បុរសដែលមានឥទ្ធិពលខ្លាំងបំផុតលើមនុស្សជាតិ
មនុស្សរាប់ពាន់លាននាក់ធ្លាប់រស់នៅផែនដី តែពួកគេភាគច្រើនមិនបានធ្វើអ្វីដែលនាំឲ្យល្បីឈ្មោះ ឲ្យមនុស្សនឹកចាំក្រោយពីពួកគេស្លាប់ទៅឡើយ។ ក៏ប៉ុន្តែមានមនុស្សមួយចំនួនដែលបាន ធ្វើអ្វីជាប្រយោជន៍ដល់ពិភពលោកទាំងមូល ហើយអ្វីៗទាំងនោះទំនងជាមានប្រយោជន៍ ក្នុងជីវិតប្រចាំថ្ងៃរបស់លោកអ្នក។
ពេលណាអ្នកបើកភ្លើងក្នុងផ្ទះ ទាញសៀវភៅមកមើល ឬលេបថ្នាំអង់ទីប្យូទិច អ្នកកំពុងទទួលប្រយោជន៍ពីស្នាដៃរបស់បុរសល្បីឈ្មោះមួយចំនួន។
ម៉ៃខឺល ហ្វារ៉ាដេ អ្នកប្រាជ្ញខាងរូបវិទ្យាម្នាក់ជនជាតិអង់គ្លេសដែលកើតនៅឆ្នាំ១៧៩១ ជាអ្នកបង្កើតម៉ាស៊ីនអគ្គិសនីនិងឌីណាម៉ូមុនគេ។ អ្វីដែលគាត់រកឃើញនិងស្នាដៃរបស់គាត់បានផ្ដល់លទ្ធភាពឲ្យមនុស្សច្រើនជាងអាចមានអគ្គិសនីសម្រាប់ប្រើប្រាស់។
ស៊ីលុន មន្ត្រីនៅរាជវាំងរបស់អធិរាជចិន។ គាត់មានឈ្មោះជាអ្នកបង្កើតវិធីធ្វើក្រដាស ប្រហែលនៅឆ្នាំ១០៥គ.ស. ហើយអ្នកឯទៀតបានប្រើវិធីនោះដើម្បីផលិតក្រដាសយ៉ាងច្រើនសន្ធឹក។
យ៉ូហាន ហ្គូតេនប៊ឹក ប្រហែលនៅឆ្នាំ១៤៥០ បុរសជនជាតិអាឡឺម៉ង់មួយរូបនេះបានបង្កើតម៉ាស៊ីនបោះពុម្ពដំបូងដែលអាចរៀបអក្សរបាន។ តាមរយៈម៉ាស៊ីនបោះពុម្ពនោះ មនុស្សជាច្រើនអាចទទួលព័ត៌មានអំពីរឿងសព្វបែបយ៉ាងក្នុងតម្លៃថោក។
អាឡិចសានឌឺ ផ្លេមិញ នៅឆ្នាំ១៩២៨ អ្នកស្រាវជ្រាវជនជាតិស្កតនេះបានរកឃើញសារជាតិអង់ទីប្យូទិចមួយដែលគាត់ហៅថាប៉េនីស៊ីល្លីន។ សព្វថ្ងៃនេះ មនុស្សនៅកន្លែងជាច្រើនប្រើអង់ទីប្យូទិចដើម្បីព្យាបាលជំងឺដែលបង្កដោយមេរោគ។
យើងឃើញច្បាស់ថាអ្វីដែលបុរសបីបួននាក់បានរកឃើញនិងបានបង្កើត បានជួយមនុស្សរាប់ពាន់លាននាក់ឲ្យមានជីវិតស្រួលជាងឬមានសុខភាពល្អជាង។
ក៏ប៉ុន្តែក្នុងចំណោមមនុស្សល្បីឈ្មោះទាំងអស់ មានបុរសម្នាក់ដែលលេចធ្លោជាងគេ។ លោកមិនល្បីឈ្មោះដោយសារបានរកឃើញអ្វីខាងវិទ្យាសាស្ត្រឬខាងវិទ្យាពេទ្យឡើយ តែបុរសពីក្រុមគ្រួសារសាមញ្ញមួយរូបនេះដែលបានទទួលមរណភាពជិត២.០០០ឆ្នាំមុន បានបន្សល់ទុកសេចក្ដីបង្រៀនដែលមានឥទ្ធិពលខ្លាំងណាស់ ជាសេចក្ដីបង្រៀនដែលផ្ដល់សេចក្ដីសង្ឃឹមនិងការសម្រាលទុក្ខ។ ពេលពិចារណាអំពីឥទ្ធិពលដែលសេចក្ដីបង្រៀនរបស់លោកមានលើជីវិតមនុស្សទូទាំងពិភពលោក មនុស្សជាច្រើននឹងយល់ស្របថា លោកពិតជាបុរសដែលមានឥទ្ធិពលខ្លាំងបំផុតលើមនុស្សជាតិ។
បុរសនោះគឺលោកយេស៊ូគ្រិស្ត។ តើលោកធ្លាប់បង្រៀនអ្វី? តើសេចក្ដីបង្រៀននោះអាចមានឥទ្ធិពលយ៉ាងណាទៅលើជីវិតរបស់អ្នក?