ចូរប្រើសៀវភៅ ចូរថ្វាយបង្គំព្រះ ដើម្បីសិក្សាជាមួយសិស្សព្រះគម្ពីរ
សៀវភៅចូរថ្វាយបង្គំព្រះពិតតែមួយ គឺបានរៀបចំដើម្បីជួយអ្នកថ្មីលូតលាស់ទៅមុខខាងសេចក្ដីពិត និងឲ្យគេមានកតញ្ញូធម៌កាន់តែជ្រាលជ្រៅចំពោះព្រះយេហូវ៉ានិងអង្គការរបស់ទ្រង់។ យើងអាចប្រើសៀវភៅនេះដើម្បីសិក្សាជាមួយសិស្សព្រះគម្ពីរជាសៀវភៅទីពីរ។ ក្នុងកិច្ចបំរើព្រះរាជាណាចក្រយើង ខែមិថុនា ឆ្នាំ២០០០ ទំព័រទី៤ បានពន្យល់ថា៖ «បើសិនជាអាចឃើញច្បាស់ថា មនុស្សម្នាក់កំពុងតែលូតលាស់ ទោះបីការលូតលាស់នោះយឺតយូរក៏ដោយ និងអាចឃើញថាគាត់ចាប់ផ្ដើមអបអរនឹងអ្វីដែលគាត់កំពុងតែរៀន នោះចូរបន្តការសិក្សាតាមសៀវភៅមួយទៀតបន្ទាប់ពីសៀវភៅតម្រូវ និងសៀវភៅចំណេះបានត្រូវសិក្សាចប់ហើយ។ . . . ក្នុងករណីទាំងអស់ សៀវភៅស្តើងតម្រូវ និងសៀវភៅចំណេះ នឹងត្រូវសិក្សាជាមុន។ ការសិក្សា ការត្រឡប់ទៅជួប និងពេលដែលត្រូវចំណាយក្នុងការបន្តការសិក្សានោះ គួរត្រូវរាប់និងរាយការណ៍ សូម្បីតែសិស្សនោះទទួលបុណ្យជ្រមុជទឹកមុនសិក្សាចប់នូវសៀវភៅទីពីរ»។
តើមានអ្នកណាទៀតដែលអាចទទួលប្រយោជន៍ពីការសិក្សាព្រះគម្ពីរដោយប្រើសៀវភៅចូរថ្វាយបង្គំព្រះ? អត្ថបទដដែលនេះចែងជាបន្តថា៖ «បើសិនជាអ្នកស្គាល់អ្នកណាដែលធ្លាប់សិក្សា[សៀវភៅស្តើងតម្រូវ និង]សៀវភៅចំណេះនៅអតីតកាល ក៏ប៉ុន្តែមិនបានលូតលាស់ដល់ការថ្វាយខ្លួននិងការទទួលបុណ្យជ្រមុជទឹកទេ នោះអ្នកប្រហែលជាអាចផ្ដើមស៊ើបសួរថា តើគេចង់ចាប់ផ្ដើមសិក្សាម្ដងទៀតឬទេ?»។ សូមឲ្យយើងខំប្រឹងជាពិសេសដើម្បីចាប់ផ្ដើមការសិក្សាជាមួយសិស្សនេះ ដោយប្រើសៀវភៅចូរថ្វាយបង្គំព្រះក្នុងកំឡុងខែមីនានិងខែមេសា។