ការពិបាករបស់សិស្ស
គ្រូរបស់ភីធើចាប់ផ្ដើមពន្យល់អំពីទ្រឹស្ដីនៃការវិវត្តន៍របស់លោកឆាល ដាវីន និងរបៀបដែលសេចក្ដីបង្រៀននៃការវិវត្តន៍របស់គាត់បានរំដោះមនុស្សចេញពីជំនឿមិនពិត។ កន្លងមកភីធើតែងតែគោរពទស្សនៈរបស់គ្រូ តែឥឡូវគ្រូឲ្យសិស្សម្នាក់ៗពន្យល់អំពីគំនិតរបស់ពួកគេទាក់ទងនឹងប្រធានបទនេះ នេះធ្វើឲ្យភីធើភ័យជាខ្លាំង។
ភីធើត្រូវធ្វើការសម្រេចចិត្តដ៏ពិបាកមួយ។ ឪពុកម្ដាយគាត់បានបង្រៀនថា ព្រះជាអ្នកបង្កើតផែនដីនិងជីវិតទាំងឡាយនៅផែនដី។ ពួកគាត់និយាយថា កំណត់ហេតុក្នុងគម្ពីរបរិសុទ្ធអំពីការបង្កើតគឺគួរឲ្យទុកចិត្ត ប៉ុន្តែទ្រឹស្ដីនៃការវិវត្តន៍គឺជាសេចក្ដីបង្រៀនមួយដែលគ្មានភ័ស្តុតាងច្បាស់លាស់នោះទេ។ គ្រូនិងឪពុកម្ដាយរបស់ភីធើសុទ្ធតែមានបំណងល្អ ប៉ុន្តែតើភីធើគួរជឿអ្នកណា?
នៅទូទាំងពិភពលោក ស្ថានភាពបែបនេះតែងកើតមានឡើងនៅសាលារៀនជារៀងរាល់ឆ្នាំ។ តើភីធើនិងសិស្សឯទៀតគួរធ្វើអ្វី? តើអ្នកយល់ស្របទេថា ពួកគេគួរគិតពិចារណាហើយធ្វើការសម្រេចចិត្តដោយខ្លួនឯង? ពួកគេត្រូវពិចារណាអំពីភ័ស្តុតាង រួចធ្វើការសម្រេចចិត្តថា តើពួកគេគួរជឿលើការបង្កើត ឬការវិវត្តន៍?
គម្ពីរបង្រៀនយើងឲ្យប្រយ័ត្នមុនជឿអ្វីមួយ អ្នកសរសេរគម្ពីរម្នាក់បាននិយាយថា៖«មនុស្សឆោតល្ងង់គេជឿគ្រប់ពាក្យទាំងអស់ តែមនុស្សមានគំនិតវាងវៃរមែងមើលផ្លូវខ្លួនដោយប្រយ័ត្ន»។ (សុភាសិត ១៤:១៥) គម្ពីរលើកទឹកចិត្តយើងឲ្យ«ប្រើសមត្ថភាពរិះគិត»ដើម្បីឲ្យដឹងប្រាកដដោយខ្លួនឯងនូវអ្វីដែលយើងរៀន។—រ៉ូម ១២:១, ២
សៀវភៅស្តើងនេះមិនបានត្រូវរៀបចំឡើង ដើម្បីគាំទ្រសាសនាណាមួយដែលចង់ឲ្យមានការបង្រៀននៅសាលាថាមានអ្នកបង្កើតនោះទេ។ ប៉ុន្តែ គោលបំណងនៃសៀវភៅស្តើងនេះ គឺដើម្បីពិចារណាអំពីអំណះអំណាងរបស់អស់អ្នកដែលបង្រៀនថា ជីវិតគឺកើតឡើងដោយឯកឯង និងបង្រៀនថាកំណត់ហេតុក្នុងគម្ពីរអំពីការបង្កើតគឺជារឿងប្រឌិត។
យើងនឹងផ្ដោតអារម្មណ៍ទៅលើកោសិកា ដោយសារនេះជាភាគល្អិតដែលតូចបំផុតនៅក្នុងភាវរស់ ហើយយើងក៏នឹងពិចារណាអំពីរបៀបដ៏អស្ចារ្យដែលកោសិកាបានត្រូវបង្កើតឡើងដែរ។ ម្យ៉ាងទៀត យើងនឹងសុំអ្នកឲ្យពិចារណាអំពីការសន្និដ្ឋានដែលគាំទ្រទ្រឹស្ដីនៃការវិវត្តន៍។
នៅថ្ងៃណាមួយ យើងទាំងអស់គ្នាត្រូវឆ្លើយសំណួរថា តើជីវិតបានត្រូវបង្កើត ឬគ្រាន់តែជាការវិវត្តន៍? អ្នកប្រហែលជាធ្លាប់គិតយ៉ាងជ្រាលជ្រៅអំពីរឿងនេះ។ សៀវភៅស្តើងនេះនឹងបង្ហាញភ័ស្តុតាងខ្លះៗដែលធ្វើឲ្យមនុស្សជាច្រើនជឿថា ជីវិតពិតជាមានអ្នកបង្កើត។