiladilo aJehova. Katu na nande okukala hatu tale ko Jehova she likolelela komangabeko etu nokukala hatu mu tokola she likolelela komifikamhango nokokudiladila kwetu. Job okwa ti: “[Kalunga] ke fi omunhu ngaashi ame, ndi shiive oku mu nyamukula, tu shiive ngeno okuya pamwe koihokolola.” (Job 9:32) Ngaashi Job, eshi hatu ende hatu udu ko omadiladilo aJehova, nafye ohatu ka ingida hatu ti: “Taleni ei, oyo ominghulo adike deendjila daye, ndele fye ohatu udu ko tuu okunongofola kwaye! Olyelye hano ta dulu okushiva okungunguma kweenghono daye?” — Job 26:14.
20 Ngeenge hatu lesha Omishangwa, ohatu ka ninga po shike ngeenge katu udite ko oshitukulwa shonhumba shomushangwa, naunene tuu ngeenge oshi na sha nomadiladilo aJehova? Ngeenge otwa kongo ouyelele shi na sha nomushangwa oo ndele inatu mona enyamukulo la yela, oshinima osho natu shi tale ko shi li eyeleko loku tu yeleka ngeenge otwe lineekela ngoo shili Jehova. Dimbuluka kutya omafimbo amwe omautumbulilo onhumba ohae tu pe omhito tu ulike kutya otwa itavela omaukwatya aJehova. Natu dimineni nelininipiko kutya itatu dulu okuuda ko oinima aishe oyo Jehova a ninga. (Omuud. 11:5) Osho otashi ke tu linyengifa tu dimine eendjovo domuyapostoli Paulus, eshi a ti: “Ouule u fike peni woupuna noweendunge nowounongo waKalunga! Omatokolo aye ohaa konakonwa kulyelye, neendjila daye olyelye e di shii! Osheshi olyelye a shiiva omayele Omwene? Ile olyelye a kala omupukululi waye? Ile olyelye e mu pa sha tete, Ye e shi mu futile? Osheshi aishe oyomuye nomolwaye ndee tai shuna kuye. Oye na fimanekwe alushelushe. Amen.” — Rom. 11:33-36.
30 OKTOBA–5 NOVEMBA
OMAMONA OMEENDJOVO DAKALUNGA | JOB 11-12
“Eenghedi nhatu di na sha nanghee to dulu okumona ounongo nokumona ouwa muo”
Job okwa li a fimanekifa edina laJehova
17 Oshike sha li sha kwafela Job a kanyatele oudiinini waye? Osha yela kutya okwa hangwa nale e na ekwatafano lopofingo naJehova ofimbo a li ina hangwa komaupyakadi. Job okwa li a tokola toko okukala omudiinini, nonande katu shi shii ngeenge Job okwa li e shii kutya Satana okwa li ta shongo Jehova. Okwa ti: “Fiyo handi ka fuda mo omufudo wange, itandi ekeleshi po ouyuki wange.” (Job 27:5) Oshike sha li sha kwafela Job a kale e na ekwatafano lopofingo naKalunga? Nopehe na omalimbililo, Job okwa li a lenga osho a li a uda shi na sha nanghee Jehova a li a ungaunga nooxekulululwa ngaashi Abraham, Isak naJakob. Job okwa li yo a konakona eshito laJehova, nokungaho okwa li a dula okulihonga kombinga yomaukwatya mahapu aJehova. — Lesha Job 12:7-9, 13,16.
Jehova oku li alushe pamwe naave
10 Panga oukaume nOvakriste ovadiinini. Panga oukaume novanhu meongalo, ovo to dulu okulihonga sha kuvo, nonande kamu na omido, ile onakudiwa ya faafana. Ombiibeli otai tu dimbulukifa kutya ‘omulumenhu weenghwakutoka oku na ounongo.’ (Job 12:12) Ovakulunhu navo otava dulu yo okulihonga kovanyasha ovadiinini. David okwa li munini neenghono kuJonatan, ashike osho inashi va imba vaha hafele oukaume wopofingo. (1 Sam. 18:1) David naJonatan ova kala hava kwafelafana, eshi tava longele Jehova nonande opa li omashongo a kwata moiti. (1 Sam. 23:16-18) Irina, omumwameme oo e li oye aeke Ondombwedi moukwaneumbo wavo, okwa ti: “Ovamwatate novamwameme otava dulu shili okukala ovadali vetu vopamhepo, ile eendenge detu. Jehova ota dulu oku va longifa, opo va wanife po eemhumbwe detu.”
11 Ihashi kala shipu okupanga oukaume novanhu vape, unene tuu ngeenge ou na eehoni. Ratna, omumwameme oo e na eehoni nokwa li ta patanekwa e shi a li te lihongo oshili, okwa ti: “Onda li nda dimina kutya onda pumbwa ekwafo lovamwatate novamwameme.” Oshi li eshongo okulombwela umwe omaliudo oye, ashike eenghundafana da tya ngaho otadi dulu okukala ekanghameno lokupanga oukaume wopofingo. Ookaume koye ova hala oku ku twa omukumo noku ku yambidida, ashike ova pumbwa u va lombwele nghee ve na oku shi ninga.
12 Onghedi imwe yomeenghedi da denga mbada omo to dulu okumona ookaume vawa, omokukufa ombinga moukalele pamwe nOvakriste vakweni. Carol, oo a popiwa metetekelo, okwa ti: “Onda likola ookaume vahapu vawa mokukala efimbo novamwameme moukalele nosho yo momalipyakidilo vali amwe opamhepo. Jehova okwa kala nokuyambidida nge oule womido okupitila mookaume va tya ngaho.” Okupanga oukaume nOvakriste ovadiinini oshinima sha denga mbada. Jehova oha longifa ookaume va tya ngaho ve tu kwafele, ngeenge hatu kondjifa omaliudo mai, ngaashi owike. — Omayel. 17:17.
it-2-E 1190 ¶2
Ounongo
Ounongo wopakalunga. Ounongo ohau di kuJehova Kalunga, oo oye “aeke omunaendunge”. (Rom 16:27; Eh 7:12) Eshiivo ohali endele pamwe noshili, molwaashi Jehova oye Omushiti, nota “kala alushe fiyo alushe” (Eps 90:1, 2), oku shii ashishe osho shi li meshito nosho yo omutungilo weshito. Oinima aishe oko ovanhu hava tale kuyo, opo va nduluke po oinima yonhumba oya shitwa kuJehova, nongeenge oinima oyo ya shitwa kuJehova kai po, kave na ekwafo lasha. (Job 38:34-38; Eps 104:24; Omayel 3:19; Jer 10:12, 13) Omifikamhango daye dopaenghedi oda fimana nokuli, molwaashi otadi kwafele ovanhu monghalamwenyo va kale va pama, ve na elihumbato liwa nohava pondola. (De 32:4-6; tala JEHOVA [Kalunga oo e na omifikamhango dopaenghedi].) Kape na osho shi mu dule meendunge. (Jes 40:13, 14) Nonande otashi dulika a pitike oinima oyo i li omhinge nomifikamhango daye dopauyuki i ningwe, ile nokuli i kale po oule wokafimbo, monakwiiwa ehalo laye otali ka wanifwa, noinima oyo a popya ‘otai ka wanifwa.’ — Jes 55:8-11; 46:9-11.
Omamona opamhepo
w08-E 8/1 11 ¶5
Okukundafana novanyasha
▪ ‘Mbela ondi udite ko ngoo kutya okwa hala okutya shike?’ Job 12:11 okwa ti: “Hakutwi ngeno haku dimbulukwa eendjovo nondakona hai udu eendja?” Paife owa pumbwa ‘okuuda ko’ nawa shi dulife nale osho omonamati, ile omonakadona woye a hala okutya. Ovanyasha luhapu ihava popi oinima va yukilila koshitwa. Pashihopaenenwa, omonamati, ile omonakadona woye otashi dulika a tye, “Alushe oho ungaunga ashike naame nda fa okaana!” ile “Iho pwilikine kwaame!” Ponhele ashike yokuyandja elitulemo koshitya “alushe” nosho yo “iho,” dimbuluka kutya okaana koye hasho ka hala okutya ngaho filufilu. Pashihopaenenwa, “alushe oho ungaunga ashike naame nda fa okaana,” osha hala okutya “ondi wete ashike ino lineekela nge,” nosho yo “iho pwilikine kwaame,” otashi dulika tashi ti “onda hala oku ku lombwela nghee ndi udite.” Kendabala okuuda ko kutya okwa hala okutya shike.