តើអ្នកស្នើសុំបង្រៀនគម្ពីរទេ?
១ បងប្អូនជាច្រើនបានទទួលលទ្ធផលល្អក្នុងការស្នើសុំដោយត្រង់ៗឲ្យរៀនគម្ពីរ។ បុរសម្នាក់ដែលបានបដិសេធច្រើនដងមិនព្រមយកសៀវភៅរបស់យើង បានយល់ព្រមរៀនគម្ពីរវិញ នៅពេលដែលអ្នកផ្សាយបានស្នើសុំគាត់។ បុរសនោះបានឆ្លើយថា៖ «ខ្ញុំចង់រៀនគម្ពីរយូរហើយ»។ គាត់ចាប់ផ្ដើមរៀនគម្ពីរ ហើយសមាជិកទាំងអស់ក្នុងក្រុមគ្រួសាររបស់គាត់ក៏បានរីកចម្រើនយ៉ាងលឿន។
២ យើងទាំងអស់គ្នាគួរប្រុងប្រៀបស្នើសុំបង្រៀនគម្ពីរជានិច្ច។ មនុស្សពុំអាចរីកចម្រើនហើយក្លាយទៅជាអ្នកកាន់តាមលោកយេស៊ូ បើគ្មានអ្នកណាបង្ហាត់បង្រៀនពួកគេទេ។ (ម៉ាថ. ២៨:១៩, ២០) ពួកគេទទួលការបង្ហាត់បង្រៀននោះ តាមរយៈការសិក្សាគម្ពីរ។ ជាញឹកញយ បងប្អូនដែលមានសិស្សគម្ពីរថ្មី គ្រាន់តែបានស្នើសុំបង្ហាញដល់ម្ចាស់ផ្ទះនូវរបៀបដែលពួកគេអាចរៀនថែមទៀតអំពីគម្ពីរឬសេចក្ដីសន្យារបស់ព្រះ។ បងប្រុសម្នាក់បានរកសិស្សគម្ពីរថ្មីប្រាំនាក់ដោយប្រើខិត្តប័ណ្ណជីវិតនៅក្នុងពិភពលោកថ្មីដ៏ក្សេមក្សាន្ត។ បងប្រុសនោះបានឲ្យសិស្សគម្ពីរខ្លះដល់បងប្អូនឯទៀត ដោយសារគាត់គ្មានពេលដើម្បីបង្រៀនសិស្សគម្ពីរជាច្រើននោះឲ្យបានទៀងទាត់ទេ។
៣ បើយើងស្រួលរកសិស្សគម្ពីរថ្មី នោះយើងអាចនាំបងប្អូនឯទៀតទៅផ្សព្វផ្សាយជាមួយនឹងយើងហើយជួយពួកគាត់ឲ្យរកសិស្សគម្ពីរថ្មីដែរ។ ឬមួយក៏យើងអាចឲ្យសិស្សគម្ពីរខ្លះដល់បងប្អូនផ្សេងទៀតក្នុងក្រុមជំនុំ។ បើអ្នកចង់បានសិស្សគម្ពីរ សូមស្នើសុំបង្រៀនគម្ពីរដល់មនុស្សដែលអ្នកជួបពេលផ្សព្វផ្សាយពីផ្ទះមួយទៅផ្ទះមួយ។ នៅពេលមួយអ្នកផ្សព្វផ្សាយម្នាក់បានត្រឡប់ទៅជួបយុវនារីម្នាក់ដែលមិនសូវមានចំណាប់អារម្មណ៍នៅដើមដំបូងទេ។ ទោះជាយ៉ាងនោះក៏ដោយ ក៏អ្នកផ្សព្វផ្សាយបានស្នើសុំបង្រៀនគម្ពីរ ហើយនាងបានយល់ព្រម។ ឥឡូវនេះនាងបានទទួលការជ្រមុជទឹកហើយ។ ម្យ៉ាងទៀត បងស្រីរបស់នាងនិងបងថ្លៃកំពុងចូលរួមកិច្ចប្រជុំ។—កាឡ. ៦:៦
៤ មនុស្សខ្លះដែលព្រមរៀនគម្ពីរជាមួយយើងនឹងឈប់រៀនក្រោយមក ហើយមិនមែនសិស្សគម្ពីរទាំងអស់នឹងចូលសេចក្ដីពិតទេ។ ប៉ុន្តែគង់តែនឹងមានសិស្សខ្លះចូលសេចក្ដីពិត។ បើស្នើសុំមនុស្សកាន់តែច្រើនឲ្យរៀនគម្ពីរ យើងនឹងមានលទ្ធភាពច្រើនជាងក្នុងការជួយអ្នកឯទៀតឲ្យក្លាយទៅជាអ្នកសរសើរតម្កើងព្រះយេហូវ៉ា។