សៀវភៅសាំយូអែលទី២
២០ នៅពេលនោះ មានបុរសម្នាក់ឈ្មោះសេបា+ ជាមេបង្កបញ្ហា។ សេបាជាកូនប្រុសរបស់ប៊ីកក្រាយ គាត់មកពីកុលសម្ព័ន្ធបេនយ៉ាមីន។ គាត់ផ្លុំស្នែងឡើង+ ហើយប្រកាសថា៖ «យើងគ្មានចំណែកអ្វីនឹងដាវីឌទេ ហើយយើងក៏គ្មានមត៌កជាមួយនឹងកូនប្រុសអ៊ីសាយដែរ។+ ឱបណ្ដាជនអ៊ីស្រាអែលអើយ! ចូរយើងគ្រប់គ្នាត្រឡប់ទៅឯព្រះ*របស់យើងវិញ»។+ ២ ពេលឮដូច្នោះ បណ្ដាជនអ៊ីស្រាអែលទាំងអស់បានឈប់ដើរតាមដាវីឌ ហើយដើរតាមសេបាកូនប្រុសរបស់ប៊ីកក្រាយវិញ។+ ប៉ុន្តែ បណ្ដាជនយូដាបន្តដង្ហែស្ដេចរបស់ពួកគេ ពីទន្លេយ៉ូដាន់រហូតដល់ក្រុងយេរូសាឡិម។+
៣ ពេលស្ដេចដាវីឌមកដល់វិមាននៅក្រុងយេរូសាឡិមវិញ+ គាត់បាននាំប្រពន្ធបន្ទាប់១០នាក់ ដែលគាត់បានឲ្យនៅមើលថែវិមាន ឲ្យទៅរស់នៅក្នុងដំណាក់មួយ។+ គាត់ឲ្យគេយាមដំណាក់នោះ ហើយចិញ្ចឹមថែរក្សាពួកនាង។ ប៉ុន្តែ គាត់មិនរួមដំណេកជាមួយនឹងពួកនាងទេ។+ នៅទីនោះពួកនាងរស់នៅហាក់ដូចជាស្ត្រីដែលគ្មានប្ដី ទោះជាប្ដីរបស់ពួកនាងកំពុងនៅរស់នៅឡើយក៏ដោយ។ ពួកនាងបានត្រូវបង្ខាំងទុករហូតដល់ថ្ងៃស្លាប់។
៤ ស្ដេចនិយាយទៅអាម៉េសាថា៖+ «ចូរអ្នកទៅកោះហៅពួកបុរសយូដាឲ្យមកជួបខ្ញុំក្នុងរវាងបីថ្ងៃ ហើយអ្នកក៏ត្រូវត្រឡប់មកទីនេះវិញដែរ»។ ៥ ដូច្នេះ អាម៉េសាបានចេញទៅកោះហៅពួកបុរសយូដា។ ប៉ុន្តែ គាត់មិនបានមកទាន់ពេលដែលស្ដេចបានកំណត់ឡើយ។ ៦ រួចមក ដាវីឌក៏និយាយទៅអាប៊ីសាយថា៖+ «សេបា+កូនប្រុសប៊ីកក្រាយអាចធ្វើឲ្យយើងអន្តរាយ ខ្លាំងជាងអាប់សាឡំទៅទៀត។+ ចូរនាំពួកអ្នកបម្រើខ្ញុំទៅចាប់សេបាឲ្យបាន មុនពេលគាត់ទៅជ្រកកោនក្នុងក្រុងដែលមានកំពែងមាំមួន»។ ៧ ម្ល៉ោះហើយ ពួកបុរសរបស់យ៉ូអាប់+ ពួកកេរ៉ែត ពួកពេលេធីម+ និងពួកទាហានខ្លាំងក្លាទាំងអស់បានចេញពីក្រុងយេរូសាឡិម ទៅដេញតាមសេបាកូនប្រុសប៊ីកក្រាយ។ ៨ ពេលពួកគេមកដល់ជិតសិលាធំនៅក្រុងគីបៀន+ នោះអាម៉េសា+បានមកជួបពួកគេ។ យ៉ូអាប់ពាក់អាវក្រោះ ហើយគាត់មានដាវក្នុងស្រោមសៀតនៅចង្កេះ។ ពេលយ៉ូអាប់ដើរទៅជួបអាម៉េសា យ៉ូអាប់ធ្វើជារបូតដាវ។
៩ យ៉ូអាប់សួរអាម៉េសាថា៖ «តើបងសុខសប្បាយទេ?»។ រួចយ៉ូអាប់លូកដៃស្ដាំទៅចាប់ពុកចង្ការបស់អាម៉េសា ហាក់ដូចជាចង់ថើប។ ១០ អាម៉េសាមិនបានចាប់អារម្មណ៍ដាវក្នុងដៃយ៉ូអាប់ទេ។ យ៉ូអាប់ក៏ចាក់ពោះរបស់អាម៉េសា+ ធ្លាយពោះវៀនចេញទ្រេលលើដី។ គាត់ចាក់តែមួយដងប៉ុណ្ណោះអាចធ្វើឲ្យអាម៉េសាស្លាប់បាន។ បន្ទាប់មក យ៉ូអាប់និងបងគាត់អាប៊ីសាយ បន្តដេញតាមសេបាកូនប្រុសប៊ីកក្រាយ។
១១ យុវជនម្នាក់របស់យ៉ូអាប់ ដែលឈរនៅក្បែរអាម៉េសា បានពោលឡើងថា៖ «អស់អ្នកដែលនៅខាងយ៉ូអាប់ និងនៅខាងដាវីឌ សូមទៅតាមយ៉ូអាប់!»។ ១២ ក្នុងអំឡុងពេលនោះ អាម៉េសាកំពុងដេកក្នុងថ្លុកឈាមកណ្ដាលផ្លូវ។ ពេលយុវជននោះឃើញថាមនុស្សទាំងឡាយតែងតែឈប់មើលអាម៉េសា គាត់ក៏យកអាម៉េសាចេញពីផ្លូវ។ រួចមក គាត់បោះអាវមួយទៅលើអាម៉េសា ព្រោះគាត់ឃើញថាពេលមនុស្សទាំងអស់ឲ្យតែមកដល់ទីនេះ ពួកគេតែងតែផ្អាកដំណើរមើលអាម៉េសា។ ១៣ ក្រោយពីគាត់យកអាម៉េសាចេញពីផ្លូវហើយ នោះបុរសទាំងអស់ក៏ទៅតាមយ៉ូអាប់ ដើម្បីចាប់សេបា+កូនប្រុសប៊ីកក្រាយ។
១៤ សេបាបានធ្វើដំណើរកាត់តាមទឹកដីនៃកុលសម្ព័ន្ធទាំងអស់របស់ជនជាតិអ៊ីស្រាអែល ឆ្ពោះទៅក្រុងអេបិលបេតម៉ាអាកា។+ ចំណែកឯកូនចៅប៊ីកក្រាយវិញ ពួកគេក៏ប្រមូលគ្នាចេញទៅក្រុងនោះតាមក្រោយសេបាដែរ។
១៥ យ៉ូអាប់និងពួកបុរសរបស់គាត់ បានមកឡោមព័ទ្ធក្រុងអេបិលបេតម៉ាអាកា។ ពួកគេបានចាក់ដីបង្គរឡើងដើម្បីវាយប្រហារក្រុងនោះ។ ពួកគេថែមទាំងបុកកំពែងដើម្បីឲ្យរលំទៀតផង។ ១៦ នាពេលនោះដែរ មានស្ត្រីវៃឆ្លាតម្នាក់បានស្រែកចេញពីក្រុងនោះមកថា៖ «អ្នកទាំងអស់គ្នាអើយ សូមស្ដាប់ខ្ញុំសិន! សូមប្រាប់យ៉ូអាប់ថា៖ ‹ខ្ញុំមានការចង់និយាយជាមួយនឹងគាត់›»។ ១៧ ដូច្នេះ យ៉ូអាប់ទៅជួបស្ត្រីនោះ។ នាងសួរថា៖ «អ្នកជាយ៉ូអាប់ មែនទេ?»។ គាត់ឆ្លើយថា៖ «មែន គឺខ្ញុំ»។ រួចនាងនិយាយទៅគាត់ថា៖ «សូមមេត្តាស្ដាប់នាងខ្ញុំនិយាយសិន»។ គាត់ឆ្លើយថា៖ «សូមនិយាយមកចុះ»។ ១៨ នាងក៏និយាយបន្តទៀតថា៖ «តាំងពីដើម គេតែងពោលថាដើម្បីដោះស្រាយបញ្ហាណាមួយ ‹ចូរទៅសួរយោបល់ពីអ្នកក្រុងអេបិល›។ ១៩ នាងខ្ញុំជាតំណាងជនជាតិអ៊ីស្រាអែលដែលស្មោះត្រង់ និងដែលចង់បានសន្តិភាព។ នាងខ្ញុំសូមជម្រាបថា អ្នកកំពុងព្យាយាមបំផ្លាញក្រុងនេះដែលជាក្រុងដ៏សំខាន់របស់ស្រុកអ៊ីស្រាអែល។ ហេតុអ្វីអ្នកចង់បំបាត់ចោលមត៌ករបស់ព្រះយេហូវ៉ា?»។+ ២០ យ៉ូអាប់ឆ្លើយថា៖ «ខ្ញុំមិនដែលគិតថានឹងបំផ្លាញក្រុងនេះចោលទេ។ ២១ ពួកយើងនឹងមិនធ្វើដូច្នោះឡើយ។ ប៉ុន្តែ មានបុរសម្នាក់ឈ្មោះសេបា+កូនប្រុសប៊ីកក្រាយពីតំបន់ភ្នំស្រុកអេប្រាអ៊ីម+ គាត់បានបះបោរប្រឆាំងស្ដេចដាវីឌ។ បើនាងប្រគល់បុរសនោះមកឲ្យខ្ញុំ នោះខ្ញុំនឹងដកថយចេញពីក្រុងនេះ»។ ស្ត្រីនោះក៏តបទៅយ៉ូអាប់ថា៖ «យល់ព្រម! យើងនឹងបោះក្បាលគាត់ពីលើកំពែងនេះទៅឲ្យអ្នក!»។
២២ ដូច្នេះ ស្ត្រីវៃឆ្លាតនោះក៏ប្រញាប់ទៅនិយាយជាមួយនឹងបណ្ដាជនទាំងអស់ក្នុងក្រុងនោះ។ បន្ទាប់មក ពួកគេបានទៅកាត់ក្បាលសេបាកូនប្រុសប៊ីកក្រាយ រួចបោះទៅឲ្យយ៉ូអាប់។ យ៉ូអាប់ក៏ផ្លុំស្នែងឡើង ពេលឮសំឡេងស្នែង ពួកបុរសរបស់គាត់នាំគ្នាត្រឡប់ទៅលំនៅរៀងៗខ្លួនវិញ។+ យ៉ូអាប់ត្រឡប់ទៅជួបស្ដេចនៅក្រុងយេរូសាឡិម។
២៣ យ៉ូអាប់បានក្លាយទៅជាមេបញ្ជាការកងទ័ពទាំងមូលនៃស្រុកអ៊ីស្រាអែល។+ បេនណាយ៉ា+កូនប្រុសយេហូយ៉ាដា+ ជាមេលើពួកកេរ៉ែតនិងពួកពេលេធីម។+ ២៤ អាដូរ៉ាម+ជាមេកំណែន ហើយយេហូសាផាត+កូនប្រុសអាហាយលូតជាអ្នកកត់ត្រា។ ២៥ សេវ៉ាជាលេខាធិការ ហើយសេដុក+និងអាប៊ីយ៉ាថា+ជាសង្ឃ។ ២៦ អាយរ៉ាកូនចៅយ៉ាអៀ ក៏បានទៅជាមន្ត្រីជាន់ខ្ពស់របស់ដាវីឌដែរ។