ហេតុអ្វីចម្លើយស្ដីអំពីរឿងនេះគឺសំខាន់?
ហេតុអ្វីការមានឬមិនមានអ្នកបង្កើតគឺសំខាន់? បើមានភ័ស្តុតាងជួយអ្នកឲ្យជឿជាក់ថាមានព្រះដែលប្រកបដោយឫទ្ធានុភាពដ៏ខ្លាំងក្លាមែន ប្រហែលជាអ្នកចង់ពិនិត្យមើលភ័ស្តុតាងដែលបញ្ជាក់ថាគម្ពីរពិតជាបានត្រូវសរសេរក្រោមការដឹកនាំរបស់លោក។ បើអ្នកទុកចិត្តអ្វីដែលគម្ពីរចែង នោះអ្នកនឹងទទួលប្រយោជន៍ដូចខាងក្រោម។
ជីវិតរបស់អ្នកកាន់តែមានន័យខ្លឹមសារ
គម្ពីរចែងថា: «[ព្រះ]បានធ្វើល្អចំពោះអ្នករាល់គ្នា ដោយធ្វើឲ្យទឹកភ្លៀងធ្លាក់ពីលើមេឃនិងធ្វើឲ្យមានរដូវដែលសម្បូរភោគផល ហើយឲ្យអាហារជាបរិបូរនិងធ្វើឲ្យចិត្តរបស់អ្នករាល់គ្នាពោរពេញទៅដោយក្ដីរីករាយ»។—សកម្មភាព ១៤:១៧
នេះមានន័យថា: អ្វីគ្រប់យ៉ាងនៅក្នុងធម្មជាតិដែលធ្វើឲ្យអ្នកសប្បាយគឺជាអំណោយដែលមកពីអ្នកបង្កើត។ អ្នកនឹងមានចិត្តដឹងគុណកាន់តែច្រើនថែមទៀតពេលដែលអ្នកដឹងថា អ្នកដែលបានផ្ដល់អំណោយនោះស្រឡាញ់អ្នកខ្លាំងប៉ុណ្ណា។
ទទួលការណែនាំល្អដែលអាចជួយអ្នកនៅឥឡូវនេះ
គម្ពីរចែងថា: «កូននឹងបានយល់សេចក្ដីសុចរិតនិងយុត្តិធម៌ គឺកូននឹងបានស្គាល់ផ្លូវល្អសព្វគ្រប់»។—សុភាសិត ២:៩
នេះមានន័យថា: ក្នុងនាមជាអ្នកបង្កើតរបស់អ្នក ព្រះដឹងអ្វីដែលអ្នកត្រូវការដើម្បីឲ្យអ្នកអាចមានជីវិតដែលមានសុភមង្គល។ ដោយពិនិត្យពិចារណាគម្ពីរ អ្នកអាចរៀនអ្វីជាច្រើនដែលនឹងផ្ដល់ប្រយោជន៍ដល់អ្នកនៅឥឡូវនេះ។
ទទួលចម្លើយចំពោះសំណួរដែលអ្នកមាន
គម្ពីរចែងថា: «កូននឹងរកឃើញចំណេះអំពីព្រះ»។—សុភាសិត ២:៥
នេះមានន័យថា: ការដឹងថាពិតជាមានអ្នកបង្កើតមែនអាចជួយអ្នកឲ្យរកឃើញចម្លើយចំពោះសំណួរសំខាន់ៗដូចជា៖ តើអ្វីជាគោលបំណងនៃជីវិត? ហេតុអ្វីមានទុក្ខវេទនាច្រើនម្ល៉េះ? តើមានអ្វីកើតឡើងពេលយើងស្លាប់? អ្នកអាចទទួលចម្លើយយ៉ាងគាប់ចិត្តពីគម្ពីរ។
មានសេចក្ដីសង្ឃឹមចំពោះអនាគត
គម្ពីរចែងថា: «ព្រះយេហូវ៉ាប្រកាសថា៖ ‹ព្រោះខ្ញុំដឹងច្បាស់នូវគំនិតដែលខ្ញុំកំពុងគិតចំពោះអ្នករាល់គ្នា គឺខ្ញុំចង់ឲ្យអ្នករាល់គ្នាមានសេចក្ដីសុខសាន្ត មិនមែនសេចក្ដីវេទនាទេ ហើយចង់ឲ្យអ្នករាល់គ្នាមានសេចក្ដីសង្ឃឹមនិងអនាគតល្អប្រសើរ›»។—យេរេមា ២៩:១១
នេះមានន័យថា: ព្រះសន្យាថានៅថ្ងៃអនាគត លោកនឹងបំបាត់ចោលអំពើទុច្ចរិត សេចក្ដីវេទនា ហើយថែមទាំងសេចក្ដីស្លាប់ផងដែរ។ ពេលដែលអ្នកទុកចិត្តលើសេចក្ដីសន្យារបស់ព្រះ សេចក្ដីសង្ឃឹមរបស់អ្នកចំពោះអនាគតបែបនោះ នឹងជួយអ្នកឲ្យប្រឈមមុខនឹងបញ្ហាដោយចិត្តក្លាហាន។