សេចក្ដីផ្ដើមផ្នែកទី៨
ព្រះយេហូវ៉ាបានឲ្យសាឡូម៉ូនមានប្រាជ្ញាជាងគេ និងមានឯកសិទ្ធិសាងសង់វិហារ។ ប៉ុន្តែ បន្តិចម្ដងៗគាត់បែរចេញពីព្រះយេហូវ៉ា។ បើអ្នកជាឪពុកម្ដាយ សូមជួយពន្យល់កូនអំពីរបៀបដែលពួកអ្នកគោរពបូជាព្រះមិនពិត បានទាញនាំសាឡូម៉ូនឲ្យចេញឆ្ងាយពីព្រះយេហូវ៉ា។ រាជាណាចក្រអ៊ីស្រាអែលបានបែកបាក់គ្នា ហើយស្ដេចអាក្រក់បាននាំឲ្យបណ្ដាជនក្បត់ជំនឿ និងគោរពបូជារូបព្រះ។ ក្នុងអំឡុងគ្រានោះ អ្នកប្រកាសទំនាយស្មោះត្រង់ជាច្រើននាក់របស់ព្រះយេហូវ៉ា បានត្រូវបៀតបៀននិងសម្លាប់។ ម្ចាស់ក្សត្រីយេសិបិលបានទាញនាំរាជាណាចក្រខាងជើង ឲ្យលិចលង់កាន់តែជ្រៅទៅក្នុងការក្បត់ជំនឿ។ នោះជាគ្រាដ៏ខ្មៅងងឹតក្នុងប្រវត្តិសាស្ត្រអ៊ីស្រាអែល។ ប៉ុន្តែ នៅមានមនុស្សជាច្រើនដែលបម្រើព្រះយេហូវ៉ាយ៉ាងស្មោះត្រង់ដូចជា ស្ដេចយេហូសាផាត និងអ្នកប្រកាសទំនាយអេលីយ៉ា។