យុវជន—តើអ្វីជាគោលដៅខាងវិញ្ញាណរបស់អ្នក?
១ ព្រះយេហូវ៉ាជ្រាបថាកិច្ចការដ៏មានអត្ថន័យ និងគោលដៅដែលអាចសម្រេចបាន ជាការសំខាន់ក្នុងការផ្ដល់នូវសុភមង្គល។ (សូមមើល លោកុប្បត្តិ ១:២៨; ២:១៥, ១៩) សព្វថ្ងៃនេះ ព្រះយេហូវ៉ាប្រទានដល់រាស្ត្ររបស់ទ្រង់នូវកិច្ចការផ្សាយនិងបង្រៀន។ យើងក៏មានគោលដៅខ្ពស់បំផុតដែរ គឺការទទួលជីវិតអស់កល្បជានិច្ចនៅក្នុងសួនមនោរម្យ។ នៅគ្រាដដែលនោះ យើងត្រូវឲ្យមានគោលដៅខាងវិញ្ញាណដែលលូតលាស់ទៅមុខ ប្រសិនបើយើងចង់ជៀសវាងពីការចាត់ចែងមិនត្រឹមត្រូវនូវកម្លាំងនិងធនធានរបស់យើង។—កូរិនថូសទី១ ៩:២៦
២ គោលដៅដែលអាចសម្រេចបានសំរាប់យុវជន: យុវជនគួរតែមានគោលដៅខាងព្រះធិបតេយ្យ ដែលអាចសម្រេចបានតាមសមត្ថភាពពួកគេនិមួយៗ។ (ធីម៉ូថេទី១ ៤:១៥) មានក្មេងតូចៗខ្លះ បានសម្រេចគោលដៅរបស់គេនៃការទន្ទេញឈ្មោះសៀវភៅព្រះគម្ពីរ មុនពេលដែលគេចេះអានអក្សរទៅទៀត។ តាមការសិក្សាក្នុងគ្រួសារ ក្មេងរៀនចេះរៀបចំសំរាប់កិច្ចប្រជុំ ដើម្បីជួយឲ្យគេអាចឆ្លើយដ៏មានន័យ និងចុះឈ្មោះក្នុងសាលាកិច្ចបំរើព្រះធិបតេយ្យ។ ពេលដែលក្មេងទៅធ្វើកិច្ចផ្សាយជាមួយឪពុកម្ដាយរបស់គេ ពួកគេរៀនធ្វើបន្ទាល់ ហើយពួកគេក៏លូតលាស់ទៅមុខ រហូតដល់បានសម្រេចគោលដៅនៃការក្លាយទៅជាអ្នកផ្សាយមិនទាន់ជ្រមុជទឹកម្នាក់ដែរ។ ឪពុកម្ដាយគួរបញ្ជាក់ប្រាប់កូនរបស់គេ អំពីគោលដៅនៃការថ្វាយខ្លួននិងការជ្រមុជទឹក។
៣ ប្រសិនបើអ្នកជាក្មេងជំទង់ម្នាក់ តើអ្វីខ្លះជាគោលដៅខាងវិញ្ញាណរបស់អ្នក? «ចូរនឹកចាំពីព្រះដ៏បង្កើតខ្លួន» ដោយយកចិត្តទុកដាក់តែគោលដៅសំខាន់ៗក្នុងជីវិត។ (សាស្ដា ១២:១; ទំនុកដំកើង ៧១:១៧) ហេតុអ្វីក៏អ្នកមិនធ្វើជាអ្នកត្រួសត្រាយជំនួយទៅ ពេលដែលសាលាវ៉ាកង? តើអ្នកមានដែលគិតអំពីកិច្ចបំរើជាអ្នកត្រួសត្រាយពេញពេលទេ? តើអ្នកមិនចង់រៀនភាសាថ្មីមួយ ដើម្បីទៅអនាគត អ្នកអាចជួយក្រុមភាសាបរទេសមួយ ឬតាមក្រុមជំនុំក្នុងដំបន់របស់អ្នក ឬកន្លែងផ្សេងៗទៀត? ស្មរបន្ទាល់ជាច្រើនឥឡូវនេះដែលកំពុងតែបំរើនៅបេតអែល ឬជាអ្នកត្រួតពិនិត្យ ឬជាសាសនទូត ពួកគេទាំងអស់គ្នានោះបានសម្រេចចិត្តធ្វើជាអ្នកបំរើពេញពេល ជាគោលដៅរបស់គេ តាំងតែពីពួកគេនៅសាលារៀននៅឡើយ។ ហេតុអ្វីក៏អ្នកមិនធ្វើដូច្នោះដែរទៅ?
៤ ពេលដែលកំពុងតែនៅក្មេងនៅឡើយ ចូរខំប្រឹងធ្វើតាមគំរូរបស់ព្រះយេស៊ូចុះ។ នៅពេលទ្រង់មានអាយុត្រឹមតែ១២ឆ្នាំប៉ុណ្ណោះ ទ្រង់មានបន្ទូលយ៉ាងស្រួលអំពីរឿងខាងវិញ្ញាណ។ (លូកា ២:៤២-៤៩, ៥២) សូមដាក់គោលដៅដែលមានប្រយោជន៍សំរាប់ខ្លួនអ្នក ក្នុងការសិក្សាផ្ទាល់ខ្លួន អានព្រះគម្ពីរឲ្យបានរាល់ថ្ងៃ និងការរាប់រកគ្នាជារឿយៗជាមួយពួកគ្រីស្ទានដែលមានគំនិតចាស់ទុំនៅកន្លែងប្រជុំ និងពេលទៅផ្សាយ នេះនឹងជួយអ្នកឲ្យបណ្ដុះការប៉ិនប្រសប់ក្នុងការបង្រៀនអ្នកដទៃ អំពីព្រះរាជាណាចក្រនៃព្រះ ដូចរបៀបដែលព្រះយេស៊ូបានបង្រៀនដែរ។