តើអ្នកមានលក្ខណៈដូចដើមឡហ្គនីអោណរទេ?
នៅភូមិមួយក្បែរជាយក្រុងព័រ ម័រប៊ីនៅប្រទេសប៉ាពូគីនេថ្មី អ្នកផ្សព្វផ្សាយពីរនាក់បានធ្វើដំណើរត្រឡប់ទៅផ្ទះវិញ។ ពេលកំពុងដើរនោះ ពួកគាត់ឃើញដើមស្អាតមួយ។ បងប្រុសបានលាន់មាត់ថា៖ «មើលហ្ន៎! ដើមឡហ្គនី អោណរ»។ បងប្រុសមានប្រសាសន៍ទៅកាន់ប្អូនប្រុសថា៖ «ឈ្មោះនេះមានន័យថា ‹ដើមប្រចាំឆ្នាំ› ពីព្រោះរាល់ឆ្នាំដើមនេះជ្រុះស្លឹកអស់ហើយមើលទៅដូចជាងាប់ គឺខុសពីដើមភាគច្រើននៅតំបន់ត្រូពិច។ ក៏ប៉ុន្តែ នៅរដូវវស្សាដើមនេះចេញផ្កាយ៉ាងស្រស់ស្អាត»។
យើងក៏អាចទាញមេរៀនពីដើមឡហ្គនី អោណរ ដែលភាសាខ្មែរហៅថា ដើមក្ងោក។ អ្នកជំនាញខ្លះចាត់ទុកដើមនេះជាដើមស្អាតមួយក្នុងចំណោមដើមប្រាំដែលស្អាតដាច់គេ។ ទោះបីជាដើមនេះជ្រុះស្លឹកនិងផ្កាអស់ក្នុងកំឡុងរដូវប្រាំងក៏ដោយ ដើមនេះក៏ផ្ទុកទឹកដែរ។ ដើមនេះមានឫសមាំដែលរុំថ្មធំៗកប់ជ្រៅទៅក្នុងដី ដូច្នេះក៏អាចទប់នឹងខ្យល់ដែលបក់យ៉ាងខ្លាំង។ សរុបសេចក្ដី ដើមនេះលូតលាស់បានសូម្បីតែពេលអាកាសធាតុប្រែប្រួល។
យើងប្រហែលជានឹងជួបប្រទះកាលៈទេសៈដែលល្បងជំនឿយើង។ តើអ្វីអាចជួយយើងស៊ូទ្រាំបាន? យើងត្រូវធ្វើដូចដើមឡហ្គនី អោណរ ដោយប្រមូលហើយផ្ទុកចំណេះពីព្រះបន្ទូលរបស់ព្រះដែលប្រៀបដូចជាទឹកទ្រទ្រង់ជីវិត។ យើងគួរតែនៅជាប់នឹងព្រះយេហូវ៉ាជា«ថ្មដា»របស់យើង ហើយនិងអង្គការរបស់ទ្រង់ផង។ (សាំយូអែលទី២ ២២:៣) ពិតណាស់ ដើមឡហ្គនី អោណរ ជាដើមស្អាតដែលតែងតែរំឭកយើងថា សូម្បីតែស្ថិតក្នុងស្ថានភាពពិបាកក៏ដោយ យើងអាចមានកម្លាំងនិងសោភ័ណភាពខាងវិញ្ញាណបាន ឲ្យតែយើងឆ្លៀតប្រយោជន៍ពីសំវិធានការដែលព្រះយេហូវ៉ាផ្ដល់មក។ បើយើងធ្វើដូច្នេះ យើងនឹង«គ្រងបានសេចក្ដីសន្យា[របស់ព្រះ]ទុកជាមរដក» ដែលរួមបញ្ចូលសេចក្ដីសន្យាឲ្យយើងរស់រានមានជីវិតជារៀងរហូត។—ហេព្រើរ ៦:១២; វិវរណៈ ២១:៤