បទចម្រៀងសាឡូម៉ូន
៥ «ឱកូនក្រមុំរបស់បង ម្ចាស់ចិត្តបងអើយ!
បងចូលក្នុងសួនរបស់បងហើយ។+
បងបានប្រមូលយកជ័រល្វីងទេសនិងគ្រឿងក្រអូប។+
បងបានបរិភោគផ្លិតឃ្មុំនិងទឹកឃ្មុំ
ថែមទាំងផឹកទឹកដោះនិងស្រាទំពាំងបាយជូររបស់បងផងដែរ»។+
«មិត្តជាទីស្រឡាញ់អើយ! ចូរនាំគ្នាបរិភោគ!
ចូរផឹកឲ្យស្រវឹងនឹងស្នេហានេះចុះ!»។+
២ «រូបកាយខ្ញុំគេង តែចិត្តខ្ញុំមិនគេងសោះ។+
ខ្ញុំឮសំឡេងស្ងួនភ្ងាកំពុងគោះទ្វារ!។
‹ឱម្ចាស់ចិត្តបង ឱបណ្ដូលចិត្តបងអើយ! សូមអូនបើកទ្វារឲ្យបងផង
ឱព្រាបមាសបង សម្រស់នួនល្អងល្អឥតខ្ចោះ!
ព្រោះក្បាលបងទទឹកជោកដោយសន្សើម
ឯសក់បងវិញពេញដោយសំណើមពេលរាត្រី›។+
៣ ខ្ញុំបានដោះអាវវែងចេញហើយ
តើត្រូវឲ្យខ្ញុំពាក់វិញឬ?
ខ្ញុំបានលាងជើងរួចហើយ
តើត្រូវឲ្យជើងខ្ញុំប្រឡាក់ដីវិញឬ?។
៤ ស្រាប់តែម្ចាស់ស្នេហ៍ខ្ញុំបានដកដៃចេញពីប្រហោងទ្វារវិញ
ពេលនោះចិត្តរបស់ខ្ញុំតាំងភ័យញាប់ញ័រ។
៥ ខ្ញុំបានក្រោកឡើងដើម្បីបើកទ្វារឲ្យម្ចាស់ស្នេហ៍របស់ខ្ញុំ
ដំណក់ជ័រល្វីងទេសក៏ស្រក់ចេញពីដៃខ្ញុំ
ហើយម្រាមដៃខ្ញុំហៀរចេញប្រេងក្រអូប*មកលើគន្លឹះទ្វារ។
៦ ខ្ញុំក៏បើកទ្វារឲ្យម្ចាស់ស្នេហ៍
តែគាត់ចេញទៅហើយ គាត់ទៅបាត់ហើយ។
ខ្ញុំខកចិត្តខ្លាំងណាស់កាលដែលគាត់ចេញទៅបាត់។*
ខ្ញុំខំរកគាត់ តែរកមិនឃើញទេ។+
ខ្ញុំហៅរកគាត់ តែមិនឮគាត់ឆ្លើយសោះ។
៧ ពួកអ្នកយាមដែលកំពុងល្បាតក្រុង ក៏បានឃើញខ្ញុំ។
ពួកគេវាយខ្ញុំឲ្យរបួស។
ឯពួកអ្នកយាមកំពែងបានទាញយកស្បៃរុំខ្លួនរបស់ខ្ញុំ។
៨ ឱកូនស្រីនៃក្រុងយេរូសាឡិមអើយ ខ្ញុំសុំឲ្យពួកនាងស្បថថា៖
បើពួកនាងឃើញម្ចាស់ស្នេហ៍របស់ខ្ញុំ
សូមប្រាប់គាត់ថាខ្ញុំមានជំងឺស្នេហា»។
៩ «ឱនារីដែលមានរូបឆោមល្អឯកអើយ
តើម្ចាស់ស្នេហ៍របស់នាងល្អជាងម្ចាស់ស្នេហ៍របស់អ្នកឯទៀតយ៉ាងណាទៅបានជានាងឲ្យពួកខ្ញុំស្បថដូច្នេះ?
តើម្ចាស់ស្នេហ៍របស់នាងល្អជាងម្ចាស់ស្នេហ៍របស់អ្នកឯទៀតយ៉ាងណាទៅ?»។
១០ «ម្ចាស់ស្នេហ៍របស់ខ្ញុំមានសាច់ឈាមស្រស់ថ្លា គាត់សង្ហាខ្លាំងណាស់។
ក្នុងចំណោមបុរស១០.០០០នាក់ គាត់លេចធ្លោជាងគេ។
១១ ក្បាលគាត់ស្អាតដូចមាសសុទ្ធ
សក់របស់គាត់ដូចជាធាងត្នោតបក់រវិច*
ហើយខ្មៅរលើបដូចសត្វក្អែក។
១២ នេត្រាគាត់ដូចព្រាបកំពុងងូតក្នុងទឹកដោះដែលនៅក្បែរផ្លូវទឹក
ហើយអង្គុយនៅជិតមាត់អាងដែលមានទឹកពេញព្រៀប។*
១៣ ថ្ពាល់គាត់ដូចជាថ្នាលរុក្ខជាតិសម្រាប់ធ្វើគ្រឿងក្រអូប+
និងដូចជាពំនូកជីរមានក្លិនពិដោរ។
ចំណែកឯបបូរមាត់គាត់វិញ ដូចផ្កាលីលីដែលស្រក់ប្រេងក្រអូប។*+
១៤ ម្រាមដៃគាត់ប្រៀបបាននឹងបំពង់មាសដាំដោយត្បូងគ្រីសូឡែត
ឯពោះគាត់ភ្លឺរលោងដូចជាភ្លុកដំរីដែលស្រោបដោយត្បូងកណ្ដៀង។
១៥ ជើងគាត់ដូចជាសសរថ្មកែវដាំលើកំណល់មាសសុទ្ធ
រូបរាងរបស់គាត់សែនស្អាតដូចទឹកដីស្រុកលីបង់និងដូចដើមស៊ីដារដែលគ្មានអ្នកណាប្រៀបផ្ទឹមបាន។+
១៦ មាត់របស់គាត់ពោរពេញដោយភាពផ្អែមល្ហែម
ហើយអ្វីៗទាំងអស់អំពីគាត់គួរឲ្យទាក់ទាញចិត្តខ្លាំងណាស់។+
ឱកូនស្រីនៃក្រុងយេរូសាឡិមអើយ នេះហើយជាម្ចាស់ស្នេហ៍របស់ខ្ញុំជាបណ្ដូលចិត្តតែមួយរបស់ខ្ញុំ»។