Pisariaqartitat annerugaangata

ILANNGUTASSIANI siullerni siunnersuuterpassuit pitsaasut saqqummiussorneqareerput, ilaannikkulli pisariaqartitsineq suli annerusinnaasarpoq. Assersuutigalugu misissueqqissaarnerit takutissimavaat meeqqat ilaat tassanngaannariartaannaratik aamma navianartorujussuusut. Naak meeqqat taama ittut asannittunik angajoqqaaqaraluarlutik aserornartumik ileqqoqarnerat ersertarpoq qanoq iliallallutillu aserorterisarneratigut, allanut suaartartarneratigut, ikuallatsitsiniartarneratigut, aallaaseeqqanik eqqarsuataartarneratigut savimmillu kapoorisarneratigut (savimmik qanittumiittoqarpat), uumasunik pinerliisarneratigut, allanut imminnulluunniit nakuuserfiginninniartarneratigut. Tamakku tamarmik uivernersuarmut ersiutaapput.

Meeqqanut taamaattunut angajoqqaajusut namminneq aalajangigassaraat meerartik ajunnginnerpaamik paaqqineqarsinnaaqqullugu nakorsamut saaffiginnissanerlutik. Angajoqqaat tamatigorluinnaq paasiniartariaqarpaat meeqqap pisariaqartitai qanoq ilillutik matussutississanerlugit, Ussatit 22:6-imi allassimasoq tuppallersaatigiitigalugu.

Katsorsaariaatsit ullumikkut atorneqartut akerleriissutaanerpaartaat tassa nakorsaatitortitsisarneq. Nakorsaat atorneqarnerpaaq, Ritalin, assigiinngitsunik kinguneqarsimavoq. Siuariarneq meeqqamik Ritalinitornerata nakorsaatinilluunniit allanik sulerusussutsimik oqimaaqatigiissaarisunik pisarnerata kingunerisaa ilaqutariippassuit naammagisimaartorujussuuaat. Nakorsaatilli ilumut sunniuteqarnersut aammalu ingasappallaamik atugaannginnersut suli akerleriissutaasarpoq. Allaat nakorsat ilaasa Ritalin atortikkumanngilaat, isumaqaramik sivisungaatsiartumik tamakkuninnga atuineq arlalitsigut kingunipiloqartartoq. Erseqqissarneqassaarli ilaqutariippassuit nakorsarpassuillu kingunipilunnik ikittuinnarnik taasassaqarmata, tamannalu ilutigalugu atuisup pissutsimigut eqqarsartaatsimigullu pitsanngorsimaneranik taasassaqarlutik. Aamma soqutiginarpoq inersimasut ADD-rtutut paasineqarsimasut maannakkullu nakorsaatitortut ilarpassui inernerusunik assut naammagisimaarinnimmata. Nakorsaatit atorneqarnerat pillugu apeqqummut atatillugu misissueqqissaartariaqarpoq naliliisariaqarlunilu, taavalu nammineq aalajangiilluni.

Nakorsaatinik atuisimaneq kinguneqarsimanngippat katsorsaariaatsinik allanik nassaassaqarpoq. Vitamininik naasunillu nakorsaasianik pisarnikkut kinguneqarluartitsineq ilaasa atuarsimallugulu misigisimavaat. Soorlu oqaatigineqareersoq ADD/ADHD ilaatigut qaratsap sananeqaasiatigut oqimaaqatigiinnginneqarneranik pissuteqartarpoq, katsorsaariaatsillu tamakku tamatuminnga aaqqiisinnaanerarneqarput.

ADD/ADHD-mut atatillugu ajornartorsiutit ilarpassuinut aamma allat pissutaanerarneqarput. Dr. Doris Rapp atuakkiamini Is This Your Child?-imi allappoq ’meeqqat ilaasa timikkut napparsimanerannut aamma/imaluunniit misigissutsikkut, pissutsimikkut ilikkagaqarniarnermikkulluunniit ajornartorsiuteqarnerannut ilaatigut, immaqaluunniit allaat pingaarnerpaamik, pissutaasarput sapigaqarneq imaluunniit avatangiisit’. Aammalu sukkunut qalipaatinullu nerisassanut akugititanut qisuariarnerit assingusunik ajornartorsiortitsisinnaapput, nakuuseriartarnikkut, isumap allanngorarneratigut sinissaaruttarnikkullu malunniuttarlutik.

Angajoqqaarpassuit meeqqamik pissusianik aqutsinissartik ilikkarsimavaat, sulili ilikkagaqarniarnikkut ajornartorsiutissaqarsinnaavoq. Ilaannut immikkut ikiorserneqarneq, soorlu immikkut ilinniartinneqarneq, siunnersorneqarneq, atassuteqaqatigiittartunullu atassuteqarneq iluaqutaasinnaapput. Meeqqat taama ittut inunnik ataasiakkaartunik attaveqarnissartik pitsaanerutittarmassuk ilaqutariit ilaasa angerlarsimaffimmi ilinniartitsisoqarneq kinguneqarluartissimavaat.

Aamma taasariaqarput ilinniartitsiniarnikkut pilersaarusiarpassuit nutaat aallarnerneqarsimasut, soorlu ph.d. Mel Levinep pilersaarusiaa Schools Attuned, meeqqat inuttut pissutsimikkut assigiinngissusiinik annertuumik eqqumaffiginnittoq. Levinep pilersaarusiaani ilinniartitsineq meeqqanut ataasiakkaanut tamanut immikkut ’ilissigaq’ salliutinneqarpoq. USA-mi ilinniartitseriaatsip inunnut ataasiakkaanut naleqqussakkap tamatuma atorneqarfigisaani tamani kinguneqarluartitsisoqartoq malunnarpoq.

Siunissaq

Meeqqanik perorsaaneq illusinermut assersuunneqarsinnaavoq. Meeqqanik perorsaaneq illumillu pisineq tamarmik pilersaarusiaapput sivisuut; pissutsit assigiinngitsut pissutaallutik pisisup pitsaalluinnaqqissaanngikkaluaq naammagiinnartariaqarsinnaavaa. Taamatuttaaq angajoqqaat naammalluinnanngitsut meeqqanik naammalluinnanngitsunik Satanip silarsuaani perorsaaniarnerminni pitsaalluinnaqqissaanngikkaluaq naammagiinnartariaqarpaat. Illumi nutaami arlaannik ippigisaqarsinnaavugut imaluunniit kissaatiginngisaqarsinnaalluta, ilungersorlunili suliniuteqarnikkut isumassarsiullaqqissusermillu atuinikkut ippinnaatit malunnarunnaarsinneqangajassinnaapput. Allaat illuliortaatsip tungaanit isigalugu ajornerpaat kingorna nuannarinerpaasanngorsinnaapput.

Taamatut angajoqqaat meeqqamik piuminaatsup pisariaqartitaanut sungiussiniarsarippata meeraq inuunerannut ilaalersinnaavoq erligilluinnagaq. Meeqqat tamarmik immikkut piginnaanitik pissutsitillu pillugit pingaartinneqartariaqarput. Taamaattumik ajunngitsortaat isiginiarnerusakkit. Meeqqat naqisimanissaannut taarsiullugu nassaarniallaqqissusiat uummarissarniartariaqarpoq paasillugulu ataqqineqarnissaminnut asaneqarnissaminnullu naleqqulluartuummata — Jehova Guutimit tunissutitut akisungaartutut. — Tussiaat 127:3-5.