ចម្រៀងសរសើរព្រះ
១៤៨ ចូរសរសើរយ៉ា!*
ឱអស់អ្នកដែលនៅស្ថានសួគ៌អើយ ចូរសរសើរតម្កើងព្រះយេហូវ៉ា។+
ឱអស់អ្នកដែលនៅទីខ្ពស់អើយ ចូរសរសើរតម្កើងលោក។
២ បណ្ដាទេវតាទាំងឡាយអើយ ចូរសរសើរលោក។+
ពលទ័ពទាំងអស់អើយ ចូរសរសើរលោក។+
៣ ដួងអាទិត្យនិងដួងខែ ចូរសរសើរលោក។
ផ្កាយទាំងអស់ដែលភ្លឺចិញ្ចាច ចូរសរសើរលោក។+
៤ ឱស្ថានសួគ៌ដ៏ខ្ពស់បំផុត និងទឹកទាំងប៉ុន្មានដែលនៅលើមេឃ*
ចូរសរសើរលោក។
៥ សូមឲ្យអ្វីៗទាំងនោះសរសើរតម្កើងដល់នាមព្រះយេហូវ៉ា
ព្រោះពេលដែលលោកចេញបង្គាប់ អ្វីទាំងនោះក៏បានកើតមក។+
៦ លោកបានតាំងអ្វីៗទាំងនោះឲ្យនៅជាប់ជារៀងរហូត។+
លោកបានកំណត់ច្បាប់មួយទុក ហើយច្បាប់នោះនឹងស្ថិតស្ថេរជាដរាប។+
៧ ឱអស់អ្នកដែលនៅផែនដីអើយ ចូរសរសើរតម្កើងព្រះយេហូវ៉ា
ឱសត្វធំសម្បើមនៅក្នុងសមុទ្រ និងទឹកជ្រៅទាំងអស់
៨ ហើយផ្លេកបន្ទោរ ដុំទឹកកក ដុំព្រិល ពពកខ្មៅក្រាស់
និងខ្យល់ព្យុះដែលកំពុងធ្វើតាមបង្គាប់របស់លោក ចូរសរសើរតម្កើងលោក។+
៩ ឱភ្នំធំនិងភ្នំតូចទាំងឡាយ+
រួមទាំងដើមឈើដែលមានផល និងដើមស៊ីដារទាំងប៉ុន្មាន+
១០ ព្រមទាំងសត្វស្រុក សត្វព្រៃនានា+
សត្វលូនវារ និងសត្វស្លាប
១១ បណ្ដាស្ដេចនៅផែនដី និងប្រជាជាតិទាំងអស់
ពួកមានឋានៈខ្ពស់ និងចៅក្រមទាំងឡាយក្នុងលោកា+
១២ ព្រមទាំងកំលោះ ទាំងក្រមុំ
ទាំងចាស់ ទាំងក្មេង
១៣ ចូរឲ្យអ្នកទាំងអស់នោះសរសើរតម្កើងនាមព្រះយេហូវ៉ា
ព្រោះមានតែនាមរបស់លោកប៉ុណ្ណោះដែលខ្ពង់ខ្ពស់បំផុត។+
លោករុងរឿងថ្កុំថ្កើងលើផែនដីនិងសួគ៌ា។+
១៤ លោកនឹងធ្វើឲ្យរាស្ត្ររបស់លោកមានកម្លាំងខ្លាំងក្លា
ដើម្បីឲ្យមនុស្សទាំងអស់ដែលមានភក្ដីភាពចំពោះលោក បានទទួលការសរសើរ
គឺមនុស្សដែលជាកូននៃអ៊ីស្រាអែល ជាបណ្ដារាស្ត្រដែលចូលទៅជិតលោក។
ចូរសរសើរយ៉ា!*