Nghee Jehova ha nyamukula omailikano etu

1-2. Oshike tashi dulika tu lipule nasho, ngeenge tashi uya pomailikano etu?

MBELA ou na ngoo fiku we lipulile ngeenge Jehova oha nyamukula ngoo omailikano oye? Ngeenge osho, haave auke. Ovamwatate novamwameme vahapu ova popya kutya navo ohave lipula shi na sha naasho, unene tuu ngeenge va taalela onghalo idjuu. Ngeenge hatu mono oixuna, nafye otashi dulika tu mone shidjuu okudidilika mo nghee Jehova ta nyamukula omailikano etu.

² Natu ka taleni kutya omolwashike hatu dulu okukala nelineekelo kutya Jehova oha nyamukula omailikano ovalongeli vaye. (1 Joh. 5:15) Ohatu ka kundafana yo omapulo aa: Omolwashike omafimbo amwe hashi monika sha fa ngeno Jehova ita nyamukula omailikano etu? Omeenghedi dilipi Jehova ha nyamukula omailikano kunena?

JEHOVA OTASHI DULIKA EHE TU NYAMUKULE MONGHEDI OYO TWA TEELELA

3. Omolwashike Jehova a hala tu ilikane kuye?

³ Omishangwa ode tu shilipaleka kutya Jehova oku tu hole neenghono nonokutya otu na ondilo kuye. (Hag. 2:7; 1 Joh. 4:10) Olo olo etomheno molwaashi te tu shivi tu pule ekwafo kuye meilikano. (1 Pet. 5:6, 7) Okwa hala oku tu kwafela tu kale popepi naye nokwa hala tu ungaunge nomupondo nomaupyakadi oo twa taalela.

4. Otu shi shii ngahelipi kutya Jehova oha nyamukula omailikano ovalongeli vaye? (Tala yo efano.)

⁴ Ohatu lesha lwoikando mOmbiibeli nghee Jehova a li a nyamukula omailikano ovalongeli vaye. Mbela ou shii oshihopaenenwa shonhumba? Ongahelipi shi na sha nohamba David? Oya li ya taalela ovatondi vahapu va nyika oshiponga monghalamwenyo yayo, noya li ya konga ekwafo lwoikando kuJehova meilikano. Pomhito imwe, oya li ya lilila Jehova, ya ti: “Omwene, uda eindilo lange, Ove pwilikina eehelo lange. Molwoudiinini woye [itavele] nge, omolwouyuki woye.” (Eps. 143:1) Jehova okwa li a nyamukula omailikano aDavid e na sha noku mu xupifa. (1 Sam. 19:10, 18-20; 2 Sam. 5:17-25) David okwa li a dula okupopya nomukumo, a ti: “Omwene oku li popepi naaveshe, have mu ifana.” Nafye ohatu dulu okukala tu na elineekelo la faafana. — Eps. 145:18.

5. Mbela omailikano ovalongeli vaJehova vopefimbo lonale okwa li haa nyamukulwa alushe monghedi oyo va li va teelela? Yandja oshihopaenenwa. (Tala yo efano.)

⁵ Jehova otashi dulika aha nyamukule omailikano etu monghedi oyo twa teelela. Osho osho sha li sha ningilwa omuyapostoli Paulus. Okwa li a pula Kalunga e mu kufe “ekiya mombelela.” Peemhito dopatatu, Paulus okwa li a ilikana kondadalunde shi na sha nonghalo oyo idjuu. Mbela Jehova okwa li ngoo a nyamukula omailikano oo? Heeno, ashike hamonghedi oyo Paulus a li a teelela. Ponhele yokukufa po oupyakadi, Jehova okwa li e mu pa eenghono, odo a li a pumbwa, opo a twile oku mu longela noudiinini. — 2 Kor. 12:7-10.

6. Omolwashike omafimbo amwe tashi dulika shi monike sha fa Jehova ita nyamukula omailikano etu?

⁶ Nafye omafimbo amwe otashi dulika tu mone enyamukulo la yooloka ko kwaasho twa li twa teelela. Ohatu dulu okukala noushili kutya Jehova oku shii filufilu nghee e na oku tu kwafela monghedi ya denga mbada. Ota dulu nokuli oku “tu pa shihapu neenghono shi dulife pwaasho hatu pula ile hatu diladila.” (Ef. 3:20) Onghee hano, ota dulu okunyamukula omailikano etu pefimbo, ile monghedi oyo inatu teelela.

7. Omolwashike tashi dulika twa pumbwa okulundulula osho hatu ilikana kombinga yasho? Yandja oshihopaenenwa.

⁷ Otashi dulika twa pumbwa okulundulula osho hatu ilikana kombinga yasho, ngeenge otwa shiiva nawanawa ehalo laJehova. Natuka taleni koshihopaenenwa shaMartin Poetzinger. Diva konima eshi a hombola, omumwatate Poetzinger okwa li a tulwa modolongo mokamba yeenghwate yaNazi. Potete, okwa li a pula Jehova e mu mangulule mo mokamba yeenghwate, opo a ka file oshisho omukulukadi waye noku ka twikile noilonga yaye yokuudifa. Ashike konima yoivike ivali, okwa li a mona kutya kape na osho tashi ulike kutya Jehova okwa hala oku mu mangulula mo. Onghee okwa li a ilikana, a ti: “Jehova, alikana, ulikile nge kutya oshike wa hala ndi ninge.” Opo nee okwa hovela okudiladila konghalo omo ovamwatate vakwao, ovo va li mokamba, tava piti muyo. Vahapu vomuvo ova li tave lipula shi na sha nounona nosho yo novakulukadi vavo. Omumwatate Poetzinger okwa ilikana, a ti: “Tangi Jehova koshinakuwanifwa shange shipe. Kwafele nge ndi pameke nondi twe omukumo ovamwatate.” Okwa kala ta ningi ngaho omido omuwoi meekamba.

8. Oshinima sha fimana shilipi tu na okukaleka momadiladilo, ngeenge hatu ilikana?

⁸ Otu na okudimbuluka kutya Jehova oku na elalakano note ke li wanifa po peufwafimbo laye. Elalakano olo ola kwatela mo okuxulifa po omaupyakadi aeshe oo haa etele ovanhu okumona oixuna kunena. Omaupyakadi oo ongaashi oiponga yopaushitwe, omauyahame nosho yo efyo. Jehova ota ka wanifa po elalakano laye okupitila mOuhamba waye. (Dan. 2:44; Eh. 21:3, 4) Ashike fiyo opapa, Jehova okwa efa Satana a pangele ounyuni.b (Joh. 12:31; Eh. 12:9) Ngeenge Jehova okwa kufa po omaupyakadi paife, ovanhu otava ka tala ko epangelo laSatana la fa tali pondola. Ofimbo twa teelela Jehova a wanife po omaudaneko onhumba, osho inashi hala kutya ite tu yambidida. Natu ka taleni keenghedi dimwe omo Jehova he tu kwafele.

EENGHEDI OMO JEHOVA HA NYAMUKULA OMAILIKANO KUNENA

9. Ongahelipi Jehova ta dulu oku tu kwafela, ngeenge twa pumbwa okuninga omatokolo? Shi faneka.

⁹ Ohe tu pe ounongo. Jehova okwa udaneka oku tu pa ounongo oo twa pumbwa, opo tu ninge omatokolo e li pandunge. Otwa pumbwa unene ounongo wopakalunga, ngeenge hatu ningi omatokolo, oo taa kumu onghalamwenyo yetu aishe, ngaashi kutya natu ye mohombo, ile hasho. (Jak. 1:5) Natu ka taleni koshimoniwa shomumwameme ina hombolwa wedina Maria.c Okwa kala ta hafele oilonga youkokolindjila, eshi a shakena nomumwatate wonhumba. Okwa ti: “Eshi oukaume wetu wa enda tau kulu, osho ngoo twa enda hatu hokwafana. Onda li ndi shii kutya ondi na okuninga etokolo. Onda ilikana luhapu kombinga yoshinima osho. Onda li nda pumbwa ewiliko laJehova, ashike onda li yo ndi shii kutya Jehova ita ka ningila nge ko etokolo.” Okwa li e shii kutya Jehova okwa nyamukula omailikano aye e na sha nounongo. Ngahelipi mbela? Eshi a ninga omapekapeko moishangomwa yetu, okwa li a mona oitukulwa yokondadalunde oyo ya li ye mu kwafela a mone omanyamukulo omapulo aye. Okwa li yo a pwilikina komayele mawa, oo a li a pewa kuina omudiinini. Omayele oo okwa li a kwafela Maria a konakone omaliudo aye. Xuuninwa, Maria okwa li a dula okuninga etokolo li li pandunge.

10. Metwokumwe nOvafilippi 4:13, Jehova ota ka ninga po shike, opo a kwafele ovalongeli vaye? Yandja oshihopaenenwa. (Tala yo efano.)

¹⁰ Ohe tu pe eenghono, opo tu lididimike. Ngaashi ashike e shi ningila omuyapostoli Paulus, Jehova ote ke tu pa eenghono odo twa pumbwa, opo tu lididimikile omayeleko. (Lesha Ovafilippi 4:13.) Natu ka taleni nghee Jehova a li a kwafela omumwatate wedina Benjamin e lididimikile eenghalo didjuu. Hanga omido daye adishe dounyasha, Benjamin noukwaneumbo waye ova kala hava di meekamba deenhauki muAfrica. Benjamin okwa ti: “Onda ilikana kuJehova lwoikando, handi mu pula a pe nge eenghono ndi longe osho tashi mu hafifa. Jehova okwa nyamukula omailikano ange, eshi a pa nge ombili yopamadiladilo, ouladi wokutwikila okuudifa nosho yo oishangomwa oyo ya kwafela nge ndi kale nda pama pamhepo.” Okwa weda ko ta ti: “Okulesha kombinga yoimoniwa yEendombwedi dikwetu nokumona nghee Jehova e di kwafela di lididimike, osha kwafela nge ndi kale nda tokola toko okukala omudiinini.”

11-12. Ongahelipi tashi dulika Jehova a hoolole okulongifa ovamwatate novamwameme, opo a nyamukule omailikano etu? (Tala yo efano.)

¹¹ Oha longifa ovamwatate novamwameme. Jesus okwa li a ilikana a mana mo oufiku oo wa tetekela efyo laye. Okwa ilikana kuJehova aha efe ovanhu vamwe va diladila kutya okwa sheka Kalunga. Ponhele Jehova a ninge ngaho, okwa kwafela Jesus moku mu tumina umwe womovaengeli vaye ve mu pameke. (Luk. 22:42, 43) Jehova ota dulu yo oku tu kwafela mokulinyengifa ovamwatate, ile ovamwameme ve tu talele po, ile ve tu dengele ongodi, opo ve tu twe omukumo. Atusheni ohatu dulu okukonga eemhito, opo tu pe ovaitaveli vakwetu “ondjovo yehekeleko.” — Omayel. 12:25.

¹² Natu ka taleni koshimoniwa shomumwameme wedina Miriam. Oivike inini, konima eshi omushamane waye a fya, Miriam okwa li meumbo oye aeke, a nyika oluhodi nokwa polimana. Okwa li ta lili neenghono nokwa li a pumbwa umwe, oo a li ta dulu okupopya naye. Okwa ti: “Kanda li ndi na eenghono dokudengela nande oumwe, onghee onda li nda ilikana kuJehova. Ofimbo nda li handi lili nohandi ilikana, ongodi yange oya li ya kwena. Onda li nda dengelwa komukulunhuongalo umwe, oo a li kaume ketu.” Miriam okwa li a hekelekwa komukulunhuongalo oo nomukulukadi waye. Okwa li a tomhwa kutya Jehova oye e linyengifa omumwatate e mu dengele.

13. Yandja oshihopaenenwa shanghee Jehova ta dulu okulongifa ovanhu ovo ihave mu longele, opo a nyamukule omailikano etu.

¹³ Ota dulu okulongifa ovanhu ovo ihave mu longele. (Omayel. 21:1) Omafimbo amwe, Jehova oha nyamukula omailikano ovapiya vaye mokulinyengifa ovanhu ovo ihave mu longele ve va kwafele. Pashihopaenenwa, okwa li e linyengifa ohamba Artasasta, opo i pitike Nehemia a shune kuJerusalem a ka kwafele mokutungulula oshilando. (Neh. 2:3-6) Kunena, Jehova ota dulu okulinyengifa ovanhu ovo ihave mu longele, opo ve tu kwafele, ngeenge tu li momhumbwe.

14. Ongahelipi oshimoniwa shaSoo Hing tashi ku tu omukumo? (Tala yo efano.)

¹⁴ Omumwameme wedina Soo Hing okwa li e udite kutya Jehova okwe mu kwafela okupitila mundokotola waye. Omonamati waye oku na oupyakadi wa kwata moiti wopamadiladilo. Eshi omonamati a li a ya moshiponga shinyanyalifi, ye nomushamane waye ova li va efa po oilonga, opo ve mu file oshisho. Oshidjemo, ova li va hangwa komaupyakadi opashimaliwa. Soo Hing okwa li e udite kutya ke na vali eenghono dokulididimikila onghalo oyo. Okwa li a mbubulila Jehova omutima waye, e mu kwafele. Ndokotola okwa li a konga onghedi omo a li ta dulu oku mu yambidida nosho yo oukwaneumbo wavo. Osho oshe va kwafela va dule okumona omayambidido okudilila kepangelo nosho yo okumona onhele oyo va li tava dulu okufuta. Lwanima, Soo Hing okwa popya, a ti: “Otwa mona nghee Jehova e tu yambidida moshinima osho. Oku li shili ‘Omuudi womailikano.’” — Eps. 65:2.

OTWA PUMBWA EITAVELO, OPO TU MONE NOTU TAMBULE KO OMANYAMUKULO AJEHOVA

15. Oshike sha kwafela omumwameme umwe a mone kutya omailikano aye okwa kala nokunyamukulwa?

¹⁵ Omailikano etu haalushe haa nyamukulwa meenghedi dididilikwedi. Ndele ohatu mono omanyamukulo, oo twa pumbwa, opo tu kale ovadiinini kuTate yetu womeulu. Onghee kala oupafi, opo u mone nghee Jehova ta nyamukula omailikano oye. Omumwameme wedina Yoko okwa li e udite kutya Jehova ka li ta nyamukula omailikano aye, ashike okwa ka hovela okukala ha ningi omadidilikoshango aasho a pula Jehova. Konima yefimbo lonhumba, okwa li a talulula omadidilikoshango oo a li a ninga nokwa li a didilika kutya Jehova okwa nyamukula omailikano aye mahapu, nokuli naao a dimbwa. Efimbo nefimbo, otwa pumbwa okukala hatu kanghama po nokudiladila kunghee Jehova a nyamukula omailikano etu. — Eps. 66:19, 20.

16. Ongahelipi hatu dulu okuulika eitavelo, ngeenge tashi uya peilikano? (Ovaheberi 11:6)

¹⁶ Ihatu ulike ashike kutya otu na eitavelo, ngeenge hatu ilikana kuJehova, ndele omokutambula ko yo omanyamukulo oo te tu pe e na sha nomailikano etu, kashi na nee mbudi kutya otae uya monghedi ilipi. (Lesha Ovaheberi 11:6.) Natu ka taleni koshihopaenenwa shaMike nanekulu laye, Chrissy. Ova li va hala oku ka longa kObetel. Mike okwa ti: “Otwa kala nokuninga eindilo oule womido dihapu notwa ilikana lwoikando shi na sha nelalakano olo, ashike katwa li twa tambulwa.” Mike naChrissy ova kala ve na elineekelo kutya Jehova oku shii filufilu nghee e na oku va longifa moilonga yaye. Ova twikila okuninga ngaashi tava dulu, okulonga ve li ovakokolindjila oko ku na omhumbwe inene nokuyambidida oilonga yokutunga omatungo ehangano. Kunena, otava longo ve li ovapashukili ovaendi. Mike okwa ti: “Jehova ina kala ta nyamukula alushe omailikano etu monghedi oyo twa li twa teelela, ndele okwe a nyamukula meenghedi da denga mbada di dulife pwaasho twa li hatu diladila.”

17-18. Metwokumwe nEpsalme 86:​6, 7, elineekelo lilipi tu na okukala tu na?

¹⁷ Lesha Epsalme 86:6, 7. Omupsalme David okwa li e shii kutya Jehova okwa uda nokwa nyamukula omailikano aye. Naave oto dulu okukala nelineekelo la faafana. Oihopaenenwa ei twa kundafana moshitukulwa eshi, oye tu shilipaleka kutya Jehova ota dulu oku tu pa ounongo nosho yo eenghono odo twa pumbwa, opo tu lididimike. Ota dulu okulongifa ovamwatate novamwameme, ile nokuli naavo ihave mu longele, opo e tu kwafele monghedi yonhumba, ile yongadi.

¹⁸ Nonande Jehova haalushe ha nyamukula omailikano etu monghedi oyo twa teelela, otu shi shii kutya ote a nyamukula. Ote ke tu pa osho twa pumbwa note ke shi tu pa pefimbo opo twe shi pumbwa. Onghee hano, twikila okwiilikana u na eitavelo nelineekelo kutya Jehova ote ku file oshisho paife nota ka “palula oinamwenyo aishe” mounyuni mupe tau uya. — Eps. 145:16.