តើលោកអ្នកដឹងឬទេ?
ក្រោយឆ្នាំ៧០ គ.ស. តើវិហារក្រុងយេរូសាឡិមបានត្រូវសង់ឡើងវិញឬទេ?
លោកយេស៊ូបានមានប្រសាសន៍ថា នៅវិហាររបស់ព្រះយេហូវ៉ានឹងគ្មានថ្មណានៅត្រួតលើថ្មណាទៀតឡើយ។ ទំនាយនេះបានសម្រេចនៅពេលដែលទាហានរ៉ូមក្រោមបញ្ជារបស់ទីតុសបានបំផ្លាញក្រុងយេរូសាឡិមនៅឆ្នាំ៧០ គ.ស.។ (ម៉ាថ. ២៤:២) ក្រោយមកអធិរាជជូលានបានមានគម្រោងសង់វិហារនេះឡើងវិញ។
ជូលានបានត្រូវហៅថាជាអធិរាជចុងក្រោយរបស់រ៉ូមដែលមិនមែនជាគ្រិស្តសាសនិក។ គាត់ជាក្មួយរបស់ខនស្ទែនធីនដ៏ខ្លាំងក្លា ហើយគាត់បានទទួលការអប់រំខាងគ្រិស្តសាសនា។ ប៉ុន្តែពេលដែលគាត់បានក្លាយជាអធិរាជនៅឆ្នាំ៣៦១ គាត់បានបដិសេធអ្វីដែលពួកគេបានបង្រៀនគាត់។ សៀវភៅប្រវត្ដិសាស្ត្រហៅគាត់ថាជា«អ្នកក្បត់ជំនឿ»។
ជូលានស្អប់ពិភពគ្រិស្តសាសនា។ មូលហេតុមួយដែលគាត់មានអារម្មណ៍ដូច្នេះប្រហែលជាដោយសារគាត់បានឃើញអ្នកដែលអះអាងថាជាគ្រិស្តសាសនិកសម្លាប់ឪពុកនិងសាច់ញាតិរបស់គាត់ នៅពេលដែលគាត់មានអាយុ៦ឆ្នាំ។ យោងទៅតាមប្រវត្ដិវិទូខាងពិភពគ្រិស្តសាសនា ជូលានបានលើកទឹកចិត្តជនជាតិយូដាឲ្យសង់វិហាររបស់ពួកគេឡើងវិញ ដោយជឿថានេះនឹងបង្ហាញថាលោកយេស៊ូជាអ្នកប្រកាសទំនាយក្លែងក្លាយ។a
គឺមិនមែនជាការចម្លែកឡើយដែលជូលានចង់សង់វិហារឡើងវិញ។ ប្រវត្ដិវិទូមិនដឹងច្បាស់ថាគាត់ពិតជាបានចាប់ផ្ដើមកិច្ចការសាងសង់វិហារឡើងវិញឬមិនបានទេ ហើយបើគាត់បានចាប់ផ្ដើមសាងសង់មែន គេមិនដឹងថាអ្វីបានបណ្ដាលឲ្យកិច្ចការសាងសង់នោះបានត្រូវបោះបង់ចោលឡើយ។ ប៉ុន្តែ អ្វីមួយដែលយើងដឹងប្រាកដគឺ ជូលានបានត្រូវគេសម្លាប់មិនដល់ពីរឆ្នាំក្រោយពីគាត់បានកាន់អំណាច ហើយគម្រោងរបស់គាត់ក៏បានត្រូវសាបសូន្យ។
a លោកយេស៊ូមិនបានមានប្រសាសន៍ថាវិហារក្រុងយេរូសាឡិមនឹងមិនសង់ឡើងវិញឡើយ ប៉ុន្តែលោកថាវិហារនេះនឹងត្រូវបំផ្លាញ ហើយនេះបានកើតឡើងនៅឆ្នាំ៧០ គ.ស.។