សៀវភៅសាំយូអែលទី២
១០ លុះក្រោយពីស្ដេចស្រុកអាំម៉ូន+ស្លាប់ កូនប្រុសគាត់ឈ្មោះហានុនបានឡើងស្នងរាជ្យបន្ត។+ ២ ពេលដាវីឌដឹងអំពីរឿងនោះ គាត់និយាយថា៖ «ខ្ញុំនឹងបង្ហាញសេចក្ដីស្រឡាញ់ដ៏ស្មោះត្រង់ចំពោះហានុន ដូចណាហាសឪពុករបស់គាត់បានបង្ហាញសេចក្ដីស្រឡាញ់ដ៏ស្មោះត្រង់ចំពោះខ្ញុំដែរ»។ ដូច្នេះ ដាវីឌចាត់ពួកអ្នកបម្រើឲ្យទៅចូលរួមរំលែកទុក្ខហានុន។ ប៉ុន្តែ ពេលពួកអ្នកបម្រើដាវីឌទៅដល់ស្រុកអាំម៉ូន ៣ នោះពួកមេដឹកនាំស្រុកអាំម៉ូននិយាយទៅហានុនជាម្ចាស់របស់ពួកគេថា៖ «ការដែលដាវីឌចាត់គេឲ្យមកចូលរួមរំលែកទុក្ខលោក តើលោកជឿថាគាត់ពិតជាផ្ដល់កិត្តិយសឲ្យឪពុករបស់លោកមែនឬ? ច្បាស់ជាមិនមែនដូច្នោះទេ ដាវីឌឲ្យគេមកគឺដើម្បីសង្កេតមើលនិងយកការណ៍ពីក្រុងយើង ក្នុងបំណងផ្ដួលរំលំក្រុងរបស់យើងតែប៉ុណ្ណោះ»។ ៤ ដូច្នេះ ហានុនចាប់ពួកអ្នកបម្រើរបស់ដាវីឌ ហើយកោរពុកចង្កាពួកគេមួយចំហៀង+ និងកាត់សម្លៀកបំពាក់វែងរបស់ពួកគេត្រឹមពាក់កណ្ដាលគូទ រួចបណ្ដេញពួកគេឲ្យត្រឡប់ទៅវិញ។ ៥ ពេលដាវីឌបានទទួលដំណឹងនោះ គាត់ប្រញាប់ចាត់ពួកបុរសឲ្យទៅជួបពួកគេ ព្រោះពួកគេអាម៉ាស់មុខខ្លាំងណាស់។ ស្ដេចបង្គាប់ពួកគេថា៖ «ចូរស្នាក់នៅក្រុងយេរីខូ+ រហូតដល់ពុកចង្កាដុះឡើងវិញ រួចសឹមត្រឡប់មកចុះ»។
៦ លុះពួកអាំម៉ូនឃើញថាពួកគេបានធ្វើឲ្យដាវីឌស្អប់ខ្ពើមពួកគេ នោះពួកគេបានទៅជួលទាហានថ្មើរជើងរបស់ពួកស៊ីរីចំនួន២០.០០០នាក់ពីក្រុងបេតរេហុប+និងពីស្រុកសូបា+ ថែមទាំងជួលស្ដេចនៃស្រុកម៉ាអាកា+និងពួកបុរសរបស់គាត់ចំនួន១.០០០នាក់ ព្រមទាំងជួលពួកបុរសចំនួន១២.០០០នាក់ពីស្រុកអ៊ីសស្ថបផងដែរ។+ ៧ ពេលដាវីឌឮដូច្នោះ គាត់ក៏ចាត់យ៉ូអាប់និងកងទ័ពទាំងអស់ ដែលមានទាំងទាហានខ្លាំងក្លាបំផុតរបស់គាត់ទៅជាមួយផង។+ ៨ ពួកអាំម៉ូនបានចេញទៅតម្រៀបទ័ពនៅច្រកទ្វារកំពែងក្រុង។ រីឯពួកស៊ីរីពីស្រុកសូបានិងពីក្រុងបេតរេហុប រួមទាំងពួកបុរសពីស្រុកអ៊ីសស្ថបនិងពីស្រុកម៉ាអាកា ពួកគេបានចេញទៅត្រៀមទ័ពនៅឯវាល។
៩ ពេលយ៉ូអាប់ឃើញពួកសត្រូវតម្រៀបទ័ពនៅខាងមុខនិងខាងក្រោយដើម្បីឡោមព័ទ្ធច្បាំងនឹងគាត់ នោះគាត់ជ្រើសរើសទាហានឆ្នើមពីចំណោមទាហានអ៊ីស្រាអែល ហើយតម្រៀបទ័ពដើម្បីច្បាំងនឹងពួកស៊ីរី។+ ១០ ចំណែកឯទាហានដែលនៅសល់ គាត់ឲ្យអាប៊ីសាយ+ដែលជាបងរបស់គាត់ នាំមុខក្នុងការតម្រៀបទ័ពដើម្បីប្រយុទ្ធនឹងពួកអាំម៉ូន។+ ១១ រួចយ៉ូអាប់និយាយទៅអាប៊ីសាយថា៖ «បើពួកស៊ីរីមានប្រៀបជាងខ្ញុំ នោះបងត្រូវមកជួយខ្ញុំ តែបើពួកអាំម៉ូនមានប្រៀបជាងបង នោះខ្ញុំនឹងទៅជួយបងវិញ។ ១២ ចូរឲ្យយើងមានចិត្តក្លាហាននិងរឹងមាំឡើង+ ដើម្បីជនជាតិរបស់យើង និងដើម្បីក្រុងទាំងប៉ុន្មានរបស់ព្រះនៃយើង! ព្រះយេហូវ៉ានឹងជួយយើងតាមដែលលោកពេញចិត្ត»។+
១៣ បន្ទាប់មក យ៉ូអាប់និងពួកទាហានរបស់គាត់សម្រុកចូលទៅច្បាំងនឹងពួកស៊ីរី រហូតដល់ពួកស៊ីរីបាក់ទ័ពរត់ពីមុខគាត់។+ ១៤ ពេលពួកអាំម៉ូនឃើញពួកស៊ីរីបាក់ទ័ព ពួកគេក៏បាក់ទ័ពរត់ពីមុខអាប៊ីសាយ ត្រឡប់ទៅក្រុងវិញដែរ។ ក្រោយពីយ៉ូអាប់ច្បាំងនឹងពួកអាំម៉ូនហើយ គាត់វិលមកក្រុងយេរូសាឡិមវិញ។
១៥ ពេលពួកស៊ីរីឃើញថាច្បាំងចាញ់ទាហានអ៊ីស្រាអែល នោះពួកគេប្រមូលផ្ដុំកម្លាំងទ័ពឡើងវិញ។+ ១៦ ដូច្នេះ ហាដាឌីសឺ+បានចាត់គេឲ្យទៅប្រមូលពួកស៊ីរីពីតំបន់ទន្លេ*+ឲ្យមកជួយ។ ពួកគេបានមកត្រង់ហេឡាម ដោយមានសូបាកជាមេទ័ពរបស់ហាដាឌីសឺជាអ្នកដឹកនាំ។
១៧ កាលដែលដាវីឌឮដំណឹងនោះ គាត់ប្រញាប់ប្រមូលទាហានអ៊ីស្រាអែលទាំងអស់ ហើយឆ្លងទន្លេយ៉ូដាន់ទៅហេឡាម។ ពេលពួកស៊ីរីឃើញដូច្នោះ ពួកគេតម្រៀបទ័ព ហើយប្រយុទ្ធនឹងដាវីឌ។+ ១៨ នៅពេលប្រយុទ្ធគ្នានោះ ដាវីឌបានសម្លាប់ពួកស៊ីរីដែលជាអ្នកបររទេះចម្បាំងចំនួន៧០០នាក់ និងទាហានសេះចំនួន៤០.០០០នាក់ ហើយពួកគេក៏បាក់ទ័ពរត់ពីមុខទាហានអ៊ីស្រាអែល។ ដាវីឌថែមទាំងបានសម្លាប់សូបាកជាមេទ័ពនៅទីនោះទៀតផង។+ ១៩ កាលស្ដេចទាំងអស់ដែលនៅក្រោមអំណាចរបស់ហាដាឌីសឺ បានឃើញថាពួកគេច្បាំងចាញ់ទាហានអ៊ីស្រាអែល នោះពួកគេប្រញាប់ចុះកិច្ចព្រមព្រៀងសន្តិភាពជាមួយនឹងជនជាតិអ៊ីស្រាអែល ហើយក៏នៅក្រោមចំណុះជនជាតិអ៊ីស្រាអែល។+ ដូច្នេះ ពួកស៊ីរីខ្លាចលែងហ៊ានជួយពួកអាំម៉ូនតទៅទៀត។