Kondjifa owike mokupanga oukaume — Nghee Ombiibeli tai dulu okukwafela

Mo 2023, ovashiivi nawa voundjolowele ova didilika kutya owike ou li oshinima sha kwata moiti osho va pumbwa okukatukila onghatu. Mbela oupyakadi oo otau dulu ngoo okupongololwa po?

• Omundokotola Vivek Murthy, womo-U.S, okwa ti: “Ngeenge tu udite owike notwe litukula ko kovanhu vakwetu, ohashi kumu oukolele wetu nohashi nyono po ehafo letu.” Ashike okwa weda ko, a ti: “Ohatu dulu okuninga po sha.” Ngahelipi mbela? “Omokukatuka eenghatu dinini efiku keshe tu pameke ekwatafano letu navamwe.”a

Ihatu kala ashike tu udite owike, ngeenge twe litukula ko kuvamwe. Vamwe otashi dulika va kale ve udite owike nokuli nongeenge ve li mokati kovanhu vahapu. Kashi na nee mbudi kutya omolwashike tu udite owike, Ombiibeli otai dulu oku tu kwafela. Ombiibeli oi na omayele taa longo oo taa dulu oku tu kwafela tu kondjife owike nokupameka oukaume wetu navamwe.

Omafinamhango Ombiibeli oo taa dulu okukwafela

Kala ho popi navamwe. Osho inashi kwatela mo ashike okukala ho lombwele vamwe omaliudo oye, ndele osha kwatela mo yo okukala ho pwilikine nawa. Ngeenge owa kala ho ulikile vamwe kutya ou na ko nasha navo, otamu ka panga oukaume wopofingo.

• Efinamhango lOmbiibeli: “Inamu lalakanena ashike ouwa weni vene, ndele lalakaneneni yo ouwa wavakweni.” — Ovafilippi 2:4.

Panga oukaume novanhu ve lili noku lili. Kendabala u pange oukaume novanhu ovo ve ku dule, u va dule, va dja meputuko limwe li lili, ile va dja koshilongo shi lili.

• Efinamhango lOmbiibeli: “Mbwalangadjekeni omitima deni.” — 2 Ovakorinto 6:13.

Opo u mone ouyelele muhapu u na sha nanghee to dulu okupameka oukaume woye navamwe, lesha oshitukulwa “Satisfying Our Hunger for Friendship.”