សំបុត្រទី២របស់យ៉ូហាន
១ ពីខ្ញុំជាបុរសចាស់ទុំ* ជូនចំពោះស្ត្រីដែលបានត្រូវរើសតាំង និងកូនរបស់នាង ដែលខ្ញុំស្រឡាញ់យ៉ាងស្មោះ។ មិនត្រឹមតែខ្ញុំប៉ុណ្ណោះទេដែលស្រឡាញ់ តែអស់អ្នកដែលស្គាល់សេចក្ដីពិត ក៏ស្រឡាញ់អ្នករាល់គ្នាដែរ។ ២ យើងស្រឡាញ់អ្នករាល់គ្នា ដោយសារសេចក្ដីពិតដែលនៅក្នុងចិត្តយើង ហើយសេចក្ដីពិតនោះនឹងនៅជាប់ជាមួយនឹងយើងជារៀងរហូត។ ៣ យើងទាំងអស់គ្នានឹងទទួលគុណដ៏វិសេសលើសលប់ សេចក្ដីមេត្តាករុណា សេចក្ដីសុខសាន្ត សេចក្ដីពិត និងសេចក្ដីស្រឡាញ់ ពីព្រះដែលជាបិតានិងពីលោកយេស៊ូគ្រិស្តជាបុត្ររបស់ព្រះ។
៤ ខ្ញុំមានអំណរក្រៃលែង ពីព្រោះខ្ញុំបានឃើញកូនខ្លះរបស់នាងកំពុងប្រព្រឹត្តតាមសេចក្ដីពិត+ ដូចបញ្ញត្ដិដែលយើងបានទទួលពីបិតាដែលស្ថិតនៅស្ថានសួគ៌។ ៥ ដូច្នេះ នាងអើយ! ឥឡូវខ្ញុំសុំឲ្យយើងរាល់គ្នាស្រឡាញ់គ្នាទៅវិញទៅមក (អ្វីដែលខ្ញុំសរសេរមកនេះ មិនមែនជាបញ្ញត្ដិថ្មីឡើយ តែជាបញ្ញត្ដិដែលយើងរាល់គ្នាបានទទួលពីដើមដំបូង)។+ ៦ ការស្រឡាញ់គ្នាទៅវិញទៅមកមានន័យថា យើងបន្តកាន់តាមបញ្ញត្ដិរបស់លោក+ ហើយបញ្ញត្ដិរបស់លោកដែលអ្នករាល់គ្នាបានឮពីដើមដំបូងគឺ អ្នកត្រូវបន្តបង្ហាញសេចក្ដីស្រឡាញ់តទៅទៀត។ ៧ ព្រោះមានអ្នកបោកបញ្ឆោតជាច្រើននាក់បានលេចមកក្នុងពិភពលោកនេះ។+ អ្នកទាំងនោះមិនព្រមទទួលស្គាល់ថា លោកយេស៊ូគ្រិស្តធ្លាប់បានមកកើតជាមនុស្សទេ។+ គឺអ្នកទាំងនោះហើយ ដែលជាអ្នកបោកបញ្ឆោត និងជាសត្រូវរបស់គ្រិស្ត។+
៨ ចូរប្រយ័ត្ន! ដើម្បីកុំឲ្យអ្នករាល់គ្នាបាត់បង់ប្រយោជន៍ពីកិច្ចការដែលយើងខំប្រឹងធ្វើក្នុងចំណោមអ្នករាល់គ្នា តែដើម្បីឲ្យអ្នករាល់គ្នាទទួលរង្វាន់យ៉ាងពេញលេញវិញ។+ ៩ អ្នកណាដែលចេះតែរុលទៅមុន ហើយមិននៅជាប់នឹងសេចក្ដីបង្រៀនរបស់គ្រិស្ត អ្នកនោះមិនធ្វើឲ្យបិតានៅស្ថានសួគ៌ពេញចិត្តឡើយ។+ ប៉ុន្តែ អ្នកណាដែលនៅជាប់នឹងសេចក្ដីបង្រៀនរបស់គ្រិស្ត អ្នកនោះធ្វើឲ្យបិតានៅស្ថានសួគ៌និងបុត្ររបស់លោកពេញចិត្តវិញ។+ ១០ ប្រសិនបើមានអ្នកណាមកឯអ្នករាល់គ្នា តែមិនបង្រៀនសេចក្ដីនេះ កុំទទួលអ្នកនោះចូលក្នុងផ្ទះរបស់អ្នក+ ឬជម្រាបសួរអ្នកនោះឡើយ។ ១១ ព្រោះថាអ្នកដែលជម្រាបសួរអ្នកនោះ គាត់ក៏រួមចំណែកក្នុងអំពើទុច្ចរិតរបស់អ្នកនោះដែរ។
១២ ទោះជាមានរឿងជាច្រើនដែលខ្ញុំចង់រៀបរាប់ប្រាប់អ្នករាល់គ្នាក៏ដោយ ខ្ញុំមិនចង់សរសេរនៅក្នុងសំបុត្រទេ។ ខ្ញុំសង្ឃឹមថានឹងមកឯអ្នករាល់គ្នា ហើយនិយាយផ្ទាល់មាត់វិញ ដើម្បីឲ្យអំណររបស់អ្នករាល់គ្នាបានពេញលេញ។
១៣ កូនៗរបស់បងស្រីនាង គឺបងស្រីដែលព្រះបានរើសតាំង បានផ្ដាំសួរសុខទុក្ខ។
ឬ«បុរសវ័យចាស់»