តើការទប់ទល់នឹងភាពក្រីក្រ ជាការតយុទ្ធដែលឈ្នះមិនបានឬ?
ទេសចរដែលទៅលេងអង្គការសហប្រជាជាតិនៅទីក្រុងញូវយ៉ក អាចឃើញមន្ទីរប្រឹក្សាខាងសេដ្ឋកិច្ចនិងសង្គម។ សាលសាធារណៈនោះមានបំពង់និងទុយយ៉ូជាប់ពិតានដោយឥតលាក់លៀម។ អ្នកនាំភ្ញៀវទេសចរនោះពន្យល់ថា៖ «ពិតាននោះដែលគេទុកចោល ត្រូវគេយល់ជាទូទៅថា ជាអ្វីដែលរំឭកពីកិច្ចការខាងសេដ្ឋកិច្ចនិងសង្គម ដែលអង្គការសហប្រជាជាតិធ្វើនោះ គឺមិនអាចហើយនិងមិនអាចចប់បានទេ។ នឹងតែងតែមានអ្វីថែមទៀតដែលគេអាចធ្វើ ដើម្បីលើកស្ទួយនូវជីវភាពរស់នៅនៃមនុស្សជាតិ»។
ថ្វីបើក្រុមប្រឹក្សានោះបានប្ដេជ្ញាឆ្ពោះទៅការសម្រេចទិសដៅដ៏ល្អ ចង់លើកស្ទួយជីវភាពរស់នៅរបស់មនុស្សទាំងអស់គ្នាឲ្យកាន់តែប្រសើរឡើងៗក៏ដោយ គឺមើលទៅដូចជាកិច្ចការនោះគ្មានទីបញ្ចប់ទេ។ គួរឲ្យកត់សម្គាល់ថា ក្នុងកំឡុងពេលកិច្ចបំរើផ្សាយរបស់ព្រះយេស៊ូគ្រីស្ទនៅលើផែនដី នៅសតវត្សទីមួយ ស.យ. ទ្រង់បានមានបន្ទូលថា៖ «ព្រះវិញ្ញាណព្រះអម្ចាស់សណ្ឋិតលើខ្ញុំ ពីព្រោះទ្រង់បានចាក់ប្រេងតាំងខ្ញុំ ឲ្យផ្សាយដំណឹងល្អដល់មនុស្សទ័លក្រ»។ (លូកា ៤:១៨) តើ«ដំណឹងល្អ»ដែលទ្រង់បានប្រកាសប្រាប់នោះ ជាដំណឹងអ្វីទៅ? នេះគឺជាសារអំពីព្រះរាជាណាចក្រដែលព្រះយេហូវ៉ានឹងស្ថាបនាឡើង ដែលមានព្រះយេស៊ូគ្រីស្ទជាស្តេច ហើយព្រះយេហូវ៉ានឹងក្លាយជា«ទីមាំមួនដល់មនុស្សកំសត់ទុគ៌ត . . . ដែលមានទុក្ខលំបាក»។ តើព្រះរាជាណាចក្រនោះនឹងសម្រេចការអ្វីខ្លះ? លោកអេសាយបានទាយទុកជាមុនថា៖ «ព្រះយេហូវ៉ានៃពួកពលបរិវារ ទ្រង់នឹងចាត់ចែងជប់លៀងដល់គ្រប់ទាំងសាសន៍ ដោយម្ហូបមានឱជារសដ៏វិសេស នឹងស្រាទំពាំងបាយជូរសំរាំង ជាម្ហូបយ៉ាងវិសេសដោយខួរឆ្អឹងជោក ហើយនឹងស្រាទំពាំងបាយជូរសំរាំងយ៉ាងល្អ។ ទ្រង់នឹងបំផ្លាញសេចក្ដីស្លាប់ឲ្យសូន្យបាត់ទៅជាដរាប នោះព្រះអម្ចាស់យេហូវ៉ា ទ្រង់នឹងជូតទឹកភ្នែកពីមុខមនុស្សទាំងអស់»។—អេសាយ ២៥:៤-៦, ៨
តើលោកអ្នកចង់ដឹងបន្ថែមទៅទៀតអំពីរបៀបដែលព្រះរាជាណាចក្រនៃព្រះនឹង«លើកស្ទួយឡើងនូវជីវភាពរស់នៅនៃមនុស្សជាតិ» ដើម្បីនឹងលែងមានការខ្វះខាតទៀតឬទេ? បើចង់ឲ្យបានអ្នកបង្រៀនល្អទៅជួបលោកអ្នកផ្ទាល់ដើម្បីបង្ហាញថែមទៀតអំពីអ្វីដែលព្រះគម្ពីររៀបរាប់ពីរឿងបែបនេះ សូមមើលខាងក្រោមទៀត។