៣១ កាល​ដែល​ពួក​គេ​កំពុង​ប៉ុន​ប៉ង​សម្លាប់​គាត់ មេ​បញ្ជាការ​កង​ទ័ព​បាន​ទទួល​ដំណឹង​ថា​ក្រុង​យេរូសាឡិម​ទាំង​មូល​កំពុង​ច្របូក​ច្របល់។ ៣២ ដូច្នេះ គាត់​ប្រញាប់​នាំ​កូន​ទាហាន​និង​នាយ​ទាហាន​មួយ​ចំនួន រត់​ចុះ​ទៅ​ឯ​ពួក​គេ។ ពេល​ដែល​ពួក​គេ​ក្រឡេក​ទៅ​ឃើញ​មេ​បញ្ជាការ​កង​ទ័ព​និង​ពួក​ទាហាន នោះ​ពួក​គេ​ក៏​ឈប់​វាយ​ប៉ូល។

៣៣ បន្ទាប់​មក មេ​បញ្ជាការ​នោះ​ចូល​មក​ជិត ហើយ​ចាប់​ប៉ូល ដោយ​បង្គាប់​ឲ្យ​យក​ច្រវាក់​ពីរ​មក​ចង​គាត់។+ ក្រោយ​មក មេ​បញ្ជាការ​ចាប់​ផ្ដើម​សួរ​ឲ្យ​ដឹង​ថា​គាត់​ជា​អ្នក​ណា ហើយ​គាត់​បាន​ធ្វើ​អ្វី។