យើងនឹងសិក្សាសៀវភៅគ្រួសារ
១ អ្នកនឹងមានចិត្តសប្បាយដោយដឹងថាចាប់ផ្ដើមពីសប្ដាហ៍ថ្ងៃទី៧ ខែមីនា ឆ្នាំ២០១១ យើងនឹងរៀនសៀវភៅគន្លឹះនៃសុភមង្គលគ្រួសារ នៅការសិក្សាគម្ពីរជាក្រុមជំនុំ។ គ្មាននរណាម្នាក់នឹងចង់ខានសិក្សាសៀវភៅនេះ ដែលមានការណែនាំពីគោលការណ៍គម្ពីរដែលជួយឲ្យគ្រួសារមានសុភមង្គលទេ។ កាលវិភាគនៃការសិក្សាសៀវភៅនោះនឹងអនុញ្ញាតឲ្យយើងពិនិត្យមើលវគ្គនីមួយៗនិងខគម្ពីរទាំងអស់ក្នុងសៀវភៅបានយ៉ាងហ្មត់ចត់។
២ សៀវភៅនេះគូសបញ្ជាក់ចំណុចសំខាន់បួនយ៉ាងដែលជួយឲ្យក្រុមគ្រួសារមានសុភមង្គល ដូចជា: (១) ការទប់ចិត្ត (២) ទទួលស្គាល់អ្នកដែលជាប្រមុខខ្លួន (៣) ការប្រាស្រ័យទាក់ទងល្អ និង (៤) សេចក្ដីស្រឡាញ់។ ការដាស់តឿននៅក្នុងសៀវភៅគ្រួសារ នឹងជួយក្រុមគ្រួសារទាំងឡាយណាដែលធ្វើតាមការដាស់តឿននោះឲ្យរកបានសេចក្ដីសុខសាន្ត។ ដំណាលគ្នានោះការសិក្សានឹងផ្ដល់ឱកាសឲ្យអ្នកស្គាល់ផ្នែកផ្សេងៗនៃសៀវភៅនេះបានច្បាស់ ដើម្បីអ្នកអាចប្រើដោយមានប្រសិទ្ធភាពពេលដែលស្នើផ្ដល់សៀវភៅនេះជូនសាធារណជន។
៣ លក្ខណៈសំខាន់មួយនៃការសិក្សាសៀវភៅនោះ គឺជាការពិគ្រោះអំពីព័ត៌មានក្នុងប្រអប់រៀនសាឡើងវិញដែលមាននៅចុងជំពូកនីមួយៗ។ ដូច្នេះ គួរលៃទុកពេលគ្រប់គ្រាន់ដើម្បីពិចារណានូវសំណួរហើយបទគម្ពីរដែលមានក្នុងប្រអប់។
៤ បងប្រុសដែលជាអ្នកដឹកនាំការសិក្សាគម្ពីរជាក្រុមជំនុំ បានត្រូវណែនាំឲ្យយកចិត្តទុកដាក់ជាពិសេសក្នុងការរៀបចំឲ្យបានល្អសម្រាប់ការសិក្សា។ ម្យ៉ាងទៀត ពេលយើងរៀបចំបានល្អ ហើយគិតទុកជាមុនអំពីសេចក្ដីបង្រៀនដ៏ល្អដែលយើងនឹងទទួល នោះនឹងធ្វើឲ្យការសិក្សាកាន់តែសប្បាយឡើង។ ពេលដែលយើងធ្វើដូច្នេះ នោះយើងនឹងអាចលើកទឹកចិត្តគ្នាទៅវិញឲ្យបានច្រើនថែមទៀត។—រ៉ូម ១:១១, ១២
[សំណួរសម្រាប់អត្ថបទសិក្សា]
១. ចាប់ពីខែមីនា ឆ្នាំ២០១១ តើយើងទន្ទឹងរង់ចាំអ្វី?
២. តើមានចំណុចអ្វីខ្លះដែលសៀវភៅគ្រួសារអាចជួយយើង?
៣. តើយើងគួរពិចារណាយ៉ាងដូចម្ដេចអំពីប្រអប់រៀនសាឡើងវិញនៅចុងជំពូកនីមួយៗ?
៤. តើយើងម្នាក់ៗអាចធ្វើអ្វីសម្រាប់ការសិក្សា? ហើយបើអ្នកធ្វើដូច្នេះតើមានប្រយោជន៍អ្វី?