ជំរឿនបណ្ដាជន
៨ ព្រះយេហូវ៉ាបានមានប្រសាសន៍ទៅម៉ូសេថា៖ ២ «ចូរប្រាប់អេរ៉ុនថា៖ ‹ពេលអ្នកអុជចង្កៀងទាំង៧ ត្រូវរៀបចំយ៉ាងណាឲ្យពន្លឺពីចង្កៀងជះទៅខាងមុខជើងចង្កៀង›»។+ ៣ អេរ៉ុនក៏បានធ្វើដូច្នោះ គឺគាត់អុជចង្កៀងឲ្យពន្លឺជះទៅខាងមុខជើងចង្កៀង+ ដូចដែលព្រះយេហូវ៉ាបានបង្គាប់ម៉ូសេ។ ៤ ជើងចង្កៀងទាំងមូលបានត្រូវធ្វើពីមាសមួយដុំ សូម្បីតែតួចង្កៀង និងក្បាច់ផ្ការីក ក៏បានត្រូវដំពីមាសមួយដុំនោះដែរ។+ ជើងចង្កៀងនោះបានត្រូវធ្វើតាមការណែនាំដែលព្រះយេហូវ៉ាបើកបង្ហាញឲ្យម៉ូសេឃើញក្នុងគំនិត។+
៥ ព្រះយេហូវ៉ាមានប្រសាសន៍បន្តទៅម៉ូសេថា៖ ៦ «ចូរញែកពួកលេវីចេញពីចំណោមបណ្ដាជនអ៊ីស្រាអែល ហើយសម្អាតពួកគេ។+ ៧ នេះជារបៀបដែលអ្នកត្រូវសម្អាតពួកគេ គឺប្រោះទឹកសម្រាប់ជម្រះការខុសឆ្គងទៅលើពួកគេ រួចពួកគេត្រូវកោរសក់និងរោមនៅលើរូបកាយ។ បន្ទាប់មក ឲ្យពួកគេបោកសម្លៀកបំពាក់ និងងូតទឹកសម្អាតខ្លួន។+ ៨ រួចពួកគេត្រូវយកគោស្ទាវមួយក្បាល+មកជូន រួមជាមួយគ្រឿងបូជាពីស្រូវ+ ជាម្សៅម៉ដ្ឋលាយនឹងប្រេង។ អ្នកត្រូវយកគោស្ទាវមួយក្បាលទៀត ជូនជាគ្រឿងបូជាសម្រាប់អំពើខុសឆ្គង។+ ៩ អ្នកត្រូវនាំពួកលេវីមកឈរនៅមុខត្រសាលជំនុំ ហើយឲ្យបណ្ដាជនអ៊ីស្រាអែលទាំងអស់មកជួបជុំគ្នា។+ ១០ ក្រោយពីពួកលេវីមកឈរនៅចំពោះព្រះយេហូវ៉ា បណ្ដាជនអ៊ីស្រាអែលត្រូវដាក់ដៃលើពួកលេវី។+ ១១ បន្ទាប់មក អេរ៉ុនត្រូវប្រគល់ពួកលេវីដល់ព្រះយេហូវ៉ា ទុកជាគ្រឿងបូជាសម្រាប់លើកចុះឡើង+របស់បណ្ដាជនអ៊ីស្រាអែល។ ក្រោយពីនោះ ពួកលេវីត្រូវបំពេញកិច្ចបម្រើជូនព្រះយេហូវ៉ា។+
១២ «រួចមក ពួកលេវីត្រូវដាក់ដៃលើក្បាលគោស្ទាវទាំងនោះ។+ បន្ទាប់មក ត្រូវជូនគោមួយក្បាលជាគ្រឿងបូជាសម្រាប់អំពើខុសឆ្គង និងមួយក្បាលទៀតជាគ្រឿងបូជាដុតដល់ព្រះយេហូវ៉ា ដើម្បីជម្រះភាពខុសឆ្គងរបស់ពួកគេ។+ ១៣ អ្នកត្រូវឲ្យពួកលេវីឈរនៅមុខអេរ៉ុននិងកូនប្រុសៗរបស់គាត់ រួចប្រគល់ពួកគេដល់ព្រះយេហូវ៉ា ទុកជាគ្រឿងបូជាសម្រាប់លើកចុះឡើង។ ១៤ អ្នកត្រូវញែកពួកលេវីពីចំណោមបណ្ដាជនអ៊ីស្រាអែល ហើយពួកលេវីនឹងទៅជារបស់ខ្ញុំ។+ ១៥ ក្រោយនោះ ពួកលេវីត្រូវចូលទៅបម្រើនៅឯត្រសាលជំនុំ។ នេះជារបៀបដែលអ្នកត្រូវសម្អាតពួកគេ ហើយប្រគល់ពួកគេដល់ខ្ញុំទុកជាគ្រឿងបូជាសម្រាប់លើកចុះឡើង។ ១៦ ព្រោះពួកគេបានត្រូវប្រគល់ដល់ខ្ញុំជាអំណោយពីបណ្ដាជនអ៊ីស្រាអែល ហើយខ្ញុំនឹងទទួលយកពួកគេធ្វើជារបស់ខ្ញុំ ដើម្បីជំនួសកូនច្បងទាំងអស់របស់បណ្ដាជនអ៊ីស្រាអែល។+ ១៧ ព្រោះកូនច្បងទាំងអស់របស់អ៊ីស្រាអែលជារបស់ខ្ញុំ ទាំងកូនច្បងរបស់មនុស្ស ទាំងកូនដំបូងរបស់សត្វ។+ នៅថ្ងៃដែលខ្ញុំប្រហារកូនច្បងទាំងអស់នៅស្រុកអេហ្ស៊ីប ខ្ញុំបានញែកពួកគេទុកជារបស់ខ្ញុំ។+ ១៨ ខ្ញុំនឹងយកពួកលេវីជំនួសកូនច្បងទាំងអស់របស់អ៊ីស្រាអែល ទុកជារបស់ខ្ញុំ។ ១៩ ខ្ញុំនឹងប្រគល់ពួកលេវីជាអំណោយដល់អេរ៉ុននិងកូនប្រុសៗរបស់គាត់ ដើម្បីបំពេញកិច្ចបម្រើនៅត្រសាលជំនុំជាប្រយោជន៍ដល់បណ្ដាជនអ៊ីស្រាអែល+ និងដើម្បីជម្រះភាពខុសឆ្គងឲ្យពួកគេ។ យ៉ាងនោះ សេចក្ដីវេទនានឹងមិនកើតឡើងដល់បណ្ដាជនអ៊ីស្រាអែលទេ+ បើពួកគេចូលទៅជិតកន្លែងបរិសុទ្ធ»។
២០ ម្ល៉ោះហើយ ម៉ូសេ អេរ៉ុន និងបណ្ដាជនអ៊ីស្រាអែលទាំងអស់ បានធ្វើដូច្នោះដល់ពួកលេវី ដូចដែលព្រះយេហូវ៉ាបានបង្គាប់ម៉ូសេ។ ២១ ដូច្នេះ ពួកលេវីបានលាងជម្រះកាយ ហើយបោកសម្លៀកបំពាក់ខ្លួន។+ ក្រោយនោះ អេរ៉ុនបានប្រគល់ពួកគេដល់ព្រះយេហូវ៉ាទុកជាគ្រឿងបូជាសម្រាប់លើកចុះឡើង។+ រួចមក អេរ៉ុនជម្រះភាពខុសឆ្គងឲ្យពួកគេដើម្បីឲ្យពួកគេបានស្អាតបរិសុទ្ធ។+ ២២ ក្រោយមក ពួកលេវីបានចូលទៅបំពេញកិច្ចបម្រើនៅក្នុងត្រសាលជំនុំ ក្រោមការមើលខុសត្រូវរបស់អេរ៉ុននិងកូនប្រុសៗរបស់គាត់។ ហេតុនេះ គេបានធ្វើដូច្នោះដល់ពួកលេវី ដូចដែលព្រះយេហូវ៉ាបានបង្គាប់ម៉ូសេ។
២៣ ព្រះយេហូវ៉ាបានមានប្រសាសន៍ទៅកាន់ម៉ូសេបន្តទៀតថា៖ ២៤ «ការណែនាំស្ដីអំពីពួកលេវីមានដូចតទៅ៖ បុរសដែលមានអាយុចាប់ពី២៥ឆ្នាំឡើងទៅ អាចបំពេញកិច្ចបម្រើក្នុងត្រសាលជំនុំជាមួយនឹងអ្នកឯទៀត។ ២៥ ប៉ុន្តែ បុរសដែលមានអាយុលើសពី៥០ឆ្នាំ គាត់នឹងចូលនិវត្តន៍ ហើយលែងបំពេញកិច្ចបម្រើគាត់ទៀត។ ២៦ គាត់អាចជួយបងប្អូនគាត់ដែលមានភារកិច្ចនៅឯត្រសាលជំនុំបាន តែគាត់មិនអាចបំពេញកិច្ចបម្រើនៅទីនោះទេ។ នេះជាការណែនាំស្ដីអំពីពួកលេវីនិងភារកិច្ចរបស់ពួកគេ»។+