ពិភពលោកសន្ដិភាព—តើពីប្រភពណា?
តើសកលរូបនីកម្មនៃការអប់រំនិងសាសនា នឹងនាំឲ្យមានពិភពលោកសន្ដិភាពឬទេ? នេះជាសេចក្ដីប្រាថ្នារបស់វេជ្ជបណ្ឌិត រ៉ូបឺត ម៉ាល្លើ ដែលជាអតីតជំនួយដល់រដ្ឋលេខាធិការរបស់អង្គការសហប្រជាជាតិ និងជាអ្នកទទួលរង្វាន់យូនីស្កូក្នុងឆ្នាំ១៩៨៩ ខាងឯការអប់រំអំពីសន្ដិភាព។ ដូចបានរាយការណ៍នៅក្នុងកាសែត ឌឹវែនឃូវើសាន់ នោះវេជ្ជបណ្ឌិតម៉ាល្លើ គឺ«ជឿស៊ប់ថា សិស្សទាំងអស់ទូទាំងពិភពលោក នឹងត្រូវបង្រៀននូវហេតុការណ៍និងគោលការណ៍អំពីភព មនុស្សជាតិ និងអំពើអហឹង្សា»។ គាត់នឹកក្នុងចិត្តនូវថ្ងៃមួយ ពេលដែលគ្រឹះស្ថានអប់រំទាំងអស់នៅជុំវិញពិភពលោក នឹងបង្រៀនកូនក្មេងអំពីអង្គការសហប្រជាជាតិ ទុកជាសេចក្ដីសង្ឃឹមដ៏ប្រសើរបំផុតចំពោះសន្ដិភាព។ កាសែតសាន់នោះបានរាយការណ៍ថា គាត់ក៏ជឿដែរថា«សាសនាទាំងអស់ក្នុងពិភពលោកគួរក្លាយទៅជាសមាជិកនៃអង្គការថ្មីមួយ ដែលដូចអង្គការសហប្រជាជាតិ ដែលត្រូវហៅថា អង្គការសហសាសនា»។ នៅពេលនោះឯង «សេចក្ដីបង្រៀនទាំងអស់ខាងសាសនានឹងផ្សព្វផ្សាយអំពើអហឹង្សា»។
តើពិភពលោកសន្ដិភាពនឹងក្លាយទៅជាហេតុការណ៍ពិតទេ? យ៉ាងប្រាកដជាទីបំផុត! ប៉ុន្តែ គឺមិនមែនតាមរយៈភ្នាក់ងារមនុស្សណាមួយនោះឡើយ។ ជាង២.៧០០ឆ្នាំកន្លងទៅនេះ អ្នកនិពន្ធម្នាក់ដែលបានត្រូវបណ្ដាលឲ្យតែង បានសម្គាល់ប្រភពដ៏ខ្ពង់ខ្ពស់នៃការអប់រំចំពោះសន្ដិភាព នៅពេលដែលគាត់បានទាយថា មនុស្សទៀងត្រង់នឹងត្រូវបាន«ជាសិស្សរបស់ព្រះយេហូវ៉ា» និងសន្ដិភាពរបស់គេនឹងបាន«ជាបរិបូរ»។—អេសាយ ៥៤:១៣
ព្រះគម្ពីរចែងថា ព្រះជាបុគ្គល‹ដែលប្រទានឲ្យសន្ដិភាព›។ (រ៉ូម ១៦:២០) សូម្បីតែឥឡូវនេះ នោះកម្មវិធីនៃការអប់រំដ៏អស្ចារ្យពាសពេញពិភពលោក គឺកំពុងកើតមានឡើង កាលដែលព្រះយេហូវ៉ាបង្រៀនរាស្ត្ររបស់ទ្រង់ ឲ្យ«ស្វែងរក ហើយដេញតាមសេចក្ដីមេត្រីភាព» និងឲ្យគេ«យកដាវរបស់ខ្លួនដំធ្វើជាផាលនង្គ័ល» ហើយមិនហាត់«រៀនធ្វើសឹកសង្គ្រាមទៀតដែរ»។—ពេត្រុសទី១ ៣:១១; អេសាយ ២:២-៤
ការថ្វាយបង្គំ ដែលមានគ្រឹះលើសេចក្ដីពិត ដែលឥតមានភាពពុករលួយនិងការបន្លំ គឺបានត្រូវយល់ព្រមនិងបានប្រសិទ្ធិពរពីព្រះ។ (ម៉ាថាយ ១៥:៧-៩; យ៉ូហាន ៤:២៣, ២៤) មានតែការថ្វាយបង្គំពិត ដែលសមស្របទាំងស្រុងជាមួយបន្ទូលរបស់ព្រះ អាចបង្កើតមនុស្សដែលរស់នៅដោយសន្ដិភាពនិងសាមគ្គីភាព ហើយជាមនុស្សដែលមានសេចក្ដីស្រឡាញ់ស្មោះចំពោះគ្នាទៅវិញទៅមក។—យ៉ូហាន ១៣:៣៥
ដើម្បីរៀនថែមទៀតអំពីអ្វីដែលបន្ទូលរបស់ព្រះបានចែង ស្តីអំពីពិភពលោកសន្ដិភាព យើងអញ្ជើញលោកអ្នកឲ្យទាក់ទងពួកអ្នកបោះពុម្ពទស្សនាវដ្ដីនេះ។