Oita oshinima shi nyanyalifi
Oita ohai etele ovanhu ouyehame muhapu neenghono. Ovakwaita nosho yo ovakwashiwana, ovo va enda moita, ove shii nghee ya nyika oshiponga.
OVAKWAITA
Gary, wokoBritain, okwa ti: “Oho mono ovanhu vahapu tava dipawa, ile va monifwa oshiponga neenghono. Iho kala udite u li meameno.”
Wilmar, wokoColombia, okwa ti: “Onda li nda yashwa lwoikando ihapu, nonda mona ovanhu vahapu tava dipawa, mwa kwatelwa ounona nosho yo ovanamido. Oita ohai ku ningifa u kale ino tila vali okumona oixuna nosho yo efyo.”
Zafirah, wokoUnited States, okwa ti: “Ngeenge umwe a yashwa momesho oye, iho dimbwa oshinima sha tya ngaho. Osho wa mona ohashi kala alushe tashi ingaana momadiladilo oye. Ku na efiku u dimbwe omunhu a tya ngaho.”
OVAKWASHIWANA
Oleksandra, wokoUkraine, okwa ti: “Onda li ndi udite kutya kandi na vali efiku ndi kale nda hafa. Onda li nda tila kutya ame, ile ovapambele vange, ile ookaume kange otava ka dipawa.”
Daler, wokoTajikistan, okwa ti: “Oshitilifa okukala momukweyo woikulya okudja 2:00 youfiku fiyo 11:00 wokonguloshi noiho kala u shii ngeenge oto ka pitulwa po koholo.”
Marie, wokoRwanda, okwa ti: “Ovadali vange ova fila moita. Onda ninga ofiye omolwoita nokape na oo ta hekeleke nge nokufila nge oshisho.”
Nonande ovanhu ovo va tumbulwa metetekelo ova mona oixuna omolwoita, paife ove na ombili. Shikwao vali, ova tomhwa kutya oita nosho yo omapiyaano otai ka xulifwa po mafiku. Oshungonangelo ei otai ka yelifa nghee osho tashi ka ningwa tai longifa Ombiibeli.