សៀវភៅសាំយូអែលទី២
៤ ពេលដែលអ៊ីសបូសែត+កូនប្រុសសុលឮថាអាប់ណឺស្លាប់នៅក្រុងហេប្រុន+ គាត់លែងមានកម្លាំងចិត្តនិងចិត្តក្លាហានទៀត ហើយជនជាតិអ៊ីស្រាអែលទាំងអស់ក៏ព្រួយបារម្ភដែរ។ ២ នៅគ្រានោះមានបុរសពីរនាក់ឈ្មោះបាអាណានិងរេកាប ដែលជាមេនៃក្រុមកងពលវាយលុករបស់កូនប្រុសសុល។ ពួកគេជាកូនប្រុសរបស់រីម៉ូន ដែលជាអ្នកក្រុងបៀរ៉ូតក្នុងកុលសម្ព័ន្ធបេនយ៉ាមីន (ក្រុងបៀរ៉ូត+ធ្លាប់បានត្រូវរាប់បញ្ចូលក្នុងទឹកដីរបស់កុលសម្ព័ន្ធបេនយ៉ាមីន។ ៣ អ្នកក្រុងបៀរ៉ូតបានភៀសខ្លួនទៅគីថែម+ ហើយពួកគេបានអាស្រ័យនៅទីនោះជាជនបរទេសរហូតមកដល់សព្វថ្ងៃនេះ)។
៤ យ៉ូណាថានជាកូនប្រុសសុល+ គាត់មានកូនប្រុសម្នាក់ពិការជើងទាំងពីរ+ ឈ្មោះមេភីបូសែត។ កាលកូននោះអាយុប្រាំឆ្នាំ មានដំណឹងពីក្រុងយេសរៀល+ថាសុលនិងយ៉ូណាថានបានបាត់បង់ជីវិត។ ឮដូច្នោះ អ្នកបម្រើដែលមើលថែកូននោះ ក៏ពរកូននោះរត់ទាំងភ័យស្លុតយ៉ាងខ្លាំង។ ប៉ុន្តែ ពេលដែលគាត់កំពុងរត់ កូននោះក៏ធ្លាក់ពីដៃគាត់ ហើយពិការទៅ។+
៥ រេកាបនិងបាអាណាកូនប្រុសៗរបស់រីម៉ូនដែលជាអ្នកក្រុងបៀរ៉ូត បានចូលទៅក្នុងវិមានរបស់អ៊ីសបូសែតនាពេលថ្ងៃត្រង់ ពេលដែលគាត់កំពុងសម្រាក។ ៦ រេកាបនិងបាអាណា+ចូលទៅក្នុងវិមាននោះធ្វើដូចជាទៅយកស្រូវសាលី។ រួចមក ពួកគេដកកាំបិតចាក់ពោះអ៊ីសបូសែត ហើយរត់គេចខ្លួនទៅ។ ៧ មុនដំបូង ពេលពួកគេចូលទៅក្នុងវិមាន ពួកគេឃើញអ៊ីសបូសែតកំពុងសម្រាកលើគ្រែក្នុងបន្ទប់របស់គាត់។ រួចពួកគេក៏ដកកាំបិតចាក់សម្លាប់គាត់ ហើយកាត់ក្បាលរបស់គាត់។ បន្ទាប់មក ពួកគេយកក្បាលគាត់ ហើយធ្វើដំណើរពេញមួយយប់តាមផ្លូវទៅតំបន់អារ៉ាបា។ ៨ ពួកគេយកក្បាលអ៊ីសបូសែត+ទៅជូនស្ដេចដាវីឌនៅក្រុងហេប្រុន ហើយនិយាយថា៖ «ស្ដេចជាម្ចាស់របស់យើងខ្ញុំ នេះជាក្បាលអ៊ីសបូសែតកូនប្រុសរបស់សុល ជាសត្រូវ+ដែលតាមសម្លាប់លោក។*+ ថ្ងៃនេះ ព្រះយេហូវ៉ាបានសងសឹកសុលនិងកូនចៅរបស់គាត់ជំនួសលោកហើយ»។
៩ ប៉ុន្តែ ដាវីឌឆ្លើយទៅរេកាបនិងបាអាណាកូនប្រុសៗរបស់រីម៉ូនថា៖ «ខ្ញុំសូមស្បថដោយនូវនាមព្រះយេហូវ៉ាជាព្រះដែលមានជីវិតរស់នៅ និងជាអ្នកដែលសង្គ្រោះខ្ញុំពីទុក្ខលំបាកទាំងអស់ថា+ ១០ ពេលនៅឯក្រុងស៊ីកឡាក់ មានបុរសម្នាក់បាននាំដំណឹងមកប្រាប់ខ្ញុំថាសុលស្លាប់ហើយ+ គាត់គិតស្មានថានោះជាដំណឹងល្អសម្រាប់ខ្ញុំ តែខ្ញុំបានបញ្ជាគេឲ្យសម្លាប់គាត់។+ នោះហើយជារង្វាន់ដែលខ្ញុំបានឲ្យគាត់! ១១ បើខ្ញុំបានធ្វើដូច្នោះចំពោះគាត់ទៅហើយ ចុះទម្រាំតែមនុស្សទុច្ចរិតសម្លាប់មនុស្សសុចរិតដែលកំពុងដេកនៅលើគ្រែក្នុងផ្ទះ នោះខ្ញុំច្បាស់ជាឲ្យរង្វាន់ច្រើនជាងនោះទៅទៀត គឺអ្នកឯងទាំងពីរត្រូវទទួលទោសចំពោះការបង្ហូរឈាម ហើយត្រូវស្លាប់ឲ្យផុតពីផែនដីនេះ!»។+ ១២ រួចដាវីឌបញ្ជាពួកយុវជនឲ្យសម្លាប់បុរសទាំងពីរនោះ+ ហើយកាត់ដៃកាត់ជើងពួកគេ។ បន្ទាប់មក ពួកយុវជនយកសាកសពពួកគេទៅព្យួរ+ក្បែរស្រះទឹកនៅក្រុងហេប្រុន។ ប៉ុន្តែ ពួកគេយកក្បាលអ៊ីសបូសែតទៅបញ្ចុះក្នុងផ្នូររបស់អាប់ណឺនៅក្រុងហេប្រុន។