ភ័ស្តុតាងដែលបង្ហាញពីជំនឿមាំមួន!
១ ពួកសាវ័កបានប្រុងស្ដាប់ព្រះយេស៊ូរៀបរាប់អំពីវត្តមានរបស់ទ្រង់ និងគ្រាចុងបញ្ចប់នៃរបៀបរបបពិភពលោក។ នៅគ្រាចុងបញ្ចប់នោះ នឹងមានព្រឹត្ដិការណ៍ដែលធ្វើឲ្យពិបាកចិត្តកើតឡើងដល់មនុស្សជាតិ ដូចជាសង្គ្រាម ការខ្វះអាហារ រញ្ជួយផែនដី និងរោគរាតត្បាតជាដើម។ បន្ទាប់មក ព្រះយេស៊ូមានប្រសាសន៍ថា នឹងមានមនុស្សដែលស្អប់អ្នកកាន់តាមទ្រង់ ធ្វើឲ្យមានសេចក្ដីវេទនា ព្រមទាំងសម្លាប់ពួកគាត់ដែរ។ អ្នកប្រកាសទំនាយមិនពិតនឹងនាំឲ្យមនុស្សជាច្រើនវង្វេង។ ណាមួយទៀត សេចក្ដីស្រឡាញ់របស់មនុស្សជាច្រើននឹងរសាយអស់ទៅ។
២ បន្ទាប់ពីព្រះយេស៊ូមានប្រសាសន៍អំពីព្រឹត្ដិការណ៍អាក្រក់ទាំងនោះ ពួកសាវ័កពិតជាឆ្ងល់ណាស់ពេលទ្រង់មានប្រសាសន៍បន្ថែមថា ដំណឹងល្អអំពីរាជាណាចក្រព្រះនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ។ (ម៉ាថ. ២៤:៣-១៤) យើងឃើញទំនាយដ៏អស្ចារ្យនេះបានសម្រេចយ៉ាងល្អប្រសើរនៅសព្វថ្ងៃនេះ។ ទោះបីយើងរស់នៅសម័យដែលពោរពេញទៅដោយគ្រោះថ្នាក់ក៏ដោយ សាក្សីរបស់ព្រះយេហូវ៉ានៅតែផ្សព្វផ្សាយដំណឹងល្អយ៉ាងខ្នះខ្នែង។ សេចក្ដីស្រឡាញ់របស់មនុស្សក្នុងពិភពលោកនេះតែងតែរសាយអស់ទៅ តែសេចក្ដីស្រឡាញ់របស់យើងរឹតតែខ្លាំងឡើងៗ។ ទោះបី«គ្រប់ទាំងសាសន៍»ស្អប់យើងក្ដី យើងនៅតែផ្សព្វផ្សាយស្ទើរតែគ្រប់ប្រទេស។
៣ ដូចបានបង្ហាញនៅតារាងទំព័រ៣ ទៅទំព័រ៨ ការពិនិត្យមើលឡើងវិញអំពីសកម្មភាពរបស់សាក្សីព្រះយេហូវ៉ាក្នុងអំឡុងឆ្នាំកិច្ចបម្រើ២០០៧ ពិតជាលើកទឹកចិត្តយើងមែន! រាល់ឆ្នាំ អស់រយៈ១៦ឆ្នាំជាបន្តបន្ទាប់មកហើយដែលយើងបានចំណាយពេលច្រើនជាងមួយពាន់លានម៉ោង ក្នុងការផ្សព្វផ្សាយនិងបញ្ចុះបញ្ចូលឲ្យមានសិស្ស! នេះជាភ័ស្តុតាងដែលបង្ហាញថា សាក្សីរបស់ព្រះយេហូវ៉ាមានជំនឿមាំមួនណាស់! ប្រសិនបើប្រៀបធៀបនឹងឆ្នាំកិច្ចបម្រើ២០០៦ យើងបានឃើញការរីកចម្រើនក្នុងចំនួនអ្នកត្រួសត្រាយពេញពេលកើនឡើង៥,៨ភាគរយ អ្នកផ្សាយ៣,១ភាគរយ សិស្សគម្ពីរ៤,៤ភាគរយ និងអ្នកដែលបានជ្រមុជទឹក២០,១ភាគរយ។ ឥឡូវនេះមានមនុស្សជិត៧លាននាក់ដែលកំពុងតែបម្រើព្រះយេហូវ៉ាយ៉ាងស្មោះត្រង់។ គ្មានគ្រាណាមួយក្នុងប្រវត្ដិសាស្ត្រមនុស្សដែលមានចំនួនច្រើនជាងនេះទេ។ នេះពិតជានាំឲ្យយើងមានចិត្តរំភើបខ្លាំងណាស់! ពេលពិនិត្យមើលតារាងនេះ តើមានចំណុចអ្វីដែលបានលើកទឹកចិត្តបងប្អូន?
៤ សូម្បីតែសេចក្ដីរាយការណ៍ទាំងនេះគឺអស្ចារ្យមែនក៏ដោយ គួរគប្បីឲ្យយើងចាំថា នេះតំណាងមនុស្សដែលបានបង្ហាញជំនឿរបស់ខ្លួន! សូមពិចារណាគំរូមួយ។ បងប្រុសឈ្មោះគីលើម៉ូបានកើតនៅប្រទេសបូលីវីនៅឆ្នាំ១៩៣៥ និងបានធំឡើងនៅប្រទេសនោះ។ ហើយតាំងពីអាយុ៩ឆ្នាំមកគាត់ធ្វើការនៅចម្ការដែលគេផលិតកូកាអ៊ីន។ តាំងពីកុមារភាពមក គាត់ចេះតែទំពាស្លឹកនោះដើម្បីជួយបន្ធូរភាពតប់ប្រមល់ និងការនឿយហត់ពីការងារ។ ក្រោយមកគាត់បានពិសាស្រាហួសប្រមាណនិងជក់បារីដែរ។ នៅពេលបងគីលើម៉ូចាប់ផ្ដើមរៀនអំពីអ្វីដែលព្រះយេហូវ៉ាតម្រូវពីគាត់ នោះគាត់លែងជក់បារីនិងពិសាស្រាហួសប្រមាណទៀត។ តែការលះបង់ចោលទម្លាប់ទំពាថ្នាំញៀនដែលគាត់មានតាំងពីក្មេងមកនោះ គឺឧបសគ្គធំបំផុតសម្រាប់គាត់។ គាត់បានអធិដ្ឋានដោយឥតឈប់ឈរ ហើយបានយកឈ្នះលើទម្លាប់នេះ។ ដោយលែងមានទម្លាប់អាក្រក់ទាំងនោះ គាត់បានជ្រមុជទឹក។ គាត់មានប្រសាសន៍ថា៖ «ឥឡូវខ្ញុំស្អាតស្អំ ហើយសប្បាយចិត្តណាស់»។
៥ ព្រះយេហូវ៉ាពិតជាយកចិត្តទុកដាក់នឹងមនុស្សមែន។ ទ្រង់ប្រាថ្នាចង់ឲ្យមនុស្សទាំងអស់ប្រែចិត្ត។ (២ពេ. ៣:៩) នេះជាសេចក្ដីប្រាថ្នារបស់យើងដែរ។ ដូច្នេះ សូមជំរុញខ្លួនឲ្យធ្វើទាំងអស់ អស់ពីសមត្ថភាពដើម្បីបន្តជួយអ្នកដែលមានចិត្តស្មោះត្រង់ឲ្យស្គាល់ និងស្រឡាញ់ព្រះយេហូវ៉ាដូចយើងដែរ។
[សំណួរសម្រាប់អត្ថបទសិក្សា]
១. តើព្រះយេស៊ូបានទាយអំពីព្រឹត្ដិការណ៍ដែលធ្វើឲ្យពិបាកចិត្តណាខ្លះ?
២. ហេតុអ្វីការផ្សាយដំណឹងល្អនៅទូទាំងពិភពលោកជាការអស្ចារ្យម្ល៉េះ?
៣. ចំពោះសេចក្ដីរាយការណ៍ពីទូទាំងពិភពលោក តើបងប្អូនកត់សម្គាល់ចំណុចអ្វីខ្លះដែលគួរលើកទឹកចិត្ត?
៤. តើបុរសម្នាក់ត្រូវយកឈ្នះនឹងបញ្ហាអ្វីខ្លះ មុនគាត់បានជ្រមុជទឹក?
៥. តើអ្វីជាសេចក្ដីប្រាថ្នារបស់យើង?